ઈથિયોપિયા ના ‘ નેલ્સન મંડેલા  ‘……!!!!!

Featured

ઈથિયોપિયા ના ‘ નેલ્સન મંડેલા  ‘……!!!!!

પાકિસ્તાન રોજેરોજ ખોટે ખોટે ડંફાસો મારીને તંગડી ઉંચી રાખી રહ્યું છે …યુનોમાં પણ માર ખાધા પછી’એ ડ્રોનો ઉડાડવાનો અને આતંકીઓ ઘુસાડવાના ઉધામા કર્યા જ કરે છે …..બીજી સર્જીકલ સ્ટ્રાઈકનું જાણે કે સામેથી નોતરું આપી રહ્યું છે – શાંતિ નથી આ ઉમ્બાડીયા દેશ ને !!! …ચીનના પ્રમુખ ભારતમાં તો છે પણ એમનું દિલ પાકિસ્તાન સાથેની દોસ્તી અને ભારત સાથેના બહોળા વેપારના બે પલ્લા પર ઝૂલી રહ્યું છે .ઉપરથી હોંગકોંગવાળા પણ બગાવત પોકારી ચુક્યા છે – ડ્રેગન પણ અશાંત છે !!! ..ટ્રમ્પ ‘ હાઉડી મોદી ‘ માં શિરકત લાવીને અમેરિકન ઇન્ડિયનોમાં હાઈલાઈટ થયા પછી મહાભિયોગની માથાકુટમાં ફસાયા છે , બીજી વાર અવાશે કે નહિ એની ચિંતામાં વ્હાઈટ હાઉસમાં શાંતિ નથી …!!!..તુર્કી એ સીરિયા પર બોમ્બમારો કરવાનો શરુ કરી દીધો છે ..કુર્દ અને તુર્ક અને વચ્ચે અમેરિકા કી સેના , આઇએસ ગયું તો કુર્દો ને તુર્કો નું હેન્ડ્યું ……અશાંતધારા જેવું વાતાવરણ છે …!!!! .ચોય શોંતિ નહિ ભાઈસા’બ …..!!!!!

ચારેકોર અશાંતિ અશાંતિ અશાંતિના સમાચારો – વાતવરણ વચ્ચે પાછા એક આના લગતા જ સમાચાર આવ્યા – આઈ મીન શાંતિ ના જ તો …!!! ના ના યુદ્ધવિરામ કે એવા કોઈ સમાચાર નથી પણ આ બે દેશો વચ્ચે ચાલતા સરહદી કોયડાનો ઉકેલ મળે એવા સમાચાર છે . આ વર્ષનું શાંતિનું નોબેલ પુરસ્કાર ઈથિયોપિયાના વડાપ્રધાન અબી અહેમદને મળ્યું …!!! શેના માટે ? તો એ એટલા માટે કે અબી અહેમદે પાડોશી દેશ ઇરિટ્રીયા સાથે ૨૨ વર્ષથી ચાલતા લોહીયાળ સરહદ વિવાદમાં સમાધાન સાધ્યું છે . મજાની વાત એ છે કે ઇરીટ્રીયા પહેલા ઈથિયોપિયાનો જ હિસ્સો હતું . ૧૯૯૩મા લગભગ ત્રણ દાયકાના સંઘર્ષ પછી એ અલગ દેશ બનેલું અને કઠણાઈ જુઓ કે ત્યારથી જ બંને દેશોને સીમા વિવાદો ચાલ્યા કરતા હતા . સરહદના શહેરો અને ગામડાઓ પર બોમ્બ અને રોકેટવર્ષા ત્યારથી ચાલ્યા કરતી કે છાપામાર લડાકુઓ હુમલો કરતા . ખુદ અબી પણ સેનામાં હોવાને લીધે આવા જ એક છાપામાર લડાકુ રહી ચુક્યા છે. અબી મીલીટરી ઓફિસર હતા અને લેફ્ટેનન્ટ કર્નલ સુધી પહોચેલા .બંને દેશો વચ્ચે ૧૯૯૮ થી ૨૦૦૦ વચ્ચે યુદ્ધ પણ થઇ ચૂકેલું . આ સીમા વિવાદોમાં અત્યાર સુધીમાં અંદાજે એક લાખ લોકોના મોત થઇ ચુક્યા છે અને ઈજાગ્રસ્તોની સંખ્યા આનાથી પણ વધુ છે . છે ને ડિટ્ટો ભારત-પાકિસ્તાન જેવો જ સરહદી કોયડો …!!!

ટેકનોલોજીના શોખીન અને ઈથિયોપિયાની સાઈબર જાસુસી યુનિટના હેડ રહી ચુકેલા અબી માત્ર ૪૩ વર્ષના છે અને આફ્રિકાના ગાંધી ગણાતા નેલ્શન મંડેલાના પ્રશંશક છે એટલું જ નહિ પણ તેને ઇથીયોપીયાના નેલ્શન મંડેલા પણ કહેવાય છે .અત્યંત સુધારાવાદી વ્યક્તિત્વ ધરાવતા આ યંગ મંડેલા પોતાની સુધારાવાદી દીર્ઘદ્રષ્ટિ માટે જાણીતા છે . એક સમયે અને હજુ પણ દારુણ ગરીબી માટે વિશ્વભરમાં જાણીતા ઈથિયોપિયા માટે આ સર્વોચ્ચ સંન્માન ખરેખર શાંતિનું પ્રતિક બની રહેશે એટલું જ નહિ પણ જગતભરમાં અનેક દેશો દેશો વચ્ચે ચાલતા સીમાવિવાદોનો હલ લાવવામાં સહાયરૂપ બને એવી આશા પણ દુનિયા રાખી રહી છે. ઈથિયોપિયા જેવા ગરીબી માટે વધુ ચર્ચિત અને બીજા કામો માટે ઓછા ચર્ચિત દેશ માટે આ મોટા સમાચાર કહેવાય . નોબેલ શાંતિ પુરસ્કાર મેળવનાર અહેમદ માત્ર ૧૩ વર્ષના હતા જ્યારે એ જેમના પ્રશંશક છે તે નેલ્શન મંડેલા જેલમાંથી છુટેલા અને ૨૦૧૮ માં જ્યારે અહેમદ ઇથીયોપીયાના વડાપ્રધાન બન્યા ત્યારે આફ્રિકન દેશોના સૌથી યુવાન વડાપ્રધાન કે નેતા હતા . મંડેલાના આદર્શોને જીવનમાં વણી લેનાર અહેમદે વડાપ્રધાન બનતાવેત જ સુધારવાદી અને ઉદારવાદી વલણ અપનાવ્યું . અબી એ પદભાર સંભાળ્યાના ૧૦૦ દિવસની અંદર અંદર જ ધડાધડ આવા એક પછી એક નિર્ણયો લેવા માંડ્યા જેના ડેફીનેટલી આફ્રિકન દેશો અને ખાસ કરીને ઇથીયોપીયાના સંદર્ભમાં ક્રાંતિકારી તો નહિ પણ સુધારાવાદી ચોક્કસપણે કહી શકાય . કદાચ બાલ્યાવસ્થાથી દેશની સ્થિતિ તેમના દિમાગમાં બરાબર ઉતરી ગઈ હશે અને એક નેતા તરીકે પોતે દેશને એની ઝગડા અને ગરીબીની છાપમાંથી મુક્ત કરવા માટે જે કરી શકે એ કરવાની નેમ ધરાવતા થઇ ગયેલા , એ ઉપરાંત પોતે ખુદ બંને દેશો વચ્ચેની આ લડાઈના એક ભાગ રહી ચુક્યા હોવાને લીધે એમને યુદ્ધ અને ઝગડાની ભયાનકતાનો ભલે મોડે મોડે પણ ખ્યાલ આવી ગયો હશે .

વડાપ્રધાન બનતા જ એમણે સૌપ્રથમ તો દેશમાં ચાલતી ઈમરજન્સી ( કટોકટી ) સમાપ્ત કરવાની ઘોષણા કરી . મીડિયા પર સ્વાભાવિકપણે કટોકટીને હિસાબે જે સેન્સરશીપ લાદવામાં આવેલી એને પણ દુર કરી . જેલોમાં બંધ વિપક્ષી નેતાઓ અને હજારો કાર્યકર્તાઓને કોઈ પણ શરત વગર મુક્ત કરી દીધેલા  એટલું જ નહિ પણ દેશમાંથી હાંકી કઢાયેલા અનેક અસંતુષ્ટ નેતાઓ-લોકોને પરત દેશમાં આવી જવાની છૂટ આપી દીધેલી . આ ઉપરાંત દેશમાં આર્થિક અને સામજિક સુધારાઓ પણ લાગુ કરેલા જેને લીધે જાતીય અને વશીય હિંસા પણ ફાટી નીકળેલી .વડાપ્રધાન બનતા જ એમણે જાહેર કરી દીધેલું કે હવે બહુ થયું , આપણે લડવાને બદલે નાગરિકોની સુખસુવિધા પર વધુ ધ્યાન આપવું જોઈએ અને એટલે જ એમણે ૨૦૧૮મા જ જાહેર કરેલું કે હું ઇરિટ્રીયા સાથે શાંતિ વાર્તા શરુ કરીશ અને શાંતિ આ વિવાદનો હલ મેળવીને જ જંપીશ . અબી ના ફેવરમાં એ વાત હતી કે તેમની પકડ તણાવગ્રસ્ત વિસ્તારોના અનેકો કબીલાઓ અને લડાકુઓ પર હતી . ૨૦૧૮મા જ આશા જાગેલી કે આ લોહીયાળ વિવાદનો કોઈ હલ આવશે જ .

અને થયું પણ એવું જ . એપ્રિલ ૨૦૧૮ માં અબી વડાપ્રધાન બન્યા અને સપ્ટેમ્બર ૨૦૧૯મા તો ઇરિટ્રીયા સાથે ઐતિહાસિક શાંતિ સમજોતા પર હસ્તાક્ષર પણ થઇ ગયા . લગભગ ૨૦ વર્ષો પછી બંને દેશો વચ્ચેની બોર્ડર આમ નાગરીકો માટે ખોલવામાં આવી .શાંતિ માટેના નોબેલ ની રેસમાં સ્વીડનની ૧૬ વર્ષની કલાયમેટ એક્ટીવીસ્ટ ગ્રેટા થુનબર્ગ , જર્મન ચાન્સેલર એન્જેલા માર્કેલ જેવા નામો ચિત્રમાં અને ચર્ચામાં હોવા છતાં નોબેલની જ્યુરી એ અબી નું નામ આપીને બધાને ચોકાવી દીધા. જો કે નોબેલ જ્યુરીએ અબી નું નામ જાહેર કરતી વખતે કહ્યું કે ‘ શાંતિ અને આંતરરાષ્ટ્રીય સહયોગની બાબતમાં અબી અહેમદ નું યોગદાન પ્રશંશનીય છે “  ખાલી ઇરિટ્રીયા સાથે ‘ નો પીસ – નો વોર ‘ સંધી જ નહિ પણ અબી એ આ સિવાય પણ આંતરરાષ્ટ્રીય સ્તરે બીજા પણ આવા જ વિવાદો ઉકેલવામાં મદદ કરી  છે . આ જ ઇરિટ્રીયા અને એના બીજા પાડોશી દેશ જીબુતી વચ્ચે ચાલતી રાજકીય શત્રુતા ખતમ કરાવેલી તો સોમાલિયા અને કેન્યા વચ્ચે ચાલતા દરિયાઈ સીમાઓના વિવાદને ખતમ કરવામાં મધ્યસ્થીની ભૂમિકા ભજવેલી .

માત્ર પાંચ જ મહિનામાં આટલી ગંભીર વાતનો હલ લાવનાર અબીને શાંતિનો નોબેલ પુરસ્કાર મળવું એ એક બીજી વાતનો પણ ઉજળો સંકેત છે કે જો આટલા નાના દેશો પણ યુદ્ધની ભયાનકતા અને સીમા-સરહદોના વિવાદનો ઉકેલ સાથે બેસીને કાઢી શકતા હોય તો જગતમાં ઘણા મોટા અને શક્તિશાળી દેશો વચ્ચે ચાલતા આવા વિવાદોનો ઉકેલ કેમ ના આવે ? નિર્દોષ માણસોનો ભોગ લેનાર આવા સરહદ વિવાદો અટકાવી શકાય છે – ઉકેલી શકાય છે એનું જ્વલંત ઉદાહરણ દુનિયા સામે ઇરિટ્રીયા અને ઈથિયોપિયા જેવા બંને નાનકડા દેશોએ આપ્યું છે .

વિસામો :

ભારતીયોને મળેલા શાંતિ નોબેલ પુરસ્કારની વાત કરીએ તો, મધર ટેરેસાને 1979માં અને કૈલાશ સત્યાર્થીને 2014માં આ પુરસ્કાર મળી ચુક્યો છે

  • અજય ઉપાધ્યાય ( ગાંધીનગર સમાચાર કોલમ ” રઝળપાટ ” ૧૩ ઓક્ટોબર ૨૦૧૯ )
Advertisements

ઇસ દિવાલી પે ડ્રામા હૈ …એક્શન હૈ …કોમેડી હૈ …ઈમોશન હૈ ……!!!!!

Featured

ઇસ દિવાલી પે ડ્રામા હૈ …એક્શન હૈ …કોમેડી હૈ …ઈમોશન હૈ ……!!!!!

આ વાંચતા હશો ત્યારે નવરાત્રી પૂરી થવાને બે દિવસ બાકી હશે . દુર્ગાપૂજા અને નવરાત્રીના નવ દિવસ આમ તો ગુજરાતભરમાં અને ઇવન દેશભરમાં બધું જ થંભી જાય છે સિવાય કે ગરબા . મનોરંજન જગત માટે આ કપરા દિવસો કહેવાય કેમકે લોકો ફિલ્મો કે ઇવન ટીવી શોઝ જોવાનો ટાઈમ કાઢી શકતા નથી ડ્યુ ટુ નાઈન નાઈટ્સ ઓફ નોનસ્ટોપ ડાન્સિંગ ….બટ કિન્તુ પરંતુ આવા કપરાકાળમાં પણ રિતિક-ટાઈગરની ‘ વોર ‘ બમ્પર ઓપનીંગ કરી શકી છે ઈનફેક્ટ ગાંધીજયંતીની રજામાં રીલીઝ થઈને નેશનલ હોલીડે પર રીલીઝ થનાર ફિલ્મોમાં કમાણીની રીતે ટોચ પર પણ પહોચી છે . સી , વિવેચકો બોલે તો રીવ્યુકારોના રીવ્યુ ચાહે કુછ ભી હો પણ ‘ વોર’ ના બમ્પર ઓપનીંગે વન્સ અગેન સાબિત કરી દીધું છે કે રીવ્યુ – બીવ્યું માયરા ફરે….શું કીઓ છો ??? બીજા દિવસના ઓછા કલેક્શન છતાં આ વિકેન્ડમાં ‘ વોર ‘ ઝડપથી ૧૦૦ કરોડની ક્લબમાં સામેલ થઇ જવાની .બાય ધ વે આ રીવ્યુ સીસ્ટમ જ ઘણાને સમજ નથી આવતી બીકોઝ ફિલ્મો કે કોઈપણ પ્રકારનું મનોરંજનની ચોઈસ દરેકની અલગ અલગ હોઈ શકે છે એને કોઈ બે-પાંચ લોકો કેવી રીતે નક્કી કરી શકે . અનેક ફિલ્મોના હીટ કે ફ્લોપ જવામાં આવા અનેક રીવ્યુકારો ઉંધે માથે પછડાયાના દાખલા મોજુદ છે જ , અને કોઈ એમ માનતું હોય કે માત્ર કોઈના કહેવાથી કોઈ ફિલ્મો જોવા જાય છે કે નથી જતું તો એ એના દિમાગમા કેમિકલ લોચો છે એ નક્કી….!!!!

ખેર હવે ફિલ્મ નિર્માતાઓની નજર દિવાળીના બિગેસ્ટ હોલીડે પર હશે અને એમાં પણ ‘ વોર ‘ ની કમાણી પછી આ દિવાળીએ કે એની આસપાસ રીલીઝ થનારી ફિલ્મો પણ કમાણી માટે આશાવાદી હશે જ એમાં કોઈ બેમત નથી . આ દિવાળીએ મજાની વાત એ છે કે જુદા જુદા સબ્જેક્ટની કોમેડી – બાયોપિક – એક્શન – ડ્રામા ફિલ્મો રીલીઝ થઇ રહી છે . તહેવાર હોય અને અક્ષયની ફિલ્મ ના હોય એવું બને ? ઈનફેક્ટ અક્ષયે તો ૨૦૨૦ના તહેવારો પણ બુક કરી લીધા છે . અને વેરાયટી જુઓ ..આવતી દિવાળીએ ઐતિહાસિક ” પૃથ્વીરાજ “ , ઈદ પર સાઉથની કાંચના-૨ ની રીમેક  “ લક્ષ્મી બોમ્બ “ ( જેમાં અક્ષય પહેલીવાર ટ્રાન્સજેન્ડર ભૂત બન્યો છે ) , ક્રિસમસ પર ‘ બચ્ચન પાંડે ‘ અને હોળી પર રોહિત શેટ્ટીની એક્શન મુવી  ‘ સૂર્યવંશી ‘..!!! હજુ હમણાં જ ‘ મિશન મંગલ ‘ જેવી હીટ ફિલ્મ આપનાર અક્ષયની હાઉસફુલ સિરીઝની ચોથી ધમાલ ‘ હાઉસફુલ-૪ ‘ આ દિવાળીના બે દિવસ પહેલા યાની ૨૬મી એ રીલીઝ થશે . હાઉસફુલ સિરીઝની બધી હીટ ફિલ્મોની જેમ આમાં પણ વાર્તાનો ટ્રેક નવો જ છે અને જરા હટ કે એટલે કે પુનર્જન્મનો છે .૧૬મી સદીથી શરુ થઈને ૨૧મી સદીમાં ખત્મ થતી આ ફિલ્મ મોટાભાગે તો ‘ મી ટુ ‘ માં ફસાયા પહેલા સાજીદ્ખાને જ ડાયરેક્ટ કરી છે અને  ટ્રેલરમાં જ એટલી ધમાલ છે કે દર્શકોને ઉત્કંઠા વધી ગઈ છે કે ફિલ્મમાં શું હશે ? ચંકી , રીતેશ , બોબી અને કૃતિ , કીર્તિ અને પૂજા હેગડેના એડેડ તડકા સાથેની આ ધમાલ કોમેડી રીવ્યુકારોને કદાચ નહિ ગમે પણ દર્શકોની દ્રષ્ટીએ સો ટકા આ દિવાળીએ કમાણીના સાંઢની આંખ વીંધી નાખવાની એ નક્કી છે .!!!

આ ‘ સાંઢ કી આંખ ‘ પરથી યાદ આવ્યું કે દિવાળીએ જરા હટ કે આ જ નામની ફિલ્મ આવી રહી છે . ‘ હાઉસફુલ-૪ ‘ ની એક દિવસ પહેલા બોલીવુડની હોટ એક્ટ્રેસીસ ભૂમિ અને તાપસીને ૬૦ વર્ષની બુઝર્ગ ઔરત બતાવતી આ ફિલ્મ યુપી ના બાગપત જીલ્લાની રહેવાસી સૌથી ઉમરલાયક શાર્પશુટર ચંદ્રો અને પ્રકાશી તોમરની બાયોપિક છે . મજાની વાત એ છે કે માંડ ત્રીસીમાં રહેલી અને હોટ ગણાતી બંને બોલીવુડ અભિનેત્રીઓને મેકઅપના કમાલથી ઘરડી બતાવી છે એટલું જ નહિ પણ પણ આ દેરાણી-જેઠાણીની જોડીએ અત્યાર સુધી શુટીંગમાં જીતેલા ૭૦૦ મેડલોની પણ દાસ્તાન રજુ કરે છે જેને યુપી ના લહેકામાં ખુબ જ રસપ્રદ રીતે રજુ થઇ હોય એવું ટ્રેલર પરથી તો લાગે છે . અનુરાગ કશ્યપ અમસ્તાય હટ કે ફિલ્મ પ્રોડ્યુસ અને ડીરેક્ટ કરવા જાણીતા છે તો આ ‘ સાંઢ કી આંખ ‘ બોક્સ ઓફીસ પર બુલ્સ આઈ હીટ કરશે એવું લાગે છે .

કોમેડી-બાયોપિક તો થઇ ગઈ પણ એક બીજી એવી જ ફિલ્મ કે જેનાથી પ્રિયંકા ચોપરા જોનસ બોલીવુડમાં ત્રણ વર્ષ પછી કમબેક કરી રહી છે એ ‘ સ્કાય ઈઝ પિંક ‘ પણ ૧૧ ઓક્ટોબરે આ છપાશે ત્યારે રીલીઝ થઇ ચુકે હશે . ફરહાન અને પ્રિયંકાની લવ સ્ટોરીની સાથે સાથે એમની દીકરી ઝાયરા વસીમની ટર્મિનલ બીમારીની વાત કહેતી આ ફિલ્મ ઝાયરાએ ધાર્મિક કારણોસર ફિલ્મોમાંથી સન્યાસ લીધો હોવાને કારણે એની છેલ્લી ફિલ્મ બની જવાની . પ્રિયંકા અને ફરહાન બંને માટે આ ફિલ્મ એટલા માટે અગત્યની છે કે પ્રિયંકા આ ફિલ્મથી બોલીવુડમાં લાંબા સમય બાદ દેખાશે તો ફરહાનને પણ એકાદ હીટની તાતી જરૂર છે જ . હીટની જરૂર તો શુશાંતસિંહ રાજપૂતને પણ છે . ધોનીની બાયોપિક પછી કોઈ સુપરહીટ ન આપી શકેલ શુશાંતને છીછોરે ની આંશિક સફળતા પણ કામ નથી આવી . એવામાં એની તૈયાર થઈને પડેલી જેકલીન સાથેની ફિલ્મ ‘ ડ્રાઈવ ‘ પર એને આશા હતી પણ ‘કલંક’ ના ધબડકા પછી નિર્માતા કરણ જોહર કોઈ રિસ્ક લેવા માંગતો ના હોઈને શુશાંતની આ ફિલ્મ નેટફ્લીક્સ પર રજુ કરવાના મુડમાં છે . મતલબ કે કરણભાઈનું ડીઝીટલ ડેબ્યુ આ ફિલ્મથી થવાનું .

ડીજીટલ પ્લેટફોર્મની વાત નીકળી જ છે તો ‘ સેક્રેડ ગેમ્સ ‘ થી ડીજીટલ મીડીયમમાં છવાઈ જનાર સૈફઅલીખાનની ‘ લાલ કપ્તાન ‘ પણ ૧૮ ઓક્ટોબરે રીલીઝ થવાની છે . નાગા સાધુઓની દિલધડક વાત લઈને આવેલી આ ફિલ્મ સૈફ માટે પણ જરા હટ કે રોલને લીધે મહત્વપૂર્ણ છે . માથા પર લાલ તિલક, આંખોમાં કાજલ અને ચહેરા પર લાગેલી ભસ્મમાં સૈફ અલી ખાન ખૂબ અગ્રેસિવ મૂડમાં દેખાય છે. ફિલ્મમાં પ્રતિશોધની જર્નીને દેખાડવામાં આવી છે.  તો ‘ રોંગ સાઈડ રાજુ ‘ જેવી શાનદાર ગુજરાતી ફિલ્મથી રાષ્ટ્રીય પુરસ્કાર જીતનાર મીખીલ મુસળે એ ડાયરેક્ટ કરેલી ફિલ્મ ‘ મેઈડ ઇન ચાઈના ‘ પણ આ દિવાળીએ જ ગુજરાતી તડકો લઈને આવી રહી છે . ટેલેન્ટેડ રાજકુમાર રાવ રઘુ નામના ગુજરાતી બીઝનેસમેનના પાત્રમાં છે સાથે મોની રોય , પરેશ રાવલ , બોમન ઈરાની , બધાઈ હો ફેમ ગજરાજ રાવ અને સુમિત વ્યાસ જેવા દમદાર કલાકારો છે .  ઓલરેડી હીટ ગીત ‘ સનેડો ‘ થી દર્શકોમાં આતુરતા જગાડનાર આ ફિલ્મ ગુજરાતી બેકડ્રોપમાં ચાઈનાની વાત કહેતી કોમેડી ડ્રામા છે . ટ્રેલર પરથી તો ઇન્દ્રકુમાર ટાઈપ એડલ્ટ કોમેડી ડ્રામા લાગી રહી છે  પણ મીખીલ મુસળે નો કમાલ આ ફિલ્મમાં કેવોક છે એનો ઇન્તેઝાર રહેશે અને જો આ રઘુ ધમાલ મચાવશે તો એઝ એ ગુજરાતી ઓર એક સફળ દિગ્દર્શકની બોલીવુડમાં એન્ટ્રી વી ધ ગુજરાતીઓને ચોક્કસ ગમશે જ . આ મોટા ગજાની ફિલ્મો ઉપરાંત નરગીસ ફાકરી – સંજય દત્ત ની અફઘાન છોકરીની વાત કહેતી ‘ તોરબાઝ’ , પ્રતિક બબ્બર અને સિધાંત કપૂરની ‘ યારમ ‘, વિક્રમ ભટ્ટની ભૂતકથા  ‘ ઘોસ્ટ ‘. સંજય મિશ્રા અને જીમ્મી શેરગીલની હોનર કિલિંગની વાત કહેતી ‘ પ સે પ્યાર – ફ સે ફરાર ‘ જેવી ઓછી જાણીતી ફિલ્મો પણ આવી રહી છે . મીન્સ આ દિવાળીએ કોમેડી-એક્શન-ઈમોશન જેવા અનેક રંગોના દીવડાઓ રૂપેરી પરદે પ્રગટવાના ….!!!

વિસામો :

ચર્ચિત શો ‘ બીગ બોસ ‘ ની ૧૩ મી સીઝન ઓલરેડી ચાલુ થઇ જ ગઈ છે અને ‘ ઇન્ડિયન આઇડોલ ‘ અને ‘ ખતરો કે ખિલાડી ‘ પણ કાઈ બહુ દુર નથી એટલે ટીવી પર પણ મનોરંજનની ફૂલઝડીઓ ફૂટતી રહેવાની ..!!!

  • અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૬ ઓક્ટોબર ૨૦૧૯ )

સંગીત અને નૃત્યનો નોનસ્ટોપ જલસો  : એ હાલ્લ્લ્લો …..!!!!!

Featured

સંગીત અને નૃત્યનો નોનસ્ટોપ જલસો  : એ હાલ્લ્લ્લો …..!!!!!

               “ વાદલડી વરસી રે સરોવર છલી વળ્યા ‘ ….હા તે બિલકુલ અત્યારે ગુજરાતભરમાં આવો જ ઘાટ છે કે ભર ભાદરવે ધોધમાર – શ્રીકાર –અનરાધાર વર્ષા ચારેબાજુ ચાલુ છે . અલ્યા ભાઈ વરસાદ આવે એ તો સારું પણ અતિ આવે એ પાછું નહિ સારું ..!!! અને એમાયે હવે તો ‘ નોન-સ્ટોપ નાઈન ડે ડાન્સિંગ ‘ ને ( નવરાત્રી જ ભયલા ) આ લખાય છે ત્યારે ૨૪ કલાક માંડ બાકી રહ્યા છે એવામાં વોટ્સઅપના ફોરવર્ડ મુજબ આ ‘ વાદલડી વરસી રે …’ વાળો ગરબો આ નવરાત્રીએ બેન કરવો પડે એવો ઘાટ થયો છે . જી હા ખેલૈયાઓ તમારી મનગમતી નવરાત યાની કી નવરાત્રી આવી પહોચી છે . યસ વરસાદના વિઘ્નની ચિંતા આયોજ્કોથી લઈને સ્પોન્સર્સથી લઈને ખેલૈયાઓ સુધી બધે જ છે અને હવામાનખાતાનું સાચું માનીએ તો ( સાલું હમણાથી આ ખાતાની આગાહીઓ પણ સાચી જ પડે છે – ફોર એ ચેન્જ …!! ) આ નવરાત્રીના ઓછામાં ઓછા અર્ધા ભાગ સુધી વરસાદ ગરબા રમવાનો છે ..!! છાપાઓ ભલે ને ‘ વરસાદે વધારી ખેલૈયા-આયોજકોની ચિંતા ‘ એવા હેડીંગો રોજ મુકે…. તો શું થઇ ગયું …એમ કાઈ વરસાદથી ખેલૈયાઓ બી મરવાના ….એ પણ વરસતા વરસાદમાં ‘ નદી કિનારે નાળીયેરી રે ભાય નારીયેળી રે ..’ લલકારવાના જ…’ રેઇન ડાંસ ‘ યુ કનો !!!  ખેર , ચાહે લાખ તુફા આયે કે ધોધમાર વરસાદ આવે  પણ વી ધ ગુજરાતી ગરબા તો રમવાના ….રમવાના અને રમવાના જ …!!! બીકોઝ ગરબા દરેક ગુજરાતીના જીન્સમાં છે – લોહીમાં છે …..શું કિયો છો …..?

જગતની માલીપા વસેલા કોઈ પણ ગુજરાતીને પૂછો કે ગરબો એટલે શું ? તો તરત જ જવાબ મળશે કે ગરબો એટલે નૃત્ય , સંસ્કૃતિ અને સંગીતનો રાપચિક મેળાવડો ….!!! અને આ ઉપરના પેરેગ્રાફમાં ત્રણ વાર ભાર દઈને ‘રમવાના’ નું રીપીટેશન એટલા માટે કર્યું કે જ્યાં જ્યાં વસે ગુજરાતી ત્યાં ત્યાં હોય ગરબા …!!! હમણાં મોદીસાહેબ ફરીથી ચૂંટાયા તો દેશ તો ઠીક પણ વિદેશમાં પણ ગરબા થયા એના દ્રશ્યો જોયા …!! મી. સિઘ ….મી. ગાંગુલી કે પછી મી. ઐય્યર ભલે ને હોય નોન-ગુજરાતી પણ જો રહેતા હોય અપને ગુજરાત મેં તો ભાંગરા – કથ્થક કે બીજા કોઈ પ્રાદેશિક નૃત્યોની સાથે ગરબા થવાના થવાના અને થવાના જ …!!! ઘણા વખતથી ગાયબ દયાબેન પણ ‘ તારક મહેતા’ માં નવરાત્રીના એપીસોડથી જ કમબેક કરવાના છે અને એ પણ ગરબા રમતા રમતા જ ..!!!  ગુજરાતીમાં ગરબો અને ગરબામાં ગુજરાતી ના મળે એવું તો ભાગ્યે જ બને …..અને એમાયે નવલી નવરાત્રી જેવો વાઈબ્રન્ટ -રંગીન-કલરફૂલ-મ્યુઝીકલી રીચ –ફેન્ટાસ્ટીક ફેસ્ટીવલ હોય પછી ક્યા કહેના …!!!! નવ નવ રાય્તું બોલે તો નાઈન નાઈટ્સનો નોન-સ્ટોપ ડાંસ ફેસ્ટીવલ ..!!! કોઈ પ્રસંગ પર – ટીવી સિરીયલ્સમાં કે ઓકેઝ્ન્લી થતા ગરબા અલગ વાત છે અને  નવ-નવ રાતો રંગબેરંગી ચણીયા-ચોળી , કુર્તા …મ્યુઝીક ( એ પણ ટ્રેડીશનલ ) ..ડેકોર … સાથે થતી ગરબાની ધડબડાટી …સંગીતનો જલસો ….અને જગતના સૌથી લાંબા ડાન્સિંગ ફેસ્ટીવલની ઉજવણી …..!!!! ‘ મા પાવા તે ગઢ થી ઉતર્યા મહાકાળી રે ‘ ….  વરસાદ – બરસાદ માર્યા ફરે ………એ હાલ્લો હીંચ – દોઢિયું –ત્રણતાલી – એકતાળી કે પછી ફ્રીસ્ટાઈલ ગરબા લેવા ….!!!!!

આમ તો શું છે કે નૃત્યશાસ્ત્રમાં લખવાનું રહી ગયું છે કે ગરબા રમવા એ પણ એક કળા છે . ઘણા એટલી તન્મયતા અને એકાગ્રતાથી પણ એટલી આકર્ષક રીતે ગરબા રમતા હોય છે કે ભલેને આપણને ના આવડતું હોય તો પણ આપણા પગ થીરકી ઉઠે . નૃત્ય શાસ્ત્રથી આગળ વિજ્ઞાન એવું કહે છે કે ગરબે રમવું એ એક પ્રકારનું હિલીંગ છે કે જેનાથી મન , આત્મા અને શરીરને અજબ અને અદ્ભુત આનંદ અને રાહત આપે છે . મેડીકલ સાયન્સ તો એમ પણ કહે છે કે એક કલાક સતત ગરબા રમવાથી શરીરની 300 કેલેરી બળી જાય છે …સતત ગોળાકાર ફરવું જેને શાસ્ત્રોગત રીતે ચક્રમણ ક્રિયા કહેવાય છે એનાથી બ્લડ શુગર અને બ્લડ પ્રેશરના દર્દીને રાહત થાય છે …..જે લોકો ડિપ્રેશન કે હતાશામાંથી પસાર થતાં હોય, તેમના માટે ગરબા અને ગરબાનું સંગીત મૂડ એલિવેશન જેવા છે. અને વાત સાચી પણ છે જ ને . મને ને તમને બરાબર અનુભવ થયો હશે કે જેવા ગરબા ગ્રાઉન્ડમાં દાખલ થઈએ કે પછી શેરી કે સોસાયટીના ગરબામાં જઈએ તો ચિત્ત-મન એક અજબ પ્રકારની રાહત અને રીલેક્સેશન અનુભવે છે જ . સંગીત અને નૃત્ય આમ પણ રીલેક્શેશન માટે ઉત્તમ કહેવાયું છે જયારે અહીયાતો ગમતું-પોતીકું સંગીત હોય છે અને ઉપરથી એકાકાર થઇ જવાય એવું નૃત્ય ….ફિર જીને કો ક્યા ચાહિયે …… હૈ ના ???..!!!

સરકારે હેલ્મેટ પહેરવામાં મુદ્દત આપી છે એટલે આ નવરાત્રીમાં ‘ હેલ્મેટ ગરબા ‘ તો નહિ જોવા મળે પણ દર વખતે નવરાત્રીમાં કૈક ને કૈક નવું આવે જ છે એ મુજબ આ નવરાત્રીના શુશોભનમાં અને શરીર પર થતા ટેટુઓમાં કલમ ૩૭૦ – કાશ્મીર- હાઉડી મોદી તો છવાઈ જવાના જ પણ ગરબાના નવા સ્ટેપ્સની વાત કરીએ તો આ વખતે સાલસા ટીટોડો અને વેસ્ટર્ન ટીટોડો ખાસ રહેશે. તો નીતનવી ચણીયા-ચોળી અને ધોતી-કુર્તાની ડીઝાઈનોની સાથે સાથે આભુષણોમાં કચ્છી પેચની , રબારી જવેલેરી ,અફઘાની જવેલરી, વણઝારા જવેલરી, અને આદિવાસી જવેલરી ઇનથીંગ છે . અને મ્યુઝીકમાં પણ પરંપરાગત  ‘તારા વિના શ્યામ મને એકલડું લાગે ‘… ‘ કુકડા તારી બોલી મને મીઠી મીઠી લાગે ‘ …… ‘ ઢોલીડા ઢોલ ધીમો ધીમો વગાડના ‘ ….. ‘ પંખીડા તુ ઉડીને જાજે પાવાગઢ રે ‘…… ‘ આવો તો રમવાને …’  જેવા અસંખ્ય મનગમતા ગરબાઓની સાથે સાથે હિન્દી મુવીઝ ના લેટેસ્ટ રીમીક્ષ ગરબાઓ “ ઓઢની “ ( મેઈડ ઇન ચાઈના )… “ રાધે રાધે “ ( ડ્રીમગર્લ )….” છોગાડા તારા “ ( લવયાત્રી ) …” કમરિયા “ ( મિત્રો )પણ ધૂમ મચાવવાના …!! સી , જમાના મુજબ સંગીત પણ બદલાઈ કે નહિ અને નવરાત્રીમાં ડીજે હોય કે પાર્ટી ગરબા ટ્રેડીશનલ ગુજરાતી ગવાવાના જ પણ હા સાથે સાથે આવા હિન્દી સોંગ્સ પણ આવતા રહે …..મૂળ હેતુ છે શક્તિની આરાધનાની સાથે સાથે ઉત્સવની ઉજવણી …!!!

ખેર ઘણા વાંકદેખાઓને આમાં પણ કેટલીય ચૂંકો થવાની  ….ગરબાનું વ્યાપારીકરણ – લાઉડ મ્યુઝીક – ગરબામાં હિન્દી ગીતો – યુવાધનમાં બગાડ – ગીર્દી – પાર્કિંગ / ટીકીટો નાં નામે હેરાનગતી વગૈરાહ વગૈરાહ ….!! સી આમાંની એકાદ-બે ચૂંકોમાં હા પણ શું છે કે નવરાત્રી આરાધનાનો ઉત્સવ તો છે જ પણ સાથે સાથે જનઉત્સવ પણ છે એટલે બધા એનો પોતપોતાની રીતે તોડ પણ કાઢી જ લે છે . ‘ ઉડી ઉડી જાય ‘ જેવા બોલીવુડ ગીતો પર રમનારા ખેલૈયાઓ એટલે જ જોશ અને આનંદથી  ‘ નદી કિનારે નાળીયેરી રે ભાય નારીયેળી રે ..’ પર પણ ઝૂમે જ છે …!! તો હવે પાર્ટી પ્લોટોમાં ગરબા રમવા જતા ભોગવવી પડતી જફાઓની સામે સોસાયટી કે ફ્લેટોમાં ગરબા રમવાનો ટ્રેન્ડ વધતો જાય છે …!! ઘણાબધા ગરબા આયોજકો માત્ર શુદ્ધ દેશી ગરબાઓ પર જ નવરાત્રીનું આયોજન કરે છે . કોઈ કુછ ભી કહે પણ ગરબો અને નવરાત્રી હીટ છે અને રહેવાનો કેમકે એમાં ભક્તિ પણ છે – આધ્યાત્મ પણ છે – ઉત્સવ પણ છે – મનોરંજન પણ છે અને ખાસ તો ગરબો – નવરાત્રી  ભાગદૌડભરી જીંદગીમાં ગરબો અબાલ-વૃદ્ધ-યુવાઓને રીલેક્ષ રહેવાનો ઉત્તમ મોકો આપે છે !!! બોલો અંબે માત કી જય …!!

– અજય ઉપાધ્યાય ( ગાંધીનગર સમાચાર કોલમ ” રઝળપાટ ” ૨૯ સપ્ટે ૨૦૧૯ )

 

ફોલો ધ રૂલ્સ : ફાયદો આપણો જ છે ……!!!!!

Featured

ફોલો ધ રૂલ્સ : ફાયદો આપણો જ છે ……!!!!!

Image result for new traffic rules

 આવતીકાલથી ગુજરાતમાં ટ્રાફિકના નવા નિયમો લાગુ થવા જઈ રહ્યા છે . સ્વાભાવિક છે કે અત્યાર સુધી ટ્રાફિક નિયમો બાબતે લોલમલોલ ચલાવતા ચાલકો આનાથી અકળાયા છે બાકી તો જે આવા કડક નિયમો નહોતા ત્યારે પણ વાહનમાં જરૂરી ડોક્યુમેન્ટ રાખીને નીકળતા હતા કે હેલ્મેટ , સીટબેલ્ટ જેવી સેફટી અને ટ્રાફિકલાઈટની આમન્યા રાખતા હતા એમને તો કોઈ વાંધો છે જ નહિ . વાંધો છે તો એ લોકોને કે જેમને મન હર કાનુન તોડને કે લિયે હી બનતે હૈ એવી માનસિકતા છે . અસલમાં નિયમો તો પહેલેથી છે જ પણ આટલા આકરા દંડની જરૂર કદાચ એટલા માટે પડી કે એક તો એ નિયમોનું પાલન કરવામાં કચાસ રહી જતી હતી અને બીજું કે આના જ લીધે અને સુરક્ષા નિયમોની ઘોર બેદરકારીના પાપે દેશમાં માર્ગ અકસ્માતમાં થતા મોતોની સંખ્યા દિવસેને દિવસે વધતી ગયેલી છે . આપણે ત્યાં માર્ગ અકસ્માતોમાં મોતને ભેટનાર લોકોની વાર્ષિક એવરેજ અંદાજે દોઢ લાખ જેટલી છે અને તમને વાંચીને નવાઈ લાગશે કે આમાંથી ૭૦૦૦૦થી વધુ ઓવરસ્પીડીંગને લીધે  , દસેક હજાર ઓવરટેકિંગમાં  , છ હજાર જેવા કોઈ નશાની આડમાં , પાંચ હજાર રોંગસાઈડને લીધે ,  ચારેક હજાર જેવા રેડલાઈટ હોવા છતાં હંકારવામાં તો દસેક હજાર જેવા હેલ્મેટ હોવા છતાં ન પહેરવાને લીધે અને બેક હજાર જેવા સીટબેલ્ટ બાંધવાને શાન કે ખિલાફ સમજવામાં હોમાઈ ગયા અને ૨૦૦૦ જેવા ચાલુ વાહને મોબાઈલ પર વાતું કરવામાં જીવનું કવરેજ ખોઈ બેઠા . યાદ રહે આ આંકડાઓ સરકારી છે અને છેક ૨૦૧૬ના છે અને આમાં સરકારી ચોપડે નહિ ચડેલા અકસ્માતો , અકસ્માતને લીધે અપંગ થયેલા કે ખોડખાંપણ પામેલા જીવોને ઉમેર્યા નથી જ ….!!!!

ઉપરના આંકડા વાચ્યા પછી કદાચ તમને ને મને કડક ટ્રાફિક રૂલ્સનું મહત્વ સમજાઈ જશે અને એનો અમલ કરાવવા માટે કડક થવું જ રહ્યું એનું મહત્વ પણ સમજાઈ જશે જ ,  પણ સાથે સાથે એક વાત પણ નોંધવી જ પડે કે આટઆટલા અકસ્માતો અને એના આવા કારણોમાં જેટલો વાંક ચાલકો અને એમના દ્વારા થતી ટ્રાફિક રૂલ્સની અન્દેખીનો છે એટલો જ ફાળો ટ્રાફિક રૂલ્સના નામે છેડચોક થતા ભ્રષ્ટાચારનો પણ છે જ . આ નવા રૂલ્સમાં ફટકારાયેલા અતિશય આકરા અને ઊંચા દંડની રકમ જોતા બધાને એક જ સવાલ છે કે આનાથી થશે એવું કે પહેલા ૧૦૦ લઈને જવા દેતા હતા એ હવે ૫૦૦ કે ૨૦૦ માંગશે ? ખેર આ ચિંતા પણ અસ્થાને તો નથી જ અને બીજું એવું છે કે નવા ટ્રાફિક રૂલ્સમાં રોજબરોજ એટલા બધા કોમ્પલીકેશન બહાર આવતા જાય છે કે એમ થાય કે આમાંથી કેમ બચાશે ? આ લખાઈ છે ત્યારે શુક્રવારના જ ન્યુઝ છે કે નાનું બાળક જો ખોળામાં હશે અને તો એને પણ ત્રિપલ સવારી ગણવામાં આવશે !!! કે પછી લુંગી પહેરીને કોઈ ટ્રક ડ્રાઈવર ટ્રક નહી ચલાવી શકે ….. આ કઈક વધુ પડતું થઇ ગયું હોય એવું નથી લાગતું ….??? એક બીજા સમાચાર એવા પણ છે કે તપેલી ટાઈપની હેલ્મેટ નહિ ચાલે પણ આઈએસઆઈ માર્કાની જ હેલ્મેટ વેલીડ ગણાશે અને એ પણ પાછળ બેસેલાએ પણ પહેરવી પડશે . બે હેલ્મેટની દ્રષ્ટીએ થોડું અવ્યવહારુ છે પણ કદાચ સેફટી માટે આ પણ સ્વીકાર્ય . જો કે હેલ્મેટ વગર ફરતા ટ્રાફિક કે બીજા પોલીસોના સામાન્ય માણસો દ્વારા વાયરલ થયેલા અનેકો વિડિયોઝ પછી આદેશ એવો આવ્યો છે  કે ટ્રાફિક પોલીસે પણ નવા કાયદાનું પાલન કરવું પડશે . સારું કહેવાય જો આવું થાય તો …!!! આવું જ નેતાલોગ અને પહોચેલા લોગ પર પણ લાગુ થવું જોઈએ …આફ્ટર ઓલ જો કાયદો બધા પર સમાન લાગુ થશે તો જ એનો અમલ ઝડપથી થઇ શકશે .

ખેર સોશિયલ મીડિયામાં આવતા મેમેઝ કે વાયરલ થતા વિડિયોઝમાં દેખાતો પબ્લીકનો આક્રોશ સમજી શકાય એવો છે કે ચાલી પણ ના શકાય એવા રસ્તાઓ , ચાર રાસ્તેથી લઈને ઓફીસો સુધી પહોચી ગયેલો ભ્રષ્ટાચાર  , વધુ સરળ અને કાર્યદક્ષ આરટીઓ ઓફિસોની ઉણપ  , પ્રસાદી આપ્યા વગર કામ થઇ જાય એવી સિસ્ટમો જેવા અનેકો મુદાઓ છે જેને પહેલા સુધારવાની જરૂર છે . સી , જે લોકો કાયદાને માન આપે છે , ખોટું કરતા નથી એને પણ આ બધી જ જગ્યાએ અગવડો અને પારાવાર મુશ્કેલીઓ પડે છે . અમેરિકા , બ્રિટન કે બીજા દેશોના કાયદાઓ અને દંડની રકમ નવા નિયમો જેટલી જ છે એવી દલીલ કરનારાઓ એ ભૂલી જાય છે ત્યાં રસ્તાઓની હાલત , કાયદાના અમલની સીસ્ટમ અને ખાસ તો ત્યાની પ્રજામાં રહેલી સિવિક કે ટ્રાફિક સેન્સનો આપણે અહિયાં બિલકુલ અભાવ છે . નો હોર્ન ઝોનમાં હોર્ન મારવા , હજુ મૂછનો દોરો પણ ના ફૂટ્યો હોય એના હાથમાં ટુ કે ફોર વ્હીલર આપી દેવી , કોઈ જ ટેસ્ટ આપ્યા વગર લાઈસન્સ કઢાવી લેવું , હેલ્મેટ-સીટબેલ્ટ ના પહેરવા , આગળના વાહનથી સેફ ડિસ્ટન્સ ના રાખવું , રેડ લાઈટ જમ્પ કરવી , ચાલુ વાહને મોબાઈલ પર વાત કરવી …….લીસ્ટ લાંબુ થઇ શકે એમ છે ..!!! પીયુસી સેન્ટરો પર અચાનક લાગતી લાંબી લાઈનો એ બતાવે છે કે આ સર્ટીનો નિયમ તો આપણે ઘોળીને જ પી ગયેલા . (  જો કે આ સર્ટી પ્રદુષણ બાબતે કેટલું કારગત છે એ પાછો અલગ ચર્ચાનો વિષય છે !!! )  આકરો દંડ કદાચ આપણને આમાંથી કોઈ બે-ચાર ચીજમાં સુધારો લાવી શકે તો પણ સરવાળે ઉત્તમ જ છે . કેમકે જ્યાં સુધી આપણા પગ નીચે રેલો નહિ આવે ત્યાં સુધી ખબર નહિ પડે . ટ્રાફિક રૂલ્સની બેદરકારીને લીધે ગુમાવાયેલા કોઈ લાડકવાયાના વાલીને મળો તો સમજાશે કે ટ્રાફિક રૂલ્સ ફોલો કરવું માત્ર આપણા માટે જ નહિ પણ બીજા માટે પણ કેટલું ફાયદાકારક છે .

એક વાત તો બધા જ માને છે કે ટ્રાફિકના કાયદા કડક હોવા જોઈએ અને એનો અમલ પણ સખ્તાઈથી થવો જોઈએ . સી , અમુક વસ્તુ મારે ને તમારે સ્વયંભુ સમજવી અને કરવી પડે આમાંની એક છે ટ્રાફિક અવેરનેસ અને રૂલ્સ ફોલોવિંગ ..!!! દીકરા કે દીકરીના હાથમાં એકટીવા કે કારની ચાવી આપતી વખતે એટલું તો કહી જ શકો કે સંભાળીને ચલાવજે . એક નાગરિક તરીકે વાહનના ડોક્યુમેન્ટ સાથે રાખવામાં શેની શરમ ??? સિગ્નલ – ઓવરટેકિંગ –પાર્કિંગ –ઓવરસ્પીડ જેવા નાના લાગતા પણ ખતરનાક પરિણામો લાવતા મુદ્દાઓ વિષે જાગૃતતાથી વર્તીએ તો કાઈ વાંધો આવે ?? ભ્રષ્ટાચારની વાત કરીએ છીએ પણ જો બધા જ ડોક્યુમેન્ટ સાથે હશે તો ક્યા કોઈ કશું માંગવાનું જ છે ??? અને ખાસ કઈ કરવાનું છે પણ નહિ . વ્હિકલના બધા પેપર્સ તમારી સાથે રાખો ,-લાયસન્સ વગર વ્હિકલ ન ચલાવો, -સ્પીડ લિમિટનું હંમેશાં ધ્યાન રાખો ,હેલ્મેટ વગર ટુ-વ્હિલર્સ ન ચલાવો.,સીટ બેલ્ટ પહેરો, દારૂ પીને ક્યારેય ગાડી ન ચલાવો , 18 વર્ષથી ઓછી ઉંમરનાને  વ્હિકલ ન આપો , વ્હિકલ ચલાવતી વખતે મોબાઈલનો ઉપયોગ ન કરો. સ્કૂટર- બાઈક પર બેથી વધારે લોકો ન બેસો ..બસ આટલું જ કરો તો કોઈ તમને ચલણ નહિ પકડાવે …!!!

સી , દરેક કાયદો અને એની અમલવારીમાં બે બાજુ હોય છે અને એ આ નવા મોટર વ્હીકલ એક્ટમાં પણ છે જ અને રહેવાની પણ એક જાગૃત નાગરિક તરીકે ઉપર લખ્યા એટલા નિયમો ફોલો કરવી એ આપણી ફરજ પણ છે અને એ આપણી જ સલામતી માટે મહત્વની પણ છે જ  બાકી તો શું છે કે કરોડો નાગરીકો અને વાહનોથી ઉભરાતા શહેરો કે કિલોમીટરો લાંબા હાઈવેઝ પર બધે તો કાઈ ટ્રાફિક પોલીસ પહોચી વળવાની છે નહિ અને એટલી ફોર્સ પણ છે નહિ કે બધાને હાથ પકડી પકડીને સમજાવે . કદાચ આટલા આકરા દંડ અને નવા નિયમોથી સરકાર આપણને ટ્રાફિક નિયમન અને આપણી ખુદની સલામતી પ્રત્યે જાગૃત થવાનો એક મોકો આપી રહી છે – અવેર કરી રહી છે એટલામાં આપણી પણ ફરજ બને છે કે ટ્રાફિક અને રોડ સેફ્ટીના નિયમોનું પાલન કરીએ અને એના વિપરીત પરિણામોથી બીજાને અને આપણને ખુદને બચાવીએ …!! નો ડાઉટ અત્યારે સુધી કદાચ હાર્ડલી ફોલો નથી કર્યું એટલે શરૂઆતમાં તકલીફ તો પડશે જ પણ લાંબાગાળે આ મને તમને અને આપણી આવનારી પેઢીઓને જાન અને માલ બંને રીતે ખુબ જ ફાયદો કરાવશે એ નક્કી છે …!!!

  • અજય ઉપાધ્યાય ( ગાંધીનગર સમાચાર કોલમ ” રઝળપાટ ” ૧૫ સપ્ટેમ્બર ૨૦૧૯ )

સોચો ઠાકુર સોચો …….. પણ માપ માં હો !!!!!!

Featured

સોચો ઠાકુર સોચો …….. પણ માપ માં હો !!!!!!

પત્નીને એમ જ બેઠેલી જોઇને પતિએ પૂછ્યું “ શું કરે છે ? “ પત્નીનો જવાબ હતો “ કઈ નહી , બેઠી બેઠી વિચારું છું “…પતિ ઉવાચ “ પણ આ કામ તો તું કાલે પણ કરતી હતી “…પત્નીનો સટાક જવાબ : હા તે હજુ પૂરું ક્યાં થયું છે “….!!!!!!! છે ને જમાવટ …??? માણહ વિચારે પણ નહિ …..??? પણ યુ સી આમાં પત્નીનો વાંક નથી કેમકે હું ને તમે બધા જ એકવાર વિચારવાનું શરુ કરીએ તો ક્યા અટકવું એની ખબર નથી પડતી …જો કે આવી સ્થિતિને આપણી તળપદી અસ્સ્સ્લ ગુજરાતીમાં “ વિચારવાયુ “ કહે છે . અને આ કાઈ ખોટું નામાભિધાન પણ નથી જ . વિચારવું એ એક પ્રકારનો વાયુ જ છે , પેલું અડગમ બડગમ ખવાઈ ગયા પછી પેટમાં ઉછાળા મારે અને જીવને જંપવા ના દે એ જ વાયુ …!!! આ વિચારવાયુનું પણ એવું જ છે , એકવાર ગોટે ચડ્યો પછી માણસને હખ લેવા નો દયે…એકમાંથી બીજો ને બીજામાંથી ત્રીજો વિચારનો પરપોટો કે વિચારનો કોટો ફૂટ્યા જ કરે …!!!!

ગુણીજનો કહી ગયા છે કે ‘ બોલતા પહેલા અનેક વાર વિચારવું ‘ પણ ગુણીજનો એ નથી કહી ગયા કે કેટલું વિચારવું ? એ ફકરો ગુણીજનોએ સૌ સૌ ની અક્કલ પર છોડેલો છે- અક્કલ બોલે તો દિમાગ પર !!! એટલે થાય છે શું કે ૧૦૦ માંથી ૯૯ દિમાગ કોઈ એક વિચાર પર ચડી જાય તો પછી વિચારમાંથી શક્યતાઓ અને શક્યતાઓમાંથી શંકાઓ અને શંકાઓમાંથી સારા કે ખરાબ અને મોટેભાગે તો ખરાબ પરિણામોની કલ્પનાઓ જ …આમ એક કે બાદ એક ઠાકુર પણ સોચતા થાકી જાય એટલા વિચારોનો ટ્રાફિક મગજના હાઈવેને જામ કરી મુકે .અને એમાં વાંક આપણો છે જ નહિ કેમકે “ સોચ પે કિસી કા કહા બસ ચાલતા હૈ “ બરાબર છે બબુઆ પણ વિજ્ઞાન કહે છે કે વધુ પડતું વિચારવાથી નેગેટીવ વિચારો વધુ આવવાની પોસીબીલીટી વધી જાય છે . આપણે ઘણીવાર “ મુક ને આમાં કાઈ થઇ શકે એમ નથી ‘ કહીને કોઈ વાત પડતી તો મૂકી દઈએ છીએ પણ પ્લીઝ નોટ કે એમ છતાયે એ પડતો મુકાયેલો વિચાર જો ફરી ફરીને દિમાગમાં ઘુસાડતા રહીએ તો પછી નેગીટીવ થીંકીંગના શિકાર બનતા વાર નથી લાગતી . હા પોઝીટીવ દિશામાં વિચારતા હોવ તો શક્ય છે કે કશોક હલ મળી જ જાય પણ તો પાછું એ ‘ પોઝીટીવ થીંકીંગ ‘ થઇ ગયું જ્યારે આપણે તો એક સિમ્પલ વિચાર વિષે વિચારી રહ્યા છીએ ….!! એની જાય્તને અહિયાં’ય વિચાર તો આવી જ ગયો …!!!

‘ ખાલી દિમાગ શૈતાન કા ઘર ‘ આ વાત જેટલી ખાલી દિમાગને લાગુ પડે છે એટલી જ અતિશય વિચારોથી ભરેલા દિમાગને પણ લાગુ પડે છે . આમાં શું છે કે આ ‘ વિચારવાયુ ‘ એટલે કે વધુ પડતું વિચારવું એને ‘ ઓવર થીંકીંગ ‘ કહે છે અને નામ મુજબ જ ઓવર થઇ જાય એટલે કવર ના થાય એવી આની લાક્ષણિકતા છે . કોઈને એમ કહીએ કે ચલ અહિયાં પાંચ મિનીટ શાંતિથી બેસ અને કશું જ ના વિચાર …તો એ પોસીબલ છે ??? બિલકુલ નહી , કેમકે દિમાગનું કામ જ આ છે વિચારવાનું અને એટલે શું છે કે એ તો પોતાનું કામ કર્યે જ જવાનું પણ વાત જ્યારે પોઝીટીવ વિચાર કે નેગીટીવ વિચારની હોય , વાત જ્યારે કોઈ એક વિચારની લાઈન કેટલે સુધી લાંબી કરવાની હોય ત્યારે મોટાભાગના કેસમાં આ લાઈન લંબાતી જ જતી હોય છે જો કે ઈટ ડીપેન્ડસ કે ક્યાં સોચ રહે હો …? આનો યુપીએસસી માં વિચારવિસ્તાર કરવાનો ક્વેશ્ચન પુછાય તો એમ કહી શકાય કે આપણે જે પ્રમાણે અને જેટલું વિચારીએ છીએ એ મુજબ આપણા દિમાગનું સ્ટ્રકચર બદલાતું રહેતું હોય છે …!!! અરે હસવાની વાત નથી પણ આ સાયકોલોજીકલી અને મેડીકલી પ્રૂવ છે કે વિચારો અને એના રીએક્શન મુજબ દિમાગ બદલાતું રહે છે . બદલાતું બોલે તો નાનું-મોટું ના થાય પણ દિમાગના જ્ઞાનતંતુઓ એ મુજબ વર્તવાનું શરુ કરી દે . ગુગલમાં કશુક સર્ચ કરો પછી ગુગલ તમને વારંવાર એના લાગતા વળગતા રીઝલ્ટ બતાવ્યા કરે છે ને કૈક એવું જ …!!! મતલબ કે વિચારોની કલ્પના અને એ વિચારોનું અંતિમ પરિણામ જો એક હોય અને ખાસ તો જો એનો સમયગાળો ઓછો હોય તો સમજ લો કી આપકા દિમાગ હેલ્ધી હૈ ..!!!

‘ એ સરકીટ હેલ્ધી બોલે તો ?’ હેલ્થી બોલે તો તમે વધુ પડતા વિચારવાની બીમારીથી ત્રસ્ત નથી . પણ જો એ જ વિચાર સતત રટ્યા જ કરતા હોવ અને કોઈ નિષ્કર્ષ કે પરિણામ પર પહોચાય નહિ તો એ થયું ઓવર થીંકીંગ ..!!! નો ડાઉટ બધી વખતે એવું ના પણ થાય કે તમે કોઈ વિચારને સફળતાપૂર્વક અંત તરફ પહોચાડી શકો પણ જનરલી હર એક વિચારનું કોઈ ક્ન્ક્લુંઝન હોવાનું જ પણ જો એ ના મળે તો આદમી સોચતા હી રહેતા હૈ …સોચતા હી રહેતા હૈ ..!! હૈ કી નહિ ??? પછી આગળ લખ્યું એમ વિચાર અને વિચારમાંથી શંકા અને શંકામાંથી અવિશ્વાસ …..ઔર ના જાને ક્યા ક્યા મગજના ગોળામાં ગોળ ગોળ દોડ્યા જ કરે કે સાલું એટ ધ એન્ડ એ જ ના સમજાય કે વિચારવાનું શરુ શેના પર કરેલું ….?? એક્ચ્યુલી વિચારવું એ ખરાબ બાબત નથી જ અને મજાની વાત એ છે કે વિચારવાથી જ દરેકનું કોઈ ને કોઈ સોલ્યુશન પણ મળી જ જાય છે અને મોસ્ટ ઈમ્પો કે સોચના હમ રોક ભી નહિ શકતે એટલે હરીફરીને વાત ત્યાં જ આવીને અટકવાની કે કિતના સોચે ઔર કબ તક સોચે …???

આટલું વાંચતા ઘણા ધોખો કરશે કે શું આ જે બધા જીનીયસ લોકો થઇ ગયા એ વધુ નહિ વિચારતા હોય ? વગર વિચાર્યે કે ઓછું વિચારીને એમણે કોઈ ને કોઈ શોધ કે શરૂઆત કરી હશે ? અસલમાં આ સવાલમાં જ જવાબ આવી ગયો અને જવાબ એ છે કે એમણે ઘણું કે લાંબુ વિચાર્યા પછી કોઈ નિષ્કર્ષ પર તો પોતાના વિચારને પહોચાડ્યો જ હશે ને ? કે બસ લેખની શરૂઆતમાં લખ્યું એમ રોજ્જેરોજ ખાલી સોચ્યા જ કર્યું હશે ??? એમને પણ નેગીટીવ વિચારો આવ્યા હશે પણ મહત્વનું એ છે કે માત્ર ઓવર થીંકીંગ કર્યા વગર એ બધા જ કોઈ એક સમાધાન – ક્ન્ક્લુંઝન પર પહોચ્યા હતા . અને આ સમાધાન જેવું જ બીજું અગત્યનું છે કે વિચારને લીમીટેડ કરવા . ખબર જ હોય કે આ વાત તમારા કન્ટ્રોલ કે પહોંચની બહાર છે તો બેટર છે કે એના વિષે વિચારતી વખતે આ વાસ્તવિકતાનો એસએમએસ દિમાગને પહોચાડી દેવો એનાથી થશે શું કે એક તો ઓવરથીંકીંગથી બચાશે અને બીજું કે નેગીટીવ થીંકીંગના વોટ્સઅપગ્રુપમાં તમને કોઈ એડ નહિ કરે …!!! કોઈ મતલબ તમે જાતે જ રીક્વેસ્ટ નહી મોકલો ..!!!

જોક્સ એપાર્ટ થીંકીંગ અને ઓવરથીંકીંગનો જ પેટા પ્રશ્ન છે પોઝીટીવ અને નેગીટીવ થીંકીંગ , મગર નેગીટીવ થીંકીંગ ડેફીનેટલી ઓવરથીંકીંગનો પાક્કો ભાઈબંધ છે ,,!! એટલે આ થીંકીંગવાળા દાખલાનો સીધો ને સટ જવાબ છે કે જરૂર જેટલું જ વિચારો ..!!! વધારે પડતું થીંકીંગ થીંકીંગ થઇ ગયું નહિ ….??!!! જો કે એક ઝાટકે આપણે એગ્રી કે આ વધુ પડતું થીન્કવા ને રોકવું મુશ્કેલ તો છે જ પણ સાયકોલોજી કહે છે કે જેટલું તમે ઓવરથીંકીંગ ટાળી શકશો એટલું તમે જરૂર જેટલું જ વિચારવાની મહારત વધુ હાંસિલ કરી શકશો ..!!!. ગયઢાં કહી ગયા છે કે ‘ બહુ વિચારવું નહિ “ પણ એનો અર્થ એ નથી કે સાવ વિચારવું જ નહી પણ એનો અર્થ છે કે કામ પુરતું જ વિચારવું ને એમાયે કાઈ છેડો ના આવે તો ઘોયરૂ કરી દેવું …બીકોઝ આફ્ટરઓલ સાચી દિશામાં અને સાચી રીતે જરૂર પુરતું જ અને એ પણ કોઈ નિષ્કર્ષ પર પહોચાય એટલું જ વિચારવું એના પર જ વ્યક્તિનું ચરિત્ર , વ્યક્તિત્વ અને વિચારશીલતા ટકેલી છે જે મને ને તમને બહેતર ઇન્સાન બનાવે છે ..!!! યે બાત ફુરસદ મિલે તો સોચ લેના ….!!!!

વિસામો :

“ ઝાઝું વિચારવું જ નહીં , મારું કે તારું કંઈ ધાર્યું ના થાય એના કરતાં તો ધારવું જ નહીં….ઝાઝું વિચારવું જ નહીં “ ( કૃષ્ણ દવે )

– અજય ઉપાધ્યાય ( ગાંધીનગર સમાચાર કોલમ ” રઝળપાટ ” ૮ સપ્ટેમ્બર ૨૦૧૯ )

“ લહુલુહાન નઝારોં કા ઝિક્ર આયા તો, શરીફ લોગ ઉઠે દૂર જા કે બૈઠ ગયે. “

Featured

“ લહુલુહાન નઝારોં કા ઝિક્ર આયા તો, શરીફ લોગ ઉઠે દૂર જા કે બૈઠ ગયે. “

“ મૈ જિસે ઓઢતા – બિછાતા હું , વો ગઝલ આપકો સુનાતા હું “…કવિ પોતે શું કહેવા માંગે છે અને એનું મૂળ શું છે એ બાબતે એ એકદમ ચોક્કસ છે તો સાવ સરળ શબ્દોમાં આંચકો કે આઘાતની વાત કરતા કહે છે કે ” તુમ્હારે પાવ કે નીચે કોઈ જમીન નહિ , કમાલ યે હૈ કી ફિર ભી તુમ્હે યકીન નહિ “…તો સમાજની કડવી વાસ્તવિકતા તરફ આંગળી ચીંધતા સાવ સરળ શબ્દોમાં કહી દે છે કે ‘ લહું-લુહાન નજારો કા જીક્ર આયા તો , શરીફ લોગ ઉઠે દુર જા કે બૈઠ ગયે “ આમાં શરાફતની વાત છેડનાર આ જ કવિ ઈન્સાની મજબુરીને અલગ જ શબ્દોમાં બયા કરતા લખે છે કે “ જિસ તરહ ચાહો બજાઓ ઈસ સભા મેં, હમ નહીં હૈ આદમી, હમ ઝુનઝુને હૈ. “ જો કે આ શેર એ વખતની પોલીટીકલ સિસ્ટમમાં અટવાયેલા મતદાર માટે વધુ લાગુ પડતો હતો . હજુ તો આ શરૂઆત છે આગળ ઉપર આ જ કવિના ભાથામાંથી એવા એવા કવિતા-તીર છૂટવાના છે કે મને ને તમને એકસાથે આશ્ચર્ય , આક્રોશ , લાચારી , મજબૂરી , વ્યંગ અને વાસ્તવિકતાના આંચકાઓ આવ્યે જ જવાના ….!!! અને આવા તીરો જેના ભાથામાંથી નીકળ્યા જ કર્યા એ બીજું કોઈ નહિ પણ હિન્દુસ્તાન જેને વિદ્રોહી શાયર , યુવા ભારતનો શાયર અને દેશી ભાષામાં “ કશુક ભાળી ગયેલો “ શાયર ગણતું આવ્યું છે એ દુષ્યંતકુમાર છે .

આજે દુષ્યંતકુમારનો જન્મદિવસ છે પણ શબ્દોની તાકાત જુઓ કે ઉપર લખાયેલી અને હવે પછીથી લેખમાં આવનાર આવા અનેકો ચોટદાર શેર આજથી લગભગ પિસ્તાળીસેક વર્ષ પહેલા લખાયેલા હોવા છતાં આજે પણ એટલા જ પ્રસ્તુત અને પ્રખ્યાત છે . “ સિર્ફ હંગામા ખડા કરના મેરા મકસદ નહીં, મેરી કોશિશ હૈ કિ યે સૂરત બદલની ચાહીએ “ જી હા દુષ્યંતકુમાર હંગામો ખડો કરવા લખતો નહોતો પણ હા એ અલગ વાત છે કે એના શબ્દોમાં એવી તાકાત હતી કે હંગામો થઇ જ જતો હતો કેમકે એ કોઈને સારું લગાડવા નહિ પણ જે સાચું લાગે એ લખી શકતો હતો . “ ઈસ શહર મેં તો કોઈ બારાત હો યા વારદાત, કિસી ભી બાત પર ખુલતી નહીં હૈ ખિડકિયાં “ . આ એ સમય હતો જ્યારે સામાન્ય માનવી અરાજકતા, અત્યાચાર, ભ્રષ્ટાચાર અને શોષણથી ભયગ્રસ્ત હતો અને કહેવાતી લોકશાહીનાં મૂલ્યો પ્રત્યે શંકા હોવા છતાં કશું બોલી શકતો નહોતો એવા સમયે દુષ્યંતની કવિતા એ લોકોનો અવાજ બની ગયેલી . “ હમકો પતા નહીં થા હમેં અબ પતા ચલા
ઈસ મુલ્ક મેં હમારી હકૂમત નહીં રહી “…. કે પછી “ ભૂખ હૈ તો સબ્ર કર, રોટી નહીં તો ક્યા હુઆ, આજ કલ દિલ્હી મેં હૈ જેરે બહસ યે મુદદુઆ.”…!!!!

‘ મેરે દિલ પે હાથ રખ્ખો મેરી બેબસી કો સમજો , મૈ ઇધર સે બન રહા હું , મૈ ઇધર સે ઢહ રહા હું ..” જેમ જેમ આ શેર વાંચતા જશો એમ એમ એક તૂટતા ઇન્સાનનું – એની બેબસીનું આબેહુબ દ્રશ્ય તમારા જહેનમાં ભજવાતું જશે . દુષ્યંતની ગઝલોમાં વિદ્રોહ , વ્યથા અને વેદના વારંવાર ઝલકતી હતી . દુષ્યંતકુમારની કવિતાઓ સામાજિક પીડા પર આકરો પ્રહાર કરતી રહી . એવું નહોતું કે આવી પીડા પર કે વ્યવસ્થાની વિરુદ્ધ કોઈએ લખ્યું નહોતું પણ જે રીતે દુષ્યંતકુમારની કલમમાંથી રૌદ્ર , આક્રોશ કે વીરરસ ટપકતો હતો એવો તો કદાચ કોઈની કલમમાંથી નહોતો જ નીકળતો એ ચોક્કસ ..!! “ કલ નુમાઈશ મેં મિલા વો ચીથડે પહેને હુયે , મૈને પૂછા નામ તો બોલા કી હિન્દુસ્તાન હૈ “ ..” સામાન કુછ નહીં, ફટે હાલ હૈ મગર, ઝોલે મેં ઉસકે પાસ કોઈ સંવિધાન હૈ. “‘ ગૂંગે નિકલ પડે હૈ જુબાં કી તલાશ મેં , સરકાર કે ખિલાફ યે સાજીસ તો દેખિયે “ ઇન્દિરા ગાંધીની ઈમરજન્સી વખતે ઘણા લોકોએ ઘણું બધું લખ્યું , ઘણા ચુપ પણ રહ્યા પણ આ એક જ શેરથી દુષ્યંતનો આકરો પ્રહાર જુઓ : મત કહો આકાશ મેં કોહરા ઘના હૈ, યહ કિસી કી વ્યક્તિગત આલોચના હૈ. “ એ જમાનો કટોકટીનો હતો , દેશમાં સળગતા આક્રોશનો હતો , લોકશાહી બચાવનો હતો …એવામાં દુષ્યંત જેવો શાયર તો શેનો ઝાલ્યો રહે ..!!! ‘ મસ્લ્હમ આમેઝ હોતે હૈ સિયાસત કે કદમ , તું અભી નહિ સમજેગા તું અભી ઇન્સાન હૈ “ વ્યંગના રેપરમાં દુષ્યંતકુમારનો આ તેજાબી ચાબખો હતો સિયાસત પર !!

પણ દુષ્યંતે આ સિવાય સામાન્ય માણસની વાચના અને વેદનાને વાચા આપતી અનેકો રચનાઓ કરી . ત્યારની દેશની હાલત અને સામાજિક વ્યવસ્થા પર ચોટદાર પ્રહારો કર્યા . “ખડે હુએ થે અલાવો કી આંચ લેને કો, સબ અપની અપની હથેલી જલા કે બૈઠ ગયે. “કે પછી “ ગઝબ હૈ સચ કો સચ કહેતે નહિ વો , કુરાનો-ઉપનિષદ ખોલે હુયે હૈ “ કે પછી સામાજિક વિષમતાને ઉજાગર કરતો આ એક જ શેર જુઓ , “ હમ હી ખા લેતે સુબહ ભૂખ લગતી હૈ બહોત , તુમને બાસી રોટિયા નાહક ઉઠાકર ફેંક દી “ કમજોર વ્યક્તિને શિકાર બનાવતી સમાજવ્યવસ્થા પર દુષ્યંતે લખ્યું કે “ તુમને ઇસ તાલાબ મેં રોહુ પકડને કે લિયે , છોટી છોટી મછલીયા ચારા બનાકર ફેંક દી “ સ્વાર્થ અને સત્તાના પાપે સમાજમાં થતા વિભાજનો પર દુષ્યંતનો કટાક્ષ જુઓ “ આપ તો દીવાર ગિરાને આયે થે , આપ તો દીવાર ઉઠાને લગે “..!! એમની ગઝલો વાંચો અને જાણે કે સામાજિક અવ્યવસ્થા, અસહિષ્ણુતા અને અસમાનતા વિષે આપણા જ વિચારોને વાચા મળતી લાગે એટલી હદે એમના શબ્દો સરળ અને સ્ટીક છે ..

દુષ્યંતની ગઝલો આવી ચોટદાર રજૂઆત સિવાય ઘણીવાર આપણને અચંબા અને આશ્ચર્યમાં પણ નાખી દે છે જેમકે જનરેશન ગેપ પરનો આ શેર વાંચો “ બચ્ચે છલાંગ માર કે આગે નીકલ ગયે , રેલે મેં ફંસ કે બાપ બેચાર બિછડ ગયા “ કે પછી દુઃખ-સુખ પર આ સાવ સરળ શેર જુઓ “ દુઃખ કો બહુત સહેજ કે રખના પડા હમે , સુખ તો કિસી કપૂર કી ટીકીયા સા ઉડ ગયા “ પણ મૂળ તો દુષ્યંત પરિવર્તનનો કવિ , ક્રાંતિનો કવિ એટલે “ મૈ બેપનાહ અંધેરો કો સુબહ કૈસે કહું , મૈ ઇન નજારો ક અંધા તમાશબીન નહિ “ જેવું એ જ લખી શકે . કે પછી પોતાની કવિતા જ આંદોલનનું માધ્યમ છે એવું માનતા એ લખે છે કે “ મેરી જુબાન સે નીકલી તો સિર્ફ નઝમ બની , તુમ્હારે હાથ મેં આઈ તો એક મશાલ હુઈ “ કે “ મુજ્મે રહેતે હૈ કરોડો લોગ ચુપ કૈસે રહું , હર ગઝલ અબ સલ્તનત કે નામ એક બયાન હૈ “.. અને આ વાત એટલી હદ સુધી સાચી છે કે આટલા વર્ષો પછી આજે પણ કોઈ પણ વિરોધ પ્રદર્શન કે રેલી માં દુષ્યંતની “ કૌન કહેતા હૈ આસમાં મેં સુરાગ નહિ હો શકતા , એક પત્થર તો તબિયત સે ઉછાલો યારો “ કે પછી “ હો ગઈ હૈ પીર પર્બત સી પીઘલની ચાહિયે. ઇસ હિમાલય સે કોઈ ગંગા નિકલની ચાહિયે. મેરે સીને મેં ના સહી તો તેરે સિને મેં સહી,હો કહીં ભી આગ, આગ જલની ચાહિયે.” કે “ સિર્ફ હંગામા ખડા કરના મેરા મકસદ નહીં, મેરી કોશિશ હૈ કી યે સૂરત બદલની ચાહિયે. “ કવિતાઓ અચૂક લલકારાય જ છે . એમની કવિતાઓ જાણે કોઈ આંખમાં આંખ નાખીને લલકારતુ હોય એવી છે . એમની કવિતાઓ માનો કે દરેક યુગમાં લાગુ પડે એવી છે . દુષ્યંતની મોટાભાગની રચનાઓ એમના અંતિમ સમયમાં લખાયેલી છે . એ વખતની ઉર્દુ ગઝલોના ચોકઠાંને તોડીને પણ એની સુંદરતા એમ જ રાખીને સામાન્ય માનવીની બોલચાલની ભાષામાં કહેવાયેલી દુષ્યંતની ગઝલો એકવાર વાંચો પછી વારંવાર વાંચવી ગમે એવી છે . ૪૨ વર્ષની નાની ઉમરમાં ચાલી નીકળેલા આ ક્રાંતિકારી અને પરિવર્તનશીલ કવિ – લેખક આજે પણ એટલા જ પ્રસ્તુત છે એ જ તો છે કવિતાની – શબ્દોની સાચી તાકાત …!! એમની જ અતિપ્રચલિત આ પંક્તિઓ સાથે દુષ્યંતને યાદ કરીએ ‘તૂ કિસી રેલ સી ગુઝરતી હૈ, મૈં કિસી પુલ સા થરથરાતા હૂં “…!!!

વિસામો :

“ એક ચિનગારી કહી સે ઢુંઢ લાઓ દોસ્તો , ઇસ દિયે મેં તેલ સે ભીગી હુઈ બાતી તો હૈ “

અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૧ સપ્ટેમ્બર ૨૦૧૯ )

ઓનલાઈન મનોરંજન : ઇસમેં ડ્રામા હૈ , કોમેડી હૈ , એક્શન હૈ , રોમાન્સ હૈ !!!!!!

Featured

ઓનલાઈન મનોરંજન : ઇસમેં ડ્રામા હૈ , કોમેડી હૈ , એક્શન હૈ , રોમાન્સ હૈ !!!!!!

અક્ષયકુમારની મંગળની વાત અને સ્ત્રી શશ્ક્તીકરણની હીટ વાર્તા
કહેતી ‘ મિશન મંગલ ‘ થીયેટરોમાં સડસડાટ ચાલી રહી છે . ૩૨ કરોડમાં જ
બનેલી આ ફિલ્મે પહેલા જ દિવસે જ ૩૦ કરોડનું કલેક્શન કરી લીધું છે અને
પહેલા દિવસના કલેકશનના આંકડા અને રિવ્યુઝ જોતા એક વાત તો નક્કી છે કે
ભારતની મનોરંજનપ્રેમી જનતાને આ સ્પેસ ફિલ્મ યા તો એમ કહો ને કે સાઈ-ફાઈ
મુવી ગમી ગયું છે . કોઈ પણ એક ફિલ્મ કે એની વાર્તા હીટ થાય એટલે આપણે
ત્યાં એના જેવી કે એવી જ વાર્તાઓ બનવાની ચાલુ થઇ જાય છે એટલે મંગળના આ
મસ્ત મિશનની વાત પરથી હવે સોપ ઓપેરા ક્વીન એકતા કપૂરે પણ એક વેબ સીરીઝ “
એમઓએમ “ ( મિશન ઓવર માર્શ ) ની જાહેરાત કરી દીધી છે . એના ટીઝર મુજબ તો
ફિલ્મની જેમ જ આ વેબ સીરીઝમાં પણ ચાર સ્ત્રી વૈજ્ઞાનિકોની જ વાત હોય એવું
લાગે છે . બાલાજીના જ ઓલ્ટ બાલાજી ડીજીટલ પ્લેટફોર્મ પર સ્ટ્રીમીંગ થનારી
આ વેબસીરીઝ અક્ષયના મિશન મંગલ જેટલી સક્સેસફૂલ થાય છે કે નહિ એ તો સમય જ
કહેશે પણ ડીજીટલ પ્લેટફોર્મનું આ માધ્યમ હવે હરણફાળ ભરી રહ્યું છે એ
નક્કી છે અને એનું એક તાજું જ ઉદાહરણ છે ‘ સેક્રેડ ગેમ્સ – સીરીઝ ૨ “ નું
ધમાકેદાર , દર્શકોમાં ઉત્સુકતા જગાડનારૂ અને ઉત્સાહપૂર્વકનું ઓપનીંગ
..!!

ધમાકેદાર એટલા માટે કહી શકાય કે ડીજીટલ પ્લેટફોર્મ પર બનેલી
અત્યાર સુધીની બધી જ સિરીઝોમાં આ સૌથી ખર્ચાળ છે એવું કહેવાય છે . મીડિયા
રીપોર્ટ મુજબ સેક્રેડ ગેમ્સ-૨ પાછળ અધધધ કહી શકાય એટલો ૧૦૦ કરોડનો ખર્ચ
નેટફ્લીક્સે કર્યો છે , આટલા ફદીયામાં તો ત્રણ મિશન મંગલ બની જાય પણ ના ,
ડીજીટલ માધ્યમની આ હીટ સીરીઝના નિર્માણમાં કોઈ કચાસ નથી રાખવામાં આવી .
લગભગ ૩૫૦૦ લોકોના કાફલા સાથે સેક્રેડ ગેમ્સ-૨ ને પંદર જેટલા દેશ-વિદેશના
લોકેશનો પર શૂટ કરાઈ છે . જેમાં મુંબઈ , દિલ્હી જેવા દેશી અને નૈરોબી ,
કેપટાઉન અને જોહનિસબર્ગ જેવા વિદેશી લોકેશનો પણ સામેલ છે . આ પાંચ શહેરના
૧૧૦ લોકેશનો પર લગભગ ૧૧૦ દિવસના શુટિંગ કરીને ૪૦૦ મીનીટની આ વેબ્સીરીઝ
બની છે . સેક્રેડ ગેમ્સ-૧ ની અપાર સફળતા પછી નિર્માતા અને દર્શકોને પણ
સીરીઝ-૨ પર ખુબ જ ઉત્સુકતા છે . જો કે પહેલો એપિસોડ ૧૫ ઓગસ્ટે રીલીઝ થઇ
ચુક્યો છે અને પ્રતિભાવો મિશ્ર છે પણ વેબ સીરીઝોમાં થાય છે શું કે એ ધીમે
ધીમે જ જામવાની . જેમ જેમ વાર્તા અન્ફોલડ થાય એમ એમ ..!!

ખેર વાત અહી સેક્રેડ ગેમ્સ કે ત્રિવેદી બચેગા કી નહિ એની નથી
કરવાની પણ મનોરંજનના આ નવા માધ્યમે ભરેલા મોટા ડગલા પર કરવાની છે . આ જ
જગ્યાએ લગભગ છએક મહિના પહેલા ડીજીટલ પ્લેટફોર્મ પર લખ્યું ત્યારે એ અંદાજ
પણ આપવામાં આવેલો કે મનોરંજનનું આ નવીન માધ્યમ દુનિયાભરમાં એક નવી જ
દિશાઓ ખોલવાનું છે અને થયું છે પણ એવું જ . સેક્રેડ ગેમ્સ-૨ નો જ દાખલો
લ્યો ને . જેવી ૧૫ ઓગષ્ટે સીઝન ૨ નો પહેલો એપિસોડ સ્ટ્રીમ થયો કે સોશિયલ
મીડિયામાં ચારેકોર ‘ વી આર વોચીંગ ‘ કે ‘ આઈ એમ વોચીંગ સેક્રેડ ગેમ્સ-૨ ‘
જેવા સ્ટેટ્સ – હેશટેગ અને પોસ્ટો છવાઈ ગઈ . કેમ જાણે લોકો એની આતુરતાથી
રાહ જોતા હતા અને કદાચ આ જ કારણ છે કે સેક્રેડ ગેમ્સ-૨ ના નિર્માતાઓએ ૧૦૦
કરોડનો દાવ લગાવ્યો છે . વાત ખાલી નેટફ્લીક્સની નથી પણ ભારતીય વેબસીરીઝ
જગતમાં એના સિવાય પણ એમેઝોન , અલ્ટ બાલાજી . જેવા બીજા નામો પણ સામેલ છે
અને બધા પ્લેટફોર્મ પર કઈ ને કઈ રોચક , મનોરંજક ચાલી જ રહ્યું છે .

સેક્રેડ ગેમ્સ-૨ જેવું જ એમેઝોન પ્રાઈમ વિડીયોની સીરીઝ ‘ મિરઝાપુર
‘ માટે કહી શકાય . પંકજ ત્રિપાઠી અને દીવ્યેંદુની દમદાર એક્ટિંગવાળી આ
વેબસિરીઝે એમેઝોનને લાઈટમાં લાવી દીધેલું . જેમ સેક્રેડ ગેમ્સ – ૧ થી
સૈફઅલી ખાનની ડૂબતી કેરિયરને નવજીવન મળ્યું એમ જ મિરઝાપુરથી પ્રાઈમ
વિડીયો વધુ ફેમસ થયો . એવું નથી કે આ ઓનલાઈન પ્લેટફોર્મ પર ખાલી સીરીઝો જ
સ્ટ્રીમ થાય છે , એમ તો મુવીઝ . ન્યુઝ અને બીજું પણ ઘણું બંધુ સ્ટ્રીમ
થયા જ કરે છે પણ લાંબી સીરીયલો જોવાની કડાકુટોમાંથી બચાવતી આ નાની-નાની (
૮ થી ૧૨ એપિસોડ ઓન્લી ) સીરીઝોએ મનોરંજન માંગતા લોકોનું દિલ જીતી લીધું
છે એમાં ના નહી . અને સેક્રેડ ગેમ્સ કે મિરઝાપુર જેવી બીજી ઘણી બધી વેબ
સિરીઝની સફળતા અને આ ડીજીટલ પ્લેટફોર્મની તાકાત જુવો કે કરણ જોહર જેવા
બોલીવુડના મોટા ફિલ્મ સર્જકો પણ હવે આ ડીજીટલ દુનિયામાં કદમ માંડવા તૈયાર
છે . જી હા કરણે લેખક અમીશ ત્રિપાઠીની શંકર ભગવાન પરની મશહુર પુસ્તક
સીરીઝ ‘ શિવા ટ્રાયોલોજી ‘ ના રાઈટ ખરીદી લીધા છે અને સંભળાય છે કે હવે એ
એના પરથી એક ભવ્ય વેબ સીરીઝનું નિર્માણ કરવાનો છે . જો કે આ કન્ટેન્ટ જ
એવું છે કે બધાને પોતાની ચોઈસ મુજબ જોવા મળી જાય . આમાં ડ્રામ , એક્શન ,
કોમેડી , રોમાન્સ , ધર્મ બધું જ છે હજુ સુધી સેન્સરની પકડથી દુર હોવાને
લીધે ડીજીટલ પ્લેટફોર્મ વિવાદોમાં પણ સપડાય તો જાય છે જ પણ ધીરે ધીરે
પોતાની જવાબદારી સમજીને સારા શોઝ વડે મનોરંજનના એક મજબુત માધ્યમ તરીકે પણ
ઉપસી રહ્યું છે .

આવો થોડી આગામી અને કરંટ વેબસીરીઝો પર નજર નાખીએ જે કદાચ તમને ને
મને જોવી ગમશે. સૈફ – નાવાઝુદીન –પંકજ ત્રિપાઠી જેવા કલાકારોવાળી સેક્રેડ
ગેમ્સ-૨ વિષે આગળ વાત તો કરી જ દીધી પણ ભલામણ છે કે જો સીરીઝ-૨ જોવાના
હોવ તો પહેલા સીરીઝ-૧ જોઈ લેજો જેથી રેફરન્સ જળવાઈ રહે . સેક્રેડ ગેમ્સ
જેવી જ એક રીકમાન્ડેડેડ સીરીઝ છે મિરઝાપુર કે જેના વિષે પણ આગળ વાત થઇ
ચુકી છે . બીલાલ સિદ્દીકી ની બેસ્ટ સેલિંગ બુક પર આધારિત અને ચાર ભારતીય
ખુફિયા અધિકારીઓની વાત કહેતી સીરીઝ ‘ બાર્ડ ઓફ બ્લડ “ સપ્ટેમ્બરમાં
સ્ટ્રીમ થશે જેમાં પહેલીવાર ઇમરાન હાશમી ડીજીટલ પ્લેટફોર્મમાં ડેબ્યુ
કરશે આ ઉપરાંત બોલીવુડ નાયિકા કીર્તિ કુલ્હારી પણ દેખાશે . બાહુબલી ફિલ્મ
તરીકે તો સુપરહીટ થઇ જ છે પણ નેટફ્લીક્સ ની સીરીઝ “ બાહુબલી : બીફોર ધ
બીગીનીંગ “ માં ફિલ્મ કરતા પણ ૭૫ વર્ષ પહેલાની વાર્તા કહેવામાં આવી છે ,
આનંદ નીલાકાંત ની નોવેલ ‘ ધ રાઈઝ ઓફ શીવાગામી ‘ પર બેઝ્ડ હોવાથી દર્શકોને
માહિષ્મતી સામ્રાજ્ય કેમ બન્યું અને શીવાગામી ની લાઈફ વિષે જાણવા મળશે .
અક્ષયની ફિલ્મ “ રુસ્તમ “ તો આવી ગઈ અને હીટ પણ થઇ ગઈ , એ જ વાર્તા પરથી
અલ્ટ બાલાજી પર ‘ ધ વર્ડીકટ : સ્ટેટ વર્સીસ નાણાવટી ‘ આવશે . ૩૦ ઓગષ્ટે
નાના પડદાની ક્વીન દિવ્યાંકા ત્રિપાઠી ‘ કોલ્ડ લસ્સી ચીકન મસાલા ‘ નામની
રોમેન્ટિક કોમેડીમાં દેખાશે . અલ્ટ બાલાજી પર જ ઉભરતા કલાકાર વિક્રાંત
મેસી ની ‘ બ્રોકન બટ બ્યુટીફૂલ ‘ ની સીઝન ૨ આવશે . તો અલ્ટ બાલાજી પર જ ‘
મેન્ટલહુડ ‘ સીરીઝ દ્વારા કરિશ્મા કપૂર ડેબ્યુ કરશે . મિરઝાપુર-૨ તો
લાઈનમાં છે જ પણ એમેઝોન પ્રાઈમ પર ક્રિકેટના કૌભાંડો પર બનેલી ‘ ઇનસાઇડ
એજ ‘ નો બીજો ભાગ પણ આવી રહ્યો છે તો બ્રિધ ની સીઝન ૨ માં અભિષેક બચ્ચન
દેખાશે . નાના પરદા અને ગુપચુપ શરૂઆત કરીને આ ઓનલાઈન માધ્યમ હવે વધુ
વિશાળ , ભવ્ય , શશક્ત અને લોકપ્રિય બની ગયું છે કેમકે આ લોકભોગ્ય વાતો ,
ઇઝી અવેલીબીલીટી અને ડીફરન્ટ કન્ટેન્ટ ને લીધે દર્શકોમાં ફટાફટ ડાઉનલોડ
થઇ રહ્યું છે .

  • અજય ઉપાધ્યાય ( ગાંધીનગર સમાચાર -કોલમ “રઝળપાટ ” ૧૮ ઓગષ્ટ ૨૦૧૯ )

નગર નામે “ ગાંધીનગર “ !!!!!!

Featured

નગર નામે “ ગાંધીનગર “ !!!!!!

આ લખનાર બારેક વર્ષ પહેલા આ શહેરમાં રહેવા આવ્યો ત્યારે ઘર આગળના ચોકઠામાં ( અહી ચારે તરફ મકાનોની આગળના ખુલ્લા મેદાનને ચોકઠું કહે છે ) માંડ એકાદ કાર પડેલી રહેતી જ્યારે આજે એ જ ચોકઠામાં નહિ નહિ તોયે દસેક કાર પડેલી હોય છે – ઓલમોસ્ટ ઘર દીઠ એક કાર યુ કનો ….!!! એ વખતના લાઈટના થાંભલાઓના પીળા બલ્બ કે બહુ બહુ તો મોટા બલ્બનું સ્થાન હવે એલઈડી લેમ્પે લઇ લીધું છે …!!! ગણીને દસેક રેસ્ટોરન્ટની જગ્યાએ આજે એક આખો રોડ જ ખાઉગલી તરીકે ઓળખાય એટલા રેસ્ટોરન્ટથી ભરચક છે અને દર મહીને ખુલતા ૩-૪ નવા ભોજનસ્થળો તો લટકામાં …!!! શહેરની બહાર તો વસ્તી નામે ઓલમોસ્ટ મસ મોટું મીંડું હતું ત્યાં આજે ગાંધીનગર બહારનો વિસ્તાર મૂળ શહેર કરતા પણ મોટો અને વસ્તીથી ફાટફાટ થઇ રહ્યો છે , અને હવે તો ન્યુ-ગાંધીનગર અથવા તો ગાંધીનગર પાર્ટ-૨ બનવાની વાતો સંભળાઈ છે ….!!! પગારદારોના શહેર તરીકે ઓળખાતું ગાંધીનગર હવે ટીસીએસ અને બીજી કંપનીઓને લીધે આઈટી અને આંતરરાષ્ટ્રીય કક્ષાની યુનીવર્સીટીઓ અને દેશની પ્રતિષ્ઠિત શિક્ષણ સંસ્થાઓની શાખાઓને લીધે શિક્ષણના હબ તરીકે જાણીતું થઇ ચુક્યું છે …!!! આ નગર રાજાના કુંવરની જેમ દિવસે નહિ એટલું રાત્રે વધતું થઇ ગયું છે …!! આ શાંત – હરિયાળા અને વેલ પ્લાન્ડ ગાંધીનગરની પહેલી ઈંટ મુકાઈ એને ૫૫ મુ વર્ષ બેઠું …… શુભકામનાઓ …!!!

આ હરિયાળા નગર પરથી યાદ આવ્યું કે નો ડાઉટ ગાંધીનગર હવે પહેલા જેવું હરિયાળું કદાચ નથી રહ્યું પણ હજુ આજેય એની ગ્રીનરી ઓછી તો નથી જ થઇ . હજુ આજે પણ સવાર સવારમા નિતમિતપણે પાંચેક કિલોમીટર વોકિંગ કરી નાખો તો ગેરંટીથી આયુષ્યના પાંચેક વર્ષો વધે એટલી તાજી અને શુદ્ધ હવા તો ગાંધીનગરની આબોહવામાં જળવાઈ રહી જ છે . વિકાસની હરણફાળમાં ભલે ગાંધીનગરમાં માથાદીઠ વૃક્ષોની સંખ્યામાં થોડો ઘટાડો થયો હોય પણ હજુ આજેય ઓલ્ડ ગાંધીનગર યાની કી મૂળ ગાંધીનગરમાં ઘરઆંગણે વવાતા અને લહેરાતા વૃક્ષોની સંખ્યા ભલે વધી ના હોય પણ ઘટી પણ નથી જ ..!! પુનિતવન , સરિતાઉદ્યાન અને નમૂનારૂપ સેન્ટ્રલ વીસ્ટા ગાર્ડન ઉપરાંત દરેક સેક્ટરોમાં રહેલા બગીચાઓ સીના તાન કે હરિયાળીની આલબેલ પોકારે જ છે . નગરની રચના જ એવી છે કે લગભગ દરેક સેક્ટરમાં વૃક્ષોની હરિયાળી જળવાઈ રહે છે . હા , સ્માર્ટસીટી અને ડેવલોપસીટી બનવાની લ્હાયમાં સિક્સલેન્સ અને શોપિંગસેન્ટરોને લીધે વૃક્ષો નાશ પામે છે પણ ગ્રીનરી બરકરાર છે જ . એ તો શું છે વિનાશ વગર વિકાસ શક્ય પણ ક્યા છે ?

શરૂઆતમાં ઓલમોસ્ટ મફત જમીનના પ્લોટો આપવા છતાં પણ ગાંધીનગરમાં નહિ ટકતા સરકારી કર્મચારીઓના એ જ પ્લોટોના આજે કરોડ ઉપરના દામો થઇ ગયા છે . આયોજનના અભાવ અને પ્રાથમિક તકલીફો વચ્ચે પણ ગાંધીનગરની બહાર એક નવું ગાંધીનગર ધબકતું થઇ ગયું છે કેમકે ગાંધીનગર મૂળે તો વોલ્ડસીટી જ કહેવાય એટલે સિટીમાં તો ડેવલોપીંગનો ખાસ કઈ સ્કોપ હવે રહ્યો નથી અને એમાં પણ સરકારી નિયંત્રણો .. ખેર એક સમયે શુષ્ક અને નીરસ ગણાતા આ નગરની હવે લીમીટેડ તો લીમીટેડ પણ નાઈટલાઈફ છે . ઘ-૫ પર ઉભા રહેતા એકાદ શીંગ-ચણા , ભાજીપાઉં કે બીજી લારીઓના જમાનાથી આગળ નીકળીને ગાંધીનગરમાં લગભગ બધી જ બ્રાન્ડેડ ફૂડચેઈનની બ્રાન્ચીસ ખુલી ગઈ છે . એક જમાનામાં અમદાવાદ સુધી લાંબા થતા સ્વાદ શોખીનો માટે હવે અહીયાજ ભાતભાતના વ્યંજન પીરસતી બ્રાન્ડેડ રેસ્ટોરન્ટ આવી ગઈ છે . ઘણા લાંબા સમય સુધી વિકાસ અને આધુનીકરણના નામે કશું જ ન થનાર આ નગરમાં આજે ભવ્ય શોપિંગમોલ્સ , મલ્ટીપ્લેક્સીસ , મલ્ટી સ્પેશીયાલીટી હોસ્પિટલ્સ અને હોટેલ-રેસ્ટોરન્ટની ભરમાર છે . એક સમયે મુખ્ય માર્ગો પર દેખાતા છૂટક વાહનોની જગ્યાએ આજે ટ્રાફિક સિગ્નલો મુકવા પડે એટલો ટ્રાફિક વધી ગયો છે . હવે ગાંધીનગર સચિવાલય જવા ટાઈમે કે છુટવા ટાઈમે જ ભરચક નથી લાગતું પણ અર્ધી રાત્રે પણ આઉટીંગ માટે જાણીતું થઇ ચુક્યું છે . ખાલી વિકએન્ડમાં જ દેખાતી પબ્લિક હવે ભૂતકાળ બની ચુકી છે . હા હજુ ઓલ નાઈટ પાર્ટી માટે આ નગર તૈયાર નથી .

ધૂળિયાનગર …આંધીનગર …કર્મચારીનગર જેવા ટેગ ને હટાવીને ગાંધીનગર સ્માર્ટસીટી –ગ્રીનસીટી-સોલારસીટી તરફ કદમ માંડી ચુક્યું છે પણ આ બધા વચ્ચે પણ એની સાંસ્કૃતિક વિશેષતા અકબંધ છે . શહેરમાં સાહિત્ય-સંગીત-સમાજસેવાના કામો કરતી ડઝનબંધ સંસ્થાઓ આ નાનકડા નગરને સાંસ્કૃતિક રીતે ધબકતી રાખે છે . અમદાવાદવાળા પણ ખાસ જેને માણવા અચૂક આવે જ એવા કલ્ચરલ ફોરમ સંસ્થાની નવરાત્રીની ઉજવણી હોય કે પછી પ્રખ્યાત ગુજરાતી નાટકો , બોલીવુડના હીટ ગાયકોના પ્રોગ્રામો હોય કે પછી કાઠીયાવાડી ડાયરાઓ અહી સંસ્કૃતિ અને મનોરંજન વધતું રહ્યું છે . અક્ષરધામ તો લગભગ બધા જ પ્રવાસીઓના લીસ્ટમાં હતું જ પણ હવે મહાત્મા મંદિર અને અચૂક જોવા જેવી દાંડીકુટીર નગરના જોવાલાયક સ્થળોમાં સામેલ થઈ ચુકી છે . આધુનિક ક્રિકેટ સ્ટેડીયમ તો ઓલમોસ્ટ બની જ ગયું છે અને શહેરના ક્રિકેટરોએ રાષ્ટ્રીય કક્ષાએ તો કલાકારોએ પણ હિન્દી-ગુજરાતી ફિલ્મોમાં કાઠું કાઢ્યું છે .

મૂળે તો ગુજરાતનું પાટનગર રહ્યું એટલે રાજકારણ અને રાજકારણીઓનો અખાડો કે એપિક સેન્ટર જ છે પણ રાજકારણીઓ અને રાજકારણ બીકોઝ ઓફ એમના નોખા ને જુદા કાર્યસ્થળોને લીધે વેરી ઓનેસ્ટલી નગરજનો ને બહુ નડતા પણ નથી . હા ૨૦૧૦મા કોર્પોરેશન બન્યા પછી રાજકીય મલ્લકુસ્તી આ નગરમાં ધીરેધીરે પગપેસારો કરતી થઇ ગઈ છે . છતાયે હજુયે મોટાભાગનું પોલીટીક્સ તો સચિવાલય કે વિધાનસભા પુરતું જ માર્યાદિત છે …!! હા રાજ્યભરના વિરોધકારો કે રેલીકારો માટે સરકાર સામે પ્રદર્શન કરવા ગાંધીનગર જ આવવું પડે એટલા પુરતું નગર રાજકારણમય થઇ જાય એ અલગ વાત છે ..!! આજુબાજુના અનેક ગામોની જમીનો પર વસેલા આ પંચરંગીનગર નામે ગાંધીનગરની પ્રજા પણ પચરંગી છે . સરકારી નોકરી માટે ગુજરાતભરમાંથી અને ખાનગી નોકરીને લીધે હવે તો ઘણા બધા લોકો બીજા સ્ટેટ્સમાંથી આવીને વસેલા છે એટલે ગાંધીનગરમાં ચોરે ને ચોંટે આઈ મીન ગાંધીનગરના સેકટરે સેકટર ને સોસાયટી સોસાયટીમાં પાસપડોશમાં મરાઠી-બંગાળી-તમિલ-પંજાબી કે બીજા પ્રદેશના લોકો ગુજરાતીઓની સાથેસાથે જ વસેલા છે એને લીધે ગાંધીનગર રીઅલમાં મલ્ટી-કલ્ચરલ નગર બન્યું છે . છે બીજા નગરો કે વિકસિત નાગરોની જેમ ગાંધીનગરના પણ પોતાના પ્રશ્નો છે . ગેરકાયદે દબાણો – ઝુપડાઓ , રખડતા ઢોરો , ટ્રાફિકની વધતી જતી સમસ્યા જેવા પ્રશ્નો માથું ઊંચકી રહ્યા છે પણ ઓવરઓલ હજુ પણ આ નગર શાંત છે …હરિયાળું છે ….રણીયામણું છે ….અને ખાસ તો કોઈ પણ રમખાણો કે બીજા એવા બનાવો વખતે હજુ સુધી ક્યારેય કર્ફ્યું નાખવો ના પડ્યો હોય એટલું સલામત પણ છે …!! સાત આડા અને સાત ઉભા રસ્તાઓથી ચંડીગઢ પેટર્ન મુજબ વિકસાવેલું અને એક સમયે ધોળે દિવસે પણ સુમસામ ભાસતું આ નગર હવે ધીરે ધીરે મહાનગર અને સ્માર્ટ સીટી બનવા જઈ રહ્યું છે તો પણ હજુ સુધી તો આ નગર નામે ગાંધીનગરના લોકો ખોટી હાયહોય – ભીડભાડ – દેખાદેખી-હુંસાતુસી થી અલિપ્ત રહીને ગ્રીનસીટી – શાંતસીટી નો આનંદ ઉઠાવી રહ્યા છે ….!!! ને એ જ આ નગરની સાચી મજા છે ..!!!

વિસામો :

ગાંધીનગર સોલાર સીટી તો બનવા જઈ જ રહ્યું છે અને ઠેકઠેકાણે મુકેલા જી-બાઈક સાઈકલ સ્ટેન્ડની સાઈકલોનો વપરાશ પણ નગરજનો હોંશેહોંશે કરી રહ્યા છે એવામાં પર્યાવરણ ક્ષેત્રે ઓર એક કદમરૂપે ૧૫ ઓગસ્ટથી ગાંધીનગર-અમદાવાદ વચ્ચે ઇલેક્ટ્રિક બસો શરુ થઇ રહી છે .

  • અજય ઉપાધ્યાય ( ગાંધીનગર સમાચાર કોલમ ” રઝળપાટ ” ૩ ઓગષ્ટ ૨૦૧૯ )

ઓનલાઈન ફૂટપ્રિન્ટ : આ ‘ લીકેજ ‘ કિમતી છે !!!!!!!

Featured

ઓનલાઈન ફૂટપ્રિન્ટ : આ ‘ લીકેજ ‘ કિમતી છે !!!!!!!

જેવું તમે ક્યાય ઓનલાઈન કોઈ ઇન્સ્યોરન્સ પ્રીમીયમ જાણવા તમારી ડીટેલ નાખી કે પત્યું બીજી જ મીનીટે જો ઈમેલ આપ્યો હોય તો ઈમેલ પર અને મોબાઈલ નંબર આપ્યો હોય તો એસએમએસ માં કે ઘણી વાર તો ડાયરેક્ટ કોલ કરીને જ માર્કેટિંગ શરુ ……નવી કાર , ફ્રીઝ કે બીજી કોઈ ચીજવસ્તુ લેતી વખતે જો ડીલરને ઈમેલ કે મોબાઈલ નમ્બર આપ્યો તો થ્યું તમને લોનોની ઓફરો આવવાનું થાય ચાલુ ….નવી કાર લેવા કે જૂની વેચવા ક્યાય ઓનલાઈન ઇન્ક્વાયરી માં આવી ચીજો મૂકી તો ફટાક કરતાંક ને તમારા મોબાઈલ કે ઇમેલમાં ઓફરોનો રાફડો ફાટી નીકળે …..!!!! હજુ આમાં તો તમારા ઈમેલ માં ‘ તમે જીત્યા છો ૧૦ કરોડ ‘..’તમને મળી છે આઈટી ની નોટીસ ‘…’ તમને મફતમાં મળે છે નવું ક્રેડીટ કાર્ડ ‘ વગેરે વગેરે જેવા સ્પામ ઈમેલ કે ‘ હાય હું છું ફલાણી …મારી સાથે દોસ્તી કરશો ‘…’ તમારા માટે ફલાણી ઓનલાઈન શોપિંગએપમાં જમા થયા છે ૧૦૦૦ પોઈન્ટ્સ ‘…’ તમારો ઓનલાઈન પાસવર્ડ હેક થયો છે બદલવા ક્લિક કરો આ લીંક’…જેવા સ્પામ એસએમએસ નો રાફડો ફાટી નીકળે તમારા મેસેજ બોક્ષમાં …!!! અને હા આ બધા ઉપરાંત ‘ અનાથ બાળકોને મદદ કરો ‘…’ તમને મળે છે સસ્તી લોન ‘….’ સર તમારે કાર લેવાની છે તો અમારી પાસે છે આકર્ષક ઓફર ‘ જેવા વણમાંગ્યા ઇરીટેટીંગ ટેલીફોન કોલ્સ તો લટકામાં ….!!!

સાલું આપણને થાય કે હજુ તો ફ્રીઝ ઘરે પણ નથી પહોચ્યું ત્યાં લોનો મળવા માંડી ..જબરું ઝડપી તંત્ર છે આ લોકોનું …!!! પણ સાથે સાથે એ વિચાર પણ આવે કે આપણો નમ્બર કે ઈમેલ આટલી જલ્દી માર્કેટમાં ફરવા કેમનો માંડ્યો …? કેમકે જ્યાં પણ આ આપેલો ત્યાં તો ગેરેંટી આપેલી કે ‘ વી વિલ નોટ યુઝ યોર પર્સનલ ડીટેલ ‘….તો આ થયું કેમનું ? તો ભાઈઓ ઓર બહેનો આ છે આજના જમાનાની લેટેસ્ટ ચોરી ટેકનીક …જીસકો હમ બોલતે હૈ ડેટા ચોરી …!!! ડેટા લીક એવા રૂપાળા હેડીંગો તો વારતહેવારે નહિ પણ લગભગ રોજબરોજ વાંચવા મળે જ છે . ઓનલાઈનની આ નવી અને એકદમ ભયંકર માયાજાળ છે અને આ માયાજાળનો ભોગ હું ને તમે વારંવાર બનીએ છીએ . ફોન કરીને પીન નંબર માંગીને ખાતામાંથી રૂપિયા ઉપડી જાય એવા બનાવો ના બને ત્યાં સુધી આપણે આને હલકામાં લેવાના જ અને બીજો કોઈ છૂટકો છે પણ નહિ કેમકે ડીજીટલ દુનિયામાં આપણી ફૂટપ્રિન્ટ લગભગ માઉસની દરેક ક્લિક પર ચારેકોર પથરાતી જતી હોય છે અને અઘરી વાત એ છે કે એ ફૂટપ્રિન્ટ જ ચોરોને આપણા તરફ પહોચાડી દેતી હોય છે .

અત્યારે ફેસએપ નામની મોબાઈલ એપ ધૂમ મચાવી રહી છે . માણસને જુવાન થવાની ઘેલછા હોય પણ આ એપ દ્વારા એ પોતાને ૨૦-૩૦ વર્ષ પછી કેવો દેખાશે અને કેટલો બુઢ્ઢો દેખાશે એનો હુબહુ ચિતાર આપે છે . લોકોને મજા પડી ગઈ છે …એપ ના ફિલ્ટર વડે પોતાનો બુઢાપાનો ફોટો બનાવી બનાવીને અપલોડ કર્યા જ કરે છે અને આમાં શું આમ કે શું ખાસ ? ભલભલા સેલેબ્સ પણ સામેલ છે . સારું છે , ઇટ્સ ફન પણ સાયબર નિષ્ણાતો કહે છે કે આ એપ તમારો ડેટા ચોરે છે . હવે તમે એમ કહેશો કે એમાં નવું શું છે ? મોબાઈલ કે નેટ પર અવેલેબલ દરેક એપ અને લગભગ બધી જ શોશિયલ નેટવર્કિંગ સાઈટ ડેટા ચોરે જ છે . કેમ હજુ હમણાં જ કેમ્બ્રિજ એનાલેટીકા અને ફેસબુકની મિલીભગત વાળી ડેટાચોરી નહોતી પકડાઈ ? જો કે આ ફેસબુક ડેટાચોરી પ્રકરણમાં લેટેસ્ટ એ છે કે અમેરિકાની યુએસ ફેડરલ ટ્રેડ કમીશને ૩૫ હજાર કરોડ રૂપિયાનો દંડ ફટકાર્યો છે . તમે ઓહો અને અધધધ એમ બોલીને મો પહોળું કરો એ પહેલા જણાવી દઉં કે ફેસબુક આ રકમ હસીખુશી ભરવા તૈયાર છે …!!! પૂછો કયું ? એ એટલા માટે કે આ ડેટાલીકથી ફેસ્બુકે કમાયેલી રકમનો આ માંડ ત્રીજો ભાગ છે એમ કહી શકાય . ઇવન ફેસ્બુકે આને પુરવાર કરતું નિવેદન એમના શેરહોલ્ડર માટે આપેલું કે ‘ ડોન્ટ વરી , આ રકમ આપણે પહેલેથી જ સાઈડમાં મૂકી રાખેલી – ફિકર નોટ “..!!! છે ને ડેટાચોરીના ધંધામાં ઘી-કેળા …!!!!

ઓકે બેક ટુ ફેસએપ એન્ડ અધર …!!! અસલમાં શું છે કે લગભગ દરેક એપ તમારા કોન્ટેક્ટ – ગેલેરી અને બીજી ચીજોનું એક્સેસ માંગી જ લે છે એટલે યુઝર્સ આ ફેસએપની બબાલમાં એમ જ પૂછે છે કે આમાં નવું શું છે ? બધા એપ આવું જ લખાવી લે છે . અમેરિકન સેનેટરે ફેસએપની ગોપનીયતા માટે કદાચ એટલે સવાલો ઉઠાવ્યા હશે કે આ એપ રશિયન છે અને ટ્રમ્પની ચૂંટણીમાં રશિયન સાઈબર કાફલો ચર્ચામાં હતો જ . ખેર જે હોય તે પણ એ હકીકત છે કે આ અને આના જેવા બીજા એપ્સ આપણી પર્સનલ માહિતીઓ સતત એકઠી કરતા રહેતા હોય છે . જો કે એપ ઇન્સ્ટોલ કરતી વખતે એક્સેસ આપવા માટે વિનંતી કરતા ટર્મ્સ એન્ડ કન્ડીશન કોણ વાંચવાનું છે ભલા ? જો ના વાંચતા હોવ ( એ શક્ય પણ નથી ) તો ખાલી નમુના માટે ફેસએપ ની ટી એન્ડ સી જ વાંચી લો . લખ્યું છે કે ‘ ફેસએપ ને હું અનુમતી આપું છું કે એ કોઈ પણ સામગ્રી અવાજ-ફોટો – ઓળખાણ – અંગત માહિતીનો ઉપયોગ ( મને પૂછ્યા વગર અને ક્યાય પણ ) કરી શકશે ‘ યુઝર્સ અને સાઈબર નિષ્ણાતો તો આથી આગળ વધીને એમ કહે છે કે યુઝર્સની ગેલેરી – મેસેજીસ-ઈમેલ-લોગીન બધું જ આ એપના હવાલે છે …!!! જો કે દરેક એપ ડેવલપર એમ કહીને છટકી જતા હોય છે કે આ માહિતી અમે અમારા એપની બહેતરી અને યુઝર્સને વધુ સારી સેવા આપી શકીએ એ માટે વાપરીએ છીએ પણ જગત ગવાહ હૈ કે આ સદંતર ખોટું છે …છે ને છે જ !!!

ખેર વાત ખાલી ફેસએપની નથી પણ ટીકટોક ને હેલો જેવા એપ પર પણ પસ્તાળ પડી જ રહી છે અને ડેટાચોરીની આ વાત વધુ ગંભીર બનશે કે નહિ એ ખબર નથી પણ હકીકત એ છે કે ઓનલાઈન ડેટાચોરી હવે આમ વાત થઇ ગઈ છે . સી સ્પામ લીંક અને ઓનલાઈન ફ્રોડ અલગ વાત છે કેમકે ઓનલાઈન ફ્રોડને તો કદાચ ટ્રેસ પણ કરી શકાય છે જ્યારે અહિયાં યુઝર્સની જાણબહાર એનો પર્સનલ ડેટા એવી રીતે બહાર વેંચાય છે કે એને તો ખબર પણ નથી હોતી . જો કે મોટાભાગના યુઝર્સ એમ કહી બેસતા હોય છે કે આપણી માહિતીઓમાં શું કમાઈ લેવાનું છે ? પણ હકીકત એ છે કે આવી માહિતીઓ અનેકો કામમાં વપરાય છે . ટેલી-માર્કેટિંગ કે ઈમેલ માર્કેટિંગ તો આનો એક ભાગ છે જ પણ એ સિવાય રાજકીય-આમાજીક-આર્થિક સર્વેક્ષણો માટે આવી માહિતીઓની ધૂમ માંગ છે . જે તે દેશ-સમાજ કે સમૂહના રાજકીય-સામાજિક-આર્થિક ટ્રેન્ડ જાણવા માટે આ માહિતીઓ અતિકીમતી તો છે જ . જો કે ક્રાઈમ સોલ્વ કરવાના ક્ષેત્રે પણ આવી ચોરી ઉપયોગી થઇ રહી છે તો કોઈ નવા સુધારા માટે પણ ઘણા ઓર્ગેનાઈઝેશન આવી માહિતીઓનો ઉપયોગ કરે છે . સાઈબર નિષ્ણાતો વાતચીત માટે સિક્યોર એપ વાપરો , સોફ્ટવેર અપડેટ રાખવો , ક્યા એપ્સે તમારી પર્સનલ ડીટેલ એક્સેસ કરવાનો હક્ક લીધો છે એની સમીક્ષા કરતી રહેવી , પાસવર્ડ મેનેજર વાપરવું કે પબ્લિક વાઈફાઈ વખતે સાવચેતી રાખવી જેવા ઉપાયો બતાવતા રહે છે પણ હકીકત એ છે કે ગમે એટલું ધ્યાન રાખો પણ તમારી ઓનલાઈન ફૂટપ્રિન્ટ તો છપાતી જ રહેવાની અને લાખ સિક્યોરીટી કરો તો પણ તમારો ડેટા વધતા ઓછા અંશે લીક થતો જ રહેવાનો …જ્યાં સુધી ડેટા પ્રોટેક્શન નો કોઈ કડક કાયદો ના બને ત્યાં સુધી સગવડ સાથે અગવડો તો આવવાની જ ….અને આવામાં તમારી અંગત માહિતીઓના એક્સેસ આપવામાં ખુદ કી અક્કલ લગાવો એ જ બેટર અને બેસ્ટ ઓપ્શન છે !!!!

વિસામો :

આ પહેલા 2012માં યુઝર્સની અંગત માહિતીઓ ઇધર-ઉધર કરવા માટે ગૂગલ પર 154 કરોડનો દંડ ફટકારાયો હતો

  • અજય ઉપાધ્યાય ( ગાંધીનગર સમાચાર – કોલમ #રઝળપાટ ૨૧ જુલાઈ ૨૦૧૯ )

અધુરપ ની મધુરપ..!!

Featured

અધુરપ ની મધુરપ..!!

હિન્દી કહેવત છે ને કે ‘ વક્ત સે પહેલે ઔર કિસ્મત સે જ્યાદા ના કિસી કો મિલા હૈ ના કિસી કો મિલેગા  “ કૈક એવું જ છે અધુરપમાં સમાયેલી મધુરપનું . હું ને તમે બન્ને બધું જ અને સઘળું જ મળી જાય એની ખેવના-ઈચ્છા તો હરહમેશ રાખીએ છીએ પણ બધું તો ક્યા કોઈને મળ્યું જ છે ? સર્વાંગ સંપૂર્ણ અને સંતોષી તો કોઈ છે જ નહિ એ હકીકત છે છતાં પણ આપણે કોઈ એક પૂર્ણતાને પામવા માટે પ્રયત્નો કરતા રહેતા હોઈએ છીએ . અને પછી ? એ પૂર્ણતા પ્રાપ્ત ના થાય તો ? મહેનત કર્યા પછી પણ એવું બને કે કોઈ એક ચોક્કસ ધ્યેય કે શિખર પર પહોચી ના પણ શકાય પણ એવા વખતે ઠાલો અફસોસ કે નિરાશા જન્માવ્યા વગર જો એમ વિચારી શકાય કે મહેનત તો કરી તો આ અધુરપમાં પણ મધુરપનો અહેસાસ થવાનો .

બરાબર છે કે એક લક્ષ્યને પામવા અથાગ પ્રયત્નો છતાં એ લક્ષ્ય મળે નહિ તો નિરાશા તો થાય જ પણ આ નિરાશાને પકડી રાખો તો થઇ રહ્યું કલ્યાણ …!!! ને એમાયે જો અફસોસ ભળે તો બેડા ગરક ..!! અફસોસ એ કરે જે હાથ પર હાથ રાખીને બેઠું હોય બાકી જેણે પ્રયત્નો કર્યા હોય એ તો ગર્વથી કહી શકે કે હારમાં પણ મારી જીત છે . અસલમાં શું છે કે અધુરપ જ જિંદગી જીવવાની અનેકો જડીબુટ્ટીઓ માંહેની એક અકસીર જડીબુટ્ટી છે . સંઘર્ષ વગર સિદ્ધિ નથી એ જેટલું સાચું છે એટલું જ સાચું એ પણ છે કે અધુરપ ને પામવા કરેલા પ્રયત્નો જ અમુક અંશે જિંદગી જીવ્યાનો એક ભાગ જ છે . અધુરપ ને ઓળખીને એને પૂર્ણતા તરફ પહોચાડવા માટે કરેલા પ્રયત્નો જ તો જિંદગીને વધુ ફોકસ્ડ , વધુ સંઘર્ષમય બનાવે છે . જીવવા માટે કોઇને કોઇ અધુરપ જોઈએ, જીવનમા કોઇ કમી જોઈએ, કોઇ ખોટ હોવી જોઈએ. અધુરપને પુરી કરવામા જ જીવનની મધુરપ સમાયેલી છે.

અને પૂર્ણ છે કોણ ? કુદરતે જ દરેકને કોઈને કોઈ અધુરપ સાથે મોકલ્યા છે , કારણ ? કારણ કે અધુરપ એ અસંતોષને જન્મ આપે છે અને એ અસંતોષ જ મને ને તમને પૂર્ણતા તરફ મહેનત કરવા પ્રેરિત કરે છે . અધુરપ ખરેખર તો જીવનને સતત ધબકતું રાખે છે , દોડતું રાખે છે . પૂર્ણતા પામ્યા પછી જીવન એક પ્રકારે સ્ટેબલ બની જાય પણ અધુરપ ને મધુરપમાં ફેરવવામાં જે મજા પડે એ મજા આ સ્ટેબલ જીવનમાં ના આવે . અધુરપ અને સંપૂર્ણતા ની વચ્ચે જે જીવાય છે એ જ છે સાચી મજા . અધુરપ તમને વિનમ્ર બનાવે છે , અધુરપ તમને નવું જાણવાની પાઠશાળાનો વિદ્યાર્થી બનાવે છે , અધુરપ તમને પૂર્ણતા ના મળે તો અપૂર્ણતાને વહાલી કરવાનો બોધપાઠ પણ આપે છે . અધુરપ ની આ જ મજા છે . હવે શું થશે ? એવા વિસ્ફારિત સવાલનો જવાબ મેળવવા જે પ્રયત્નો કરાય છે એ જ તો છે અધુરપને ઓળંગવાની સાચી મજા .

અને અધુરપ નો તો ક્યાં અંત જ છે ? સંબંધો , વિચારો , વર્તન , કાર્યો બધે જ આ અધુરપનો એરુ ફૂંફાડા મારતો જ હોય છે , એના અફસોસ અને નિરાશારૂપી લબકારાઓને અવગણીને પણ એને સંતોષના કરંડિયામાં કેદ કરવો જ પડે ….એ જ તો છે લાઈફની મધુરતાની મોટી નિશાની …!!  જીવનમાં ઘણી એવી ઇચ્છાઓ-આકાંક્ષાઓ છે જે ઉગતી રહે છે એમાંથી ઘણી પૂરી નથી પણ થતી , ઘણી એવી પણ છે કે જાણીએ છીએ કે ક્યારેય પૂરી નહી થાય અને ઘણી ઇચ્છાઓ અધુરી જ આનંદ આપતી હોય છે . અમુક અફ્સાનાઓ ખબર છે કે પુરા નહિ થાય તો એને ‘ કોઈ હસીન મોડ પે ‘ છોડી દેવાની મજા પણ મધુરતા જ છે . ઘણી અધૂરપો પૂરી થયા વગર પણ વધુ આનંદ આપતી હોય છે આવી અધુરપોના વિચારો કે વાતો પણ મધુરપ થી કમ નથી હોતી .

ઘણા સંબંધો અધૂરા જ હોય છે કે જેમાં એકબીજા કશુક શોધ્યા કરતા હોય છે પણ મળતું નથી હોતું તો ઘણા સંબંધો આ અધુરાપણાના ભાર નીચે તૂટી પણ જાય છે . કેમ ? કારણ કે જે અધુરપ છે એનો આનંદ કે સ્વીકાર કરવાને બદલે અધુરપ ને યાદ કરી કરીને સંબંધોની આસપાસ અફસોસની દીવાલો ચણ્યા કરે છે . અર્ધા ભરેલા પાણીના ગ્લાસ જેવી વાત છે ….ભરેલો જોવો છે કે ખાલી એ આપણા પર ડીપેન્ડ છે !!! બસ , અધુરપ ને ક્યાં એન્ગલથી જોવી એના પર જ જિંદગીની મધુરપ નો આધાર છે .

  • અજય ઉપાધ્યાય ( ગાંધીનગર ) ( “આપણું વિચારવલોણું ” જુલાઈ ૨૦૧૯ )

વિશ્વકપને રહ્યું વ્હેત છેટું : વેલ પ્લેય્ડ ટીમ ઇન્ડિયા !!!!!!!

Featured

વિશ્વકપને રહ્યું વ્હેત છેટું : વેલ પ્લેય્ડ ટીમ ઇન્ડિયા !!!!!!!

“ ધોનીને વહેલો ઉતારવાની જરૂર હતી ‘…..” પહેલી ૪૫ મીનીટમાં જ અમે સેમી હારી ચુકેલા ‘…’ન્યૂઝીલેન્ડની બોલિંગ સટીક અને નિશાના પર હતી ‘….’ અમે પ્રેસર ને બરાબર હેન્ડલ ન કરી શક્યા ‘….’ ન્યૂઝીલેન્ડ પ્લેયડ બેટર ધેન અસ ‘……!!!! કોઈ પણ નિવેદન ઉઠાવી લો પણ હકીકત એ છે કે ક્રિકેટ વિશ્વકપ ૨૦૧૯મા ટોચ પર રહેલી અને મહત્તમ મેચ જીતેલી ટીમ ઇન્ડિયા સેમીફાઈનલમાં કરારી હાર ખાઈને ટુર્નામેન્ટની બહાર થઇ ગઈ છે . એ તો શુકર મનાઓ ધોની અને જાડેજાનો કે આ બંનેને લીધે ઇન્ડિયન ટીમ સન્માનજનક હાર મેળવી શકી બાકી તો પાંચ રનમાં ત્રણ આધારભૂત બેટ્સમેન ગુમાવ્યા પછી આટલી લાંબી લડતની કલ્પના તો આ લખનાર સહીત કોઈને હતી પણ નહિ …!!! ઇવન ન્યૂઝીલેન્ડ પણ ધોની અને જાડેજા હતા ત્યાં સુધી જીત મળશે એવી શ્રધ્ધા નહિ જ રાખતું હોય કારણ કે જે રીતે એ બન્ને એ મેચનું રુખ બદલવાની કોશિશ કરી એ કાબિલ-એ-તારીફ હતી જ એમાં કોઈ શક નથી જ ..!!!!

વિશ્વકપ ૨૦૧૯મા ઇન્ડિયા કપ જીતવાના પ્રબળ દાવેદાર તરીકે જ ઉતરેલી અને શરુઆતની મોટાભાગની મેચોમાં એનું પ્રદર્શન પણ એક વિજેતાને છાજે એવું જ હતું . શરૂઆતની લીગ મેચોમાં આફ્રિકા , ઓસ્ટ્રેલીયા , પાકિસ્તાન જેવી ધરખમ ટીમોને જે રીતે ધૂળ ચાટતી કરી હતી તેના પરથી તો કપ જીતવા માટે ભારત દાવેદાર હતું જ પણ ક્રિકેટ માટે કહેવાય છે કે જે દિવસ તમારો ના હોય તે દિવસે તમને કોઈ પણ ટીમ હરાવી શકે છે અને સેમીમાં પણ એમ જ થયું . આ લખાય છે ત્યારે પુરા થયેલા ઓસીઝ ઇંગ્લેન્ડના બીજા સેમીમાં પણ પાંચ વાર ચેમ્પિયન ઓસીઝ્નો ખરાબ દિવસ નજર સામે જ છે .સેમીમાં કિવીઝના બોલરોની કાતિલ ગેંદબાજીની તારીફ તો કરવી જ રહી પણ સાથે સાથે એ નોંધવું રહ્યું કે વાતાવરણ પણ એમને અનુરૂપ હતું . ન્યુઝીલેન્ડમાં મોટાભાગે આવું ઓવરકાસ્ટ વેધર એ આમ વાત છે અને ન્યૂઝીલેન્ડની ટીમને આવા વાતાવરણનો લાભ ઉઠાવવાની વર્ષો જૂની આદત પણ છે . પણ એનો અર્થ એ નથી કે ભારતીય ટોપઓર્ડરનો આ હારમાં કોઈ રોલ જ નથી . રાહુલ , રોહિત અને કોહલીની વિકેટ સેમી માટે ટર્નીંગ સાબિત થઇ . ઓવરકાસ્ટ કન્ડીશનમાં સ્વીંગ થતા બોલનો કુનેહ્ભર્યો ઉપયોગ અને ભારતીય ટોપ ઓર્ડરનું ખરાબ શોટ સિલેકશન ન્યૂઝીને ફાઈનલ સુધી લઇ ગયા .

અધૂરામાં પૂરું આગલી લગભગ બધી જ મેચોમાં ટોપ ઓર્ડરે જ બાજી સંભાળી લીધેલી એને લીધે મિડલ ઓર્ડરના ભાગે બહુ ખાસ કશું કરવાનું આવેલું નહિ . અગાઉની મેચોમાં પાંચ માં ત્રણ જેવી વિકટ પરીશ્થીતી આવેલી જ નહિ એવામાં સેમીમાં આ કઠોર સ્થિતિમાં મિડલ ઓર્ડરની નબળાઈ એક્સપોઝ થઇ ગઈ , એમાયે નમ્બર ૪ ની ટુર્નામેન્ટ શરુ થયા પહેલા ચાલેલી ચર્ચા સેમીમાં સાચી પડી . ભારતે ટુર્નામેન્ટમાં શંકર , પંત, કાર્તિક , જાદવ , પંડ્યા જેવાઓને નમ્બર ૪ પર મેચ દર મેચ ઉતાર્યા કર્યા , કેમકે નંબર ૪ નું સ્થાન પહેલેથી જ ડગુમગુ હતું જ . જો કે મારા મતે સેમીમાં કાર્તિકને બાદ કરતા પંત અને પંડ્યાએ એની કેપેસીટી મુજબ સારું પ્રદર્શન કર્યું પણ એવું જ ટોપઓર્ડર માટે કહી ન શકાય . ધવનની ઇન્જરી મેજર અપસેટ કહી શકાય .નો ડાઉટ રાહુલે સારી બેટિંગ કરી પણ ટુર્નામેન્ટમાં જે કોમ્બીનેશન સાથે ભારત આવેલું એ કોમ્બીનેશનને ધવનના જવાથી ઝાટકો તો લાગેલો જ . એક તો રાઈટી લેફટીનું કાતિલ કોમ્બીનેશન તૂટી ગયું અને બીજું કે ધવનના અનુભવ અને હાર્ડહિટીંગનો લાભ ગુમાવ્યો .

ક્રિકેટમાં જો અને તો ને સ્થાન નથી જ છતાં પણ નિષ્ણાતો અને ક્રિકેટરસિકોના મતે ધોનીને આગળ ઉતારવામાં આવ્યો હોત તો કદાચ સિનારિયો જુદો હોત પણ જેમ કોહલીએ પ્રેસ કોન્ફરન્સમાં કહ્યું એમ ધોનીને સાત નમ્બર પર ઉતારવાનો પ્લાન ટીમ મીટીંગમાં જ નક્કી થઇ ગયેલો . ટીમનું માનવું હતું કે કાર્તિક , પંત અને હાર્દિક જો રમી જાય તો ફાયદો અને ના રમી શકે તો પાછળ આવેલા ધોની જવાબદારી સાંભળી શકે . અને એક વાત તો કબૂલવી જ પડે કે ભલે બેટિંગમાં ધોનીના રીફ્લેક્સીસ પહેલા જેવા ના રહ્યા હોય , ધોની ભલે પહેલાની જેમ ગ્રેટ ફિનીશર ના રહ્યો હોય છતાં પણ ‘ ધોની હજુ ક્રીઝ પર છે’ એ હાઉ વિશ્વની બધી જ વિરોધી ટીમો પર હજુ ય એટલો ને એટલો જ છે . પાંચમાં ત્રણ વિકેટ અને ૯૨માં છ વિકેટ જેવા સ્કોર પર ધોની પાસે મેચ વિનિંગ બેટિંગની આશા એટલા માટે નહોતી કે હવે ફક્ત જાડેજા જ બાકી હતો અને બાપુને છેલ્લા વર્ષોમાં મળેલા ઓછા ચાન્સીસને લીધે જીતવાની આશા તો નહિવત હતી જ પણ બીગ સેલ્યુટ ટુ રવીન્દ્ર જાડેજા કે એણે વિપરીત પરીશ્થીતીઓમાં પણ જે શાનદાર અને જાનદાર બેટિંગ કરી એની નોંધ વિશ્વકપના ઇતિહાસમાં હમેશા લેવાશે જ . ૨ જુને આ જ કોલમમાં વિશ્વકપની શરૂઆત પર લખેલા આર્ટીકલમાં ઉલ્લેખ કરેલો કે પુરતો મોકો મળે તો જાડેજા ગેમ-ચેન્જર બની શકે છે . જો કે પુરતી નહિ પણ ઓછી મળેલી તકનો પણ જાડેજાએ બેટિંગ બોલિંગ અને ફિલ્ડીંગમાં શ્રેષ્ઠ દેખાવ કરીને પોતાની હાજરી સાબિત કરી બતાવી એ ભારત માટે આ વર્લ્ડકપનું જમાપાસું કહેવાય .

રમતમાં હાર જીત તો થયા જ કરે પણ સાથે સાથે એ પણ સાચું છે કે કપની આટલી નજીક આવ્યા પછી હાર મળે એનું દુખ અને નિરાશા સ્વાભાવિક છે પણ આ વિશ્વકપના ભારતીય ટીમ માટે ઘણા પોઝીટીવ પહેલું રહ્યા જેને યાદ કરવાથી આ હારનું દુખ ઓછું થઇ શકે છે . બેટિંગમાં પાંચ સદી ફટકારીને રોહિતે અને સતત પાંચ અર્ધી સદી ફટકારીને વિરાટે વિરોધી ટીમો પર પોતાનો સિક્કો જમાવ્યો , ઈનફેક્ટ ઇંગ્લેન્ડ ઓસીઝના બીજા સેમી પત્યા પછી પણ રોહિત અત્યારે ૬૪૮ રન સાથે ટુર્નામેન્ટનો ટોચનો બેટ્સમેન છે . તો પંડ્યાએ ઉપયોગી ફટાફટી બેટિંગ અને લગભગ દરેક મેચોમાં શરૂઆતી સ્પેલમાં જ વિકેટ ઝડપીને એક ઓલરાઉન્ડર તરીકે પોતાને વધુ નિખાર આપ્યો . પાંચમાં બોલરની ભૂમિકા હાર્દિકે બરાબર નિભાવી એ ભારત માટે ભવિષ્યના સારા સંકેત છે . બુમરાહનો ખોંફ દરેક ટીમો પર સરખો જ રહ્યો . શરૂઆતી સ્પેલમાં અચૂક વિકેટ અને ડેથ ઓવર્સમાં યોર્કર અને સ્ટમ્પ ટુ સ્ટમ્પ બોલિંગ દ્વારા ભલભલા બેટ્સમેનના દાંડિયા ડુલ કરનાર વર્લ્ડ નમ્બર વન બુમરાહ અને એને મળેલો સામી અને ભુવનેશનો સાથ આ વિશ્વકપમાં આપણી બોલિંગનું ઉજળું પાસું રહ્યું . ચહલ કે કુલદીપ આશા મુજબ ના ચાલ્યા એમ કહી શકાય , એમાયે કુલદીપે પાકિસ્તાન સામે બાબરને આઉટ કર્યો એ સિવાય તેનો કોઈ નોંધપાત્ર દેખાવ ના રહ્યો . છતાં પણ એજ એ ટીમ વેલ પ્લેયડ ટીમ ઇન્ડિયા !!

ખેર પરાજયનું પોસ્ટમોર્ટમ કરવા કરતા આ વિશ્વકપમાં આપણને ઘણું પોઝીટીવ મળ્યું છે એમ કહી શકાય . હવે તો ફાઈનલીસ્ટ નક્કી થઇ ગયા છે અને આ વાંચતા હશો ત્યારે રવિવારે આ વખતે વિશ્વકપ પર ક્યાં નવા નામની એન્ટ્રી થાય છે એ પણ ખબર પડી જશે પણ આ વિશ્વકપ ભારત દ્વારા પાકિસ્તાનને ફરી એકવાર વર્લ્ડકપમાં ધૂળ ચાટતું કરવું , આફ્રિકા જેવી ટીમના ખરાબ પ્રદર્શન , બાંગ્લા-પાકિસ્તાન અને અફઘાનિસ્તાનની ટીમના ઝુઝારું પ્રદર્શન માટે , ઈંગ્લીશ પીચો માટે , પરિસ્થિતિનો ફાયદો ઉઠાવનાર ન્યુઝીલેન્ડ માટે અને મારા મતે વર્ષો પછી અને પ્રથમ વાર વિશ્વકપ જીતવાના ઇંગ્લેન્ડના બેટર ચાન્સીસ માટે હમેશા યાદ રહેશે .

વિસામો :

“ ( લાસ્ટ ફોર માટે ) મારા હિસાબે ઇંગ્લેન્ડ, ઓસીઝ, ભારત પછી ન્યુઝીલેન્ડ ટીમ પે નિગાહ જમાયે રખના . “ ( ૨ જુન ના “ રઝળપાટ “ ના આર્ટીકલમાંથી )

  • અજય ઉપાધ્યાય ( ગાંધીનગર સમાચાર – કોલમ “રઝળપાટ ” ૧૪ જુલાઈ ૨૦૧૯ )

ઓ ટુરિસ્ટ , યહા મત આના પ્લીઝ ..!!!!

Featured

ઓ ટુરિસ્ટ , યહા મત આના પ્લીઝ  ..!!!!

      નેધરલેંડ દુનિયાના સૌથી આકર્ષક દેશોમાંનો એક છે , ત્યાના એમસ્ટડેમની સુંદરતા , નાના નાના ઘરો અને નહેરો જોવા દર વર્ષે કરોડો પ્રવાસીઓ આવે છે ,પણ હમણાં ત્યાની સરકારે એક એવી જાહેરાત કરવાની નક્કી કર્યું કે દુનિયાની નજર એ તરફ ખેંચાઈ . નેધરલેંડની સરકારે નેધરલેંડને પર્યટક દેશ તરીકે પ્રમોટ કરતી જાહેરાતો બંધ કરવાનો નિર્ણય કર્યો . જેના પર દેશનું મહતમ અર્થતંત્ર નભે છે એ ટુરીઝ્મનો જ પ્રચાર નહિ ? કારણ ? કારણ સાફ હતું કે પ્રવાસીઓને લીધે દેશની સુંદરતા અને શાંતિ જોખમાઈ રહી છે . ત્યાના રહેવાસીઓ પ્રવાસીઓના આક્રમણથી પરેશાન છે અને તેઓ જ આગ્રહ કરી રહ્યા છે કે ફરવા માટે અહી ના આવો , બીજે જાવ ..!!! કટ ટુ અપના ઇન્ડિયા ….હજુ હમણાં જ થોડા સમય પહેલા સુંદર અને પર્યટકોના માનીતા સિમલામાં સતત સાત દિવસ સુધી પાણીની વિકરાળ તંગી ઉભી થઇ ગયેલી. પાણીના સ્ત્રોત્રના અભાવોની સાથે સાથે એક બીજું અને મહત્વનું કારણ એ પણ હતું કે અસંખ્ય ટુરીસ્ટો સીમલામાં આવવા લાગેલા જેને લીધે હોટલો – રેસ્ટોરનટોમાં પાણીનો વપરાશ વધી ગયો . સીમલાની કેપેસીટીથી વધુ હોટલો અને પ્રવાસીઓની આ સંખ્યાને લીધે આ મુસીબત સર્જાઈ હતી , કેટલીય હોટલો બંધ કરવી પડેલી અને જરૂરિયાતનું પાણી મિનરલ વોટરની બોટલ સ્વરૂપે વાપરવું પડેલું …!!

આવું જ કઈક હમણાં જ ઉતરાખંડમાં પણ બન્યું જો કે અહી પાણીની નહિ પણ ચારધામયાત્રાને લીધે થયેલા ટ્રાફિકજામે વરવું સ્વરૂપ ધારણ કરેલું . હરિદ્વાર હાઈવે અને ચારધામયાત્રા રૂટ પર કલાકોના જામ લાગ્યા એટલું જ નહી પણ ઘણા યાત્રીઓ તો વાહનોમાંથી ઉતરીને પગપાળા ચાલવા લાગ્યા એવા દ્રશ્યો પણ સર્જાયા . ત્યાનો લોકલ ટ્રાફિક તો હતો જ પણ એ ઉપરાંત બહારના અસંખ્ય યાત્રીઓને લીધે પેટ્રોલ-ડીઝલની અછત કે એટીએમમાં પૈસાની કમી જેવા બુનિયાદી પ્રશ્નો પણ ઉભા થયા . પેટ્રોલ લાવતા ટેન્કરોની મર્યાદિત સંખ્યાઓની સામે ઇંધણ પુરાવવા આવતા વાહનોની લાંબી લાઈનો લાગી . ટુરીઝમ ભારત અને વિશ્વની એક આગવી ઈકોનોમી છે એમાં ના નહિ . ભારતના અનેક શહેરો કે સ્થળો  અને વિશ્વના અનેક દેશો ટુરીઝમ પર જ નભે છે એમ કહી શકાય પણ પ્રવાસીઓની સંખ્યામાં વધારો આ પ્રદેશો કે સ્થળો માટે મુસીબત બની જાય છે . ટુરીસ્ટોના ભરાવાને લીધે દેશના અનેક ટુરિસ્ટ સ્થળો પર્યાવરણની દ્રષ્ટીએ નુકશાન વેઠે છે એટલું જ નહિ પણ આને લીધે સ્થાનિકોને મુસીબતોનો સામનો કરવો પડે છે .

              પ્રવાસ કે ટુર કશુક જાણવા-જોવા માટે હોય છે પણ આપણે અને વિશ્વના અનેકો પ્રવાસીઓ ટુરના નામે નુકશાન અને બેદરકારી વધુ દાખવતા હોય છે .જે સ્થળે ફરવા ગયા હોઈએ ત્યાની પોતાની મહતા – સુંદરતા કે કુદરતી ચાર્મને જાણ્યે-અજાણ્યે નુકશાન પહોચાડીએ છીએ. ભારતના અનેક નેશનલ પાર્ક વાહનોના ધુમાડાથી પ્રદુષિત થતા રહે છે . સાસણમાં મનાઈ હોવા છતાં ઈલીગલ સિંહદર્શન ચાલુ જ હોય છે તો રણથંભોર નેશનલ પાર્કમાં તો વાહનોની સંખ્યા લીમીટેડ કરવા નિયમ બનાવવો પડ્યો છે એટલું જ નહિ પણ પાર્કને પ્રદુષિત થતો અટકાવવા એક સંઘર્ષ સમિતિ પણ બની છે . આગ્રાનો જ દાખલો લ્યો . આડેધડ હોટેલોના બાંધકામ અને ક્યારેક તો રોજના ૫૦૦૦૦ જેટલા પ્રવાસીઓને લીધે તાજના ચમકતા માર્બલને પણ અસર થવા માંડી છે . આવું જ કઈક ગોવા જેવા સુંદર બીચ સાથે પણ થઇ રહ્યું છે . વધુ ને વધુ પ્રવાસીઓ આવવાને લીધે ત્યાં ખેતીની જમીનોમાં હોટલો શરુ થઇ રહી છે એટલું જ નહિ પણ જેમ બધા જ પ્રવાસન સ્થળો પર બને છે તેમ પ્લાસ્ટિક-કાગળ અને બીજા કચરાઓનો ઢગ ખડકાતો જાય છે કે જેના નિકાલની કોઈ યોગ્ય વ્યવસ્થા ગોવા તો શું પણ કોઈ પણ પ્રવાસન સ્થળે દેખાતી ન જ નથી આને લીધે પર્યાવરણનો એક મોટો ઇસ્યુ બનતો જાય છે .

જેશલમેર કે શ્રીનગર જેવા સ્થળોએ પ્રવાસીઓની વધતી સંખ્યા દાલ સરોવરમાં ફેંકાતા પ્લાસ્ટિક વેસ્ટ અને પુરાતન કિલ્લાઓની દીવાલોને વધુ જર્જરિત કરવાનું કામ કરી રહી છે. વારાણસી જેવા અતિ પવિત્ર સ્થળ પર પણ નદીમાં ફેંકાતા ફૂલ્હારો , પ્લાસ્ટિક વેસ્ટ અને ઉદ્યોગોના પ્રદુષણોની સાથે સાથે રોજેરોજ વધતી જતી પ્રવાસીઓની સંખ્યાને લીધે શાંત અને પવિત્ર સ્થળમાંથી ભીડભાડ અને ગંદકીવાળું સ્થળ બનતું જાય છે .  દાર્જીલિંગ હોય કે દ્વારકા ……કેરાલા હોય કે કતરા દરેક જગ્યાએ પ્રવાસીઓની વધતી સંખ્યા અને લોકલ મેનેજમેન્ટની નિષ્ફળતાને લીધે દિન પ્રતિદિન સુંદર સ્થળો ગંદા અને અસહ્ય ભીડભાડમાં ફેરવાતા જાય છે . હમણાં જ આપણે સમચાર વાચ્યા કે માઉન્ટ એવરેસ્ટ પર ચડાઈ કરવા જનારા પર્વતારોહકોની ભીડ એટલી બધી વધી ગઈ છે કે એના લીધે પ્રશ્નો ઉભા થવા માંડ્યા છે ને આ ઓવરક્રાઉડને લીધે ડઝન જેટલા પર્વતારોહકો તો મોતને શરણ પણ પામ્યા. માઉન્ટ એવરેસ્ટ પર બસ-સ્ટેન્ડ પર હોય એવી ભીડ પર્વતારોહકોની જોવા મળી .

ઓવરક્રાઉડ કે પ્રવાસીઓની વધતી સંખ્યા એ પરથી સમજાશે કે ૧૬ લાખની વસ્તીવાળા બાર્સેલોનામાં ગયા વર્ષે ૩ કરોડ ટુરિસ્ટ આવ્યા તો ૩ લાખની વસ્તીવાળા વેનિસમાં ઓલ્મોસ્ટ ૨ કરોડ લોકો એઝ એ ટુરીસ્ટ પધાર્યા.  ભારતની જ વાત કરો તો સિમલામાં એવરેજ ૫૦૦૦ ટુરિસ્ટ વાહનો દરરોજ આવે છે જેને લીધે  પાર્કિંગ , પાણી, વીજળીની સમસ્યા ગંભીર બનતી જાય છે . એવું જ કઈક મસુરી માટે પણ છે . મસુરી પણ છેલ્લા બે વર્ષથી પાણીની તંગીનો સામનો કરી રહ્યું છે જે ભૂતકાળમાં ક્યારેય નહોતી થઇ . ઉટી ૧૦૦૦૦ લોકોનો સમાવેશ કરી શકે એમ હોવા છતાં ત્યાં ઓલરેડી એક લાખ ઉપર લોકો રહી રહ્યા છે અને ઉપરથી આવનારા ટુરીસ્ટ અલગથી …!! નજીકના ભૂતકાળમાં જ એમસ્ટરડેમ ( નેધરલેંડ ), વેનિસ (ઇટલી ), માચુ પીછું (પેરુ), દુબ્રોવ્નીક ( ક્રોએશિયા ), બાર્સેલેનો અને જગતના બીજા પ્રવાશીઓ માટે હોટ શહેરોએ કાયદેસર રેલીઓ કાઢીને પ્રવાસીઓને લીધે પડતી તકલીફો અંગે વિરોધ નોંધાવેલો . ગયા વર્ષે એપ્રિલમાં ફિલીપાઈન્સના બોરેકે બીચને છ મહિના માટે સાફ-સફાઈ કરવા માટે બંધ રાખવો પડે એટલો ગંદો કરી મુકેલો પ્રવાસીઓએ .

વાત પ્રવાસીઓના વિરોધની નથી પણ વધતા જતા પ્રવાસીઓની સંખ્યાને લીધે જે તે સ્થળ કે પ્રદેશની નેચરલ બ્યુટી પર પડતી અસરોની છે . સસ્તી ટીકીટો , ખર્ચ કરવાની શક્તિમાં વધારો , સરળ અને સસ્તા પેકેજોને લીધે ટુરીઝમમાં રોકેટ ગતિએ વિકાસ અને ટુરિસ્ટની સંખ્યામાં એનાથી પણ વધુ ઝડપે વધારો થયો છે પણ એને લીધે મોટાભાગના ટુરિસ્ટ સ્થળો પર બેઝીક સુવિધાના નામે અગવડ ,ભીડ , ટ્રાફિકજામ , પાયાની સુવિધાઓમાં કમી જેવી તકલીફોની સાથે સાથે જે તે પ્રદેશ કે સ્થળની સુંદરતા , એનું પ્રાચીન મહત્વ કે એની બ્યુટીમાં પણ નુકશાન થઇ રહ્યું છે અને આ કાઈ ખાલી ભારતની વાત નથી પણ આગળ જોયું એમ વિશ્વભરમાં આના માઠા પરિણામો આવી રહ્યા છે . ફરવું કે ટુર કરવી સારી વાત છે પણ પ્રાચીન કિલ્લાની દીવાલ પર લવ-સાઈનો ચિતરવી , સુરક્ષિત પ્રાચીન બગીચાઓમાં મનફાવે તેમ વર્તવું , સોશિયલ મીડિયામાં જાહેરાતો કરવાની દેખાદેખીમાં અજાણ્યા અને નાના લોકેશનો પર જવું , જે તે સ્થળના ઓવરહાઈપ ટુરીઝમનો શિકાર બનવું , ઘર સાફ રાખતા હોઈએ પણ જે તે સ્થળે ફરવા જઈએ ત્યાની સ્વચ્છતા અને પર્યાવરણની ઘોર ઉપેક્ષા કરવી વગેરે વગેરે દિવસેને દિવસે સામાન્ય થતું જાય છે જેને લીધે એક દિવસ એવો આવશે કે ગયા હશો કોઈ હિલ સ્ટેશન કે બીજે ફરવા પણ મનની શાંતિ અને ચેન્જની બદલે ત્યાં પણ તમને જેનાથી છૂટવા ગયા હશો એ જ ભીડભાડ અને બીજી મુશ્કેલીઓનો સામનો કરવો પડશે …!!!

વિસામો :

લદાખમાં દર વર્ષે ટુરિસ્ટ દ્વારા ફેંકાયેલ ૩૦૦૦૦ જેવી બોટલો દાટી દેવી પડે છે તો માઉન્ટ એવરેસ્ટ પર અંદાજે ૮-૧૦ ટન કચરો જમા થાય છે તો શુદ્ધ હવા માટે વિખ્યાત મનાલી-લેહ હાઈવેની જમીનમાં સલ્ફરની માત્રા જોવા મળી છે જે વાહનોના પ્રદુષણની નિશાની છે .

– અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૭ જુલાઈ ૨૦૧૯ )

સોશિયલ મીડિયા : અપની અક્કલ લગાઓ ..!!!!

Featured

સોશિયલ મીડિયા : અપની અક્કલ લગાઓ ..!!!!

“ અલ્યા , ફેસબુક કે વોટ્સઅપની બહાર પણ જીવન છે “….” એમ ???? લીંક મોકલજે !!!!! “….જોક ભલે જુનો હોય પણ સો આની સચ પણ છે જ . સોશિયલ મીડિયાના વિસ્ફોટમાં આપણને દરેક વસ્તુ – વાત-ઘટના કે વ્યક્તિની લીંક જોઈએ જ , નહિતર નકામું કે પછી કહેનાર ખોટો …..!!!! અને મજાની વાત એ છે કે લેટેસ્ટ ટ્રેન્ડ મુજબ કોઈ ભી ગપગોળાની એક એવી જ ફેક લીંક પણ હાજર હોય છે …!!! કોઈએ સાચું જ કહ્યું છે કે જેમ મોબાઈલ આવવાથી આપણે આપણી યાદશક્તિ ઓછી કરતા જઈએ છીએ બિલકુલ એમ જ સોશિયલ મીડિયાના જમાનામાં ફોર્વરડીયા અને ફેક મેસેજોને લીધે આપણે આપણી વિચારશક્તિ ગુમાવતા જઈએ છીએ . ભલે ને મનોરંજન માની ને પણ ફોરવર્ડ કે બીલીવ કરાતા મેસેજોને લીધે ખરેખર ‘ વાઘ આવ્યો વાઘ ‘ ની જેમ સાચા સમાચારો પણ ફેક જ લાગવા માંડે છે .

૩૦મી જુન સોશિયલ મીડિયા દિવસ તરીકે ઉજવાય છે પણ ખરેખર તો યુઝર્સે રોજ્જેરોજ પોતાની અક્કલ મુજબ આ દિવસ ઉજવવો પડે એટલી બધી પક્કડ સોશિયલ મીડીયાએ મારા ને તમારા પર જમાવી દીધી છે . ‘ બધું પીળું સોનું નથી હોતું ‘ એ ન્યાયે સોશિયલ મીડિયામાં ફેંકાતું – ફોરવર્ડ થતું –પુરાવાઓ સાથે રજુ થતું દરેક મટીરીયલ ( જી હા, આ મટીરીયલ જ કહેવાય ) સાચું નથી હોતું . પણ શું છે કે સોશિયલ મીડિયાની માયાવી દુનિયામાં ગરક થઇ ગયા પછી સાચા-ખોટાનું ભાન તો અમુકને જ રહે છે ને જ્યારે ભાન થાય ત્યાં સુધીમાં ઘણું મોડું થઇ ચુક્યું હોય છે . નશો જ એવો છે આ સોશિયલ મીડિયાનો ….!! ‘ અલ્યા આ તો ખોટું છે “ કે પછી “ આ રહી સચ્ચાઈ “ ના મેસેજો આવે તે પહેલા તો ખોટું કે ફેક કાચબુ રેસ જીતી ચુક્યું હોય છે . સવાલ ખાલી ફેક મેસેજોનો પણ નથી જ , સવાલ છે સોશિયલ મીડિયાનો તમે ક્યાં-કેટલો અને કેવો ઉપયોગ કરો છો એનો .

એની વેય્ઝઝ્ઝ્ઝ્ઝ ….મનુષ્ય સામજિક પ્રાણી છે અને સંદેશાવહન કરવાના કે પછી સમાજમાં રહેવાના અને સમાજ સાથે કનેકટીવીટી જાળવી રાખવાના એના પોતાના સદીઓથી ચાલતા આવતા નુશ્ખાઓ છે જ એમાં આ આંગળીના ટેરવે અને મોબાઈલના સ્ક્રીન પર હાજર સોશિયલ મીડિયાના મહાકાય નેટવર્કે જરા વધુ પડતી મોકળાશ – કમ – મસ્તી પૂરી પાડી છે . મોકળાશ એટલા માટે કે એની ટાઈમ અને એનીવેર તમે એમાં ખુંપી શકો છો અને મસ્તી એટલા માટે કે ઓળખ છુપાવીને કે પછી રૂબરૂ થયા વગર પણ તમે તમને ગમતું એન્જોય કરી શકો છો એમાં સાહિત્ય , સિનેમા , સંવાદ , વિવાદ , વ્યક્તિપૂજા , રાજકારણ વગેરે વગેરે આવી જાય . વર્ચ્યુલ વર્લ્ડમાં વિચારો – વિવાદો – વિખવાદો અને વ્યક્તિઓને ગળે મળવું ક્યાં જરૂરી હોય છે ? એ માટે તો જરૂરી હોય છે કોઈ પણ સોશિયલ મીડિયા પર એક પ્રોફાઈલ…..એય ને થાવ લોગીન ને મારો ધુબાકા …!!! ડૂબો કે તરો એ તો ક્યાં-કેવા અને કેટલા ધુબાકા મારો છો એના પર નિર્ભર છે કેમકે સોશિયલ મીડિયા આમ જોવા જાવ તો તમને આ ધુબાકાનું પ્લેટફોર્મ પૂરું પાડે છે બાકી કૌન દિશા મેં જાના હૈ વો તો લોગીનકારે જ નક્કી કરવાનું છે ….!!!

“ આ મફત ઇન્ટરનેટે દાટ વાળ્યો છે “ આવા બહાના નીચે સોશિયલ મીડિયા પર આડેધડ અને અંધાધુંધ ફેલાતી નેગેટીવીટી કે સાચી – ખોટી-અધુરી-તોડેલ મરોડેલ માહિતીના વિસ્ફોટનો બચાવ હરગીઝ થઇ શકે નહિ કેમકે આ માધ્યમ જ એવું છે કે એના પર વાપરનારનો અંકુશ રહે છે નહિ કે માધ્યમનો ખુદનો . “ સોશિયલ મીડિયાનો સકારાત્મક ઉપયોગ ફાયદાકારક છે “ આવા સુવીચારોની અસર થાય છે ખરી પણ જ્યારે વાત તર્ક લડાવવાની આવે તો ‘ આગે દેખા ના પીછે ‘ ની જેમ હું ને તમે જાણ્યે-અજાણ્યે ખોટા કે ફેક ન્યુઝના પ્રચારનો હાથો બની જઈએ છીએ . સોશિયલ મીડિયા માટે જો કોઈ ચિંતાનો વિષય અત્યરે હોય તો એ આ છે . પણ શું છે કે ખાલી ભારતની જ વાત લઈએ તો દેશભરમાં રહેલા મોબાઈલ ઇન્ટરનેટધારકોમાંથી લગભગ ૪૦% થી વધુની પાસે વોટ્સઅપ કે ફેસબુક પર ફ્લેશ થતા ન્યુઝ, વિડીયો , ફોટો કે લખાણ સાચું છે ? ખોટું છે ? કે તપાસ યોગ્ય છે એવી ખેવના કરવા જેટલી યોગ્યતા જ નથી . એ તો ‘ શેર જરૂર કરના ‘ કે “ દેશ કે હિત મેં ફોરવર્ડ કરો ‘ જેવી આજીજી કે આદેશાત્મક સુચનાઓનો ફટ દઈને ફોરવર્ડ બટન દબાવીને પાલન કરી જ નાખે છે ..!!!! ટીકટોક પર એવા ઘણા વિડીયો જોવા મળે છે કે જેમાં ભાઈ કે બહેન ઝુંપડામાં રહેતા હોય છે પણ વિડીયો બનાવે છે …!!! પ્રભાવ છે એમાં ના નહિ જ …!!! હમણા જ ક્યાંક વાંચેલું કે એક મીનીટમાં જગતભરમાં ૧૯ કરોડથી વધુ ઈમેલ મોકલાય છે , લગભગ ૬ કરોડ જેટલા મેસેજીસ વિવિધ એપ દ્વારા સેન્ડાય છે , ૩૮ લાખ લોકો ગુગલમાં કૈક ને કૈક સર્ચ કરે છે તો લગભગ ૧૦ લાખ લોકો ફેસબુકમાં લોગીન મારે છે . આવું તો ઘણું બને છે સોશિયલ મીડિયાના આંગણે અને એજ બતાવે છે કે આજના જમાનામાં આનો કેટલો દબદબો છે ..!!!

ખેર , વાત ખાલી ફેક ન્યુઝની નથી પણ સાથે સાથે સોશિયલ મીડિયાનો આડેધડ – વિચાર્યા વગર થતો ઉપયોગ સમાજવ્યવસ્થા અને સંબંધોને આંટીમાં લઇ લે છે એવા અનેકો દાખલાઓ નોંધાયેલા છે . સોશિયલ મીડિયા પર સમવિચાર અને સમવ્યક્તિત્વવાળા લોકો સાથે સંવાદ સાધવાની મજા પડે છે પણ વર્ચ્યુલ વર્લ્ડનો નિયમ છે કે અહી બધા પોતાને એક ઈન્ડીવીઝ્યુલ વ્યક્તિત્વ સમજે છે . ક્યાંક સાંભળેલું કે “ ફેસબુક પર વાચકો કરતા લેખકો વધુ છે “ …વાતમાં કાઈ અતિશયોક્તિ લાગતી નથી . સોશિયલ મીડિયાના મેદાનમાં લોગીન થનાર હર શુરવીર ખુદ પોતે લેખક – ફોટોગ્રાફર – તત્વચિંતક – વૈજ્ઞાનિક – ફિલોસોફર ઓર ના જાને ક્યા ક્યા હૈ !!! ! અભિવ્યક્તિની સ્વતંત્રતાના નામે તમે કઈ પણ લખી શકો છો – મૂકી શકો છો – અપલોડ કરી શકો છો . કઈ પણ અને કોઈના પર પણ ….. છાપા વિરુદ્ધ , નેતા વિરુદ્ધ , કલાકાર વિરુદ્ધ . કંપની વિરુદ્ધ વગૈરાહ વગૈરાહ …!!! ટૂંકમાં આ અભિવ્યક્તિની સ્વતંત્રતા જ કદાચ સોશિયલ મીડિયાનો મોહભંગ થનારા લોકોના કિસ્સાઓ માટે એક અગત્યનું રીઝન બની ગયું છે .

ફેસબુક-વોટ્સઅપ-ઇનસ્ટા જેવી નેટવર્કિંગ સાઈટો બનાવનારને એ તો ખ્યાલ હતો કે આનાથી લોકો એકબીજા સાથે વેલ કનેક્ટ રહેશે પણ એ ખ્યાલ નહોતો કે એ કનેકટીવીટી જ લોકો માટે મુસીબત બની જશે . અને બીજું શું છે કે ‘ અતિ સર્વત્ર વર્જ્ય્તે ‘ ની જમે માર્કેટમાં રોજ નવા નવા સોશિયલ એપ આવતા જાય છે એમ એમ મોહભંગ થનારની સંખ્યાની સાથે સાથે નવા મોહિત થયેલાની સંખ્યા પણ વધતી જ જાય છે . કેમકે આ પ્લેટફોર્મ નો ડાઉટ માહિતીના આદાન-પ્રદાન અને સરખા વિચારોવાળા લોકો સાથે નેટવર્કિંગનું બેસ્ટ માધ્યમ છે અને ઘણા બધા લોકો એને એ જ રીતે યુઝ પણ કરી રહ્યા છે પરંતુ આજના માહિતી વિસ્ફોટના જમાનામાં જરૂર સિવાયનો ઉપયોગ એડીકટ – મનોરોગીથી લઈને સંબંધોમાં તિરાડો , કન્ફયુઝન , સામાજિક વિચારધારાના બદલાવ જેવા લાંબે ગાળે ગંભીર બની શકનાર સિન્ડ્રોમનો ભોગ પણ બનાવી જ દે છે અને આ છાપા-ટીવી પર સોશિયલ મીડિયાના પ્રતાપે દુખી-ટ્રોલ-હેરાન થતા અનેક કિસ્સાઓથી સાબિત થઇ ચુક્યું છે . અમથુ’ય કહેવાય છે ને કે ‘ અતિ ની કોઈ ગતિ નહિ ‘ અને આગળ કહેવું હોય તો ‘ અપની અક્કલ લગાઓ , દિખાવે પર ના જાઓ “….સોશિયલ મીડિયાનો ઉપયોગ અક્કલથી કરો નહિ કે દેખાદેખીથી ….તો જ લોગીન વેલીડ ગણાશે ….!!!!!!

વિસામો :

“ સોશિયલ મીડિયા ની ( વપરાશ ને લગતી ) પોલીસીઝ ક્યારેય મૂર્ખાઓની સારવાર નહિ કરી શકે “ – નિકોલસ કેલી

– અજય ઉપાધ્યાય ( ગાંધીનગર સમાચાર – કોલમ “રઝળપાટ ” ૩૦ જુન ૨૦૧૯ )

સંગીત : મજા પણ છે અને દવા પણ ..!!!!

Featured

સંગીત : મજા પણ છે અને દવા પણ ..!!!!

હમણા જ ‘ અબુઝાદા બુમ બુમ ‘ સોંગ વિશ્વભરમાં હીટ થયેલું અને મજાની વાત એ છે કે શબ્દોમાં ખાસ ટપ્પા ના પડતા હોવા છતાં પણ અનેકો દેશોના સંગીતપ્રેમીઓની પહેલી પસંદગી બની ગયેલું , એના કેટલા તો રીમીક્સ થી લઈને જુદા જુદા ડાંસ વર્ઝન અને લીરીક્લ વર્જન પણ બન્યા . અબુઝાદા ની આ સફળતા કઈ પહેલી પણ નથી કે છેલ્લી પણ નથી , યાદ હોય તો થોડા વર્ષો પહેલા “ વ્હાય ધીસ કોલાવરી ડી “ એ અખ્ખા ઇન્ડિયાને આમ જ ઘેલું ઘેલું કરી મુકેલું તો એ સિવાય પણ ‘ લોલીપોપ લાગેલું ‘ જેવ ભોજપુરી ગીતે પણ ગામ ગાંડું કરેલું ..!!! આ તો માત્ર ઉદાહરણ માટેના અડસટ્ટે યાદ આવેલા નમુનામાત્ર જ છે બાકી તો ભોજપુરી હોય , સ્પેનીશ હોય , તમિલ હોય , અરબી હોય કે પછી કોઈ પણ ભાષામાં – કોઈ પણ દેશનું ગીત હોય સંગીતનો જાદુ જ એવો છે કે એને કોઈ સીમાડા નડે જ નહિ , હા શરત એટલી કે સંગીતમાં થોડો ઘણો દમ હોવો તો જોઈએ જ …!!!!

આ લેખ વાંચતા હશો એના બે દિવસ પહેલા ૨૧ મી જુને વિશ્વ યોગ દિવસ ની ઉજવણી રંગેચંગે થઇ ચુકી હશે પણ બિલકુલ એ જ દિવસે ‘ વર્લ્ડ મ્યુઝીક ડે ‘ યાની કી ‘ વિશ્વ સંગીત દિવસ ‘ પણ હતો અને મજાની વાત એ છે કે જે યોગ ને લીધે શરીર અને મનને ચુસ્ત-દુરસ્ત રાખી શકાય છે બિલકુલ એવો જ કઈક લાભાલાભ સંગીત બાબતે પણ છે જ . ચોંકી ના ઉઠશો ..કેમકે વિજ્ઞાને પણ સ્વીક્કાર્યું છે કે રોગ ની સારવારમાં દવાની જેમ જ સંગીત પણ ભાગ ભજવે છે . અસલમાં એ સિદ્ધ થઇ ચૂકેલું છે કે સંગીત એ એક એવી કળા છે કે જેનું જોડાણ સીધું જ ઈન્સાનના દિલ સાથે-આત્મા સાથે છે . યોગ અને સંગીત નું કનેક્શન ચેક કરીએ તો યોગથી ઇન્દ્રિયો જાગૃત થાય છે જે તંદુરસ્તી માટે કામ કરે છે બિલકુલ એમ જ સંગીતમાં પણ એવા રાગ છે કે જેનાથી અનેક બીમારીઓના ઈલાજ થઇ શકે છે એટલે આમ જોવા જાવ તો સંગીત પણ એક પ્રકારે યોગ જ થયું .અને એનો પુરાવો એ છે કે આધુનિક વિજ્ઞાન પણ એવું સ્વીકારતું થયું છે કે દરરોજ ૨૦ મિનીટ મનપસંદ સંગીત સાંભળો તો ઘણાબધા રોગો ભગાડી શકો એટલું જ નહિ પણ મનપસંદ .સંગીત સાંભળવાથી માનસિક સ્વસ્થતા પણ મેળવી શકો. . ડીપ્રેશન અને પ્રસવપીડામાં સંગીતથી હિલીન્ગના અનેકો કિસ્સા નોંધાયા છે કે જેને જનરલી મ્યુઝીક થેરેપી ના નામે ઓળખાવાય છે . ઘણી બધી વાર એ સાબિત થયું છે કે કોઈ સર્જરી પછી સંગીત સાંભળવાથી દર્દી ને જલ્દી સારું થવામાં મદદ થાય છે . તબેલામાં સંગીત વગાડવાથી દુધમાં વધારો કે વાડીમાં સંગીત વગાડવાથી પાકમાં વધારો થયાનું પણ નોંધાયું છે .

સંગીત ક્યાં નથી ? આમ જુવો તો જગતના અણુ એ અણુ માં સંગીતનો વાસ છે . વરસાદના છાંટામાં , દરિયાના ઘુઘવાટમાં , પવનની લહેરખીઓમાં , પંખીઓના કલરવમાં , ઝરણાંના કલકલાટમાં થી લઈને જ્યાં જ્યાં નજર મારી પડે ની જેમ હર જગહ સંગીત હી સંગીત હૈ …!! અને સંગીત અને માનવજીવને જબરો સંબંધ પણ છે . બોલતા ના શીખ્યું હોય ત્યાં રડવાનું સંગીત સંભળાવા માંડે . ગમ હોય કે ખુશી સંગીત હરેક મોડ પર – હરેક પ્રસંગે આપણો સાથ આપે છે . ફ્રાન્સના ગીતકાર વિક્ટર હ્યુગો એ કહેલું કે ‘ જે આપણે શબ્દોમાં વ્યક્ત કરી શકીએ નહિ તે સંગીત દ્વારા વ્યક્ત કરી શકાય છે ‘ . વિક્ટરભાઈની વાત ખોટી નથી જ . આજે ઇઝીલી અવેલેબલ અને અફાટ ઇન્ટરનેટ ની દુનિયામાં વિશ્વભરનું શ્રેષ્ઠ મ્યુઝીક દુનિયાના ખૂણે ખૂણે આસાનીથી પહોચી પણ જાય છે અને ભાષા ના અજ્ઞાન ની સીમા હોવા છતાં વખણાય છે – સંભળાય છે – એન્જોય કરાય છે . આ જ તો છે સંગીત ની સફળતા અને એની વેલ્યુ …!! હ અને હવે તો ડીજીટલ જમાનો છે , હવે ક્યા ૬ કે ૧૦ ગીતોની લોંગપ્લે રેકોર્ડ કે ૧૦-૧૨ ગીતોની કેસેટ સંઘરવી પડે એમ છે . જગતભરનું મ્યુઝીક મોબાઈલ કે લેપ્પીના કી-બોર્ડના ટેરવે છે . ૪ કે ૮ જીબી ની પેનડ્રાઈવમાં તો અમેરિકન-યુરોપીયન-અરબી કે ઇન્ડિયન મ્યુઝીક ના અધધધ આલ્બમો સમાય જાય છે , ૧૨૮ જીબી ના મોબાઈલમાં દુનિયાભરનું મ્યુઝીક ડાઉનલોડ કરી શકાય છે , યુટ્યુબ હાજરાહજૂર છે દુનિયાભરના સંગીતનો રસાસ્વાદ કરાવવા તો અનેકો ગાના – સાવન જેવી અનેકો મ્યુઝીક એપ્સ તમારા દિલોદિમાગને તરબતર કરવા સતત તત્પર છે , એવામાં સારા સંગીત ની અસર કોઈ એક ક્ષેત્ર પુરતી નહિ પણ વૈશ્વિક બની ગઈ છે .

સંગીતના ભલે ને પ્રકારો અલગ અલગ હોય પણ સંગીતનો જાદુ , એની અસરો દરેક પ્રકારો માટે એક સરખી જ છે . સમયે સમયે સંગીતના પ્રકારો બદલાતા રહે છે છતાં પણ ક્લાસિકલ હોય કે નોન-ક્લાસિકલ સંગીત તો સંગીત જ રહે છે . અને એમાયે આપણા ભારત પાસે તો સંગીત ની અખૂટ વિવિધતા અને ખજાનો છે . શાસ્ત્રીય સંગીત હોય કે પછી ઘરાના સંગીત , ડિસ્કો હોય કે રેપ મ્યુઝીક સંગીત ક્ષેત્રે કશુક નવું નવું આવતું જ રહે છે . ભક્તિ સંગીત , કવ્વાલી , મુજરો , દેશભક્તિ , ગમ ના ગીતો કે પ્રેમના ગીતો વગેરે વગેરે વાગતા જ રહે છે . અને શું છે કે સંગીત નું પણ ફિલ્મ જેવું જ છે , માણહે માણહે પસંદગી જુદી જુદી હોયુ શકે છે પણ ફિલ્મોની જેમ જ મજાની વાત એ છે કે હાથી ને મણ અને કીડીને કણ ની જેમ દરેક કાનને એનું ગમતું સંગીત મળી રહે છે . ડીજીટલી એડવાન્સ જમાનામાં તો હવે મનગમતું સંગીત શોધવું અને સાંભળવું કોઈ અઘરું કામ નથી રહ્યું . સંગીતના સાત સુરો સકલ બ્રહ્માંડને એકસૂરે બાંધી રાખે છે એનું એક કારણ ઇઝીલી અવેલેબલ મ્યુઝીક ની સાથે કોઈ પણ ભાષા કે શબ્દોની બાઉન્ડ્રીમાં બંધાયા વગર સંભળાતું સંગીત જ છે એમાં કોઈ શક નથી .

રોતા બાળકના હાથમાં મુકેલા મોબાઈલમાં વાગતી રીંગટોન , કાનમાં ભરાવેલા ઈયરપ્લગમાં થી વહેતું સંગીત , ધાર્મિક કથાઓમાં વચ્ચે વચ્ચે લહેરાતું સંગીત , હિન્દી ફિલ્મોનું અભિન્ન અંગ એવા ગીતો , સવારે સવારે ઘરના પુજાખંડમાંથી ગવાતી આરતી-સ્તુતિઓ ,ડિસ્કોથેકમાં વાગતું ધમાલિયું સંગીત ,સવારે શાળાઓમાં ગવાતી પ્રાથના , શેરીમાં પરોઢિયે સંભળાતા પ્રભાતિયા , બાળકને સુવડાવવા ગવાતું હાલરડું , ભાગતી રાત્રે સંભળાતા ભજનો , પાર્ટીપ્લોટમાં થી હથોડાની જેમ જીંકાતા કર્કશ ગીતડાઓ , ક્યાય પણ ગવાતું રાષ્ટ્રગીત , કોરસ-સોલો કે પછી માત્ર વાદ્યસંગીત રૂપે વહેતું સંગીત , મરસીયાનું – લગ્નનું – પ્રસંગોનું સંગીત …..પ્રકારો કેટકેટલા અને વૈવિધ્યસભર છે પણ બધાનો લ.સા.અ. એક જ છે અને એ છે અત્ર તત્ર સર્વત્ર સંગીતની હાજરી . માનવજીવન સાથે સંગીત એટલું અભિન્ન રીતે જોડાઈ ગયું છે કે યેહ ભાગદૌડ ભરી જીંદગીમાં ભલે ઘણીવાર એ સંગીતને સાંભળવાનો સમય ના મળતો હોય તો પણ સંગીત ઈઝ એ પાર્ટ ઓફ અવર લાઈફ છે એમાં કોઈ બેમત નથી જ .

વિસામો :

સંગીતમાં સાત સ્વર હોય છે સારેગમપધનિ. આ સાત સ્વરના ઉપયોગથી જ વિવિધ રાગો તૈયાર થાય છે. આપણા શરીરમાં પણ આવાં સાત ચક્રો રહેલાં છે જે ભલે દેખાતાં નથી, પણ એ આપણા જીવિત હોવા માટે જરૂરી છે . સંગીતના સાત સૂરોની આ સાત ચક્રો પર સીધી અસર થાય છે એટલે કે જુદા- જુદા રાગો દ્વારા તમે આ ચક્રોને ગતિમાન કરી શકો છો

– અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૨૩ જુન ૨૦૧૯ )

“ ના હો તો રોતી હૈ જિદ્દે ખ્વાહિશો કા ઢેર હોતા હૈ , પિતા હૈ તો હમેશા બચ્ચોકા દિલ શેર હોતા હૈ “…!!

Featured

“ ના હો તો રોતી હૈ જિદ્દે ખ્વાહિશો કા ઢેર હોતા હૈ , પિતા હૈ તો હમેશા બચ્ચોકા દિલ શેર હોતા હૈ “…!!

“ મેં મારા પિતાનું સપનું પૂરું કર્યું “ આ શબ્દો છે હમણાં જ આંતરરાષ્ટ્રીય ક્રિકેટમાંથી નિવૃત થયેલ યુવરાજસિંહના . ‘ હું યુવરાજ દ્વારા દુનિયાને એક વાત સાબિત કરી દેખાડવા માંગતો હતો અને મને ગર્વ છે કે યુવીએ સાબિત કરી બતાવ્યું “ આ શબ્દો છે યુવીની નિવૃત્તિ પર ભાવુક એના પિતા યોગરાજસિંહના …!!! આજે ફાધર્સ ડે યાની કી પિતૃ દિવસ છે અને એક બાપ પોતાના બાળક પાસેથી શું ઈચ્છે છે અને એક પુત્ર બાપની આકાંક્ષાઓ કઈ રીતે પૂરી કરી શકે છે એનો આનાથી વધુ શ્રેષ્ઠ દાખલો કોઈ હોઈ ના શકે . ઈજાને લીધે ક્રિકેટ કેરિયર પર પૂર્ણવિરામ મુકાઈ જતા પોતાના પુત્રમાં પોતાની અધુરી ઈચ્છા પૂરી કરવાના સપના જોતા એક બાપ અને એને સાર્થક કરવા કડી મહેનત અને કેન્સર જેવા જીવલેણ રોગ સામે બાથ ભીડીને પણ ચમકનાર એક પુત્રની આ કથા ફાધર્સ ડે પર મિસાલ છે . મજાની વાત એ છે કે બાપની અધુરી ઈચ્છા પૂરી કરનાર પુત્રને પાછો બાપ સાથે ૨૦ વર્ષ સુધી લવ-હેટનો સંબંધ રહ્યો પણ અંતે એણે બાપની મહેનત અને આકાંક્ષા પૂરી તો કરી જ બતાવી . “ આજે હું જે કઈ પણ એચીવ કરી શક્યો એ મારા પિતાના કારણે છે “ – આ શબ્દો યુવરાજના છે . બાપ અને બેટો બંને લાખ તકરારો છતાં પણ પોતપોતાના ધ્યેયને વળગી રહ્યા. સેલ્યુટ બનતા હૈ બોસ્સ !!!!

આજે જ બાપ-બેટાનો આવો જ એક બીજો જોરદાર જંગ વર્લ્ડકપમાં પણ થશે . ભારત-પાકિસ્તાનની મેચ અને ફાધર્સ ડે…’ બાપ બાપ હોતા હૈ ઔર બેટા બેટા “ આવા મેસેજો ફરતા કરવા માટેનો એક ઉત્તમ દિવસ ક્રિકેટરસિકો માટે છે જ . ઓન એ લાઈટર નોટ પાકિસ્તાનને બાપ કૌન હૈ ( ઓફકોર્સ વાત અત્યારે ક્રિકેટની જ થાય છે ) એનો અહેસાસ કરાવવાની ઓર એક તક કોહલી એન્ડ કંપની પાસે છે . ખેર “ તુમ પાપા કો ખુશ કરો …પાપા તુમ્હે ખુશ કરેંગે … ‘ ટીવીના પરદે આવેલી આ જાહેરાતમાં અર્ધસચ્ચાઈ એ છે કે બાપને ખબર જ હોય કે ઘરમાં કોને શું જોઈએ છે ? ક્યારે જોઈએ છે ? કેટલું જોઈએ છે ? એને કહેવાની જરૂર નહિ – મસ્કા મારવાની જરૂર નહિ – ખુશ કરવાની જરૂર નહી . નવી બાઈકની ચાવી હાથમાં આવતા જો એમ કહો કે ‘ થેંક્યું પાપા ‘ તો સામો જવાબ મળશે ‘ ઠીક છે ઠીક છે – સંભાળીને ચલાવજે “..!! એને થેંકયુ ના કહો તો ચાલે કેમકે એને આભાર નહિ પણ અહેસાસ જોઈએ , એને શબ્દો નહિ પણ સંગાથ જોઈએ , એને સંતાનની સલામતી જોઈએ , સપના પૂરી કરાવી શકવાની શક્તિ જોઈએ . બાકી એ તો મૂંગામોઢે સંતાનોની ઇચ્છાઓ-માંગણીઓ-આકાંક્ષાઓ પૂરી કરતો જ રહેવાનો , ક્યારેક એની કેપેસીટી મુજબ તો ક્યારેક કેપેસીટી ની બહાર પણ જઈને કરજ લઈને-ઉધાર લઈને-લોનો લઈને !!!.

“ ના હો તો રોતી હૈ જિદ્દે ખ્વાહિશો કા ઢેર હોતા હૈ , પિતા હૈ તો હમેશા બચ્ચોકા દિલ શેર હોતા હૈ “..!! વોટ્સઅપ પર એક સરસ ઈમેજ ફરે છે કે એક બાપ પોતાના ખભ્ભા પર આખું ઘર ઊંચકીને ચાલે છે અને એ જ ઘરમાં માં-દીકરો વાત કરી રહ્યા છે કે “ પાપાને આપણા માટે ટાઈમ જ નથી “..!!! જેણે પણ આ બનાવ્યું છે એને સલામ . ખરેખર એક જ ઈમેજમાં પિતાની આખી કથા આવી ગઈ . પણ આ વાત અમુક અંશે સાચી હોવા છતાં પણ હકીકત એ છે કે સંતાન અને કુટુંબની સુખ-સગવડો પૂરી કરી શકે એટલા માટે તો એક બાપ દોડધામ કરતો હોય છે . ઘણીવાર એવું લાગે કે પિતાજી પાસે તો અમારા માટે સમય જ નથી, પણ સાથે સાથે એ પણ વિચારો કે એ કોની માટે આટલી મહેનત કરે છે ? સંતાન-કુટુંબના ઉજ્જવળ ભવિષ્ય માટે જ ને ? સંતાનને સારું ભણાવી એનું ફ્યુચર ઉજળું બનાવવા કે કુટુંબને શક્ય એટલી સુખ-સગવડો આપવામાં બની શકે કે એક બાપ તમને ઓછો સમય આપી શકે . સંતાનની જરૂરીયાતો પૂરી કરવી એ એને મન એક એવી ડીલ છે જેમાં કોઈ જ ટર્મ્સ એન્ડ કન્ડીશનની ફૂદડી નથી મારેલી હોતી . સંતાનના સમૃદ્ધ ભવિષ્ય માટે નોકરી હોય તો ઓવરટાઈમ , ધંધો હોય તો ઓવરવર્ક કરતા બાપ માટે એ જ એની ફરજ પણ છે અને એ જ એનું પિતૃત્વ છે .

અને એનું એક સોલીડ કારણ એ પણ છે કે હરેક બાપ એમ ઈચ્છતો હોય છે કે મને મળી નહિ એ દરેક sસુખ-સગવડ –તકો મારા સંતાનને મળે . યોગરાજ-યુવરાજના કિસ્સાની જેમ જ દરેક બાપ પોતાના સંતાનમાં પોતાની અધુરી રહી ગયેલી ઈચ્છાઓ-તકોને શોધતો હોય છે અને મહદઅંશે એ પૂરી કરાવવા મથતો હોય છે , રાત-દિવસ એક કરતો હોય છે . પરીક્ષાઓના રીઝલ્ટમાં અનેકો એવા દાખલા સામે આવ્યા છે કે પંચરવાળાની દીકરી કે ઓટોડ્રાઈવરનો દીકરો બોર્ડમાં પ્રથમ આવ્યો હોય . બાપની સંજોગોવશાત મજબૂરી હશે કે એને પંચર કે ડ્રાઈવિંગ કરવું પડ્યું હશે પણ ૧૦૦માંથી ૧૦૦ આવા પિતાઓ એમ નથી વિચારતા કે મારો બેટો કે બેટી પણ આ જ કામ કરે . એ એને ભણાવશે , આગળ વધારવા અથાગ મહેનત કરશે . કેમ..??? કેમ કે એ ઇચ્છે છે કે મારા સંતાનો મેં વેઠેલી મુશ્કેલીઓમાંથી પસાર ના થાય . બાપ બાળકને ખાલી સાઈકલ જ નથી અપાવતો પણ એ સાઈકલ શીખવાડે પણ છે અને ખાસ તો બચ્ચાને સાઈકલ શીખવાડવા એ કેટલાય દિવસો એની પાછળ પાછળ દોડે પણ છે . સિક્યુરીટી અને સગવડ બન્ને પલડા પર બરાબર સંતુલન સાચવે એ છે પિતા.

આંગળી પકડીને સૌપ્રથમ ડેલી કે ઘર બહાર લઇ જનાર પિતા એ જ આંગળી પકડીને તમને સ્કુલના દાદરા ચડાવવા પણ આવશે ….સંતાનના સારા નંબરે પાસ થયાની ખુશી દોસ્તો-સગાસંબંધીમાં ગર્વથી વહેચતો બાપ એ જ સંતાનને ઓછા માર્ક વખતે ધમકાવવાનું નથી ચૂકતો …સ્કુલની ફી ભરતો બાપ , હોંશે હોંશે પ્રવાસમાં મોકલતો બાપ , નવી બાઈક કે મોંઘો મોબાઈલ લઇ આપતો બાપ , જીવનના હરેક મોડ પર ‘ ડરના મના હૈ ‘ શીખવતો બાપ , રીપેર કરાવેલા જોડા પહેરીને પણ તમને બ્રાન્ડેડ શુઝ અપાવતો બાપ , ‘ મારે તો ઘણા કપડા છે ‘ કહીને પ્રસંગમાં પહેરવા તમને થ્રી-પીસ લઇ આપતો બાપ , નાણાકીય કટોકટીમાં મધરાતે મા સાથે ચર્ચા કરતો બાપ , ‘ તું ચિંતા ના કર બધું થઇ જશે ‘ જેવી દેવવાણી કરતો બાપ ….પુખ્ત થાય ત્યાં સુધી સલાહો આપતો બાપ અને પછીથી સલાહો લેતો બાપ , ગમે એ ઉમરે પણ એની પાસે બેસો તો મુશ્કેલીનો હલ શોધી આપતો બાપ , લવ-મેરેજ જેવા પ્રસંગોમાં ‘ બધું બરાબર જોયું છે ને ? ‘ એવી છુપી ચિંતા સાથે હા પાડતો બાપ , દીકરીના લગ્નમાં હસતું મોઢું રાખીને સતત દોડધામ પછી દીકરીની વિદાય પછી ધાણીફૂટ રોતો બાપ , સંતાનના દોસ્તો-કેરિયર પર બાજ નજર રાખતો બાપ …સંતાનના સુખી સંસાર માટે ખુશીથી વૃદ્ધાશ્રમ જતો બાપ …..બાળપણમાં જે પિતા એટલે ડર ગણતા હો એ જ બાપ સમય જતા તમારી તાકાત-હિમત બની જાય …. તમને એમ કે બાપને કશી ખબર નથી પણ ‘ તુજે સબ હૈ પત્તા મેરી માં “ ની જેમ જ બાપ ને બધી જ ખબર હોય છે . એ ચુપ હોય તો સમજવું કે એ તમારું ભલું ઈચ્છે છે અને જો ચુપ ના હોય તો પણ એમ જ સમજવું કે તમારી ભલાઈ સિવાય એનો કોઈ મકસદ નથી નથી ને નથી જ …!! તમારા સપનાઓને પુરા કરવામાં બાપ જલ્દી ઘરડો થઇ જતો હોય છે , તમારી આંખોમાં એના સપનાઓ રોપતા બાપના સપના પુરા કરવા એ જ તો છે સંતાનની સાચી પિતૃદક્ષિણા ….!!!!!

– અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૧૬ જુન ૨૦૧૯ )

ક્રિકેટ નો મહાકુંભ : અબ આયેગા અસલી મજા ….!!!!!

Featured

ક્રિકેટ નો મહાકુંભ : અબ આયેગા અસલી મજા ….!!!!!

“ ઇંગ્લેન્ડ , ભારત અને ઓસ્ટ્રેલીયાનું સેમીફાઈનલમાં પહોચવું નક્કી છે , જ્યારે ચોથી ટીમ કદાચ પાકિસ્તાન કે ન્યૂઝીલેન્ડ હોય શકે છે “ ( સચિન તેન્ડુલકર )…” “ ભારત અને ઇંગ્લેન્ડ વચ્ચે ફાઈનલ રમાઈ શકે છે જેમાં ઇંગ્લેન્ડનું પલડું ભારે છે ,એ સિવાય બીજી ટીમો ઓસ્ટ્રેલીયા અને આફ્રિકા લાસ્ટ ફોરમાં હોય શકે છે “ ( એન્ડ્ર્યુ ફ્લીનટોફ )….” ઇંગ્લેન્ડ વર્લ્ડકપ ૨૦૧૯ જીતવા મજબુત દાવેદાર છે પણ એને ભારત અને ઓસ્ટ્રેલિયાની કસોટીમાંથી પાર ઉતરવું પડશે “ ( રિકી પોન્ટિંગ )….” જે રીતે ભારત રમતું આવ્યું છે એ જોતા સેમીફાઈનલ સુધી તો ભારત આરામથી પહોચી જશે “ ( ચામિંડા વાસ )..!!! આ ચાર દિગ્ગજોએ આ લેખ તમે વાંચતા હશો ત્યાં સુધીમાં શરુ થઇ ચુકેલા ક્રિકેટના મહાકુંભ એવા વર્લ્ડકપના પરિણામોની આછેરી આગાહી કે શક્યતાઓ વ્યક્ત કરી છે . સરવાળે આ ચાર કે બીજા ક્રિકેટ સિતારાઓનો લગભગ મત એવો છે કે ઇંગ્લેન્ડ અને ભારત આ વર્લ્ડકપ જીતવાના દાવેદારોમાં આગળ છે . પણ આ વર્લ્ડકપ છે , અહી ડાર્કહોર્સ બાજી મારી ચૂક્યાના દાખલાઓ છે જ ….યાદ કરો ૧૯૮૩ ભારત વિરુદ્ધ વેસ્ટઇન્ડીઝ ….!!!!

વાત પણ સાચી જ છે કેમકે જે રીતે ભારતીય ટીમ છેલ્લા થોડા વર્ષોથી રમતી આવી છે અને જે રીતે બોલર્સ અને બેટ્સમેન ફોર્મમાં છે એ જોતા ભારતીય ટીમ માટે સેમી સુધીની સફર બહુ મુશ્કિલ હોય એવું લાગતું નથી . હા , નંબર ૪ પર કોણ ? એ કોયડો હજુ ઉકેલવો કદાચ બાકી છે પણ છતાયે જે રીતે કોહલીની આગેવાનીમાં બધા અત્યાર સુધી પ્રદર્શન કરતા આવ્યા છે એ જોતા નંબર ૪ નો કોયડો પણ ઉકેલાય જશે જ . રોહિત શિખરની જોડી ચાલે તો નંબર ૪ ની બહુ જરૂર રહેશે જ નહિ કેમકે ઈંગ્લીશ પીચો પર માત્ર કોહલીનો રેકોર્ડ જ શાનદાર છે . કપ્તાન કોહલી પર તમે આંખો વિંચીને ભરોસો કરી શકો છો તો ધોની અને હાર્દિક ગેમ ચેન્જર સાબિત થઇ શકે છે . પ્રેક્ટીસ મેચમાં રાહુલની સદી કદાચ નંબર ૪ નો કોયડો ઉકેલી આપશે જો કે કોહલીનો ઝોક વિજયશંકર તરફ વધુ હોય એમ લાગે છે છતાં પણ કેદાર અને રાહુલ આ જગ્યા ભરવા સક્ષમ છે . ઇયાન ચેપલના મતે ભારત પાસે બધી ટીમો કરતા વધુ વેરાયટીવાળું બોલિંગ આક્રમણ છે . ભલે પેસમાં બીજાથી ઉતરતા હોય છતાં વેરાયટી અને ચોક્કસતાની બાબતે બુમરાહ, ભુવી અને શમી કોઈ પણ ટીમને ભારે પડી શકે છે . ચહલ-કુલદીપ અને જાડેજા સ્પિનમાં તરખાટ મચાવશે , એમાયે બોલીંગમાં જાડેજા કદાચ આ ટુર્નામેન્ટમાં હાર્દિક પછીનો બીજો ગેમચેન્જર બની રહે તો નવાઈ નહિ , શરત એટલી કે એને પૂરો મોકો આપવામાં આવે .

ઇન્ઝમામે ભલે દાવો કર્યો હોય કે પાકિસ્તાનની ટીમ આ વખતે ભારતને હરાવશે પણ ભારત-પાકિસ્તાનના ભૂતકાળના મુકાબલા જોતા ઈન્ઝમામની આ ઈચ્છા અધુરી રહેવાની પૂરી શક્યતા છે . નો ડાઉટ લગભગ દરેક વર્લ્ડકપમાં પાકનું પ્રદર્શન આશ્ચર્યજનક રહ્યું જ છે છતાં પણ આ વખતે બીજી ટીમોની સરખામણીમાં એક તો પાક ટીમ વધુ યુવાન – બિનઅનુભવી ખેલાડીઓવાળી અને ખાસ તો વર્લ્ડકપ પહેલા ના ૧૦ વનડે લગાતાર હારીને વર્લ્ડકપ રમવા આવ્યું છે . બે વર્ષ પહેલા ઇંગ્લેન્ડની ધરતી પર જ આઈસીસી ચેમ્પિયન્સ ટ્રોફી જીતી ચુકેલી પાકની ટીમ માટે એવા દેખાવનું પુનરાવર્તન કરવા ક્ન્સીસટન્ટ રહેવું જરૂરી રહેશે. સ્મિથ અને વાર્નરના સમાવેશથી મજબુત બનેલી ઓસીઝ્ની ટીમ છઠ્ઠીવાર વિશ્વકપની ટ્રોફી ઊંચકવા સંપૂર્ણ સજ્જ છે અને જે રીતે વર્લ્ડકપની મેચોમાં ઓસીઝે મેચ બાય મેચ પ્રદર્શન કર્યું છે એ જોતા દાવેદારોમાં સામેલ છે . શેન વોર્ન તો કહી જ ચુક્યો છે કે આ વિશ્વકપ પણ ઓસીઝ જ જીતશે . ભારત અને પાકિસ્તાન બંનેને હમણાં જ વનડે સીરીઝમાં પરાસ્ત કરી ચૂકેલ ઓસીઝ્ની ટીમ વ્યૂહરચનાની માસ્ટર તો ગણાય જ છે એટલું જ નહિ પણ બીગ મેચિસમાં વિજયી દેખાવ કરવાની ટેવ પણ ધરાવે છે . ઇંગ્લેન્ડને ભલે બધા દાવેદાર માનતા હોય પણ ભારતની સાથે સાથે ઓસીઝ કપની રેસમાં શાનદાર દોડ લગાવવાની એ નક્કી છે . ઇંગ્લેન્ડની ટીમ હોમગ્રાઉન્ડ અને ઇન્ફોર્મ ખેલાડીઓને લીધે વિશ્વકપની હોટફેવરીટ તો છે જ પણ સાથે સાથે બીજી ટીમોની સરખામણીમાં મચ મોર બેલેન્સ્ડ છે . રૂટ , મોર્ગન , બટલર , બેરસ્ત્રો , રોય જેવા બેટ્સમેન તો લેટેસ્ટ એડીશન આર્ચર , કરેન , સ્ટોક્સ , મોઈન જેવા બોલરો અને ઉપરથી ઘરઆંગણાની પીચો …મોસાળે જમણ અને મા પીરસનારી ..જોઈ શું બીજું ? ૩ વાર રનર્સઅપ અને બે વાર સેમીફાઈનલ રમેલી આ ટીમ આ વખતે કશુક કરી છૂટવા સજ્જ છે એવું બધા ક્રિકેટ રસિકોને લાગે જ છે .

હવે જો ઇંગ્લેન્ડ , ઓસીઝ કે ભારત જ ટ્રોફી જીતવાનું હોય તો શું બાકીની ટીમ થેમ્સ નદીમાં તરવા આવી છે ? બિલકુલ એવું નથી . સૌપ્રથમ જે મેચથી વર્લ્ડકપનો આગાઝ થવાનો છે એ સાઉથ આફ્રિકાની ટીમ ભલે ચોકર કહેવાતી હોય પણ આ વખતે એને એક ફાયદો એ છે કે સાઉથ આફ્રિકાની ટીમ આ વખતે કોઈ પણ પ્રકારની અપેક્ષાઓના ભાર વગર ઉતરશે જો કે પહેલા જેવી ચમક આ વખતની આફ્રિકન ટીમમાં નથી જ છતાં પણ ચાર વખત સેમી સુધી પહોચીને વિજયના પ્યાલાથી હાથવેત દુર રહેલી આ ટીમ ચમત્કાર કરી શકે છે . કૈક એવું જ વેસ્ટ ઇન્ડીઝ માટે કહી શકાય . સટાસટી ક્રિકેટના આ કલાકારો જે દિવસે ચાલ્યા તે દિવસે ભલભલાની બોલતી બંધ કરી શકે એમ છે . વેસ્ટઇન્ડીઝ ટીમનું નવું લોહી પડકારોને જીલવા સક્ષમ છે જ . ૭૯ ના વર્લ્ડકપ વિજય પછી માત્ર એકવાર રનર્સઅપ અને એકવાર સેમીમાં પહોચેલી આ ટીમ માટે ખોવાયેલી પ્રતિષ્ઠા પાછી મેળવવાનો પડકાર છે અને બેટિંગના જોરે આ પડકાર કેટલો પાર કરે છે એ જોવાનું રહેશે . શ્રીલંકાની ટીમ દિગ્જ્જોની ગેરહાજરી અને ઘરેલું ક્રિકેટના રાજકીય દાવપેચને લીધે એકજુટ થઇ શકે એવું લાગતું નથી તો સામે છેડે શેરીમાં સાવજ બાંગ્લાદેશ અને પ્રમાણમાં હજુ ઓછી ક્ષમતાવાળી અફઘાનિસ્તાન કદાચ એકાદ ઉલટફેર કરવા સુધી જ સીમિત રહેવાની . આ બધા અન્ડરડોગમાં સૌથી વધુ ચોકાવનારો દેખાવ ન્યુઝીલેન્ડની ટીમ કરશે એવું મને લાગે છે . વિશ્વકપમાં સૌથી વધુ ૬ સેમી રમેલી આ ટીમ છુપી રુસ્તમ છે એમ કહેવાય . ગુપ્તીલ , ટેલર , વિલિયમ્સન અને લેથલ ની હાર્ડહીટર ટોપ બેટિંગ લાઈનઅપ તો ટેન્ટ , સાંતનર અને સાઉથી ગમે ત્યારે પાસું પલટવા સક્ષમ છે એમ કોઈ શક નથી . મારા હિસાબે ઇંગ્લેન્ડ, ઓસીઝ, ભારત પછી ન્યુઝીલેન્ડ ટીમ પે નિગાહ જમાયે રખના .

ક્રિકેટ ઈઝ એ ફની ગેમ અથવા સુશીલ દોશીના શબ્દોમાં ક્રિકેટ અનિશ્ચિતતાઓ સે ભરા ખેલ હૈ બાકી ક્યાં ૮૩ માં કોઈને ભારતની વિશ્વવીજેતાની આગાહી કરેલી કે એવી જ રીતે ૯૨ માં પાકિસ્તાનની . ટીમોની સાથે સાથે આ વખતે ઈંગ્લીશ પીચો અને ઈંગ્લીશ હવામાનનો સામનો પણ વિજેતાએ કરવો પડશે . ઓવરકાસ્ટ કન્ડીશનમાં સ્વીંગ થતા બોલ પર બેટ્સમેનોની કસોટી થવાની છતાયે એવરેજની દ્રષ્ટીએ એક બે ગ્રાઉન્ડને બાદ કરતા લગભગ મેચ હાઈ સ્કોરિંગ થશે એવું અનુમાન છે . ટોટલ ૪૮ મેચોમાંથી ૧૦ માં વરસાદ વેરી બનવાનો જ એવી ચોખવટ હવામાનખાતું કરી ચુક્યું છે હવે આ ૧૦ મેચ ક્યાં હશે એ ઉપરવાળાને ખબર. પણ આપણું અનુમાન એવું છે કે રશીદખાન ,વોર્નર , શાકિબ , બટલર , કોહલી , બોલ્ટ , હસન અલી , ડે કોક , એન્જેલો મેથ્યુઝ અને ક્રીસ ગેલ પર ચાહકોની નજર રહેશે તો સામે છેડે હાર્દિક , મોહમ્મદ નબી , ઝાંપા , બેરસ્ત્રો , આર્ચર જેવા કોઈ અનસંગ હીરોઝ પણ ધમાકા કરી શકે છે . લેટ્સ વેઇટ ટીલ ફોર્ટીન્થ જુલાઈ ….ટીલ ધેન એન્જોય ધ ગેમ ….!!!!

વિસામો :
૧૯૮૭ના વર્લ્ડકપમાં ન્યુટ્રલ અમ્પાયર ની સેવા શરુ થઇ તો આ જ વર્લ્ડકપથી એક ઈનિંગમાં ઓવર્સની સંખ્યા ૬૦ થી ઘટાડીને ૫૦ કરવામાં આવી .

  • અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૨ જુન ૨૦૧૯ )

હું નરેન્દ્ર દામોદરદાસ મોદી : ભાગ ૨ ….!!!!!

Featured

હું નરેન્દ્ર દામોદરદાસ મોદી : ભાગ ૨ ….!!!!!

વર્ષ ૧૯૭૧ ની લોકસભા ચૂંટણીમાં વિપક્ષોનો નારો હતો ‘ ઇન્દિરા હટાવ ‘ , તો સામે ઇન્દિરાએ ગરીબી હટાઓ નો નારો આપીને જડબેસલાક ૩૫૧ સીટની બહુમતી હાસિલ કરેલી . વર્ષ ૨૦૧૯ ….સિનારિયો લગભગ સરખો જ હતો કે જ્યારે એકબાજુ વિપક્ષો ( બહાર બહારથી ) એક થઈને એક જ મુદ્દા પર ચૂંટણી લડી રહ્યા હતા અને એ મુદ્દો હતો “ મોદી હટાવો “…!!! તો સામે છેડે મોદીએ ગરીબી, ભ્રષ્ટાચાર અને વંશવાદ હટાવવાની વાતની સાથે સાથે એક અહમ મુદ્દો રાષ્ટ્રવાદનો ભરપુર પ્રચાર કર્યો અને ૨૩ તારીખે આવેલા પરિણામોએ સિદ્ધ કરી દીધું કે મોદી વિરુદ્ધ બાકીની પાર્ટીની આ લડાઈ નરેન્દ્ર મોદીએ ઓલમોસ્ટ વનસાઈડેડ રીતે અને અભૂતપૂર્વ કહી શકાય એવી બહુમતીથી જીતી બતાવી ..!!! ૨૦૧૪ની લોકસભા ચૂંટણીમાં પણ આવું જ હતું , ત્યારે પણ મુદ્દો તો મોદી જ હતા પણ ત્યારે વિપક્ષોની આવી ઘેરાબંધી ઓછી હતી . આ વખતે તો સપા, બસપા અને કોંગ્રેસ પણ મોદી પર આક્રમક પ્રહારો કરવામાં આગળ હતા . ૨૦૧૪મા ૪૦ આસપાસ સમેટાઈ ગયેલી કોંગ્રેસ અસ્તિત્વની ઓલમોસ્ટ આખરી ગણી શકાય એવી આ ૨૦૧૯ ની લડાઈમાં કોઈ કસર બાકી રહેવા દેવા નહોતી માંગતી અને એના નિશાના પર હતા એકમાત્ર નરેન્દ્ર મોદી ..!!

ગુજરાતના શાસનકાળ વખતનો મોદીનો ઈતિહાસ કહે છે કે મોદી મુશ્કેલીઓમાંથી વધુ તાકાતથી બહાર આવે છે . પોતાના પર ફેંકાતા પથ્થરની સીડી બનાવીને ઉપર ચડવાની એમની કાબેલીયતને ગુજરાતીઓ તો ભલીભાંતિ જાણે જ છે પણ ૨૦૧૪ અને હવે ૨૦૧૯ના પરિણામોએ એ વાત પ્રૂવ કરી આપી છે કે મોદીને હરાવવા એટલીસ્ટ નજીકના ભવિષ્યમાં તો શક્ય છે જ નહિ . અને એનું કારણ ૨૦૧૯ના પરિણામો પર નજર કરશો તો તરત સમજાઈ જશે . સમાજનો કોઈવર્ગ બાકી નથી કે જેણે મોદીને મત ના આપ્યા હોય . વિપક્ષોએ કિસાનો , યુવાનો , લઘુમતીઓ અને મધ્યમવર્ગને ભડકાવવામાં કોઈ કસર બાકી રાખી નહોતી છતાં પણ લગભગ ૫૦% ની આસપાસ વોટશેર મેળવીને મોદી મેજિક છવાઈ ગયું એની પાછળનું એકમાત્ર કારણ મોદી તો છે જ પણ જે વસ્તુ વિપક્ષો અને દેશના સો કોલ્ડ બુદ્ધિજીવીઓ ને નહોતી દેખાતી એ પ્રજાનો મોદી પર વિશ્વાસ પણ છે .

અને વિશ્વાસ પણ કેવો ? ‘ મોદી હૈ તો મુમકીન હૈ ‘ નો નારો નહિ પણ આમજનતાના હ્રદયના ધબકારનો પડઘો આ સૂત્રમાં પડતો હતો . એરસ્ટ્રાઈક પછી દેશમાં મોદી પર આતંકવાદ મામલે પ્રજાની વિશ્વસનીયતા વધી હતી એ હકીકત છે . વિપક્ષો ભલે એમ કહેતા ફરે કે મોદીએ એરસ્ટ્રાઈકનો મુદ્દો ચૂંટણીમાં ચગાવેલો પણ હકીકત એ છે કે પ્રજામાં સ્વયંભુ જ એ વાત ઘર કરી ગયેલી કે આતંકવાદ વિરુદ્ધ જો કોઈ કડક અને કઠોર વલણ આપનાવી શકે એમ છે તો એ મોદી જ છે . “ ચોકીદાર ચોર હૈ “ જેવા મનઘડત વિપક્ષી નારાઓ એટલા માટે બુમરેંગ થયા કે પ્રજાને આ ચોકીદાર દેશની સરહદોની વધુ સારી રક્ષા કરી શકશે એવું ડે વન થી જ લાગી ગયેલું . મોદી જનતાને એ સંદેશ આપવામાં સફળ રહ્યા કે એમની સરકાર આતંકવાદ પર ઝીરો ટોલરન્સની નીતિ ધરાવે છે અને યુનોમાં મસુદ અઝહર બાબતની જીત હોય કે અભિનંદનને ૪૮ કલાકમાં પાકિસ્તાનમાંથી છોડાવવાની વાત હોય જનતાએ અગાઉ દેશમાં  થયેલા આતંકી હુમલાઓ વખતે જે તે સરકારનું વલણ અને મોદી સરકારના એક્શનની તુલના કર્યા પછી પ્રજાને વિશ્વાસ બેસી ગયેલો કે અગાઉની સરકારો કરતા મોદી સરકાર આ બાબતે વધુ ચોક્કસ અને દમદાર છે .

૨૦૧૯ના પરિણામો વિપક્ષો અને ૧૦૦ વર્ષથી પણ જૂની કોંગ્રેસ માટે મરણતોલ તો છે જ પણ આ પરિણામો ભારતમાં લડાતી પરંપરાગત ચૂંટણીઓની અનેક માન્યાતાઓની છેદ ઉડાડનાર પણ છે જ . સૌપ્રથમ તો આ પરિણામોએ વંશવાદને સજ્જડ જાકરો આપી દીધો છે . ખુદ રાહુલ ગાંધી , સિંધિયા સહીત અનેકો પોતાની જાગીર સમજતી સીટો પરથી હારી ગયા છે . ૨૦૧૪માં હાર મળ્યા પછી પણ અમેઠીમાં રહીને લોકોનો પ્યાર જીતવામાં કામિયાબ રહેલી સ્મૃતિ ઈરાની મારા હિસાબે મોદી મેજિક અને અમિત શાહની કુશળ રણનીતિ પછીથી આ ચૂંટણીની એક મોટી હાઈલાઈટ કહી શકાય . ૨૦૧૯ના પરિણામોએ સાવ તો નહિ પણ એક મોટા પ્રમાણમાં જાતીવાદી રાજકારણને જાકારો આપેલો છે . યુપી અને બિહાર જેવા પ્રદેશોમાં કે જ્યાં જાતિવાદ જ ચૂંટણીનું હથિયાર હોય છે એવામાં ભાજપ અને સાથીપક્ષોએ લગભગ બધી જ જાતિઓના મત મેળવીને ‘ સબ કા સાથ સબ કા વિકાસ ‘ સુત્રને સાર્થક કર્યું છે . જાતીવાદના હલેસે ચુંટણીનો મહાસાગર પાર કરવા નીકળેલ મહાગઠબંધનની નૌકા મોદી-અમિત શાહની માર્કેટિંગ – મહેનત અને મેનેજમેન્ટની સુનામીમાં મધદરિયે ગરકાવ થઇ ગયેલ છે . જાતિવાદને જાકારાનો આ મેંડેટ ભારતના ભવિષ્ય માટે અમુલ્ય છે .

છેક છેલ્લે સુધી વડાપ્રધાન થવાના સપના જોનાર અને અંદરખાને એકમેકથી વિપરીત એવા વિપક્ષો ઓલમોસ્ટ નબળા તો હતા જ એમાં એમણે પ્રજાના મૂળભૂત પ્રશ્નો ઉઠાવવાને બદલે બીજા પ્રશ્નો અને રાફેલ કે બાલાકોટના પુરાવા માંગવા કે મોદીને ગાળો આપવી – અપમાનિત કરવાથી લઈને જેલમાં બંધ કરી દઈશું એવી વાહિયાત ભૂલો પર ભૂલો દોહરાવ્યા કરી . પ્રજાનું મન કઈ બાજુ છે એની તપાસ કર્યા વગર અને કોઈ ઠોસ કાર્યક્રમો કે નીતિઓ વગર માત્રને માત્ર મોદી હટાવો કેમ્પેન ચલાવ્યું . એમાયે કોંગ્રેસ તો આત્મમંથન પણ કરી શકે એમ નથી કેમકે હજુ ચાર મહિના પહેલા જે ત્રણ રાજ્યોમાં સરકાર બનાવેલી , અરે જે ગુજરાતમાં પણ વિધાનસભામાં સારો દેખાવ કરેલો એ બધા જ રાજ્યોમાં એના સુપડા સાફ થઇ ગયા ત્યાં સુધી કુંભકર્ણની નિંદ્રામાં અને રાહુલભાઈ ની નિશ્રામાં ‘ મોદી તો ગયો ભાયા ‘ ના ગેલમાં ગુલતાન રહી . કોઈ નક્કર કાર્યક્રમ કે નીતિઓ વગર માત્રને માત્ર જુઠને સહારે વૈતરણી પાર કરવા નીકળેલી કોંગ્રેસ ખુદ પોતાના લીડરની સીટ પણ બચાવી ના શકી .

વિપક્ષોની આવી કરારી હાર પાછળ અમિત શાહ- મોદીની અનુભવી રણનીતિ અને ભાજપના કરોડો કાર્યકરોની અથાગ મહેનત જ છે એમાં કોઈ શંકાને સ્થાન નથી . ૨૦૧૪માં સત્તામાં આવ્યા પછીથી મોદી-શાહની જોડીએ ભાજપના વિસ્તારની જે યોજનાઓ બનાવેલી એનું ફળ ૨૦૧૯મા મળ્યું છે અને એનું મોટું ઉદાહરણ બંગાળ છે . સરમુખત્યાર મમતાના ગઢમાં અને જનુની ટીએમસી કાર્યકરો સાથે બાથ ભીડીને ભાજપે જે દેખાવ કર્યો છે તેના મૂળ ૨૦૧૪મા જ રોપાઈ ગયેલા એટલું જ નહિ પણ ૪ મહિના પહેલા ગુમાવેલા ત્રણ રાજ્યોમાં ક્લીન સ્વીપ કરવા પાછળ પણ મોદી-શાહ ની જોડીની રણનીતિઓ કામ કરી ગઈ છે .કર્ણાટક , અરુણાચલ જેવા બિન હિન્દી રાજ્યોમાં પણ ભાજપ પગપેસારો કરવામાં સફળ રહી છે .ચુંટણીમાં માત્ર મોદીના ચહેરાને આગળ કરવાની ચાલ વિપક્ષીઓ સમજી શક્યા નહિ એટલું જ નહિ પણ દેશભરમાં હારેલી સીટો પર કરેલી મહેનત અને હિન્દી હાર્ટલેન્ડમાં અભૂતપૂર્વ દેખાવ જાળવવાની સાથે સાથે નીતીશ અને શિવસેનાને સાથે રાખવાની ચાલ કામિયાબ થઇ છે . કાર્યકરોમાં ઉત્સાહ , ચૂંટણી પહેલા જ સંગઠન મજબુત કરવાથી લઈને અને ખાલી રેલીઓ કરીને સંતોષ માનવાને બદલે ઘેર ઘેર જઈને મતદારોને ખેચી લાવવા કે પ્રચાર કરવામાં આ જોડી ૨૦૧૯મા ફરી કિંગ સાબિત થઇ છે અને એનડીએના સાથી પક્ષો સહીત વિપક્ષો પણ એ વાત કબુલે છે કે ઈલેકશન ૨૦૧૯ની જીતના આ બે જ સાચા નાયક છે ..!!

જીત મળ્યા પછીની સાંજે બીજેપી મુખ્યાલયમાં જેમ મોદીએ કાર્યકરોને સંબોધતા કહ્યું એમ હવે પડકાર વધુ મોટો છે . નોટબંધી અને જીએસટીની નકારાત્મક અસરોમાં અટવાતા મધ્યમવર્ગને રાહત આપવી પ્રાથમિકતા રહેશે તો કિસાનો અને બેરોજગારો માટે પણ આ પાંચ વર્ષમાં કશુક નક્કર કરવું જ રહ્યું . પાછલા પાંચ વર્ષમાં સરકાર પર એક પણ આરોપ નથી લાગ્યો એ બરકરાર રાખવું પડશે . પાકિસ્તાન હવે સાનમાં સમજી જ ગયું છે છતાં પણ આતંકવાદ સામે સખ્તી ચાલુ રાખવી પડશે . જમ્મુ-કાશ્મીરમાંથી ૩૭૦મી કલમ રદ કરવા જેવા આકરા કદમો માટે તૈયાર રહેવું પડશે . દેશમાં સામાજિક સમરસતા બનાવી રાખવી પડશે . દેશમાં જ ખાઈને દેશનું જ ખોદતા તત્વો સામે કડક થવું પડશે . ટ્રીપલ તલાક , રામમંદિર જેવા વિવાદી મુદાઓનો હલ લાવવો પડશે . જંગી બહુમતીથી ફરીવાર આવેલ મોદી આ બધું કરવા શક્ય બધું જ કરી છૂટશે એ નક્કી છે . પ્રજાએ રાષ્ટ્રવાદ અને વિકાસની રાજનીતિને મત આપ્યા છે ત્યારે નરેન્દ્રભાઈની આ બીજી ઇનિંગ અનેકો નવી દિશાઓ ખોલીને , નવા પડકારો પાર કરીને ભારતને મહાસત્તા બનવા તરફ લઇ જશે એવી ભારતના કરોડો નાગરિકોને આશા અને વિશ્વાસ છે .

વિસામો :

       “ જો તમે ચર્ચગેટ મુંબઈથી ઉત્તર ભારત બાજુ જવા ટ્રેનમાં બેસો તો પહેલો બિનભાજપી સંસદસભ્ય છેક પંજાબમાં જોવા મળશે “ – એક વોટ્સઅપ ચબરાકિયું

– અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૨૬ મે ૨૦૧૯ )

મજા – એ – મુફ્ત ….!!!!!

Featured

મજા – એ – મુફ્ત ….!!!!!

હમણાં જ વોટ્સઅપ પર એક વિડીયો વાઈરલ થયેલો …સુટ-બુટમાં સજ્જ અનેકો મહાનુભાવો કોઈ અધિવેશનમાં આઈસ્ક્રીમના કપની લુંટફાટ કરતા હતા …બધા એકદમ સજ્જન અને સુસંસ્કૃત લાગતા હતા એટલું જ નહી પણ કોઈ અધિવેશનમાં આવેલા ડેલીગેટસ છે એવું એ વિડીયોમાં કહેવામાં આવેલું …અધિવેશનમાં આપવામાં આવતા આઈસક્રીમના કપને વ્યક્તિદીઠ લેવાય એટલી સંખ્યામાં લેતા જોઇને હસવું તો આવી જ ગયું પણ સાથેસાથે માનવમનના એક મહત્વના પાસાના પણ દર્શન થયા …અને એ પાસું છે ‘મફત’ મળે તો લડી લેવું …!!! આઈ મીન મફત મળતું હોય ત્યારે આગળ-પાછળ કે આજુ-બાજુ જોયા વગર ખિસ્સા કે પછી જે ભરાઈ એ ભરી લેવું …!!! કોઈ કવિતામાં કહ્યું છે ને કે ‘ ગમતાનો કરીએ ગુલાલ ‘ બસ કૈક એવી જ રીતે ‘ મફતનો કરીએ ઉત્સવ ‘ ( અહી લુંટફાટ દરેક વખતે લાગુ નથી પડતું બબુઆ ..!!! ) …અલ્યાઓ ..આયોજકોએ ખાવા માટે જ તો હિમક્રીમ રાખેલો , હા જરા ‘ મફત ‘ મેળવવાની લ્હાયમાં લુંટફાટ જેવું થઇ ગયું તો શું હે …? નથીંગ રોંગ ના ….!!! આ તો છીંડે ચડ્યો ચોરની જેમ આ બાપડાઓ વિડીયોમાં ઝડપાઈ ગયા બાકી જ્યાં જ્યાં ‘ ફ્રી ‘ કે ‘ મફત…મફત….મફત ‘ નો નાદ સંભળાશે ત્યાં ત્યાં આ સિનારિયો અચૂક દેખાશે …પછી એ કોઈ મોલમાં હોય …ફૂટપાથ પર હોય કે પછી ઓનલાઈન હોય …!!!! સાલું આ ફ્રી કહેતા મફતની મોહમાયા ગરીબ હોય કે તવંગર બધાને એકસરખી જ લાગે છે ….હા ક્યારેક એનું સ્થળ બદલાઈ પણ ‘ મફત ‘ બીના ચૈન કહા રે …ગાતા ગાતા સકલ બ્રહ્માંડમાં હું ને તમે એને શોધતા ફરતા હોઈએ છીએ ….હૈ કી નહિ ….?????

અસલમાં આ ‘ મફત ‘ શબ્દ સામે સકલ બ્રહ્માંડમાં અમારા સહીત અનેકોને સખત વિરોધ છે . શેનું મફત ભાઈ …? એ આપે છે ને આપણે લઈએ છીએ ….આપણે નહિ લઈએ તો કોઈ બીજું લેશે …કોઈ બીજું નહિ તો કોઈ ત્રીજું …પણ લેશે તો ખરું જ ને . એ આપવા બેઠા છે તો દોણી સંતાડવાનો શું અર્થ હે ?.!!! અરે મિત્ર કોઈ ૨૦૦ ગ્રામ ટુથપેસ્ટ પર ૫૦ ગ્રામ ટુથપેસ્ટ મફત – આઈ મીન ફ્રી આપે છે તો એના આ ઉત્સાહને આપણે વધાવવો જોઈએ નહિ કે મફત મળે છે લઇ લ્યો લ્યા..કહીને નીચું દેખાઈ એવું કરવાનું …!! શાકભાજી સાથે મરચા-કોથમીર મફત માંગવાનો ઉપક્રમ તો સદીઓથી ચાલતો આવે છે એટલે શું એ મફતનો કોઈ મહિમા જ નહિ ? ભલે ને ભાવ કસીને શાકભાજી લીધી હોય પણ જ્યાં સુધી રકઝક કરીને પણ પેલી ફ્રી કોથમીર-મરચા મળે નહિ ત્યાં સુધી આપણે શાક લેવાનો સંતોષ ના લઇ શકીએ …!! કોઈને મિસકોલ મારવો ( કેમકે એ ફ્રી છે ) એ કઈ કંજુસાઈની નિશાની થોડી છે ? એક કરોડ ખર્ચીને ફ્લેટ લીધો હોય પણ ઘરે આવનાર મહેમાનને ફ્લેટની સાથે સાથે ગર્વથી – સીના તાન કે ફ્લેટની સાથે ‘ ફ્રી ‘ આવેલું ૪૦ ઈંચનું એલઈડી ના બતાવીએ તો ફ્લેટ લેવાની મજા જ મરી જાય ..!!! ૩-૪ મહિના એકદમ ધ્યાન રાખીને કાપેલા કુપનો ચોટાડીને ૩૦-૫૦ રૂપિયાની ફ્રી ગીફ્ટ લેવા લાઈનમાં ઉભા રહેવામાં શરમ શેની …? એ આપણો અધિકાર છે ( આવું દિલને સમજાવવા કહી જ દેવું )…!! જીઓ કે બીજા સર્વિસ પ્રોવાઈડર બધા કોલ ફ્રી આપે છે અને એ પણ અનલીમીટેડ અને આપણે નોનસ્ટોપ વાતો કર્યે જઈએ છીએ પણ યુ કનો સાચી મજા ફ્રી અનલિમિટેડ કોલિંગમાં નહિ પણ ‘ ફ્રી’ અનલિમિટેડ કોલિંગમાં છે ..!!!! કુછ સમજે કી નહિ …!!!!! ના સમજાય તો ફરી વાંચો ….( ફરી હો .’ ફ્રી ‘ નહિ )…!!!

‘ મફત ‘ શબ્દ જ એવો છે કે દુરદુરથી પણ બોર્ડમાં લખેલો આ શબ્દ દેખાઈ જાય કે છાપાની જાહેરાતો વચ્ચે ગમે ત્યાં છુપાયેલો હોઈને તો પણ આ શબ્દને આપણે બાકાયદા પકડી પાડીએ …!!! અને જો ના જોવા કે વાંચવા મળે તો ‘ તું છુપા હૈ કહા , મૈ તડપતા યહા ‘ ગવાઈ જ જાય …!! આ શબ્દની તાકાત જ એવી છે કે કોમામાં ગયેલા પેશન્ટના કાનમાં જો ડોક્ટર આ બોલે તો બની શકે કે પેલો હોશમાં પણ આવી જાય …!!! ‘ મફત ‘ શબ્દનો જલવો જ એવો છે કે ડાયેટ પર રહેલો ઇન્સાન પણ મફત મળતું હોય તો સમોસું વિથ ગ્રીન ચટની બિન્દાસ ખાઈ નાખે …ડાયેટ કી ઐસી કી તૈસી !! ભવિષ્યમાં કામ લાગી શકે છે એમ વિચારીને જો મફત મળતી હોય તો લોકો ઝેરની ગોળીઓ પણ લઈને સંઘરી રાખે !!! અસલમાં ‘ મફતમાં મળે તો માણસ ઝેર પણ ના છોડે ‘ એ કહેવત છે જ ..!! મૂળ ચીજ સાથે મફત મળતી ચીજ નબળી હોય કે પછી નબળી ચીજ સાથે મળતી ફ્રિ ચીજ સબળી હોય એની સાથે આપણે શું લેવાદેવા ..? આપણે તો અર્જુને જેમ માછલી પર નજર રાખેલી એમ ‘ ફ્રી ‘ ચીજ પર નજર રાખવાની ..!!!

પણ આમ જોવા જાવ તો કશું જ ખરેખર મફત હોતું નથી.. બધો મનનો વહેમ છે બચ્ચા ..!!!. સાબુ કે શેમ્પુ કે ખાંડ કે બિસ્કીટ સાથે ફ્રી મળતા પાઉચ કે બીજી ચીજો એ ભવિષ્યના કસ્ટમર ઉભા કરવાનો કારસો હોય છે …મફતમાં મળેલ ૧૦ મિગ્રા શેમ્પુ વાપરનારમાંથી કાલે સવારે અર્ધા પણ એ જ શેમ્પુની ૨૦૦ રૂપિયાવાળી બોટલ ખરીદે તો પણ પેલા મફત પાઉચ આપવાવાળાનો બેડો પાર થઇ જાય …!!! વેબ્સાઈટ પર ખાલી લોગીન કરીને ફ્રી કોફી કે નાસ્તો મેળવનારા લોકોના પ્રોફાઈલ ડેટાની કીમત પેલી કોફી કે નાસ્તાથી વધુ જ હોય છે ….!!! ગયા વર્ષે જ મદ્રાસ હાઈકોર્ટે એક ચુકાદો આપેલ કે મફ્તમાં અપાતા ચોખાને લીધે લોકો આળસુ થઇ ગયા છે એટલે હવેથી સરકાર દ્વારા અપાતા મફત ચોખા ફક્ત બીપીએલ પરિવારોને જ આપવામાં આવે …!!! કોર્ટે નોંધેલું કે સરકારે દરેક વર્ગો માટે લાગુ કરેલી આ ‘ મફત ચોખા યોજના ‘ ને લીધે લોકો સરકાર પાસેથી હજુ વધુ ચીજો મફત મળે એવી આશા રાખતા થઇ ગયા છે …!!! છે ને જબરું …!! જો કે સરકાર દ્વારા આપતી સબસીડી, મફત પાણી , આરોગ્ય કે શિક્ષણ જેવી કે બીજી મફત યોજનાઓથી નીચલા સ્તરે જીવતા , જરૂરીયાતમંદ લોકોનું કલ્યાણ થાય છે એ હકીકત છે ,,!!! પણ એ મફત ને આપણું મફત બંને અલગ છે હો …!!!

આ સરકાર પરથી જ યાદ આવ્યું કે મફતની સૌથી વધુ જાહેરાતો અને લહાણી પણ આ રાજકારણીઓ જ કરે છે …!! એમાયે અત્યારે ચૂંટણીની મોસમ છે ..ફ્રી નાસ્તા, રોકડાની રેલમછેલ અને જમણવારો તો ખરા જ પણ એ સિવાય પણ કોઈ ફ્રી લેપટોપ તો કોઈ ફ્રી સાડી કે ઘર કે દેવામાફી કે પછી ના જાને ક્યા ક્યા ….!!!! મફત એપ ડાઉનલોડની સાથે ભલેને આપણા કોન્ટેક્ટ કે બીજું લઇ લે …હું કેર્સ ? પાણીપુરી ખાધા પછી ‘ ફ્રી ‘ મસાલાપુરી ખાવી એ આપણો અધીકાર છે !!! સાધુ-સંતો તો કહે કે મફતમાં મળેલી ચીજો સંતાપ લાવે છે પણ એમને શું ખબર કે ફ્રી માં આવેલી ચા ની ૨૦ ગ્રામની ડબ્બી પાડોશીને બતાવવામાં કેટલો આનંદ આવે છે …!!! ભલે ને ૨૦૦ ના ફ્રી ડાઈનીંગ વાઉચર વાપરવા ૭૦૦ નું ડીનર કરવું પડે …તો શું થયું ? એમાયે ૨૦૦ નો ફાયદો તો થયો કે નહિ …? હમેશા મોલમાં , શોપીંગમાં કે જ્યાં જ્યાં નજર મારી ઠરે ત્યાં ત્યાં જો કોઈ સ્કીમ ‘ ફ્રી ‘ કે ‘ મફત ‘ વાળી હોય તો ના આવ કે તાવ દેખ્યા વગર એ વસ્તુ-સ્કીમ-ઓફર ઝડપી લેવી એ જ આ યુગનો સનાતન – સિદ્ધ મંત્ર છે વત્સ ….!!!!!!!

વિસામો :

હોટેલ એસોસિયેશનનો એક રીપોર્ટ કહે છે કે હોટેલમાં ઉતરનાર મોટાભાગના લોકો રૂમમાં રાખેલા સાબુ-શેમ્પુ-તેલ-ટુવાલ જેવી ચીજો ચેકઆઉટ કરતી વખતે સાથે લેતા જાય છે કેમકે રૂમભાડા સાથે આ બધું ‘ ફ્રી ‘ જ ગણાય એવું ગ્રાહકોનું માનવું છે ..!!! – વાત ખોટી’ય નથ …!!!

અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૫ મેં ૨૦૧૯ )

ઇસ અંજુમન મેં આપકો આના હૈ બારબાર ….!!!!!

Featured

ઇસ અંજુમન મેં આપકો આના હૈ બારબાર ….!!!!!

બસસ્ટેન્ડની લાઈનમાં કોઈને મસ્તીથી સીટી વગાડતો ખભ્ભે ટીફીન-બેગ લઈને ઉભેલો જોઇને જીવ બળી જાય છે ? કે સાલો કેટલી મોજથી નોકરીએ ઉપડ્યો છે ને આપણે ….??? સ્કુલે જવા ખીલખીલાટ સાથે બસની રાહ જોઇને ઉભેલા બાળકને જોઇને પરાણે ભણવા જતો બીજો બાળક શું વિચારતો હશે ? એજ કે આને શેનો હરખ છે આટલો બધો ભણવા જેવા બોરિંગ કામ માટે ? ‘ રોજ રોજ શું રાંધવું ? ‘ કે પછી ‘ હાલો હજુ મારે તો રસોડું રાહ જોવે છે “ જેવા મોનોટોનસ વાક્યો સામે ‘ આજ તો કૈક નવી રેસીપી ટ્રાય કરવાની ઈચ્છા છે ‘ જેવું કશુક સ્વાદિષ્ટ લાગે એવું અને ભૂખ ઉઘાડી દે એવું વાક્ય બોલતી ગૃહિણી સામે જોઇને પેલા રોજ રોજ શું રાંધવાની ચિંતા કરવાવાળા બેન શું વિચારતા હશે ?…..સી , પરિસ્થિતિ બધા જ મામલે સરખી જ છે છતાં પણ દરેક મામલાના બે પેહલું ઓલરેડી વાંચતા જ દેખાઈ આઈ મીન સમજાઈ જાય છે અને એ છે એકબાજુ બોરિંગ થવાવાળા અને બીજી બાજુ એ જ કામને જરાક જુદો રંગ…જરાક જુદો ટ્વીસ્ટ ….જરાક હટકે લાગે એવું પ્રેઝન્ટેશન કરનારાઓ …..!!!!!

લેખનું ટાઈટલ બનેલી ઉમરાવજાન ફિલ્મના ગીતની પંક્તિ ‘ ઇસ અંજુમન મેં આપકો આના હૈ બારબાર ‘ નો આગલો પોર્શન જ વિચારવા જેવો છે કે ‘ દીવાર-ઓ-દર કો ગોંર સે પહેચાન લીજીયે “ …અને આ જ તો છે ટાઈટલ પંક્તિમાં ઉઠાવેલી ઉલ્ફતનો સરળ જવાબ !!! જી હા બહેનો ઔર ભાઈઓ …જિંદગી ઝંડવા હુઈ ગઈ હૈ …આઈ મીન જિંદગી ફાસ્ટ તો થઇ જ ગઈ છે પણ કમાવાની જદ્દોજહદમાં એકધારી પણ બનતી ગઈ છે . રોજ એ જ ઓફીસ …કે એ જ ઘર …કે એ જ દુકાન …કે એ જ કામ-ધંધો …એ જ રહોડું ….એક્સેટ્રા એક્સેટ્રા. લગભગ બધું સેમ ટુ સેમ ચાલતું હોય છે . એ જ યુનિફોર્મ …એ જ ૧૦:૦૫ ની બસ ….એ જ ખુરશી-ટેબલ …એ જ બોસ કે પછી ધંધાર્થી હોય તો એ જ આવક-જાવકની રોજીંદી લમણાજીંક – ગ્રાહકો-ઉઘરાણી …….વગૈરાહ વગૈરાહ ..!!! સાયન્સ કહે છે કે અતિ રૂટીન લાઈફ એ એક પ્રકારનો રોગ છે અને એનાથી અનેકો પ્રકારની તકલીફો માનવજીવને પડી શકે છે ..!!

ખેર અહી આપણે તકલીફો કઈ કઈ પડશે એનું પિષ્ટપીંજણ કરીને દુખતી રગો દબાવવાને બદલે આ રૂટીન લાઈફને અન-રૂટીન (!!!) કેવી રીતે બનાવી શકાય એના પર થોડી લાઈટ થ્રો કરવાનો પ્રયત્ન કરવાના છીએ . સી , કમાવા જવું કે ધંધે જવું એ તો જરૂરી જ છે , એ જ રીતે સ્ત્રીઓને રસોડે જવું કે પછી સાસરે કે ઘરમાં એડજસ્ટ થવું એ પણ એટલું જરૂરી છે જ પણ જ્યારે આ બધી વસ્તુઓ-પ્રક્રિયાઓ રૂટીન લાગવા માંડે કે પછી રૂટીન થઇ જાય એવામાં સમજો કે જિંદગી કા ચાર્મ કુછ કમ હોને લગતા હૈ ..!! લાઈફ બોરિંગ લાગવા લાગે છે પણ અહી વાત આપણે બોર થવા પર નથી કરવી પણ રૂટીનમાં પણ મજોમજો જલસો જલસો કરવાની વાત છે . સી , ખબર જ છે કે રોજ ઓફીસ જવાનું જ છે …ખબર જ છે કે રોજ દુકાને કે ધંધે પણ જવાનું જ છે …ખબર જ છે કે રોજ રસોડા-ઘરકામમાં ગુંથાવાનું જ છે તો એવામાં જો એને રૂટીન ગણવા લાગીએ તો બોર થવાની – કંટાળી જવાની શક્યતા વધુ રહેવાની પણ દીવાર-ઓ-દર કો જો ગૌર સે પહેચાન લઈએ તો એ જ બોરિંગ-રૂટીન લાઈફ અમુક અંશે રસાળ – મસ્ત – રાપ્ચિક લાગી શકે છે . પૂછો કૈસે ???

તો ઐસે કી વાત હવે ગંભીર વળાંક લઇ રહી છે એવી વોર્નિંગ સાથે બોરિંગ કે રૂટીન લાઈફને છુપાવવાનો કે એને આપણા પર હાવી ના થવા દેવાનો એક આસાન અને સરળ રસ્તો છે ‘ કશુક નવું કરતા રહેવું “ …નવું મતલબ એ જ ઓફીસ એ જ ઘર કે એ જ રૂટીન ક્રિયાઓ કે ઘટનાઓ કે જે કરવી જ પડવાની છે એમાં થોડા થોડા સમયે કોઈ ને કોઈ ટવીસ્ટ આપતો રહેવો . એ જ રીંગણ-બટાકા નું ડીફરન્ટ શાક બનાવવા જેવી વાત છે આ યુ સી ….!!! મનોવિજ્ઞાનીઓ કહે છે કે રૂટીન લાઈફને તમારે ફોલો કરવી ફરજીયાત છે કેમકે ઇટ ઈઝ લાઈફ ઓર પાર્ટ ઓફ લાઈફ પણ ઓફીસ કે ઘરના રૂટીનમાંથી પણ જો કશુક નવું જાણવા-માણવા કે સમજવાનો વીકમાં એકાદી વાર પ્રયત્ન કરીશું તો રૂટીનનું લેબલ થોડી વાર દુર જતું રહેશે . ખબર જ છે કે આ કામ કરવાનું જ છે – લખાયેલું જ છે આપણા લમણે તો પછી બેટર છે કે એ રૂટીન આપણા પર હાવી થાય એવી એક પણ તક એને આપીએ નહિ . મીન્સ કે બની શકે ત્યાં સુધી એ રૂટીનમાંથી પણ કશુક આકસ્મિક આશ્ચર્ય જેવું શોધી શકીએ તો એ રૂટીન રૂટીન ના રહેતા થોડું આનંદપ્રદ બની રહેશે . ઈનફેક્ટ સાયન્સ તો કહે જ છે કે કોઈ રૂટીન ના હોવું એ મેન્ટલ ડીસોર્ડર છે પણ આપણે એટલા બધા ગંભીર પરિણામો વિષે નથી વિચારવું .

એકધારી જિંદગી કે કામકાજથી બોર થવું અલગ વાત છે અને રૂટીનથી બોર થવું બીજી વાત છે અને અહી વાત બોર થવાની એટલા માટે નથી કે બોર ત્યારે થવાય કે કરવું પડે એવું હોય એ કામ પણ કરવાની ઈચ્છા થાય નહિ જ્યારે રૂટીનમાં તો ( ફરજીયાત ) કરવાનું જ છે એ કામ કઈ રીતે બોર થયા વગર કરવું એની વાત છે . એના માટે અગેન દીવાર-ઓ-દર ને ઓળખવાની જરૂરીયાત છે જ . ઓફીસ હોય કે ઘર …સંબંધ હોય કે સંસાર એ બધામાં કશુક આગવું – પોઝીટીવ – નવીન શોધતા રહેવું પડે , તો અને તો જ એ રૂટીન આપણા પર સવાર નહિ થાય અને આ બધું જ રૂટીન ને ફોલો કરતા રહીને કરવાનું છે . અઘરું તો છે પણ અશક્ય બિલકુલ નથી જ . ઘણીવાર રૂટીન લાઈફ એટલા માટે પણ ફોલો કરતા હોઈએ છીએ કે એ આપણને એક પ્રકારનું કમ્ફર્ટ ઝોન જેવું લાગતું હોય છે . મોટાભાગે કોઈ પડકાર વગરની જિંદગી જીવતા લોકો રૂટીન લાઇફમાં ક્યારે બોરડમના શિકાર બની જાય છે એની એમને પણ ખબર નથી હોતી . જો રૂટીન લાઇફને ઓળખીને એમાં જ રહીને કશુક નવું વિચારી શકાય – કરી શકાય તો લાઈફ જીંગા લાલા થતા વાર નથી લાગતી !!

બોલે તો રૂટીનમાં રહીને જ આ જીંગા લાલા વાળું હાવ ટુ એચીવ ? હિયર આર સમ ટીપ્સ ટુ દીવાર-ઓ-દર ને પહેચાનવાની..!! સૌપ્રથમ તો રૂટીનમાં રહીને જ કશુક નવું ટ્રાય કરો . ઓફીસવર્કમાં પણ કશુક નવી રીતે કોઈ કામ કરવાની ટ્રાય કરો ..કોઈ નવું લક્ષ્ય રાખીને એને પામવા નવી રીતો અજમાવો…ખાલી સમય કાઢો અને એ ખાલી સમયમાં મનગમતી કોઈ પ્રવૃત્તિ કરો ..કોઈ એવા વ્યક્તિ સાથે વાત કરવાની કોશિશ કરો જે તમારી સામે આવતા અચકાઈ છે –ગભરાઈ છે . આવું જ કઈક સંબંધોમાં પણ કરી શકો . સી રિલેશન્સને રૂટીન નો એરુ બહુ ઝડપથી આભડી જાય છે તો બેટર છે કે સંબંધમાં એવું બતાવતા રહો કે ‘ આઈ કેર યુ ‘ .. તમારે શું જોઈએ છે એનો એક આઈડિયા દિમાગમાં રાખો અને એ ગોલથી ભટકીને કોઈ કામ ના કરો …વ્યર્થ શક્તિ વેડફાશે અને બોર થવાના ચાન્સીસ વધવાના ..!! ગોળ રાખો પણ એ ગોળ અચીવ ના થાય કે એમાં મોડું થાય તો નાસીપાસ થયા વગર રૂટીનને ચોપડાવ્યા વગર ગોળ અચીવ કરવાની બીજી રીતો શોધી કાઢો , એ નહાને પણ રૂટીન બ્રેક કરી શકશો ..!! નિષ્ફળતાનો ટોપલો તમારા રૂટીન પર ઢોળો નહિ એને બદલે એ જ રૂટીનને રી-પ્લાન કરી નિષ્ફળતાને ચેલેન્જ કરો ..વિક કે મંથમાં એકાદ-બે વાર રૂટીન તોડવાની કોશિશ કરો ..!! માઈન્ડ વેલ કે આ ટીપ્સ ગૃહિણી,નોકરીયાત,ધંધાદારી કે બીજા બધા જ માટે કોમન છે . અમલ બધા કરી શકે છે પોતપોતાની રીતે

વિસામો :

ઘણા તો એટલા રૂટીન ના આદી થઇ ગયા હોય છે કે રેસ્ટોરન્ટમાં પણ દરેક વખત અનેકોવાર ચાખેલી ડીશનો જ ઓર્ડર આપતા હોય છે !!!

-અજય ઉપાધ્યાય ( ગાંધીનગર સમાચાર – કોલમ #રઝળપાટ ૨૮ એપ્રિલ ૨૦૧૯ )

જબાન કો લગામ દો ….!!!!!

Featured

જબાન કો લગામ દો ….!!!!!

લોકસભા ચૂંટણી એના શરૂઆતી તબક્કામાં છે . જગતની સૌથી મોટી લોકશાહી તાકાતવાળો આ દેશ એની આગામી સરકાર ચૂંટવા માટે ધીમી પણ મક્કમ ગતિએ એક પછી એક તબક્કાના મતદાન તરફ જઈ રહ્યો છે . ૨૦૧૪ પછી ફરી એકવાર આખીયે દુનિયાની નજર આ મતદાન ના પરિણામો પર રહેશે . પરિણામો આવે ત્યાર પછી તો ખરું જ પણ અત્યારે પણ આખીયે દુનિયાની નજર ભારતની ચૂંટણી અને એના પ્રચાર અભિયાન પર મંડાયેલી છે જ એમાં કોઈ શંકાને સ્થાન નથી જ . અમસ્તુયે જ્યારે પણ કોઈ દેશ ચુનાવ પ્રક્રિયામાં હોય ત્યારે જગતના બીજા દેશોની નજર એના પરિણામો પર હોય જ , કઈ સરકાર આવશે અને એના સાથે કેવા પ્રકારના સંબંધો રહેશે એના વિશ્લેષણ માટે પણ જે તે દેશના ચુનાવ પરિણામો પર બીજા દેશોની નજર હોય જ છે અને આમેય ભારતનો ચૂંટણી પ્રચાર બીજાથી અનોખો હોય જ છે એમાં આ વખતે જરા વધુ અનોખો હોવાની સાથે સાથે અણગમતો પણ બનતો જાય છે ..!!!

પ્રચારની એક સીસ્ટમ હોય છે , એક વણલખી આચારસંહિતા હોય છે પણ આ વખતે આ આચારસંહિતાની ઐસી તૈસી થઇ રહી છે . ૨૦૧૪ કે એની અગાઉની ચૂંટણીના પ્રચારોમાં પણ એકબીજા પર ગલીચ આક્ષેપો અને ‘ મૌત કા સૌદાગર ‘ કે ‘ વિધવા ‘ જેવા નિમ્ન કહી શકાય એવા ચૂંટણી પ્રચાર દરમ્યાનના આક્ષેપો અને એક રીતે ગાલી-ગલોચ જ કહી શકાય એવા બનાવો નોંધાયેલા જ પણ આ વખતે કદાચ એ લીમીટને પણ આપણા નેતાલોગો ક્રોસ કરી ચુક્યા હોય એવું લાગે છે . સત્તા અને પૈસાનો મદ કે પછી આ બંનેની લાલસા ઇન્સાનને કઈ હદ સુધી નીચે પહોચાડી દે છે એના વરવા ઉદાહરણો હમણાં હમણાથી ચૂંટણી પ્રચારમાં જોવા મળ્યા છે . જે માણસે લાખો લોકોનું પ્રતિનિધિત્વ કરવાનું હોય છે એ ઇન્સાન એકદમ નીચ , હલકટ કે પછી પ્રચારમાં કહી ના શકાય એવી ભાષામાં વાત કરે ત્યારે એને સાંભળી રહેલો મતદાર કે એને ચૂંટવા ઉત્સુક મતદારના દિમાગ પર શું વીતતી હશે એની કલ્પના ચૂંટણી પ્રચારના ઉન્માદમાં નેતાજીને તો ક્યાંથી હોય પણ ?

સવાલ કોઈ એક પાર્ટીનો છે જ નહિ “ હમામ મેં સબ નંગે હૈ “ના ન્યાયે એક અઠવાડિયામાં જ બીએસપી ના સુ.શ્રી માયાવતીજી , બીજેપી ના યોગીજી અને મેનકાજી , સપા ના આઝમખાનજી અને બાકી હતા તે કોંગ્રેસના સીધ્ધુજી જેવા કદાવર નેતાઓએ એવા બફાટો કર્યા કે આપણને એમ લાગે કે શું આ જ છે ચુનાવ પ્રચારના મુદ્દા ? શું આ જ રીતે થાય છે પ્રચાર ? અને એમાં પણ આ બધા ના વિવાદિત નિવેદનો સાંભળતી વખતે તાળીઓ પાડતા એના ટેકેદારોને જોઇને એમ થાય કે શું આવી જ લોકશાહી અને આવા જ નિમ્નપ્રચારને લાયક છીએ આપણે ? ….!!! આ બધા પાછળ જી એટલા માટે લગાડ્યું કે આ આપણા માનનીય લોક્પ્રતીનિધિઓ છે પણ ચૂંટણીના ઉન્માદમાં ભાન એવા ભૂલ્યા હતા કે મને ને તમને શરમના માર્યા મો છુપાવવું અઘરું થઇ પડેલું . નેતાઓ મર્યાદા ભૂલે કે પછી જાણીજોઇને વોટબેંકને ખુશ કરવા આવી હલકી રાજનીતિ કરે તો એને એક જાગૃત મતદાર તો ક્યારેય એન્ડોર્સ કરે જ નહી પણ થાય છે શું કે સભામાં સામે બેઠેલા મતદારોને વોટબેંક સમજીને , એમને ગમે એવી ભાષામાં ભાષણ જીંકવું કે પછી જેવો દેશ તેવો વેશ ની જેમ જે તે એરિયામાં એને લગતા વિવાદિત નિવેદનો આપવાથી વિશેષ કોઈ મુદ્દા કે પ્રશ્નોનો હલ બતાવવાની વાત આ વખતના ચૂંટણીપ્રચારમાં ક્યાય થતી હોય એવું લાગતું નથી .

એવું લાગે છે કે આ વખતની લોકસભાનો ચૂંટણી પ્રચાર કદાચ અત્યાર સુધીના પ્રચારોમાં સૌથી નિમ્ન કક્ષાએ પહોચી ગયો છે . નૈતિક ટીપ્પણીઓ તો ઠીક છે કે થતી જ રહેતી હોય છે પણ આઝમખાને કરેલી જયાપ્રદા પરની ટીપ્પણી કે પછી મેનકા ગાંધીએ મતદારોને કહેલું ‘ જોઈ લઈશ ‘ જેવા બનાવો કદાચ આ પહેલા જાહેર પ્રચારમાં આ પહેલા ક્યારેય બન્યા હોય એવું યાદ નથી આવતું . બાકી ખાનગી બેઠકો અને મિલન-મુલાકાતોમાં નેતાઓ દ્વારા ‘ મત મને જ આપજો નહિતર ખેર નથી ‘ એવી મભમ ધમકીઓ અપાતી હોય એના છાનેખૂણે ઉતારવામાં આવેલા વિડિયોઝ તો શોશિયલ મીડિયા પર ખુલ્લેઆમ ફરતા જ હોય છે પરંતુ આટલા ઊંચા ગજાના નેતાઓ જાહેરસભામાં આવા નિમ્ન ઉચ્ચારણો કરે એ ભારતીય લોકશાહીના વસ્ત્રાહરણ કરવાથી કમ નથી જ . આ બે-ચાર બનાવો તો ટીવી અને છાપે ચડ્યા એટલે વગોવાયા બાકી તો નેતાલોગ ચૂંટણી જીતવા લીટરલી શામ-દામ-દંડ-ભેદ વાપરતા જ હોય છે એ હું ને તમે બધા જ જાણીએ છીએ . સત્તા અને સ્ટારપ્રચારકનો નશો અને ઉપરથી સામે બેઠેલી ભીડ જોઇને કોઈક જ માઈનો લાલ શબ્દોથી લપસવામાં બચી શકે છે . ‘ જો તુમકો હો પસંદ વોહી બાત કરેંગે ‘ જેવું માનતા આવા નેતાઓ વિરોધીઓને નીચા દેખાડવા માટે સામજિક અને નૈતિક લક્ષ્મણરેખાને ક્યારે ક્રોસ કરી જાય છે એ એમને પણ ખબર નથી હોતી . જો કે ઘણા જાણીજોઇને પણ આવું કરતા હોય છે . વિવાદમાં રહેવું એ નેતાગીરીનું એક આગવું લક્ષણ છે અને આવા કેસમાં તો શું છે કે ચૂંટણીપંચ પણ લાચાર હોય એવું દેખાય રહ્યું છે . કહેવામાં તો આચારસંહિતા અને એના અનેકો મુદાઓ છે પણ નેતાલોગો તો આવી આચારસંહિતાને ઘોળીને પી જવામાં ઉસ્તાદ હોય છે . ઉપરના કેસોમાં પણ ચૂંટણીપંચ માત્ર નોટીસ આપીને અને અમુક કલાકો પ્રચાર માટે પ્રતિબંધ ફરમાવ્યા સિવાય ક્યાં કશું કરી જ શકી છે ? એની પોતાની એક મર્યાદા છે અને પંચે પણ કબુલ કર્યું છે કે આમાં વિશેષ કોઈ કડી કાર્યવાહી કરવાની સત્તા નથી એની પાસે ..!!.

પણ એઝ એ વોટર આપણી શું મજબૂરી છે કે આપણે આવા નિવેદનો પર તાળીઓ પાડી …એના મેમે બનાવીને ચારેકોર સેન્ડ કરીએ એના કરતા કમ સે કમ નેતાજીને કહી તો શકીએ ને કે ‘ જબાન સંભાલ કે નેતાજી “..!!!! ચૂંટણી પ્રચારની આ મોસમમાં આપણા એરિયામાં મત માંગવા આવેલા નેતાને આપણે એણે વાયદા મુજબ કામ નથી કર્યા એમ કહીને ઉધડો લઇ લઈએ છીએ તો શું આવા નિવેદનો સાંભળતી વખતે સભામાંથી ઉઠી ના જઈ શકીએ કે સ્થળ પર જ વિરોધ ના કરી શકીએ ? પ્રચારની એક ગરિમા તો હોવી જ જોઈએ ને . ધર્મ – જાતી- લિંગ કે હેસિયતના ત્રાજવે વિરોધીને તોલીને કે પછી એ જ ત્રાજવે મતદારોને તોલીને કરાતા પ્રચારની તો બંધારણમાં અને આચારસંહિતામાં પણ મનાઈ છે તો આ નેતાલોગને કેમ ખબર નથી પડતી ? નેતાલોગ એ નથી સમજતા કે ભારતનો વોટર બદલાઈ ગયો છે અને એનાથી વધુ મહત્વની વાત એ છે કે એમાંનો મોટોભાગ યુવાન મતદારોનો છે . એમની ચૂંટણી બાબતે , નેતા બાબતે અને પ્રચાર બાબતે પોતાની આગવી અક્કલ છે . એ દિવસો ગયા કે મતદારને આવા નિવેદનોથી કે બીજી રીતે ઉલ્લુ બનાવી શકાતો , હવે આ નવી પેઢીનો મતદાર વધુ શાણો છે , એને બધી ખબર છે , જાણ છે અને ખાસ તો એનું પોતાનું દિમાગ છે જેને એ વોટ કરવા જતી વખતે વાપરે છે . એટલે બેટર એ છે કે મતદારોને પોતાની કઠપુતળી સમજનારા આવા નેતાઓને એટલું જ કહેવાનું કે જમાના બદલ ગયા હૈ નેતાજી , જબાન સંભાલ કે ચલાના ….!!!!

  • અજય ઉપાધ્યાય ( ગાંધીનગર સમાચાર – કોલોમ #રઝળપાટ ૨૧ એપ્રિલ ૧૯ )

 

કોઈ આહટ ન સરસરાહટ હૈ , જીંદગી સિર્ફ મુસ્કુરાહટ હૈ ….!!!!!

Featured

કોઈ આહટ ન સરસરાહટ હૈ , જીંદગી સિર્ફ મુસ્કુરાહટ હૈ ….!!!!!

મશહુર કોમેડી શો ‘ કપિલ શર્મા શો ‘ માં થોડા વખત પહેલા ઓડીયન્સમાં એક બહેન આવેલા , મજાની વાત એ હતી કે એ બહેન ઓલમોસ્ટ એક વાક્યમાં બે થી ત્રણ વાર ખડખડાટ હસતા હતા ….મોટેથી …ખુલીને ….બિન્દાસ ….!!! એમને હસતા જોઇને આખુયે ઓડીયન્સ વિથ કપિલ અને ગેસ્ટ પણ ખડખડાટ હસી પડતા હતા ….!! ઘણીવાર તો હસવાને લીધે એ બહેન શું કહે છે એ સમજવું પણ મુશ્કેલ થઇ પડતું હતું છતાં પણ એમને હસતા જોવાની અને એમની સાથે સાથે ખડખડાટ હસવાની બધાને ખુબ જ મજા પડેલી ..!!! ભાગદોડવાળી જીંદગીમાં આજકાલ આટલું ખડખડાટ પણ કોણ હસે છે હે ભલા ….? એ બહેનને હસતા જોઇને દર્શકો અને હાજર ઓડીયન્સને એક વાતની તો પ્રતીતિ થઇ જ કે હસવાથી જે આનંદ મળે છે એ અમુલ્ય તો છે જ …ઘડીભર તો બધા એ પણ ભૂલી ગયા કે ખરેખર શું વાત ચાલે છે , બસ બધા જ એ બહેનની સાથે સાથે ખુલીને-ખડખડાટ હસતા રહ્યા ..!!!

“ જૈસે પો ફટ રહી હો જંગલ મેં , યુ કોઈ મુસ્કુરાયે જાતા હૈ “ ( અહમદ મુસ્તાક ) . હસવું ….હાસ્ય …મુસ્કુરાહટ….સ્માઈલ …શબ્દો ભલે ને જુદા જુદા હોય પણ અર્થ તો એક જ છે અને એ છે ખુશી જાહેર કરવી કે પછી હેપ્પીનસનો અણસાર આપવો , એ ખુશી કોઈને મળવાથી પણ હોય કે પછી આંતરિક પણ હોય . માર્ક કરજો કે જેના ચહેરા પર હાસ્ય છે એને મળવાની તમને વધુ મજા આવશે અને એ જ રીતે જો તમારા ચહેરા પર હાસ્ય હશે તો મળનારને મજા આવશે , આ તો પૃવ્ડ છે , ઈનફેક્ટ એમ પણ કહેવાય છે કે તમે ગમે એટલા બનીઠનીને તૈયાર થયા હશો પણ જો ચહેરા પર મુસ્કાન નહિ હોય તો ગઈ ભેંસ પાની મેં સમજજો …!!! હાસ્ય વગરના ચહેરાને તો થોબડા જ ગણવા પડે અને પીઠ પાછળ બોરિંગ કે પછી સોગીયો વિશેષણથી નવાજવા પણ પડે જ …!!!

મોંન અને સ્મિત આ બંને આપણા ચહેરાના હથીયારો છે . મોંનથી ઘણી મુશ્કેલીઓથી બચી શકાય છે તો હાસ્ય-સ્મિતથી ઘણી મુશ્કેલીઓનો હલ કાઢી શકાય છે . જિંદગી તનાવભરી છે જ એની ના નહિ પણ દિવસમાં એકાદવાર કે એનાથી વધુ મંદમંદ કે ખડખડાટ હાસ્ય આ તણાવને ઓછો કરી શકે છે એ વાત વૈજ્ઞાનિક રીતે પણ સિદ્ધ થયેલી છે . ‘ બે હસ ને , હસવામાં ક્યા તારે કાઈ ખર્ચો છે ? “ જી હા હાસ્ય કુદરતે આપણને ટોટલી ફ્રીમાં આપેલી મસ્ત મજાની બક્ષિશ છે અને એનાથી પણ અગત્યની વાત એ છે કે કુદરતે કૈક સમજીને જ હાસ્ય આપેલું છે કેમકે હાસ્યથી બોઝિલ માહોલ કે ટેન્શનવાળી પળોને પણ તમે થોડી આસાન બનાવી શકો છો . એક વ્યક્તિના હસવાનો જાદુ આજુબાજુ પણ ફેલાઈ જાય છે , ઉદાસી દુર થઈને થોડીવાર તો ખુશી આવી જ જાય છે , આ જ તો છે હાસ્યનો જાદુ ..!!

દુનિયાભરમાં હાસ્ય પર જુદા જુદા સંશોધનો થયેલા છે અને લગભગ દરેક સંશોધનોનો સાર એક જ છે કે ‘’ હસના મના નહિ હૈ “…!!! એક શોધ એવું કહે છે કે હસીને કહેલી કોઈ પણ વાત કે કરાવવા ધારેલું કામ સફળ થવાના ચાન્સીસ ૫૦% વધી જાય છે . બોસ્ટન યુનીવર્સીટી દ્વારા ૧૦૦૦૦ લોકો પર થયેલ સર્વેમાં સાબિત થયું છે કે એમાંના ૮૫% લોકોએ કબુલ્યું કે જીવનમાં એવા ઘણા મોકા આવ્યા કે હસીને વાત કરવાને લીધે બગડેલા કામો ઝડપથી પુરા થઇ ગયા . જો કે આ સર્વેમાં બાકીના ૧૫%નું એવું પણ માનવું હતું કે હાસ્ય ખાસ કાઈ કામમાં આવતું નથી !!! વિજ્ઞાન તો કહે જ છે કે એક સ્માઈલ એ સર્વશ્રેષ્ઠ વ્યાયામ છે કેમકે એનાથી ચહેરાથી લઈને ગરદન સુધીની માસપેશીઓને કસરત થાય છે . માત્ર બે ઈંચની સ્માઈલ કરવાથી હજારો નસોને વ્યાયામ મળે છે અને વિજ્ઞાન કહે છે કે એનાથી ચહેરા પર જલ્દીથી કરચલીઓ પડવાની શક્યતા ઘટી જાય છે . એક મહિલા શોધકર્તા દ્વારા થયેલા એક સર્વેમાં સાબિત થયું કે જો તમે કોઈને પહેલીવાર મળો છો તો હાસ્યથી શરુ થયેલી વાતચીત વધુ ખુલીને થઇ શકે છે . બુન ની વાત સાચી પણ છે જ ને …કોને સોગિયા ડાચા સાથે કે કોઈ જ હાવભાવ વગરના સીલેટીયા થોબડા સાથે વાત કરવી ગમે ….?? આવા ડાચાઓને તો ‘ ટોક ટુ માય હેન્ડ ‘ જ કહેવું પડે ને …??

“ જેને હસતા નથી આવડતું એ દુનિયાનો સૌથી ગરીબ ઇન્સાન છે “- ( એક કહેવત ) …પણ થયું છે શું કે ધીરે ધીરે આપણે હસવાનું ભૂલતા જઈએ છીએ , હસતા ચહેરા દુર્લભ થતા જાય છે . અને અહી હસવું એટલે જોક્સો કે કોમેડી શો જોતા જોતા હસવું એની વાત નથી જ પણ કોઈ વાત પર , કોઈની વાત પર , કોઈ પ્રસંગ પર કે પછી અમસ્તા પણ ચહેરા પણ એક સ્માઈલ કરવાનું – લાવવાનું ઓછું થતું જાય છે . જી હા જરૂરી નથી કે કોઈની સામે જ સ્માઈલ કરવું ….તમે તમારી જાતને અરીસામાં જોઇને પણ સ્માઈલ કરી જ શકો છો …!!! નિર્દોષ , અકારણ કે અહેતુક હાસ્ય અલોપ થતું જાય છે . કપિલનો શો કે વોટ્સઅપના ટુચકાઓ પર હસી તો લઈએ છીએ પણ ટેન્શનવાળી પળોમાં કે નાનીનાની વાતોમાં હસી કાઢવાની ટેવો લુપ્ત થતી જાય છે . છેલ્લે ખરેખર અકારણ – અહેતુક ક્યારે હસેલા ….???? તમે માર્ક કર્યું હશે કે ડીપ્રેશનમાં હશે એ વ્યક્તિના ચહેરા પર તમે ચિંતાની લકીરો જ જોશો નહિ કે હાસ્યની , એનો અર્થ એમ પણ કાઢી શકાય કે જે હસતો નથી એના ડીપ્રેશનમાં જવાના ચાન્સીસ વધુ છે …છે કે નહિ ? – જવાબ ફરજીયાત છે .

અને જવાબ એટલા માટે ફરજીયાત છે કે હસવું એ સ્વસ્થ અને સુખી રહેવાના અનેકો ફંડા માહેનો મોસ્ટ ઈમ્પોર્ટન્ટ ફંડો છે . ‘ હસે એનુંવ ઘર વસે ‘ ને જરા ટ્વીસ્ટ કરીને કહી શકાય કે ‘ હસતું રહે એનું ઘર સદાયે વસતું રહે ‘ જે માણસ દોસ્ત સાથે , ઓફિસમાં કલીગ સાથે , ધંધા પર ગ્રાહક સાથે , ઘરમાં ફેમીલી મેમ્બર સાથે હસી શકે છે એના દિમાગને તનાવનો તાપ ઓછો લાગશે ..!! છોકરાઓ સામે મુસ્કુરાવ એનાથી તમારો તણાવ તો હલકો થશે જ પણ સાથે સાથે છોકરાઓને પણ એક શીખ મળશે કે હસવું એ આત્મવિશ્વાસની નિશાની છે . લાઈફને એટલી બધી પણ સીરીયસ ના લો . ઘણાને આપણે જોયા છે કે મસ્ત મજાના કોઈ હાસ્ય પ્રોગ્રામમાં પણ એમના ચહેરા પણ હસીની કોઈ રેખા નથી દેખાતી . નથી જરૂર આટલું બધું સ્ટ્રેસ રહેવાનું ભઈલા…!!! આઈ એગ્રી કે જમાનો હરીફાઈનો છે પણ બકા જ્યાં કુદરતે હાસ્ય નામનું અદ્ભુત ટોનિક આપેલું છે એનો જ્યારે તક મળે ત્યારે ઉપયોગ તો કર …!! ડો ગુડમેને કહેલું કે જો તમે દિવસમાં ૧૫ મિનીટ હસી શકો તો તમારા દવાના બીલમાં ઘણો ઘટાડો નોંધાશે …!!

એટલે વાત એમ પણ નથી કે સતત એટલું હસતા રહો કે લોકો તમને ગાંડામાં ગણવા માંડે કે પછી દેશી ભાષામાં ‘ વેખલા ‘ ગણે ..!!! ખીખીખીખી કર્યા કરવું અને ચહેરા પર સ્માઈલ લાવવું બંને અલગ છે . જો કે હસવું અને હસી કાઢવું એ બંને આમ તો એક જ છે , હસવું દેખાય છે અને હસી કાઢવું ઘણીવાર માનસિક પ્રક્રિયા છે , પણ હાસ્ય-મુસ્કાન એ એક એવી ચીજ છે કે જે તમારા ચહેરાની શોભા વધારે છે . કહે છે ને કે સ્માઈલ ઈઝ ધ બેસ્ટ મેકઅપ…!! હોય છે ખંધુ હસનારા , કૃત્રિમ હસનારા , ભેદી હસનારા , પરાણે હસનારા કે પ્લાસ્ટીકીયા હાસ્યકારો પણ હોય છે પણ એ તો શું છે કે તમારે કયું સ્માઈલ અપનાવવું છે એ તમારે નક્કી કરવાનું છે . પણ જરૂરી એ છે કે ચહેરા પણ સ્માઈલ આવતું રહે કેમકે એમાં કોઈ નુકશાન છે નહિ બસ ફાયદા હી ફાયદા હૈ …!

વિસામો

“ દિવસમાં જો તમે એક વાર પણ હસ્યા નથી તો સમજજો કે તમારો દિવસ નકામો ગયો “ – ચાર્લી ચેપ્લીન

– અજય ઉપાધ્યાય ( ગાંધીનગર સમાચાર – કોલમ #રઝળપાટ ૧૪ એપ્રિલ ૨૦૧૯ )

સલાહ : લેવા કરતા આપવી વધુ ગમે ….!!!!!

Featured

સલાહ : લેવા કરતા આપવી વધુ ગમે ….!!!!!

‘ અસલમાં કોહલીએ બુમરાહ ને બોલિંગ આપવાની જરૂર હતી …કુલદીપ તો આમાં ધોવાઈ જ જાય ‘… ‘ મોદીને કાઈ ખબર પડતી જ નથી ..મારું માને તો હજી એકાદી સ્ટ્રાઈક કરી જ નાખવી જોઈ ‘…..’ મોટા તું એક કામ કર , કાર લે ને તો સીએનજી જ લેજે …પેટ્રોલીયુ લેવાય જ નહિ ‘….’ આની વાત માનીશ નહિ , હું તો કહું છું કે કાર લેવાય જ નહિ …એક તો ઇંધણ મોંઘુ ને ઉપરથી પાર્કિંગ ના ડખ્ખા …’.’ ના ના ભૂરા કાર લેવાય જ ..બહારગામ જવું હોય તો સસ્તું પડે ‘……’ મને પુછાય ને ? એ રેસ્ટોરાંનું ફૂડ સાવ જ બેકાર છે , ત્યાં જમવા જવાય જ નહિ એની બદલે હવે હું કહું ત્યાં જ જજો જમવા ..મોજ આવશે ..”… સલાહોના સળગતા સુરજમુખીઓથી તમે અંજાઈ જાવ એ પહેલા સલાહ માટેનું એક સોનેરી સૂત્ર કહી દઉં કે ‘ સલાહ કોઈને આપવી નહિ અને કોઈની લેવી નહિ અને લેવી તો એવી વ્યક્તિની જ લેવી જે આપણા જેવી પરીશ્થીતીમાંથી પસાર થઇ ચૂકેલ હોય “….પણ બંધુઓ શરૂઆતમાં લખ્યા એ ડાયલોગો આ સોનેરી સુત્રથી બિલકુલ વિપરીત છે ….!!!

સલાહ – આ એક એવી ચીજ છે કે જેનો વિસ્તાર કરવા , પ્રચાર કરવા અને અત્યંત ઉત્સુકતાથી આપવા માટે હું અને તમે બન્ને હરહમેશ તૈયાર જ હોઈએ છીએ ..!! કોઈએ અમસ્તું પણ કાઈ કહ્યું કે પૂછ્યું નથી કે ધડાધડ સલાહોની એકે-૪૭ માંડે ફૂટવા …જાતજાતની ને ભાતભાતની સલાહોની બુલેટ તમારા પ્રશ્ન-ચિંતા-મુસીબતને વીંધવા ૧૦૦ની સ્પીડે છૂટી પડે અને તમારા દિલો-દિમાગ ને છલની કરવા માંડે …!! અખતરા માટે પણ ક્યારેક કોઈને કઈક સલાહ માંગી શકાય એવું પૂછી જોજો અવનવી સલાહોથી તમારી ઝોલી ફાટફાટ થવા માંડશે અને જરૂરી નથીં કે માંગો તો જ સલાહ મળે …નાં રે બબુઆ ના … માંગવા કરતા વણમાંગી સલાહો આ જગતની માલીપા વધુ ભ્રમણ કરતી હોય છે .ઘણીવાર તો એટલી બધી સલાહો મળતી હોય છે કે સલાહ લેનાર એ ભૂલી જાય છે કે મેં ખરેખર આ સજ્જન કે સન્નારી પાસે ક્યાં વિષય પર સલાહ કે અભિપ્રાય માંગેલો વારુ ????

સલાહ આપવાનું વિજ્ઞાન પણ અતિ અઘરું છે . સાલું એને ભલે ને મહિનાના એન્ડમાં ત્રણ સાંધે ત્યાં તેર તૂટતા હોય પણ ફાય્નાનાસીય્લ પ્લાનીંગની તમને એવી જડબેસલાક સલાહ આપશે કે તમને એમ થશે કે સાલું આ તો કોઈ મહાન અર્થશાસ્ત્રી છે કે શું ? એક્ચ્યુલી સલાહ આપનારાઓની આ જ તો છે ખૂબી – ખાસિયત . પોતાની મુંજવણો કે મુસીબતોનો હાલ ભલે ને ના મળતો હોય પણ કોઈ દુખીયારાની આવી જ કોઈ મુસીબતોનો હાલ એ યેનકેન પ્રકારેણ અચૂક શોધી કાઢવાનો ..!! કમ સે કમ સલાહ આપવાના શોખીનોના મતે તો એમણે આપેલી સલાહ જ અકસીર હોવાની . એ છાતી ઠોકીને કહેશે કે આમ જ કર – આ જ બેસ્ટ રહેશે …!! એમને કોઈ ફર્ક નથી પડતો કે સલાહ માંગનારની પરીશ્થીતી શું છે ? પણ આમાં શું છે કે લગભગ દરેક સલાહકારને એવો વહેમ હોય છે કે સલાહ જેને આપી રહ્યો છે એના કરતા અપુન કા આઈ-કયું થોડા ઊંચા હૈ , અને મોસ્ટલી આને લીધે જ આપણને બીજાને સલાહ આપવાનું ભયંકર જનુન હોય છે જો કે એ વાત પણ છે કે આવી ધુંઆધાર સલાહો આપણે માનવી કે નહિ ???

સલાહો માનવી કે નહિ એ તો સલાહ લેનારની બુદ્ધિમત્તા પર નિર્ભર છે . સલાહ આપનાર તો શું છે કે ભોળાભાવે અને ક્યારેક દયાભાવે સલાહોનો ટોપલો ખાલી કરીને જતો રહે પણ પછી એમાંથી કઈ સલાહ કામની છે એ તો લેનારે નક્કી કરવાનું હોય છે . સલાહનું તો એવું છે ને કે ગમે એને અને કોઈ પણ ટોપિક પર આપી શકાય . ઘણા તો ડોક્ટરને પણ કઈ દવા વધુ અકસીર હોય શકે એની સલાહો આપતા હોય છે – ડોક્ટર એ હોય તો શું થયું ? સલાહ તો અપાય ને ??? અપરણીતો પરણેલાઓને સુખી સંસારની સલાહો આપતા પણ નજરે પડતા જ હોય છે તો છૂટાછેડા લીધેલા પ્રવચનવીરો કે વીરાંગનાઓ પણ ‘ દામ્પત્યજીવનને સુખી કેમ બનાવશો ‘ એના પર એકાદું સલાહ-લેકચર જીંકતા પણ જોવા મળે જ છે …!! એસી સિવાય રહી ના શકનાર પણ મોકો આવ્યે તડકાનો મુકાબલો કેમ કરવો એની સલાહો દઈ શકે છે અને થેલી લઈને શાકમાર્કેટ આવેલો ભડવીર સલાહસત્રમાં પત્નીને કાબુમાં કેમ રાખવી એનો સલાહ-બફાટ પણ કરી જાણે..!!! બજેટ પહેલા નાણામંત્રીને કે વડાપ્રધાનથી લઈને ફિલ્મસ્ટારો અને ખેલાડીઓને સલાહો તો હર ગલી-નુક્કડના ગલ્લાઓ પર રોજે રોજ અપાતી જ હોય છે ( પછી ભલે ને એ લોકો સુધી અમુલ્ય સલાહો પહોચવાની હોય નહિ તો પણ …)

સૌથી વધુ સલાહોની સટાસટી કેરિયરની પસંદગીના રણમેદાનમાં ઉતરવા જતા વિદ્યાર્થીવીરો અને એમના વાલીઓ સાથે અને હોસ્પીટલના બિછાને પડેલા દર્દી આગળ થતી હોય છે અને બન્ને કેસમાં સલાહો કેટલીકવાર ભવિષ્યની અત્યંત અમંગળ નિશાનીઓ સાથે આપવામાં આવતી હોય છે . કેરિયર ચોઈસ વખતે તો એટલી બધી સલાહો મળે કે પેલા બાપડાને તો એમ જ થઇ જાય કે આના કરતા પાણીપુરીની લારી શરુ કરી દઉં એ જ બેટર રહેશે …!!! લો-બીપી ના લીધે હોસ્પીટલમાં દાખલ થનાર આગળ સલાહ નહિ માનો તો ફલાણા ભાઈને એટેક આવેલો ત્યાં સુધીની સલાહોરુપી અગમ્ચેતીઓ આપી દેનારા સલાહવીરોને પેલાના નાજુક જીગર પર શું વીતશે એનો ખ્યાલ હોતો નથી ..!!! કરે પણ શું ? સલાહ આપવી એ આપણો જન્મસિદ્ધ અધિકાર છે એવું માનનારાને મન તો સલાહ આપીને કશુક અમુલ્ય અને અદ્વિતીય કાર્ય કર્યાનો સંતોષ જ મહત્વનો હોય છે …!! અસલમાં સલાહ આપવી એ એક એવી સનાતન ચીજ છે કે જે માણસ કશું જ આપી શકે એમ હોય નહિ એ પણ સલાહ તો અચૂક આપી જ શકે …!!! શાસ્ત્રોમાં લખવાનું રહી ગયું છે કે સલાહ લેનાર જેટલો કોઈ ભોટ નથી અને સલાહ આપનાર જેટલું કોઈ જ્ઞાની નથી …!!!

સાલ્લુ આમાં પણ એક ટ્વીસ્ટ એ છે કે સલાહ આપવી સારી કે લેવી સારી ? અઘરું તો છે પણ ઘણા સલાહ ઇચ્છુકો પણ એવા હોશિયાર હોય કે નક્કી કરીને જ સલાહ લે અને જો તમે એણે માંગવા ધારેલી સલાહથી વિપરીત સલાહ આપવા માંડો તો મારી મચડીને એની મનવાંછિત સલાહ સુધી તમને પહોચાડી જ દે …!!! અસલમાં સલાહ લેવા કરતા સલાહ આપવી વધુ અઘરી છે . પૂછો કયું ? એ એટલા માટે કે આપેલી સલાહ જ શ્રેષ્ઠ છે એવું સલાહ માંગનારના દિમાગમાં ઠસાવવા જે મહેનત કરવી પડે છે એ અત્યંત કઠીન છે . એવું પણ બને કે તમારી સલાહ પેલાના પલ્લે ના પણ પડે તો સલાહ આપનારે સતત એ વાતનું ધ્યાન રાખવું પડે કે એણે આપેલી સલાહથી ઉલ્ટું થયું તો તરત જ ‘ મારી સલાહ માની હોત તો આમ થાત નહિ ‘ ની બાંસુરી બજાવીને ‘ માય સલાહ વોઝ બેસ્ટ ‘ સાબિત કરતા રહેવું પડે ..!! એનીવે ઓન એ સીરીયસ નોટ એક વાત સમજી લો કે તમારા ખુદ કરતા કોઈ વધુ સારો સલાહકાર હોઈ શકે નહી અને ઇન્કેઇસ કોઈની સલાહ લેવાની થાય તો ઉતાવળે એનો અમલ કર્યા વગર એ સલાહને એક માર્ગદર્શન તરીકે લેવી પડે અને એમાં પોતાની પરીશ્થીતી મુજબ આકલન કરવું પડે . સાવ એવું પણ નથી કે બધી જ સલાહો નિરુપયોગી હોય છે , અસલમાં સમજુ અને ડાહ્યા માણસની સાચી સલાહ ઉપયોગી બની શકે છે પણ આ સમજુ અને ડાહ્યાની વ્યાખ્યા તમારે નક્કી કરવી પડે અને હા સલાહ લેવી એમાં કાઈ ખોટું નથી પણ એ સલાહનો ઉપયોગ અને અમલ કેટલો કરવો એ તો તમારે જ નક્કી કરવું પડે …!!!! આ હતી મારા તરફથી છેલ્લી સલાહ ….!!!!

વિસામો

“ ડાહ્યા માણસો સલાહ પર વિચાર કરે અને મુર્ખાઓ એનો તરત અમલ કરે “ – શાહબુદીન રાઠોડ

– અજય ઉપાધ્યાય ( ગાંધીનગર સમાચાર – કોલમ #રઝળપાટ ૭ એપ્રિલ ૨૦૧૯ )

‘ ફૂલ ‘ બનવાની ક્યાં નવાઈ છે ….!!!!

Featured

‘ ફૂલ ‘ બનવાની ક્યાં નવાઈ છે ….!!!!

‘ ઓ ભાઈ તું ટાઢા પહોરની હાંક નહી…”……..” શું સાવ ફેંકા-ફેંક કરે છે ….’….’ ઓ હેલ્લો મને તો આ ગપ્પુ જ લાગે છે ..’….’ ના હોય ???? હાચ્ચે જ એવા સમાચાર છે ? ક્યા ? ટીવીમાં તો કાઈ આવતું નથી ..’…સી , પ્રશ્નો અને આશ્ચર્યોના અનેકો પ્રકાર હોય શકે છે પણ આ બધા પાછળ મકસદ તો એક જ રહેવાનો અને એ છે કોઈને ઉલ્લુ બનાવવાનો …!!!! ઉલ્લુ બોલે તો ઉલટા લટકાને કા બીડું ….!!!! જી હા , આમ તો માર્ચ એન્ડીંગની પળોજળમાં ફસે હુયે ઇન્સાનોકો કલ યાનીકી પહેલી એપ્રિલકી કોઈ જ્યાદા ઈફેક્ટ નહિ હોતી હૈ …ફિર ભી કાલે એપ્રિલનો પહેલો દિવસ યાની કી એપ્રિલ ફૂલ બનાવવાનો અને બનવાનો સુભગ સયોંગ સર્જાવાનો છે એ જસ્ટ જાણ ખાતર ,,,,!!!!

આમ તો શું છે કે વી ધ પીપલ ને ‘ એપ્રિલ ફૂલ ‘ બનવાની બહુ કાઈ નવાઈ રહી નથી . નિર્દોષ આનંદની વાત છોડો પણ ડગલેને પગલે ક્યાંક ને ક્યાંક અને રોજ ને રોજ હું ને તમે એપ્રિલ ફૂલ બનતા જ આવીએ છીએ એટલે શું છે કે ‘ ફૂલ ‘ બોલે તો મૂરખ બનવા માટે કોઈ પેસીય્લ દિવસની ક્યા જરૂર જ છે ?!!! શું કિયો છો ….?? હવે એવું ક્યા છે કે કોઈ અંગત …દોસ્ત કે સગા-સંબંધી જ એપ્રિલ ફૂલ અને એ પણ ફર્સ્ટ એપ્રિલે જ બનાવે , હવે તો બારે મહિના અને ત્રણસો પાસઠે દહાડા ક્યાંક ને ક્યાંક ઉલ્લુ ઉફ્ફ્ફ્ફ આઈ મીન એપ્રિલ ફૂલ બનતા જ રહીએ છીએ ..હૈ કી નહિ ??? અને જાણવા છતાં પણ બનતા હો રહીએ છીએ . ટીવી-છાપામાં અનેકો બનાવો ફ્રોડ અને કપટના આવે છે તોયે આપણામાંથી કેટલાયે એટીએમ પીનથી લઈને ક્રેડીટ કાર્ડના ફ્રોડના શિકાર બનીએ જ છીએ ને …? ‘ અંકલ તમારા પૈસા પડી ગયા ‘ આવું કહીને ૧૦-૨૦-૧૦૦ની નોટ વીણવા સ્કુટર રોકીને ઉતરેલો પેલો જ્યારે સ્કુટરમાં લટકાવેલો પૈસા ભરેલો થેલો ગઠીયો ઉપાડી ગયો એમ જાણે ત્યારે પોતાની લાલચની સાથે સાથે મૂર્ખતા પર પણ ગુસ્સે થાવાનો જ …!! ભલે ને એને ફ્રોડ કહો પણ થયું તો એપ્રિલ ફૂલ જ ને …??? જાણવા છતાં અથવા તો માન્યામાં ના આવે એવી વાત હોય છતાં પણ એમાં ખેંચાવું એ વન ટાઈપ ઓફ ફૂલ જ છે ..!!

કોઈને પણ પૂછો કે પછી સર્વે કરાવો કે ‘ સૌથી વધુ એપ્રિલ ફૂલ ‘ કોણ બનાવે છે ? ‘ તો ૧૦૦ માંથી ૯૯ કહેશે કે ‘ રાજકારણીઓ “…!!!! ખીખીખીખી અને એમાયે અત્યારે તો ઇલેક્શનની મોસમ છે એટલે યુ કેન ફિલ ધ એપ્રિલ ફૂલ ઈફેક્ટ મોર…..!!!! ફૂલ બનાવવાની રમત ચરમસીમા પર છે . હવે તો રીઝલ્ટ આવે ત્યારે જ ખબર પડશે કે કોણે કોને ‘ એપ્રિલ ફૂલ ‘ બનાવ્યા …?? એક્ચ્યુલી રીઝલ્ટ મે માં છે તો ‘ મે ફૂલ ‘ કહી શકાય …. લોલ્ઝઝ્ઝ્ઝ …!!! યસ , સો ટકા સાચી વાત છે કે વગર એપ્રિલે પણ જો કોઈ આપણને વધુમાં વધુ એપ્રિલ ફૂલ રમાડતા હોય તો એ છે અવર પોલીટીશીય્ન્સ …!!! “બુરા ના માનો હોલી હૈ “ ભલે ને હમણાં જ ગઈ હોય પણ રાજકારણીઓએ આ વાક્યનું બુરું લગાડવાની છૂટ છે …!!! વચનોની ભરમાર અને વાયદાઓની વહેચણી એ બીજું કાઈ નહિ પણ એક પ્રકારનું એપ્રિલફૂલ જ છે . તકતીઓ લગાડ્યા પછી …ખાતમૂહરતો કર્યા પછી ….વાયદાઓ આપ્યા પછી ….પણ ના થયેલા કામો એ એપ્રિલ ફૂલ જ છે ..!! ખેર રાજકારણ આખ્ખે આખ્ખું જ બેઝીકલી ફૂલ બનાવવાની ગેમ પર રચાયેલું છે એમાં તો ખુદ નેતાલોગ પણ ના નહિ પાડે ..!!! જો કે ઘણી વખત લોકો પણ સભાઓમાં લાખોની મેદનીમાં આવ્યા હોવા છતાં પણ બીજાને ચૂંટી કાઢે ત્યારે રાજકારણીઓનો દાવ થઇ જાય અને પ્રજા એમને એપ્રિલ ફૂલ બનાવે એવું પણ બને જ છે ….!!!! આને કહેવાય તેરા તુજકો અર્પણ ..!!!!!!

જનરલી એપ્રિલ ફૂલ દિવસનું મોરલ એ છે કે આ દિવસે ફૂલ બનનાર ખોટું ના લગાડે કેમકે ઓફીસ્ય્લી આ દિવસે કોઈને ફૂલ બનવાનો અને બનાવવાનો હક્ક છે પણ રોજબરોજ એટલા બધા ફૂલ આપણે બનીએ છીએ કે હવે કોઈને ફૂલ બનાવીને કહો કે ‘ હેપ્પી એપ્રિલ ફૂલ ડે ‘ તો સામો જવાબ મળે કે ‘ આની ક્યાં નવાઈ છે ?’..!!! ખાલી વર્બલી ફૂલ બનવાની ક્યા માંડો છો …હવે તો ડીજીટલ ફૂલ ડે પણ હાજર છે અને એ પણ ઓલ્મોસ્ટ એવરીડે..!!! ઓનલાઈન સેલ આનું જ્વલંત ઉદાહરણ છે . ‘ મોબાઈલ માત્ર ૧૦૦૦૦ માં ‘…’ ૫૦% ઓફ પ્રાઈઝ સેલ “….’એક રૂપિયામાં ટીવી ‘ ….જેવી લીંકો ક્લિક કરો ને ક્યા તો આઉટ ઓફ સ્ટોક આવે કે પછી શરતોને આધીન ફૂદડીવાળી વાત વાચો એટલે ફૂલ બન્યાની ફીલિંગ આવી જ જાય ..!! ખેર એને તમે માર્કેટિંગ ગીમીક્સમાં ગણાવી શકો પણ લીંક ક્લિક કરીને ત્યાં પહોચનાર તો ફૂલ જ બની ગયો કે નહિ ….???

આ વખતે પહેલી એપ્રિલ રવિવારે છે એટલે આ લખનારે જેમ એના પર લખ્યું છે એમ રવિવારની રજાની મજા લેવા છાપા અને ટીવી માં ફૂલ ન્યુઝ આવવાના …પણ સાચું કહું તો આગળ લખ્યું એમ સતત ફૂલ બનતા રહેતા મારા-તમારા જેવા આમ ઇન્સાનો માટે એપ્રિલની પહેલી તારીખે મજા માટે બનાવતા ‘ ફૂલ ન્યુઝ ‘ એટલા બધા એક્સાઈટ નથી કરતા ..!!! ઠીક છે હસી-ખુશી માટે બે ઘડી ‘ એપ્રિલ ફૂલ બનાયા તો ઉનકો ગુસ્સા આયા ‘ બબડવું ગમે છે પણ ચારેકોર ફૂલ જ તો બનતા રહીએ છીએ ..!!! જો કે એક દિવસ માટે તો એક દિવસ માટે પણ ‘ એપ્રિલ ફૂલ ‘ ના દિવસે નિર્દોષ મજાક કે ગમ્મત કરવામાં પણ કાઈ ખોટું નથી . આ ભાગદોડવાળી જીંદગીમાં એકાદ આવી ક્ષણ ખુશી અને છેતરાયા છતાં પણ ‘ એ દાગ અચ્છે હૈ ‘ બોલવામાં પણ મજા છે . બાકી તો ફૂલ આપણે રોજ બનીએ જ છીએ . ઘણીવાર જાણી જોઇને તો ઘણીવાર અજાણતા જ ..!!!

ખેર બેક ટુ ક્યાં ક્યા ને કેવા કેવા એપ્રિલ ફૂલ બનીએ છીએ આપણે..!!!! ચૂંટણી આવતા જ ‘ લોકોનું ભલું ‘ કરવાના બહાને એકમાંથી બીજી પાર્ટીમાં ગુલાંટ મારતા નેતાઓ આપણને બિન્દાસ એપ્રિલ ફૂલ બનાવી જાય છે ….અત્યારે ઈલેક્શનનો માહોલ છે તો હમણાં જ જે બહાર પાડવામાં આવશે એ ‘ ચૂંટણી ઘોષણાપત્ર ‘ એ પણ વન ટાઈપ ઓફ ‘ એપ્રિલ ફૂલ ‘ જ ગણવું , કેમકે મોટાભાગના વચનો તો પાંચ વર્ષે પણ પુરા થતા નથી જ ને …!!! .સ્કુલ-કોલેજોમાં એડમીશન વખતે બ્રોશરોમાં ફેસીલીટીઓની ઝાકઝમાળ પ્રિન્ટીંગ વચ્ચે એડમીશન લીધા પછી ખબર પડે કે ગ્રાઉન્ડના નામે ૨૦x૨૦ ની ખુલ્લી જગ્યા કે પછી કોમ્પ્યુટર લેબના નામે શેરીંગવાળા પીસી છે – લો બની ગયા ને ફૂલ ?……વોટ્સઅપ અને શોશિયલ મીડિયામાં ફોટોશોપ કરેલા ફોટાઓ અને ડબ કરેલા વિડીયો વગર વિચાર્યે સાચા માનીને ફોરવર્ડ કરતા વી ધ પીપલ જયારે ખબર પડે કે આ તો ફેક હતું ત્યારે ક્યા કોઈને કહી શકીએ છીએ કે ‘ એપ્રિલ ફૂલ ‘ બની ગયા અલ્યાઆઆઆ …!!!! ૪૬ લાખમાં થ્રી બીએચકે ની જાહેરાતો જોઇને જ્યારે બિલ્ડરને મળીયે ત્યારે ખબર પડે કે ટોટલ તો આપણને ૪૬ નહિ પણ બધું મળીને ૫૬ માં પડવાનો ….!!! આવું તો ઘણું આંખ બંધ કરીને વિચારશો તો તમને જ મળી જશે ….!!! છતાં પણ ઘણીવાર જાણવા છતાયે મૂરખ બનવાની પણ મજા છે એમ સમજીને પણ ‘ હેપ્પી ફૂલ ડે “ !!!!

વિસામો :

એપ્રિલ ફૂલ ડે ની તો હાઈટ એ વાતમાં આવે કે આ દિવસે કોઈ રીયલી સીરીયસ ન્યુઝને પણ વર્તમાનપત્રોએ “ આ એપ્રિલ ફૂલ ન્યુઝ નથી “ એમ કહીને છાપવા પડે છે ….!!!

  • અજય ઉપાધ્યાય ( ગાંધીનગર સમાચાર – કોલમ #રઝળપાટ ૩૧ માર્ચ ૨૦૧૯ )

મા મારી “ ગુજરાતી “ છે …!!!!

Featured

મા મારી “ ગુજરાતી “ છે …!!!!

યુનેસ્કોનો એક અહેવાલ વાંચશો તો ચોંકી ઉઠશો ….યુનેસ્કો બહુ જ જવાબદારીપૂર્વક કહે છે કે દર બે અઠવાડિયે વિશ્વમાંથી એક ભાષા ભુલાઈ રહી છે …અહી ભાષા એટલે જે તે લોકોની માતૃભાષા જ ગણવી …!!! ગંભીર છે ને ? આટલું વાંચીને રુવાડું ના ફરકે તો જરા વધુ ચિંતા એ વાતની કરવા જેવી છે કે કાલે ઉઠીને આ લુપ્ત થતી ભાષામાં ક્યાંક ગુજરાતી તો નહિ આવી જાય ને …???? તમે હજુ મનોમન જવાબમાં “ ના …ના “ એવું ચિલ્લાઈ ઉઠો એ પહેલા એક બીજી વાત પણ જાણી લ્યો કે વિશ્વમાં લગભગ ૭૦૦૦ જેટલી ભાષા બોલાઈ છે જેમાંથી અંદાજે અર્ધી ભાષાઓ યા તો લુપ્ત થવાના આરે છે યા તો ઓલરેડી લુપ્ત થઇ ચુકી છે ….!!! પણ રાહત અને સંતોષની વાત એ છે કે હજુ સુધી તો ‘ ઘણું જીવે છે ગુજરાતી ‘…!!!

આ તમે વાંચતા હશો ત્યાં સુધીમાં વિશ્વ માતૃભાષા દિવસની ધોધમાર ઉજવણીઓના ભરચક પ્રોગ્રામો બહાર પડી ગયા હશે અને ‘ ગુજરાતી બચાવો ‘…’ ગુજરાતી વંચાવો ‘ અને ‘ ગુજરાતી બોલો ‘ ના સ્લોગનો સાહિત્યસભાઓ – મેળાવડાઓ કે બેઠકોમાં ગળા ફાડીફાડીને પોકારાઈ રહ્યા હશે પણ હકીકત એ છે કે ગુજરાતી બચાવવાના થાય એટલા પ્રયત્નો હરેકે કરવા જરૂરી છે ..!! હહહહ રખે એવું માનતા કે ગુજરાતીનો વારો બહુ જલ્દીથી લુપ્ત થતી ભાષાઓમાં આવી જવાનો છે …ના બાબા ના ..સાવ એવું પણ નથી જ , પણ શું છે કે ભાષા એના બોલનાર – વાંચનાર અને લખનારથી જીવતી રહેતી હોય છે …વિકસતી હોય છે …ફૂલતી હોય છે …પ્રસાર પામતી હોય છે એવામાં જો મી એન્ડ યુ અર્થાત હું ને તમે જ જો ગુજરાતીની અવગણના કરતા થઇ જઈશું તો ગુજરાતી ભાષાનો ધી એન્ડ ભલે નજીકમાં નહિ તો પણ બહુ દુર પણ નહિ જ હોય …!!!

જુઓ વાત એકદમ સીધી ને સટ છે ..બાળક જેટલું માં ના ખોળામાં કિલકિલાટ-સુખ અને શાંતિ મેળવે એટલું આયાના ખોળામાં તો ના જ મેળવે ..!!! સીધી વાત છે ગ્લોબલ સ્પર્ધાઓના જમાનામાં બીજી ભાષાઓ શીખવી જરૂરી છે જ ( અહી બીજી એટલે ઓલ્મોસ્ટ કોમન ઈંગ્લીશ જ સ્તો ..!!! )પણ એનો અર્થ એવો હરગીજ ના થવો જોઈએ કે ગુજરાતી જરૂરી નથી ..!! ગુજરાતી મારી મા અને અંગ્રેજી મારી માસી ….!!! હા તો એમાં ક્યા પ્રોબ્લેમ જ છે કોઈને પણ માં ભુલાઈ નહિ એ જ જરૂરી છે . ગુજરાતી પર અંગ્રેજી શિક્ષણનો પ્રભાવ વધતો જાય છે ..ઈનફેક્ટ રૂટીન ગુજરાતી બોલતા સંતાનો ઓછા થતા જાય છે તો એમાં વાંક ઘરમાં કે વ્યવહારમાં અંગ્રેજી બોલવાનો આગ્રહ રાખતા માં-બાપનો વધુ છે એવું તો હવે લગભાગ બધા સ્વીકારતા થયા છે . સારું છે એમાં કાઈ ખોટું પણ નથી પણ સરવાળે તો ગુજરાતીમાં વાતો કરતા સગાઓ વચ્ચે મો વકાસીને ઉભા રહેતા બાળકને જોવું ના હોય તો એટલીસ્ટ અંગ્રેજી શિક્ષણની સાથે સાથે એ ગુજરાતી બોલે- વાંચે એટલું તો થઇ શકે ને …?

બોર્ડના રીઝલ્ટ જોઈ લ્યો …ગુજરાતમાં જ ગુજરાતી વિષયમાં નાપાસ થનારાની સંખ્યા વાંચીને એમ થાય કે ખાટલે જ મોટી ખોટ છે ત્યાં જગતને ક્યાં જામગીરી ચાંપવી …? ચાલો માન્યું કે બોર્ડની પરીક્ષામાં ગુજરાતીમાં નાપાસ થવાનું કારણ કદાચ શૈક્ષણિક ગુજરાતી અભ્યાસક્રમ હોય શકે પણ નિષ્કર્ષ તો એ જ નીકળી શકે ને કે ક્યા તો ગુજરાતી વાંચન ઓછું થયું , ક્યા તો ગુજરાતીમાં રસ લેવડાવનારાઓનો દુકાળ પડ્યો ..!!! છે. ‘ગુજરાત મોરી મોરી રે…’નાં માત્ર ગાણાં ગાવાથી હવે ગુજરાતીને જિવાડી નહીં શકાય. વિશ્વમાં એક અંદાજ મુજબ આશરે ૭ કરોડ જેટલો ગુજરાતી બોલનારો વર્ગ છે. વિદેશી ગુજરાતીઓ તો વિકેન્ડમાં પોતાના સંતાન ગુજરાતી બોલે-લખે-વાંચે એના પ્રયત્નો કરી રહ્યા છે , અરે ગુજરાતમાં વસેલા બીજા રાજ્યોના લોકો પણ આસાનીથી ગુજરાતીને એક્સેપ્ટ કરી રહ્યા છે એવામાં ગુજરાતમાં જ ગુજરાતીની અવદશા ….? એનો મતલબ એ થયો કે ઈ.સ. ૭૦૦ આસપાસ જેનું ઓફિસિયલ ‘ ગુજરાતી ‘ એવું નામાભિધાન થયું એ ગુજરાતી ભાષા વિષે ચિંતન-ચિંતા કરવાનો સમય તો ક્યારનો પાકી ગયો છે એમાં કોઈ બેમત નથી જ . ઈ.સ.૧૧૦૦થી ૧૫૦૦ વચ્ચેના સમયમાં રાજસ્થાન તરફથી અપભ્રમશ થઈને જુની ગુજરાતી ભાષાનું નિર્માણ થયું એ પછી સુધારા સાથે આજની ગુજરાતી ભાષા અસ્તિત્વમાં આવી , જો કે ગુજરાતી શબ્દોનો સૌથી પહેલો ઉપયોગ કવિ પ્રેમાનંદે ઈ.સ.૧૬૦૦-૧૭૦૦માં તેમના સાહિત્યમાં કર્યો હોવાનું મનાય છે . ગુજરાતી ભાષા ત્રણ તબકકામાં વિકસી – પ્રથમ ૧૦ થી ૧૪ની સદી વચ્ચે જુની ગુજરાતી , દ્વિતીય ૧૪ થી ૧૭મી સદી મધ્યકાલીન ગુજરાતી અને તૃતીય અબ્ક્કો ૧૭મી સદીથી આજસુધી અર્વાચીન ગુજરાતી .!!

ખેર આટલી જૂની ભાષાને સાવ સાચવવામાં નથી આવી એવું પણ નથી જ . ઈનફેક્ટ આ લખનારનું નિરીક્ષણ છે કે હાલના તબક્કે ગુજરાતી વધુને વધુ મજબુત – લોકભોગ્ય બની રહી છે . સાવ એવું પણ નથી કે ગુજરાતી લખાતું નથી , બોલાતું નથી કે વંચાતું નથી – બધું જ થાય છે . પ્રયત્નો ભરપુર થઇ રહ્યા છે , સાહિત્ય સર્જન અને સર્જકોને ઉમળકાભેર વધાવવામાં આવી રહ્યા છે . જ્ઞાનસત્રો , બેઠકો , પુસ્તકમેળાઓ જેવી પ્રવૃત્તિઓ પૂરબહારમાં છે . પણ હકીકત એ છે કે માતૃભાષાને જીવતી રાખવા મથતા લોકોની એક ફરિયાદ પણ છે જ કે લોકોનો માતૃભાષા પ્રત્યે પ્રેમ ઘટી રહ્યો છે અને આ લોકો મતલબ નવી પેઢી જ ગણવી ..!!! નવી પેઢીને વધુને વધુ માતૃભાષા તરફ વાળવી ….માતૃભાષા શું છે ? એનું જ્ઞાન આપવું અને માતૃભાષા જ સંસ્કારનું સાચું ઉદગમસ્થાન છે એવી શીખ-સમજ આપવી આજની તાતી જરૂરીયાત બની ગઈ છે .

એવું નથી કે કોઈ ભાષા ફટાફટ ભુસાઈ જાય અને એમાં પણ આ તો આટલી જૂની ભાષા , પણ શું છે ભાષાનો વિકાસ અને જાળવણી પેઢી દર પેઢી થતી હોય છે એવામાં જો આવનારી પેઢીને ગુજરાતી એટલે શું એ જ જો ખબર બહિ હોય તો ….? સારા ગુજરાતી સર્જનોને વધાવતા રહેવું પડશે …ગુજરાતી સર્જન ખોટનો સોદો છે એ માન્યતા બદલાવવી પડશે …. ગુજરાતી સર્જકોને હુંફ આપતી રહેવી પડશે … ભલે ને ફેસબુક પર તો ફેસબુક પર પણ ગુજરાતીમાં લખાયેલી કોઈ સારી પોસ્ટને લાઈક-શેર કરતા રહેવું પડશે …સારા અને સાચા ગુજરાતી કાર્યક્રમોમાં ભાગ લેતો રહેવો પડશે … વિશ્વભરના વધુને વધુ ગુજરાતીઓને ‘ ભાષા મારી ગુજરાતી છે “ માં ઇન્વોલ્વ કરાવતા રહેવા પડશે ….’ ગુજરાતી એટલે બીઝનેસમેન ‘ એવા ટેગનો ભલે ઘમંડ રાખીએ પણ સાથે સાથે બીજા રાજ્યોના લોકોમાં પોતાની માતૃભાષાનું જે ગુમાન-આદર છે એ હરેક ગુજરાતીએ કેળવવો પડશે …..‘ કાઉ ‘ અને ‘ ક્રો ‘ ની સાથે સાથે ગાય અને કાગડો પણ બોલાતું રહેવું જોઈએ ..!!! ‘ બેટા હોટ હોટ થેપલા ઈટ કરી ને કોલ્ડ મિલ્ક ડ્રીંક કરજે ‘ ની સાથે સાથે ગગા કે ગગીને આખો કક્કો આવડે એવા પ્રયત્નો પણ કરતા રહેવા પડશે …!!!! લીસ્ટ લાંબુ બની શકે એમ છે અને સાવ એવું પણ ના માનતા કે આવું કશું થતું જ નથી , બધું જ થાય છે , સારું અને વિપુલ સાહિત્ય સર્જન થઈ રહ્યું છે , ગુજરાતીનો પ્રચાર-પ્રસાર પણ બરાબર થઇ રહ્યો છે ,અને ગુજરાતી ભાષા સાવ વેન્ટીલેટર પર પણ નથી જ પણ શું છે કે જોઈએ એટલો વ્યાપ-વિસ્તાર હજુ કરવો બાકી છે અને એનો એકમાત્ર ઉપાય એ જ છે કે સહિયારો પુરુષાર્થ જ ‘ ભાષા મારી ગુજરાતી ‘ ને આવનારા વર્ષો કે સદીઓમાં લુપ્ત થતી બચાવી શકશે એ નિર્વિવાદ સત્ય છે ..! મારા અને તમારા તરફથી આટલું અને આવું કશુક થઇ શકતું હોય તો ભવિષ્યમાં ‘ ગુજરાતી ભાષા બચાવો ‘ નો કાગારોળ – મોરચાઓ –બેઠકો- ચિંતનસભાઓ – સેમિનારો નહિ કરવા પડે ….!!!! આફ્ટરઓલ માતૃભાષા તો મા છે અને મા માટે આટલું તો થઇ જ શકે ને ….??

ઠંડક :

ટાગોર , અમર્ત્યસેન , અબ્દુલ કલામ , કલ્પના ચાવલા , મહાત્મા ગાંધી ,સી.વી.રમણ , બાબાસાહેબ આંબેડકર , ધીરુભાઈ અંબાણી ……………………- આ બધા જ માતૃભાષામાં જ ભણેલા …!!!!!

  • અજય ઉપાધ્યાય ( નમસ્કાર ગુજરાત મેગેઝીન ઓસ્ટ્રેલીયા – કોલમ #પરબ ફેબ્રુઆરી૨૦૧૯ )

આઈપીએલ અને વર્લ્ડકપ : આર યુ રેડીઈઈઈઈઈઈઈઈઈ!!!!!!!

Featured

આઈપીએલ અને વર્લ્ડકપ : આર યુ રેડીઈઈઈઈઈઈઈઈઈ!!!!!!!

એકબાજુ રાજકારણીઓ ક્લીન સ્વીપ અને સિક્સર-બાઉન્ડ્રીસ ફટકારવા તૈયાર છે ત્યારે બીજી બાજુ ભારત અને વિશ્વ બીજી એક રોમાંચક ફટકાબાઝી માટે તૈયાર છે . આ લેખ તમે વાંચતા હશો ત્યાં સુધીમાં વિશ્વની લોકપ્રિય ફટાફટ ક્રિકેટની આવૃત્તિ યાની કી આઇપીએલ ની ૨૦૧૯ ની સીઝનનો પ્રારંભ થઇ ચુક્યો હશે અને પહેલા જ હાઈ-વોલ્ટેજ મુકાબલામાં ધોની અને કોહલી ટકરાઈ ચુક્યા હશે …!!! જસ્ટ થીંક ધ કલેશ યાર …..ધોનીની સામે કોહલી ….એકરીતે તો સુપ્રમસીનો જ મુકાબલો કહેવાય ને …? આઇપીએલની આ જ તો મજા છે કે એક જ ટીમના બે મેમ્બર્સની એકબીજાની સામેની ભીડંત જોવાની જલસો જ પડી જાય …!! અને ચાહકો પણ કમ્બાઇનથી છુટા પડીને ઈન્ડીવિડ્યુંલ ચાહકોમાં ફેરવાઈ જાય …..ધોનીઈઈઈઈઇ ધોનીઈઈઈઈઇ કે કોહલીઈઈઈઇ કોહલીઈઈઈઈપોકારતા ચાહકોથી સ્ટેડીયમ ગુંજી ઉઠે …!!!

ક્રિકેટ વર્લ્ડકપને હવે કાઈ બહુ વાર છે નહિ એવામાં આઇપીએલ ૨૦૧૯માં ખેલાડીઓને રેસ્ટ લેવા કે આપવા બાબતે ચાલુ થયેલી ચર્ચાઓ વચ્ચે એક વાત એ પણ છે કે વર્લ્ડકપ પહેલા પોતાની ખામીઓને સુધારવાનો અને પોતાની ખૂબીઓને વધુ બહેતર બનાવવાનો આઇપીએલ એક બહેતર મોકો છે એવું આ લખનાર માને છે . નો ડાઉટ ઈજાઓ કોઇપણ ક્રિકેટરની કારકિર્દી માટે વિલન સાબિત થઇ શકે છે એમ હોવા છતાં પણ આઇપીએલનું ફટાફટ વર્ઝન ક્રિકેટરો માટે લર્નિંગ પીરીયડ બની તો શકે જ છે . જો કે વર્લ્ડકપ એરાઉન્ડ ધ કોર્નર છે એવામાં અને લગભગ બધા જ દેશની વર્લ્ડ કપ ઈલેવન ઓલમોસ્ટ નક્કી જ થઇ ગઈ છે એવામાં પણ આઇપીએલમાં થનારા ચોકન્ના પ્રદર્શન પર પસંદીકારોની નજર તો રહેવાની જ ..!!

આ વખતના આઇપીએલને ઈલેક્શનની ગહેમાંગહેમી કદાચ અસર પાડી શકે છે છતાં પણ ભારતીય ક્રિકેટની આ ફટાફટ ટુર્નામેન્ટ લોકપ્રિય તો છે જ એમાં ના નહિ . ખાસ તો ઉગતા કે આશાસ્પદ ખેલાડીઓ માટે તો આઇપીએલ કુબેરભંડારીની સાથે સાથે રાષ્ટ્રીયટીમના બારણા ખખડાવવાનો એક સોનેરી મોકો પણ છે . જેમ કે કિંગ્સ ઈલેવન પંજાબ દ્વારા ૮.૪ કરોડ જેવી અધધ રકમે ખરીદાયેલ સી. વરુણ . એક ઓવરના છ એ છ દડા અલગ અલગ નાખી શકવાની ક્ષમતા રાખનાર આ મિસ્ટ્રી સ્પિનર પર દેશ અને પસંદીકારો બંનેની નજર રહેવાની તો ૫ કરોડમાં રોયલ ચેલેન્જરે ખરીદેલ શિવમ દુબે , ૪.૮ કરોડમાં પંજાબ દ્વારા રખાયેલ પ્રભસીમરન સિંહ અને રોયલ ચેલેન્જરમાં ૩.૬ કરોડમાં લેવાયેલ આકાશદીપ નાથ પર પણ બધાની નજર રહેશે . એવી જ રીતે બીગબેશ અને હમણાં જ પૂરી થયેલી ભારત-ઓસીઝ સીરીઝમાં સુપેર્બ દેખાવ કરી ચૂકેલ અને માત્ર ૫૦ લાખમાં રાજસ્થાન રોયલ દ્વારા લેવાયેલ ઓસીઝ ડેશિંગ બેટ્સમેન એશ્ટન ટર્નર એકલે હાથે મેચ બદલી શકે છે કે નહિ એ જોવા પણ દર્શકો ઉત્સુક છે ..!! સી , આઇપીએલની આ જ મજા છે દર વખતે કોઈ એક કે બે એવા હીરાઓ બહાર આવે છે કે જેની કોઈ નોંધ ટુર્નામેન્ટ શરુ થવા સુધી કોઈએ પણ લીધેલી નથી હોતી …!!!

આઇપીએલ ૨૦૧૯ ભારતીય ક્રિકેટટીમ માટે પણ અગત્યની છે , નો ડાઉટ કદાચ વર્લ્ડકપના સંભવિત ૧૫ નક્કી થઇ જ ગયા હશે અને જેમ ઓસીઝ સીરીઝ પછી પત્રકાર પરીષદમાં કોહલીએ કહ્યું એમ એકાદ ફેરફાર સાથે અમારી વર્લ્ડકપ ઈલેવન ઓલ્મોસ્ટ નક્કી જ છે છતાં પણ આઇપીએલ ૨૦૧૯માં કોહલીની કેપ્ટનસીની કસોટી અને આકલન તો થવાનું જ . ભલે ને વર્લ્ડ કપ માટે કોહલી જ કેપ્ટન છે જ પણ કેપ્ટનસીની ધાર કાઢવામાં કોહલી અને બોર્ડ બન્ને માટે આ આઇપીએલ એકરીતે આશીર્વાદરૂપ સાબિત થશે એટલું જ નહિ પણ કોહલી પર પણ ચેલેન્જરને એટલીસ્ટ ફાઈનલ સુધી પહોચાડવાનું દબાણ પણ રહેશે જ આવી સ્થિતિમાં કપ્તાની અને ટીમની એઝ એ બેટ્સમેન કોહલી પર વધુ આશાઓ નીચે કોહલી કેવો દેખાવ કરે છે એ જોવું રહ્યું . બિલકુલ એ જ રીતે બુમરાહ , ભુવી અને શામી માટે પણ આ આઇપીએલ અગત્યની રહેશે કેમકે ખરેખર તો આઇપીએલ પહેલા જ સ્ટાર ખેલાડીઓને આરામ આપવાની વાત ચગેલી પણ પૈસા ના સમુંદર એવા આઇપીએલ છોડવું કોને પોસાઈ કે લખલૂટ પૈસા આપ્યા પછી કઈ ફ્રેન્ચાઈઝી એમ કહે કે ના બકા તું તારે આરામ કર .!!!! એટલે આ ત્રણ બોલરો કે જેના પર ઇંગ્લેન્ડની સરજમીન પર વર્લ્ડકપ ખેલાવાનો છે એને કોઈ ઈજા ના થાય કે વર્કલોડ ઓછો આવે એવા પ્રયત્નો કરવાની રીક્વેસ્ટ થઇ ચુકી છે ..!!! જો કે કોહલી કહી ચુક્યો છે કે વર્લ્ડકપને ધ્યાનમાં લઈને એવું બને કે હું આઇપીએલના અમુક મેચોમાં આરામ પણ લઉં ..!!! ઈટ મીન્સ કે આવું જ કદાચ આ બોલરો અને બીજા સંભવિત વર્લ્ડકપ ટીમ મેમ્બરો માટે પણ લાગુ થઇ શકે છે . એમાયે આ વખતે પણ આઈસીસી ઇવેન્ટ ( વર્લ્ડ કપ ) પહેલા આઇપીએલ છે અને ભૂતકાળ પર નજર કરીએ તો ૨૦૦૯-૧૦ માં આઇપીએલ પછી રમાયેલ વર્લ્ડ ટી-૨૦ માં આપણે ફેંકાઈ ગયેલા અને આરોપ આઇપીએલ પર આવેલો એટલે ખેલાડીઓને વધુ મહેનત ના પડે કે ઈજા નાં થાય એની તકેદારી તો આ વખતે પણ રખાશે જ એ નક્કી છે …આફ્ટરઓલ વર્લ્ડકપ જીતવા ઇંગ્લેન્ડ અને ઓસીઝ્ની સાથે સાથે હમ ભી ફેવરીટ હૈ …!!!

વર્લ્ડકપ માટેની ભારતીય ટીમમાં હાર્દિકનો ઉમેરો નક્કી જ છે અને એ સિવાયના ખેલાડીઓ પણ ઓલમોસ્ટ નક્કી હોવા છતાં પણ હજુ મિડલ ઓર્ડરનું સ્થાન હચુડચુ લાગી રહ્યું છે એવામાં આ આઇપીએલમાં રાયડુ , રહાને અને વિજયશંકરનું પ્રદર્શન પોતાની દાવેદારી મજબુત કરવામાં મદદરૂપ થઇ શકે એમ છે જો કે બીસીસીઆઈ એ લગભગ વિજયશંકરને બેકઅપ ઓલરાઉન્ડર તરીકે ઇંગ્લેન્ડ લઇ જવાની હિન્ટ આપી જ દીધેલી છે છતાં પણ રહાને અને રાયડુની ધમાકેદાર ઇનિંગ્સ આ સમીકરણ બદલીને કોઇપણને વર્લ્ડકપ સ્કવોડમાં સ્થાન અપાવી શકે છે . આવું જ કૈક જાડેજા , અશ્વિન માટે પણ થઇ શકે છે . અશ્વિન તો લીમીટેડ ઓવર ક્રિકેટથી દુર જ છે અને જાડેજાને હમણાથી મોકો મળે છે પણ ચહલ અને કુલદીપના આગમન પછી આ બંને માટે ટીમમાં જગ્યા બનાવવી મુશ્કેલ બની રહીછે એવામાં કુલદીપ અને ચહલની સાથે સાથે જાડેજા અને અશ્વિન માટે પણ આઇપીએલમાં જબરદસ્ત પ્રદર્શન ઇંગ્લેન્ડની ટીકીટ અપાવી શકે છે .

આમ તો હાર્દિક ઇંગ્લેન્ડ માટે નક્કી જ છે પણ એટલે જ ફિટનેસની સમસ્યાથી હેરાન હાર્દિક માટે આઇપીએલમાં રમવા છતાં પણ ફીટ રહેવું જરૂરી બનશે નહિતર ઇંગ્લેન્ડની ફ્લાઈટ ચુકી જવાનો . ઓસીઝ્ના કોઈ પહેલી હરોળના બોલરો વર્લ્ડકપને લીધે આઇપીએલમાં રમવાના નથી પણ ઓસીઝ બોર્ડની નજર પ્રતિબંધ પછી પરત ફરેલા સ્મિથ અને વોર્નરના આઇપીએલ દેખાવ પર રહેશે . ધોની વર્લ્ડકપ ટીમના મેઈન વીકી માટે નક્કી છે પણ એના બેકઅપ માટે કાર્તિક અને પંત વચ્ચે હરીફાઈ રહેશે અને એટલે જ એ બંનેનો આઇપીએલ દેખાવ બોર્ડવાળા પણ ધ્યાનથી જોશે જ . ખેર બોર્ડ અને ખેલાડીઓની ચિંતાથી દુર દર્શકો અને ચાહકો તૈયાર છે ગેલના સ્ટેડીયમ બહાર પડતા છક્કા ….ધોનીના વીજળીક સ્ટમ્પીંગ ….કોહલીની શાનદાર કવર ડ્રાઈવ …..શિખરની સટાસટી…અને એકસાથે વિશ્વના શ્રેષ્ઠ ખેલાડીઓની રમત જોવા અને માણવા માટે …..!!!!! સો આર યુ રેડીઈઈઈઈઈઈઈઈઈઇ ………!!!! લેટ્સ પ્લે ..!!!

– અજય ઉપાધ્યાય ( ગાંધીનગર સમાચાર – કોલમ #રઝળપાટ ૨૪ માર્ચ ૨૦૧૯ )

વેલકમ ટુ ‘ ઈલેકશન – ૨૦૧૯ ‘

Featured

વેલકમ ટુ ‘ ઈલેકશન – ૨૦૧૯ ‘

નગારે ઘા લાગી ચુક્યો છે …ચોકઠાં ગોઠવાઈ રહ્યા છે …આયારામ-ગયારામ ભજવાઈ રહ્યું છે ..એકબીજાને ભરી પીવાના હુંકાર માટે સભાઓ ગોઠવાઈ રહી છે …શામ-દામ-દંડ-ભેદને તો હજુ વાર છે પણ એની આગોતરી તૈયારીઓ ચાલુ થઇ ગઈ છે …’ અમે જ શ્રેષ્ઠ ‘ કે ‘ પેલા તો સાવ નકામા છે ‘ એવું લોકોના દિમાગમાં ઠસાવવા માટે શબ્દોના તીરો તૈયાર થઇ ચુક્યા છે …તોતિંગ જાહેરાતો અને પ્રાયોજિત સમાચારો ટીવી-રેડિયો-છાપા-સોશિયલ મીડિયા દ્વારા સતત ફેંકતા રહીને આબોહવા બનાવવાની રણનીતિઓ બની રહી છે …બે હાથ જોડીને નતમસ્તક થઈને (મત ની ) આજીજી કરવાની શરૂઆત થઇ ચુકી છે …..અને આ બધાના સાક્ષી બનવા હું અને તમે એવા કરોડો મતદારો તૈયાર છીએ ….વેલકમ ટુ ધ વર્લ્ડ’સ કોસ્ટીએસ્ટ ઈલેકશન કેમ્પેઈન ….!!!!! વિશ્વની સૌથી ખર્ચાળ ચૂંટણીઓમાં તમારું સ્વાગત છે ….!!!!!

ખર્ચાળ-બર્ચાળની વાત છોડો પણ આવનારા બેએક મહિના સુધી આખીયે દુનિયાની નજર લોકશાહી દેશની અભૂતપૂર્વ કહી શકાય એવી ચૂંટણી પ્રક્રિયા અને ખાસ તો એનું કોણ વિજેતા બને છે એના પર રહેશે . એક બાજુ સર્જીકલ અને એર-સ્ટ્રાઈક પછી વધુ વિશ્વાસમાં આવી ગયેલ મોદી અને એનડીએ છે તો બીજી તરફ તાજેતરમાં જ ત્રણ રાજ્યોમાં સત્તાવાપસીનો સ્વાદ ચાખી ચૂકેલ કોંગ્રેસ અને યુપીએ છે ….એક તરફ ફિર સે એકબાર સરકાર બનાવવા કોન્ફીડેંટ મોદી છે તો બીજી તરફ પ્રિયંકાના ઉમેરા સાથે મોદીને માત આપવાનો વિશ્વાસ રાખનાર ગાંધી ખાનદાન અને કોંગ્રેસ છે ….એક તરફ દેશભક્તિ અને રાષ્ટ્ર સુરક્ષા જેવા મુદ્દાઓ છે તો બીજી તરફ ‘ કહા ગયે અચ્છે દિન ? ‘ ના સવાલો છે …. હિન્દી ક્રિકેટ કોમેન્ટ્રીની સ્ટાઈલમાં કહેવું હોય તો એમ કહી શકાય કે ‘ મુકાબલા કાંટે કા હૈ “ !!!

કોંગ્રેસ ‘ મહાગઠબંધન ‘ ની આશા સાથે આ કાંટે કા મુકાબલામાં જંપલાવી ચુકી છે એની ના નહિ પણ આ મુકાબલામાં ૨૦૧૪ની જેમ જ હાર અને જીત વચ્ચે એક મોટું ફેક્ટર છે અને એ છે ખુદ મોદી ..!!! અત્યાર સુધીની મોટાભાગની ચૂંટણીમાં આપણે જોયું છે કે કોઈ એક મુદ્દા પર ચૂંટણી લડાતી હોય છે પછી ચાહે એ ‘ ગરીબી હટાવો ‘ હોય કે ‘ અચ્છે દિન આયેંગે ‘ હોય . જો શરૂઆત કોંગ્રેસથી કરીએ તો રાહુલ ગાંધી અને હવે પ્રિયંકા ગાંધીના ઉમેરા સાથેની કોંગ્રેસ પાસે ઠોસ કહી શકાય એવા મુદ્દાની સો ટકા ઉણપ છે. બેરોજગારી કે કિસાનોના મુદ્દા મોદી સરકારની છેલ્લે છેલ્લે આવેલી કિસાન યોજનાઓ પછી એટલા કારગત નીવડી શકશે નહિ એ હકીકત છે બીજું કે રાહુલબાબાનો રાફેલ બોમ્બ પણ ઈલેકશન મુદ્દો હરગીજ કહી શકાય નહિ જ કેમકે હજુ એમાં મોદીસરકારને ગુનેગાર ચીતરી શકાય એવું કોઈ ઠોસ કારણ બહાર આવ્યું નથી . રાહુલ અને કોંગ્રેસ રાફેલને સેના અને સૈનિકો સાથે જોડીને એક ભાવનાત્મક વાત બનાવવાની કોશિશ કરે છે પણ બાલાકોટ પ્રકરણ પછીથી દેશભક્તિ અને મોદીસરકારે લીધેલા આ ત્વરિત આક્રમક નિર્ણય પાસે રાહુલબાબાનું રાફેલ બાણ નિષ્ફળ નીવડી રહ્યું છે .

સામે છેડે નોટબંધી , જીએસટી અને ‘ કહા ગયે અચ્છે દિન ? ‘ જેવા સવાલોનો માર ખમી રહેલા ભાજપ માટે પણ મે-૨૦૧૯મા સત્તાનું સિંહાસન હાસિલ કરવું એટલું આસાન પણ નથી . અને એમાયે આ વખતની ચૂંટણી વિપક્ષો મોદીની લીડરશીપ પર પ્રશ્નાર્થ તરીકે લડી રહ્યા છે એવામાં મોદી અને એનડીએ એડીચોટીનું જોર લગાવી દેશે એ નક્કી છે . ત્રણ રાજ્યોમાં પોતાની વિરુદ્ધમાં ગયેલા પરિણામોએ કદાચ બીજેપીની આંખ વહેલી ઉઘાડી દીધી છે અને એનો જ પડઘો બજેટમાં અને કિસાનોને રાહતમાં દેખાય આવ્યો હતો . કોંગ્રેસના શાશનમાં થયેલા ભોરીંગ ભ્રષ્ટાચારો અને એનાથી પણ ખખડી ગયેલી સીસ્ટમને દુરસ્ત કરતા કમ સે કમ ૧૦ વર્ષો લાગશે એવું કહીને જ ૨૦૧૪મા સત્તામાં આવેલ બીજેપી માટે હવે પછી ૨૦૧૯ કબજે કરવું એટલા માટે પણ જરૂરી છે કે હવે પછીના વિકાસકામો વધુ ઝડપથી થાય.

કોણ સત્તામાં આવી શકે છે એના વિષે તો પછીના કોઈ આર્ટીકલમાં ચર્ચા કરીશું જ પણ આવો જોઈએ ચુનાવી દંગલના આ પ્રારંભિક દોરમાં કોણ છે આગળ ? શું છે પ્લસ પોઈન્ટ્સ ? શું છે નબળાઈઓ ? અને શું છે શક્યતાઓ ? ઓબ્વીય્સ્લી શરૂઆત બીજેપી/એનડીએ થી . મોદીની એક નિર્ણાયક નેતા તરીકેની છબી બની છે એટલું જ નહિ પણ એર-સ્ટ્રાઈક પછી એ છબીમાં ઓર વધારો પણ થયો છે . રાંધણગેસ – જનધન-આયુષ્યમાન યોજના જેવી યોજનાઓ થકી ગરીબલક્ષી સરકારની છાપ પડી છે . ભાજપ પાસે અમિત શાહ જેવા મુત્સદી અને દાવપેચમાં માહિર પ્રમુખ છે એ પણ એનો પ્લસ પોઈન્ટ છે અને ખાસ તો ૨૦૧૪ ની જેમ ભાજપ મોદી વિરુદ્ધ વિપક્ષો એવા મોડમાં ચૂંટણી પ્રચારને લાવી શક્યો છે જેમ અમેરિકામાં પ્રેસીડેન્સીયલ ઈલેક્શન થાય છે બિલકુલ એવું જ …!! તો સામે કોંગ્રેસના પ્લસ પોઈન્ટમાં ૨૦૧૪ પછી કદાચ પહેલી વખત કોંગ્રેસ ત્રણ રાજ્યોની જીત પછી વધુ કોન્ફીડેંટ છે એટલું જ નહિ પણ એ વિજયના લીધે જ રાહુલ ગાંધી કોંગ્રેસના સર્વમાન્ય નેતા તરીકે ઉભરી આવ્યા છે એટલું જ નહિ પણ એને લીધે જ ભાજપના ‘ કોંગ્રેસમુક્ત ભારત’ અભિયાનને બ્રેક મારવામાં પણ સફળ રહ્યા છે અને ખાસ તો મોદીને હટાવવા ‘ ગઠબંધન ‘ માટે પણ તૈયાર થયા છે એટલું જ નહિ પણ એવું લાગે તો સમય આવ્યે પીએમ પદ પર કુરબાન કરી દેશે એવું કહી ચુક્યા છે ,,,,!! ઇનશોર્ટ અત્યારે કોંગ્રેસનું મોરલ હાઈ છે ..!!

મોરલ હાઈ તો છે પણ ૨૦૧૪મા જે રીતે મોદીએ આખાયે દેશમાં કોંગ્રેસ વિરુદ્ધ એક આક્રોશનો ભાવ ફેલાવેલો એવો કોઈ જુવાળ મોદી વિરુદ્ધ બનાવવામાં હજુ સુધી તો કોંગ્રેસ સફળ થયેલ નથી . બીજું કે કોંગ્રેસ સરકારમાં થયેલા કૌભાંડોને લીધે ભ્રષ્ટાચાર પર આક્રમક તેવર અપનાવી શકે એમ છે નહિ અને ખાસ તો જેમ ૨૦૧૪મા મોદી પાસે મુદ્દા હતા એવા કોઈ ખાસ કહી શકાય એવા મુદ્દા હાલતુરંત તો કોંગ્રેસ પાસે છે નહિ એટલે ‘ મોદી હટાવો ‘ જેવા એક્સુત્રી કાર્યક્રમને પ્રજા કેટલી મહોર મારે છે એ તો સમય જ કહેશે . તો સામે છેડે લઘુમતી- દલિતો પર અત્યાચારો, બેરોજગારી , જીએસટી , નોટબંધી જેવા નિર્ણયોને લીધે અળખામણી થયેલી એનડીએ ને જો વિપક્ષો એક થઇ શકે તો પોતાની સીટોમાં મોટો ઘટાડો આવી શકે છે ની ચિંતા પણ સતાવી રહી છે એ ચોક્કસ છે . જોકે રાહતની વાત એ છે કે વિપક્ષો એક થઇ શકે એવી કોઈ શક્યતા અત્યારે નથી જ કેમકે દરેકને સંભવિત સત્તામાં મોટો ભાગ જોઈએ છે અને એ માટે તડજોડ કરવા ગઠબંધન થી દુર રહેવું અત્યારે તો અનેક નાની પાર્ટીઓને યોગ્ય લાગે છે અને જ્યાં પણ જોડાણ થયું છે તે ક્ષેત્ર પુરતું જ છે બાકી બીજા રાજ્યોમાં એ જ પાર્ટીઓ સામેસામે લડવાની છે …!!!

હવે વાત રહી શક્યતાની તો એનડીએ પાસે ટેક્ષ રીફોર્મ , પેન્શન સ્કીમ , આયુષ્યમાન યોજના , જનધન અને ખાસ તો પાકિસ્તાનને આપેલ કરારા જવાબની જમાપુંજીની સાથે સાથે મોદી જેવા કરિશ્માઈ અને સર્વમાન્ય નેતા અને ‘ સ્થિર અને બહુમતવાળી સરકાર ‘ નો નારો અને આશાવાદ છે તો સામે છેડે કોંગ્રેસ / યુપીએ પાસે કિસાનોને કર્જમાફી જેવા વાયદાઓ , અનેક રાજ્યોમાં નાની પાર્ટીઓના સહારે જીતવાની આશા અને ઘણી સીટો પર બીજેપી સાંસદો સામે એન્ટીઇન્ક્ર્બન્સી નો લાભ લેવાની આશા છે અને હા આ બધા વચ્ચે એસપી-બીએસપી-ટીએમસી જેવી પાટીઓ શું ફાચર મારી શકે છે એ તો પરિણામ વખતે જ ખબર પડશે પણ અત્યારે તો એનડીએ અને યુપીએ ની આ લડાઈ ૨૦૧૪ ની જેમ વનસાઈડેડ થાય છે કે પછી રાહુલ + મેની મોર કશુક ઉલટું જ પરિણામ લાવે છે એના વિશ્લેષણ માટે ૧૧ એપ્રિલથી શરુ થતી ઈલેકશન એક્સપ્રેસ અર્ધે પહોચે ત્યાં સુધી તો રાહ જોવી જ રહી …!!

– અજય ઉપાધ્યાય ( ગાંધીનગર સમાચાર – કોલમ #રઝળપાટ ૧૭ માર્ચ ૨૦૧૯ )

ઇમ્તિહાન ઔર ભી હૈ જિંદગી મેં “ એક્ઝામ “ કે સીવા ….!!!!!

Featured

ઇમ્તિહાન ઔર ભી હૈ જિંદગી મેં “ એક્ઝામ “ કે સીવા ….!!!!!

આ લેખ તમે વાંચતા હશો ત્યાં સુધીમાં બોર્ડની એક્ઝામ પોતાની અર્ધી મંઝીલ તરફ પહોચી ગઈ હશે અને એકાદ વીકમાં તો આખરી મંઝીલે પણ પહોચી જશે …!!! એક્ઝામ્મ્મ્મ ….એની જાય્તને એવો ભયંકર અને થથરાવી મુકનારો આ શબ્દ છે એનો અંદાઝ મેળવવા તમારે કોઈ પરીક્ષાર્થીને મળવું પડે અને એનાથી પણ વધુ હાહાકારીયો અર્થ જાણવો હોય તો એ પરીક્ષાર્થીના વાલીને મળવું પડે …મારા હમ એટલો હાવ કરી મુક્યો છે ને આ બોર્ડ-ફોર્ડની એક્ઝામે કે વાત જવા દયો….!!!! પરીક્ષા આપનાર કરનાર તો પરીક્ષા ના આપનાર વધુ ટેન્શનમાં હોય બોલો …!!! પેલો કે પેલી તો હમજ્યા કે ભણ્યા એનું મૂલ્યાંકન કરાવવા તૈયાર હોય પણ આ વાલીઓ તો બાપ્પ્પ્પા એટલું ટેન્શન કરી મુકે ને કે એમ થાય કે સંતાનની સાચી પરીક્ષા તો ઘરમાં જ લેવાય જાય છે …..ખોટ નૈ કે’તો ……!!!!!

આઈ એન્ડ યુ ઓલ્સો એગ્રી કે ભણતર જીવનમાં અગત્યનું છે અને એટલું જ અગત્યનું છે સ્પર્ધામાં ટકી રહેવું . જમાનો જ્ઞાનનો છે એની ના નહિ અને શું છે કે જમાના પ્રમાણે અને જમાનાની સાથે બાથ ભીડવા માટે જ્ઞાન હોવું જરૂરી છે , ઈનફેક્ટ જ્ઞાન હોવું કરતા એમ કહી શકાય કે ડીગ્રી હોવી જરૂરી છે અને શક્ય છે કે હરકોઈ વાલી એમ જ ઈચ્છે કે પોતાનું બાળક આ સ્પર્ધાત્મક સમાજમાં આગળ રહે અને આગળ વધે . પણ …બટ …કિન્તુ …પરંતુ આ બધા માટે મહજ ૧૪-૧૫ વર્ષના બાળકને ( આ ૧૦ માં બોર્ડ માટે છે ) સારા ટકા લાવવાનું પ્રેશર કે ડીમાંડ કેટલી હદે વિચલિત કરી મુકે છે એનું ભાન છે કોઈને ??? ૧૦ માં ની તૈયારી ઓલમોસ્ટ ૮ એન્ડથી અને ૧૨ બોર્ડ સુધી એને કેરી ઓન કરતા વાલી અને વિદ્યાર્થી જો એમ સમજતા હોય કે આ પરીક્ષા અને એનું પરિણામ જ સર્વેસર્વા છે તો દિમાગનો એમઆરઆઈ કરાવવો જોઈએ ..!!!

પરીક્ષા એટલે વર્ષભર ભણ્યા હોય એનું મૂલ્યાંકન – આટલું સાદું ગણિત તો બધા સમજે છે પણ પછી એમાં ઉમેરાય છે ટકા લાવવાની હોડ ….સારી લાઈન પકડવાની દોડાદોડી ….પેલા વોશિંગ પાઉડરની જાહેરાતોની જેમ ‘ તેરા બચ્ચા મેરે બચ્ચે સે હોશિયાર કૈસે ? ‘ નો હુંકાર અને યેનકેન પ્રકારે બાળક પર લાદવામાં આવતો અચ્છે પરસેન્ટેજ લાને કા દબાવ ,,,સરવાળે ઘણી ખીચડીઓ પાક્યા પહેલા જ દાઝી જાય છે અને પછી ડહાપણ આવે છે કે બાળકની કેપેસીટી સમજવાની મોટી ભૂલ હવે નડી..!!! જી હા , કોઈ પણ એક્ઝામના પરિણામોની અસર તમારા પર એટલી ઓછી થશે જેટલી તમે તમારા બાળકની કેપેસીટી અગાઉથી જાણી શકશો …!!! સી , નો ડાઉટ ટયુશનીયા સમાજમાં ૫૦-૫૫ ની એવરેજવાળા બાળકને તમે ૬૦ સુધી તો પહોચાડી શકો પણ પછી એ જ બાળકની પાસે ૭૦ ને ૮૦ ની અપેક્ષા રાખો તો તમને ભગવાન’ય માફ ના જ કરે ને ….!!! આગલા ધોરણોના પરિણામો , બાળકનું ભણવા પ્રત્યે વલણ અને એના પ્રોગ્રેસ રીપોર્ટ જો પહેલેથી જ ફોલો કરતા રહેશો તો શું છે કે ના કરે નારાયણ ને બાળક બોર્ડની સો-કોલ્ડ જીવન-મરણના જંગ જેવી એકઝામમાં ટાય ટાય ફીશ થઇ જાય કે ડીમ દેખાવ કરે તો તમને આઘાત ઓછો લાગશે ..અને ખાસ તો બાળકને એની કેપેસીટીથી વધુ એક્સીલેટર આપવાની તમારી જીદની ઓછી અસર થશે …..એન્ડ ધીસ ઈઝ નોટ એ માઈથ ….આ શિક્ષણવિદો દ્વારા ટ્રાય એન્ડ ટેસ્ટેડ એન્ડ એપ્રુવ્ડ થીયોરી છે ….!!!

ઓકે ….આનો અર્થ હરગીઝ એવો નથી કે બાળકને બેસ્ટ એચીવ કરવા માટે પુશ કરવું નહી , ચોક્કસ પુશ કરવું – મોટીવેટ કરવું પણ એક વાતને દિમાગમાં રાખીને કે ‘ આ કોઈ પહેલી એક્ઝામ નથી કે આ કોઈ છેલ્લી એક્ઝામ પણ નથી જ ‘ . જીન્દગીમે ઇમ્તેહાન ઓર ભી હૈ ની જેમ આગળ આ અને આવી અનેકો પરીક્ષાઓ આવતી જ રહેવાની , મને-કમને આપતી જ રહેવાની છે તો બેસ્ટ એ છે કે એકઝામને કોઈ ફેય્લોર કે સકસેસના ચશ્મે જોવા કરતા એક પડાવ તરીકે વધુ જોઈએ . ગામ આખું ઇલેક્ટ્રોનિક કરે છે કે આર્કીટેકચર કરે છે કે ફોરીન જાવાનું છે એની પર સતત વોચ રાખ્યા કરતા પરીક્ષા પહેલા અને ખાસ તો બોર્ડની પરીક્ષા પહેલા બાળક સાથે બેસીને કયો વિષય , કયું ફિલ્ડ એની પ્રતિભાને માફક આવે એમ છે એની જો ચર્ચા થઇ શકતી હોય તો સારું એ રહેશે કે પરીક્ષા પ્રત્યેનો બાળકનો આખો અભિગમ જ બદલી જશે . નક્કી જ હોય કે ટકાવારીની રેસનો ઘોડો નથી જ બનવાનું તો બની શકે કે બાળક પરીક્ષાની તૈયારી વધુ હોંશ અને હોશિયારીથી કરી શકે ..!! સી , આમેય ૧૦ પછી તો હવે કશું નોંધપાત્ર બની શકાય એવો કોઈ અભ્યાસક્રમ છે જ નહિ . ૧૦ પછી તો સારા ટકા મોટાભાગે એટલા માટે જ લાવવાના છે કે સારી સ્કુલમાં એડમીશન મળે ….જો એવું જ હોય ( અને છે પણ ) તો વ્હાય ૧૪-૧૫ વર્ષના બચ્ચાને એકઝામનો એક્સ્ટ્રા હાઉ દેને કા ….???

બાય ધ વે આ સારી સ્કૂલો પણ એક પ્રકારની માન્યતા હોય એવું નથી લાગતું ? બીકોઝ બોર્ડના ટોપ ટેન માંથી મોટાભાગના તો સરકારી કે અર્ધસરકારી સ્કુલોના જ હોય છે ..!!! જો કે આની પર ડીબેટ શરુ થાય એ પહેલા એ કહી દઉં કે એક્ચ્યુલી ઉપરવાળાએ બાળકના દિમાગની હાર્ડડિસ્કમાં ભણતર માટે જેટલી જીબી ફાળવી હશે એનાથી એકપણ એમબી વધુ સ્ટોર નથી જ થવાની એ હકીકત છે , બસ આ સ્ટોરેજ ને જાણવું હરેક વાલી માટે અગત્યનું છે . જો એકવાર આ સ્ટોરેજની ખબર પડી જાય તો ધાર્યા હોય ૬૦ ને બાળક ૬૨ ટકા લાવે તો ગામ આખાનો જમણવાર કરવાનું મન થઇ જાય કે નહિ ….??? જો કે અહી કહેવાનો અર્થ એ પણ નથી કે બાળક ઓછું હોશિયાર છે તો એને સ્વીકારી લેવું …હરગીઝ નહિ . પણ એની ક્ષમતાને જાણ્યા પછી એ ક્ષમતામાં વધારો કરવા શું કરવું પડે એની તબક્કાવાર તૈયારી જો કરી શકો તો એવું પણ બને કે સ્ટોરેજ વધી પણ જાય …!! પણ શું છે કે બધા માટે પણ પહેલા બાળકની બદલે વી ધ વાલીઓએ તૈયાર રહેવું પડે .

એની વેય્ઝ …આખોયે લેખ વાલી…વાલી માં પૂરો થઇ જાય એ પહેલા બે વેણ બાળકો માટે પણ ઈર્શાદ કરી જ દઉં…!!! પરીક્ષાની આ મોસમમાં ચારેકોર મોટીવેશનલ લેખો-પ્રવચનો-વિચારો-સલાહો વચ્ચે એટલું જ કહેવાનું કે પરીક્ષાને હાઉ ની બદલે લેવા કરતા ખુદની સજ્જતાની કસોટી વધુ સમજવી … પરીક્ષાને જીવનની અંતિમ પરીક્ષા માનવા કરતા આ એક પડાવ છે એમ સમજવું …રીઝલ્ટ ચાહે ફેઈલનું આવે તો પણ શું થયું ? એવા કેટલાયે ઉદાહરણો છે કે જેઓ શરૂઆતી પરીક્ષાઓમાં ફેઈલ થઈને પણ અને એ ફેય્લોરમાંથી શીખીને જ આગળ વધેલા-ટોચ પર પહોચેલા છે ..!! અને શું છે કે ‘ જિંદગી હર કદમ એક નઈ જંગ હૈ ‘ ની જેમ કોઈ ને કોઈ પરીક્ષામાં તો નાપાસ થવાના જ કે નહિ ?? સો , પરિણામોથી નાસીપાસ થયા વગર વધુ હિમ્મત અને વધુ સજ્જતાથી પરીક્ષાનો સીના તાન કે મુકાબલો કરવો જ પડે …!! નિષ્ફળતાની બીક અને ક્યારેક એક્ચુય્લ નિષ્ફળતા કુમળા દિમાગો પર હાવી થઇ જાય અને ના કરવાનું કરી બેસે એના કરતા બહેતર અને બેટર છે કે ઘર લેવલે જ બાળકને સફળતા કરતા નિષ્ફળતાની બીક ઓછી બતાવાય ….ખોટા હાઉ ઉભા નાં કરાય અને પરિણામની બીક રાખ્યા વગર ‘ જા ..ઓંર દિખા દે અપના બેસ્ટ ‘ આવી હિંમતભરી હોશલાઅફ્ઝાઈ એ જ છે ઇમ્તેહાનના હાઉ પર સાચી ‘ સર્જીકલ ‘– આઈ મીન ‘ એજ્યુકેશનલ સ્ટ્રાઈક ‘…..ઓલ ધ બેસ્ટ એક્ઝામવીરો.!!!

  • અજય ઉપાધ્યાય ( ગાંધીનગર સમાચાર – કોલમ #રઝળપાટ ૧૦ માર્ચ ૨૦૧૯ )

પાકિસ્તાન ને પછડાટ – સેનાને ‘ અભિનંદન ‘….!!!!!

Featured

પાકિસ્તાન ને પછડાટ – સેનાને ‘ અભિનંદન ‘….!!!!!

“…ભારતીય શુરવીર વિંગકમાન્ડર અભિનંદન ને ભારતકી જમીન પર કદમ રખ્ખે …” શુક્રવારે લાંબા ઇન્તેઝાર પછી રાત્રે લગભગ ૯ વાગે આ સમાચાર જેવા ન્યુઝચેનલ્સની સ્ક્રીન પર ફ્લેશ થયા કે આખાયે દેશમાં હર્ષ , આનંદ અને ઉલ્લાસનું એક મોજું ફરી વળ્યું . બહાદુર વિંગકમાન્ડર અભિનંદનની રેકોર્ડ કહી શકાય ગણતરીના કલાકોમાં થયેલી ઘરવાપસી સાથે ભારતીય સેના , ભારતીય પ્રજા અને ભારતસરકારની પાકિસ્તાન પર સૈન્ય અને કુટનીતિક વિજયગાથાનો એક અધ્યાય આ સાથે સુખરૂપ સમાપ્ત થયો . સુખરૂપ એટલા માટે કે હલકટ અને ગંદી રાજનીતિમાં માહિર પાકિસ્તાનનો કોઈ ત્યાં સુધી ભરોશો નથી કરતું કે જ્યાં સુધી અભિનંદન ભારતીય સીમામાં પાછો આવી જાય .

“…આમેય ઉરી પછી ભારતીય શુરવીરોએ કરેલી સર્જીકલ સ્ટ્રાઈક એ વાતનું ઉદાહરણ છે કે આપણી સેના ચોક્કસ બદલો લેશે જ . બની શકે કે આ વખતે સર્જીકલ સ્ટ્રાઈક હવાઈ એટેકના સ્વરૂપમાં હોય શકે છે …” હજુ ગયા રવિવારે આ જ કોલમમાં આ શબ્દો લખ્યા ત્યારે ગળા સુધી ખાતરી હતી કે પુલવામા એટેકનો બદલો આપણી સરકાર અને સેના બંને ચોક્કસ લેવાના જ . સી , કોઈ સેના અને સેનાના પરાક્રમોને સરકારની નીતિઓ અને સરકારની છૂટથી દુર રાખતું હોય તો એનાથી મોટું કોઈ મૂરખ નથી કેમકે આખરે તો સેનાના એટેકના પ્લાનને સરકારની લીલી ઝંડીની જરૂર પડે જ છે અને આ વાત ચાહે લાદેન હોય કે સદામ કે પછી જગતમાં ક્યાય પણ થતી લશ્કરી કાર્યવાહી હોય એ બધામાં દેખાઈ આવેલ જ છે એટલે ચોક્કસપણે પાકિસ્તાનની સીમામાં જઈને જૈશના કેમ્પને તબાહ કરવામાં જેટલી સલામને પાત્ર અને જેટલી શૂરવીરતા સેનાની છે એટલી જ શાબાશી સરકારને પણ આપવી જ પડે . અને સરકારની સટીક નિર્ણાયકતા અને દેશની રક્ષા કરવા માટે લશ્કરી કાર્યવાહીની ખુલ્લી છૂટની પુષ્ટિ દુનિયાભરના દેશોએ પણ કરી છે .

ખેર , વાત રાજકીય બને એ પહેલા જુઠ્ઠા પાકિસ્તાનને જે રીતે એક પછી એક બધા જ મોરચે જોરદાર ઝાપટો પડતી રહી એ વધુ નોંધનીય છે . ભારતીય સેનાએ અદમ્ય સાહસ બતાવીને પહેલા તો બાલાકોટ પર એટેક કર્યો એ અને એ પછીથી મીગ-૨૧ જેવા ટેકનોલોજીમાં ડીગ્રેડ લડાકુ વિમાનથી પીછો કરીને એફ-૧૬ જેવા આધુનિક વિમાનનો શિકાર કર્યો એ બંને બનાવો સેનાના ચોપડે સુવર્ણઅક્ષરે લખાઈ ચુક્યા છે . અને એનાથી પણ આગળ વધીને બહાદુર અભિનંદનની શોર્યગાથા સેના અને દેશ માટે એક મિસાલ બની ગઈ છે . પાકિસ્તાની સરહદમાં પડ્યા પછીથી લઈને આર્મી કેમ્પમાં પણ અભીનંદને જે મુસ્તેદી , વીરતા અને સ્થિરતાનો પરચો બતાવ્યો છે એના માટે આ બહાદુર ફોંજી શત શત સલામને પાત્ર છે . કેમકે ટીવી પર પણ જે રીતે ભૂતપૂર્વ લશ્કરી ઓફિસરો કહી રહ્યા હતા એ મુજબ આવા કિસ્સામાં પાકિસ્તાન એની નાપાક હરકતો ભૂતકાળમાં બતાવી ચુક્યું છે અને અભિનંદનના કિસ્સામાં પણ એવો ડર હતો જ .

પણ . ભલે દેશમાં રહેલા અમુક સો કોલ્ડ લીબરલોને ગમે કે ના ગમે પણ ગણતરીના કલાકોમાં અભિનંદનને પાછો હિન્દુસ્તાન લાવવામાં સરકારે કરેલા પ્રયત્નોની તારીફ કરવી જ રહી . નો ડાઉટ જીનીવા સંધી મુજબ આજે નહિ તો કાલે અભિનંદનને પાકિસ્તાને પાછો આપવો જ રહ્યો હતો પણ ભૂતકાળમાં પાકિસ્તાનમાં પકડાયેલા આપણા વીર જવાનોને કેટલા દિવસો ગોંધી રખાયેલા . કેટલી યાતનાઓ આપવામાં આવેલી એની મીડિયામાં જાહેર થયેલી માહિતીઓને જોતા ભારત સરકારનો અભિનંદનના મામલામાં જોરદાર અને ત્વરિત કુટનીતિક વિજય તો થયો જ છે . જગતભરમાં પાકિસ્તાનને એકલું પાડી દેવામાં આવ્યું એટલું જ નહિ પણ ચીન જેવા એના પરમ મિત્ર પણ મભમ રહ્યા અને ઇસ્લામિક દેશો જેવા એના જોડીદારો પણ આ બાબતે ભારતની સાથે રહ્યા . મોદી સરકારની વિદેશનીતિ અને મોદીના વિદેશપ્રવાસોના આંકડાઓ જાહેર કરતા વિપક્ષોને અભિનંદન મામલે જગતભરના દેશોએ આપેલું સમર્થન જોરદાર વળતો જવાબ જ ગણી શકાય . આફ્ટરઓલ સજ્જડ સરકારી પીઠબળથી જ કોઈ પણ સેના આવા પરાક્રમો કરી શકતી હોય છે બાકી ભૂતકાળમાં ભારતમાં થયેલા આતંકવાદી હુમલાઓ વખતે સેનાને પુરતી તૈયારી હોવા છતાં છૂટ નહોતી જ મળેલી ..!!!

સૌથી અગત્યની વાત એ રહી કે અત્યાર સુધી કુપ્રચાર કરતા અને બડાશો હાંકતા પાકિસ્તાનના એક એક જૂઠનો સેના અને સરકારે પર્દાફાશ કર્યો . તોડી પડાયેલા એફ-૧૬ના મામલે જુઠ બોલતા પાકિસ્તાનને પુરાવા આપીને અમેરિકાની નજરોમાં પણ ગુનેગાર સાબિત કરી શક્યા . કુપ્રચાર ચલાવતી પાક ચેનલોએ પકડાયેલા ભારતીય શુરવીરો અને તોડી પડાયેલા ભારતીય લડાકુ વિમાનો વિષે સાંજ પડતા પડતા તો પોતાનું જ થુકેલું ચાટીને સાચું બોલવું પડ્યું . બાલાકોટ પર ભારતીય સેનાએ કરેલા એટેકને ખારીજ કરતા પુરાવાઓ પાકિસ્તાને આપવાની વાત કરેલી પણ હજુ સુધી એ આપી શક્યું નથી જ્યારે સામે છેડે ભારતીય સેનાએ પોતાની પાસે બધા પુરાવા છે અને જરૂર પડ્યે બતાવાશે એ કહી બતાવ્યું . ‘ અમારી સેના સજાગ હતી પણ અંધારું હતું એટલે અમે ભારતીય પ્લેનને રોકી શક્યા નહિ ‘ કે પછી ‘ મીડિયાને બાલાકોટ લઇ જઈશું પણ હવામાન બરાબર નથી ‘.. કે પછી ‘ ભારતના બે વિમાનો તોડી પાડ્યા ‘ જેવા પાકિસ્તાની જુઠાણાઓ એમના જ સમાચાર માધ્યમો અને ઓફિસરોએ ફેરવી તોળ્યા.

એકબાજુ જગતભરમાં ભારતની કાર્યવાહીને સમર્થન મળ્યું , પાકિસ્તાનના એક પછી એક જુઠાણા ઉઘાડા પડ્યા અને પાકિસ્તાનને ખુદને ભારતીય સેના હજુ વધુ એટેક કરશે એની સોલીડ બીક લાગ્યા પછીથી ઈમરાને સંસદમાં ‘ પીસ ગેશ્ચર ‘ નું નાટક કરવું જ પડ્યું , જો કે એનો પણ ભારતે એમ કહીને જોરદાર જવાબ આપ્યો કે ‘ આ કોઈ ઉપકાર નથી , અભિનંદન પાછો આપવો જ પડે અને એ પણ કોઈ શરત વગર “ અને ભારત વીર અભિનંદનને કોઈ શરત વગર પાછો લાવીને જ રહ્યું . પાકિસ્તાનની આબરુની ધજ્જિયા એના દેશમાં અને દુનિયામાં ઉડી . આ લખનારે પાક ન્યુઝ ચેનલ્સ પર ભારત વિરુદ્ધ સતત અપ્રચાર , નિમ્ન ભાષા અને ટોટલ જુઠ્ઠી વાતો સતત ચાલતી સાંભળતી-જોઈ છે . અમેરિકા , ચીન ના જોર પર અને ભારતમાં ચલાવતા આટલા વર્ષો જુના આતંકવાદી નેટવર્કને ભરોશે પાકિસ્તાને અકડ રહેવાની કરેલી બધી જ કોશિશ ભારતીય સેના અને સરકારે ધૂળચાટતી કરી દીધી એટલું જ નહિ પણ ભારતીય સીમામાં આવીને પાકિસ્તાની ફાઈટર પ્લેનોએ કરેલા હુમલાને ગંભીરતાથી લીધો છે અને એનો યોગ્ય જવાબ આપવામાં આવશે એવું સ્પષ્ટ કહી દીધું છે ત્યારે પાકિસ્તાન પાસે અત્યારે તો પૂછડી દબાવીને બેસવા સિવાય કોઈ આરો નથી જ .

એનો અર્થ એવો પણ હરગીઝ નથી કે વાત પૂરી થઇ ગઈ કેમકે પાકિસ્તાન કાશ્મીરમાં સળીઓ ચાલુ જ રાખશે પણ હવે બદલાયેલી સ્થતિ એ છે કે ભવિષ્યમાં જો બીજું પુલવામા થશે તો સેના અનેકો બાલાકોટ પાકિસ્તાનમાં સર્જશે એ પાક્કી વાત છે . આ લખાય છે ત્યારે જ પાક વિદેશમંત્રીએ જૈશનો હાથ પુલવામાંમાં નથી એમ કહીને ભારતની મુખ્ય માંગ ત્રાસવાદ વિરુદ્ધ એક્શનને ઓર હવા આપી દીધેલ છે અર્થાત આવનારા સમયમાં ભારતીય સેના પાકિસ્તાન સ્થિત જૈશ કે બીજા સંગઠનો વિરુદ્ધ ચોક્કસ કાર્યવાહી કરશે જ અને હવે તો જગત જમાદારોએ પણ ભારતની એ વાત સ્વીકારી છે કે ત્રાસવાદ વિરુધ એટેક કરવામાં ભારત કાઈ ખોટું નથી કરતું . અણુબોમ્બ , આતંકવાદીઓ અને ભારતને ભરી પીશું ની ધમકીઓ આપી અત્યાર સુધી ભારતને બેકફૂટ પર રાખનાર પાકિસ્તાનની બધી હવા સૈન્ય અને રાજકીય બંને મોરચે એક ઝાટકે નીકળી ગઈ છે . પાકિસ્તાન એક જ ફટકામાં જમીન પર આવી ગયેલ છે અને હજુ પણ ના આવ્યું હોય તો આવનારા સમયમાં ભારતીય સેના લાવી ને જ રહેશે .

વિસામો :

“ ઇમરાનખાન ‘ પીસ ગેશ્ચર ‘ તરીકે હાફીઝ અને મસુદ ને ક્યારે મોકલો છો ? કે પછી એના માટે પણ અમારે મિરાઝ જ મોકલવા પડશે …??” – એક વોટ્સઅપ મેસેજ

  • અજય ઉપાધ્યાય ( ગાંધીનગર સમાચાર – કોલમ #રઝળપાટ ૩ માર્ચ ૨૦૧૯ )

પુલવામા અને પાકિસ્તાનને સબક : જોશ ઈઝ હાઈ સર ….!!!!!

Featured

પુલવામા અને પાકિસ્તાનને સબક : જોશ ઈઝ હાઈ સર ….!!!!!

“ ભારત જો યુદ્ધ કરશે તો અમે એને જવાબ આપીશું ….યાદ રહે કે યુદ્ધ શરુ કરવું સહેલું છે ખતમ કરવું મુશ્કેલ “…ટીવી પર પાક પીએમ ઇમરાન જ્યારે આવું નિવેદન આપી રહ્યા હતા ત્યારે ભારતમાં તો ઠીક પણ પાકિસ્તાન અને વિશ્વભરમાં આને સાંભળનારાઓ મનમાં ને મનમાં હસતા હશે . આખી દુનિયા જાણે છે કે પાકિસ્તાનમાં વડાપ્રધાનનું માન અને એની પાસે કેટલા અધિકારો કે પાવર હોય છે ..!!! ખેર , ઇમરાનની ટીવી પર આવતા આવા રમુજી નિવેદનોને આ વખતે ભારતે બિલકુલ નજરઅંદાજ કર્યા જ છે , કેમકે મોદી સરકારે ઓલમોસ્ટ નક્કી કરી જ લીધું છે કે પુલવામામાં સીઆરપીએફના જવાનો પર થયેલા કાયરતાપૂર્વક …અમાનવીય અને કપટી ત્રાસવાદી હુમલાનો જવાબ અને કીમત બન્ને પાકિસ્તાને ચૂકવવી જ પડશે ….!!! યસ જેમ પ્રધાનમંત્રી મોદીએ કહ્યું એમ આ બદલાની કાર્યવાહીનો સમય , સ્થળ અને એની તીવ્રતા ચોક્કસપણે ભારતીય સેના જ નક્કી કરશે …!!!

પુલવામામાં થયેલા હિચકારા અને નિંદનીય હુમલા પછી આખીયે દુનિયામાં એક જ સવાલ છે કે શું ભારત યુદ્ધ કરશે ? કે પછી ઓર એક સર્જીકલ સ્ટ્રાઈક ?…. શક્યતાઓ બન્ને છે જ પણ બદલાયેલા વિશ્વમાં સીધું યુદ્ધ કોઈ પણ દેશ પસંદ કરે નહિ એ હકીકત છે એટલે હાલ તુરંત તો જૈશના મુખિયાને જીવતો કે મરેલો કરી નાખવાની તૈયારીઓ શરુ થઇ ચુકી હોવી જોઈએ અને આમેય ઉરી પછી ભારતીય શુરવીરોએ કરેલી સર્જીકલ સ્ટ્રાઈક એ વાતનું ઉદાહરણ છે કે આપણી સેના ચોક્કસ બદલો લેશે જ . બની શકે કે આ વખતે સર્જીકલ સ્ટ્રાઈક હવાઈ એટેકના સ્વરૂપમાં હોય શકે છે કેમકે જૈશનો દુષ્ટ મસુદ જ્યાં છુપાઈને બેઠો છે ત્યાં જમીની લડાઈની શક્યતા જોખમી છે . જો કે પુલવામા હુમલાના ૧૦૦ કલાકની અંદર અંદર જ આપણી સેનાએ પુલવામા હુમલામાં શામેલ આતંકવાદીઓને મારી નાખીને દેશવાસીઓને એ સંદેશ આપ્યો છે કે પુલવામા જેવા ઘાતક હુમલા પછી પણ સેનાનો જુસ્સો એટલો જ બુલંદ છે .

“ હાઉ ઈઝ ધ જોશ ?”….” હાઈ સર “..!!!! સર્જીકલ સ્ટ્રાઈક પર જ બનેલી અને હીટ ફિલ્મ ‘ ઉરી ‘ ના આ ડાયલોગની જેમ આખાયે દેશમાં જોશ હાઈ છે . પાકિસ્તાનને બહુ મોકા આપ્યા પણ હવે એને એની ઓકાત બતાવી દેવાની માંગ દેશભરમાં પુરા જોશથી પોકારાઈ રહી છે . શોશિયલ સાઈટો દેશભક્તિના સુત્રો , ચિત્રો , વિડિયોઝ અને ‘ પાકિસ્તાન તારી ખેર નથી ‘ ના ભાવમાં પૂરી રીતે આક્રમક બની ગઈ છે . કોઈ વાંક્દેખ્યાઓને આ ક્ષણિક દેશભક્તિ લાગતી હોય તો એમણે આંખના નંબર ક્યા તો મગજનો એમઆરઆઈ કરાવવાની જરૂર છે . દેશભક્તિ દેખાડતા દેશવાસીઓને ‘ સિવિક સેન્સ ‘ ને એવી બધી અપ્રાસંગિક સલાહો પીરસતા ડાબું દિમાગ જ કામ કરતું હોય એવા અલેલટપ્પુંઓને એટલું જ કહેવાનું કે નાગરિકોનું કામ આવા વખતે દેશ એકસાથે છે , સૈનિકોના દુઃખમાં ભાગીદાર છે અને સરકારના કોઈ પણ પગલાને પૂરું સમર્થન આપે છે એ બતાવવાનું હોય છે અને આ એસ્યોરન્સ – ખાત્રી માત્ર ને માત્ર દેશભક્તિ બતાવવાથી જ આવે . કેટલાક ડફોળોના કહેવા મુજબ એના માટે મોરચે જવાની જરૂર ના હોય અને માઈન્ડ વેલ કે શહીદ થયેલા સૈનિકોના બલિદાનો એળે ના જાય એની કાળજી રાખવાનું કામ જેમ સરકારનું છે એવી જ રીતે શહીદોની શહીદીઓનું દેશવાસીઓને મન પુરતું સન્માન અને અભિમાન છે એ બતાવવાનું આ એક પગલું જ છે …!!

અને બાય ધ વે હે દેશભક્તિ પર ઉંગલી ઉઠાવનારાઓ જરા ૧૪ જાન્યુ પછીની સવારથી જ દેશવાસીઓએ લીધેલા પગલાઓ જોઈ લેવા ….પાકિસ્તાનનો બહિષ્કાર હોય કે શહીદોના કલ્યાણનિધિમાં જમા થતી રકમો હોય એટલું તો બોસ સેલ્યુટ સાથે માનવું પડે કે મુસીબતમાં દેશ સાથે છે . અમુક છે હજુ પણ જેને દરેક વાતમાં શંકાઓ અને સલાહો આપવાની ચળ ઉપડે છે પણ શું છે કે ગદ્દારો તો છે જ દેશમાં અને એટલે તો આતંકીઓ પુલવામા જેવા હુમલાને અંજામ આપી શક્યા છે ..!! છેલ્લા ઘણા સમયથી અને ખાસ કરીને મોદી સરકાર આવ્યા પછીથી દેશમાં બુદ્ધિજીવીઓના ઓઠા નીચે નફરત અને નામોશી ફેલાવતી એક આખી ગેંગ અસ્તિત્વમાં આવી છે જે આવા કોઈ પણ બનાવ વખતે ‘ નેશન ફર્સ્ટ ‘ ને ભૂલીને સરકાર અને ખાસ કરીને મોદી પર પસ્તાળ પાડવાનું ચૂકતી નથી અને એના માટે કોઈ પણ મો-માથા વગરના નિવેદનો અને પ્રસંગોની કલ્પનાઓ વહેતી મુકતા અચકાતા નથી . આવી ગેંગોને દેશ ઓળખી તો ગયો જ છે પણ પુલવામા એટેક પછીથી દેશવાસીઓએ સ્વયંભુ રીતે બતાવેલી એકતા અને દેશભક્તિ એ આવી ગેંગને સણસણતો તમાચો પણ મારી જ દીધો છે .

ખેર , મજાની વાત એ છે કે આવી ગેંગના થોડાઘણા જીહજુરીયાઓ સિવાય દેશવાસીઓએ આની કોઈ ખાસ નોંધ લીધી નથી અને સરકારની પાછળ મજબુત થઈને ઉભા છે માત્ર એટલા ને એટલા માટે કે હવે પાકિસ્તાનને સબક શીખવાડવાનો સમય આવી ગયો છે . ઇમરાન ભલે ને કહે કે હિન્દુસ્તાનમાં ચૂંટણીઓ સમયે પાકિસ્તાનનો મુદ્દો ઉછળે જ છે પણ ઈમરાનને એ ખબર હશે જ આ વખતે આખું હિન્દુસ્તાન એમ કહે છે કે ચૂંટણીઓ પછી કરજો , પહેલા પાકિસ્તાનને ઠોકી દો..” પુલવામાં એટેક પછી થયેલા ત્રાસવાદીઓ સાથેની અથડામણ વખતે ટીવી પર પથ્થરબાજોને હટી જવાની આજીજી કરતા સેનાના ઓફિસરને જોયા હશે કદાચ હવે એવું નહિ જોવા મળે કેમકે સેનાએ સ્પષ્ટ કરી દીધું છે કે હવે જે બંદુક પકડશે એ જીવતું નહિ બચે . સેનાની સહનશક્તિની પણ હદ આવી ગઈ છે અને સારી વાત એ છે કે સેનાની પડખે ઉભી રહેતી અને એને ખુલ્લી છૂટ આપતી સરકારને લીધે સેના વધુ નીડર અને આક્રમક બની છે અને એનો દાખલો છેલ્લા પાંચેક વર્ષોમાં ઘાટીમાં વીણીવીણીને મારી નંખાયેલા આતંકવાદીઓ છે .

આજના બદલાયેલા વિશ્વમાં અને આધુનિક હથિયારોના જમાવડાને લીધે કોઈ પણ દેશ પ્રત્યક્ષ યુદ્ધ કરવું પસંદ કરે નહિ . રાજકીય દબાણ અને ચોક્કસ નીતિ સાથે કોઈ પણ દેશ દુશ્મનને ભૂ પીવડાવી શકે છે એમાયે પાકિસ્તાન જેવા આતંકના કારખાના જેવો દેશ હવે આ બાબતે જગતભરમાં અળખામણો થઇ ગયો છે જો કે ભારતને હવે પાકિસ્તાનને આર્થિક મોરચે અને પછી સૈન્ય મોરચે પછડાટ આપવી જ રહી . અને એની શરૂઆત પુલવામા હુમલાના બીજા જ દિવસથી થઇ ચુકી છે . આ લખાય છે ત્યારે શુક્રવાર સુધીમાં મોસ્ટ ફોરવર્ડ નેશન થી લઈને ૨૦૦% ડ્યુટી જેવા પાકની ઘોર ખોદનારા નિર્ણયો લેવાવાની શરૂઆત થઇ ચુકી છે , પાકિસ્તાનને મળતું પાણી બંધ કરવાની તૈયારી થઇ ચુકી છે અને બી સ્યોર કે આ તો હજુ શરૂઆત જ છે હજુ આગે આગે ઘણું થવાનું . પાકિસ્તાન સાથે દરેક પ્રકારનો વ્યવહાર બંધ કરવો એ જ સૌથી મોટો સબક રહેવાનો . દેશવાસીઓ સ્વયંભુ પાક વસ્તુઓને જાકારો આપી રહ્યા છે . વેપારીઓ દ્વારા પાકિસ્તાનમાં શાકભાજી અને બીજી વસ્તુઓની નિકાસ બંધ કરી દેવામાં આવેલ છે , પાકિસ્તાનમાં થનારા એક્ઝીબીશનમાંથી નામો પાછા ખેંચાઈ રહ્યા છે , પાકિસ્તાની ક્રિકેટરો – ક્રિકેટ , પાકિસ્તાની કલાકારો પર પ્રતિબંધ મુકાઈ રહ્યો છે અને ત્યારે બીજી તરફ દેશ મોદી સરકાર પાકને કઈ રીતે પાઠ ભણાવે છે એ જોવા ને જાણવા આતુર છે એવા વખતે સેનાની સલામતી હજુ વધુ સજ્જડ બને એ જોવું પણ જરૂરી છે જ . આયેદિન થતા સેના પરના હુમલાઓ છતાં સેનાનું મોરલ હાઈ છે એ ખરેખર અભિનંદનને પાત્ર છે જ પણ સરકારની ફરજ બની રહે છે કે સામસામી લડાઈમાં શહીદ થવાને બદલે આવી રીતે કપટી હુમલાઓમાં દેશના વીર જવાનો શહીદ ના થાય . બાકી સરકાર ,દેશ અને સેના આ ત્રણેય મોરચે જોશ હાઈ છે જ સવાલ એ છે કે પાકિસ્તાન પર બીજી સર્જીકલ સ્ટ્રાઈક થાય છે કે પછી યુદ્ધ ??? અને બન્ને કેસમાં ‘ પાકિસ્તાન તો ગયો ભાયા “. આજે નહિ તો કાલે આતંકની ફેક્ટરી સમાન પાકનું પતન નક્કી છે જ એવામાં શહીદ જવાનોને નતમસ્તક શ્રધાંજલિ સાથે દેશવાસીઓની એક જ અપીલ છે કે પાકિસ્તાનને કડકમાં કડક પાઠ ભણાવવો જ જોઈએ – ભણાવવો જ પડશે ..!!! જયહિન્દ !!!

  • અજય ઉપાધ્યાય ( ગાંધીનગર સમાચાર કોલમ #રઝળપાટ ૨૪ ફેબ ૨૦૧૯ )

ફરવરી : લવ ઇન ધ એર ……!!!!!!!

Featured

ફરવરી : લવ ઇન ધ એર ……!!!!!!!

“ દિલ દિયા ગલ્લા કરાંગે નાલ નાલ બૈઠ કે , અખ્ખ નાલ અખ્ખ નું મિલા કે …” ભલે ને પંજાબી સમજ આવે કે નાં આવે પણ આમાં કવિ એવું કહેવા માંગે છે કે આંખોમાં આંખો પરોવીને બેસવું છે ( ઓફકોર્સ પ્રિયપાત્ર સાથે જ બકા …!! ) જ્યારે પ્યારની મૌસમ આવે કે દરેકનું એક ખ્વાબ – સ્વપ્ન હોય કે પછી ઈચ્છા હોય છે કે પોતાના પ્રિયપાત્રની સાથે બેસીને , આંખમાં આંખ પરોવીને ઘડી બે ઘડી શાંતિથી બેસીને દિલની બહુ બધી વાતો કરવી છે …!! હવે તમે જો આમાં પહેલો પ્રશ્ન ફરજીયાત એમ પૂછશો કે ભાઈ/બોન મરવાની પણ નવરાશ નથી આઈ મીન ઘડીની પણ ફુરસદ ક્યા છે ? …તો વળી અમુક એવો પણ બાઉન્સર ફેંકશે કે નવરાશ તો દુનિયાની છે પણ આ પ્રિયપાત્ર ક્યાં ? આમ શું છે કે બંને સવાલો પૂછનારની કંડીશન મુજબ અમુક અંશે સાચા પણ હોય છે પણ ડોનના બચ્ચનબાબુની સ્ટાઈલમાં કહી શકાય કે ‘ યે દોનો સવાલકે જવાબ મુશ્કિલ હૈ મગર નામુમકીન નહિ હૈ ‘..! પૂછો વ્હાય ….? તો વ્હાય કા આન્સર યે હૈ કી પ્રિયપાત્ર માટે ફુરસદ તો કાઢવી જ પડે અને રહી વાત સવાલ નમ્બર બે ની તો જુવાનડાવ અને જુવતીઓ તમારા માટે જ તો છે ફેન્ટાસ્ટીક ફેબ્રુઆરી …!!!!! એય ને વેલેન્ટાઈન અને વસંત બેય ની ઓપનીંગ પેર ૧૦ ની સ્ટ્રાઈકરેટ થી રમે એવો ફેબ્યુલસ ફેબ ઈઝ ઓન ગાય્ઝ્ઝઝ્ઝ્ઝ્ઝ ….!!

નહિ સમજે…..? તો લો તનિક ડીટેલમેં બતાય દેત હૈ…!!! આમ તો શું છે કે ફેબ્રુઆરી જનરલી એક્ઝામ મંથ કહેવાય , ક્યા તો સ્કુલ્સની એક્ઝામ ચાલુ હોય અને ક્યા તો બોર્ડની એકઝામનો હાઉ ડોકિયા કરતો હોય પણ આ બધી એકઝામથી પણ થોડી હટકે એક એક્ઝામ ફરવરીમાં આવે અને એ આપણે આગળ પુછેલા બે પ્રશ્નોના શોર્ટ પેપરવાળી લવ એક્ઝામ …!!! જી હા , ફેબુઆરીમાં પ્યાર …પ્રેમ…ઈશ્ક …મહોબ્બત કે પછી લેટેસ્ટ ટ્રેન્ડમાં કહીએ તો લવ કા સીઝ્ઝ્ન હોતા હૈ બીડું …!!!! ચોકલેટ ….પ્રપોઝ… દિન તો આ તમે વાંચતા હશો ત્યારે ગુજરી ( યાની કી પસાર ) થઇ ગયા હશે અને આજે તો શોનું …જાનું …શોના કે ડીયરને ટેડી આપવાના ધખારા ઉપડ્યા હશે એવો વેલેન્ટાઈન વિકનો વરણાગી તહેવાર ( હાસ્તો તહેવાર જ તો કાયદેસર ફેસ્ટીવલ જ ગણાય …દેશી – વિદેશી એવું આમાં કાઈ ના આવે હો ….) પુરજોશમાં ચાલુ જ છે અને આ વિદેશી તહેવારની જેને આભડછેટ હોય એને માટે આજે શુદ્ધ હિંદુ તહેવાર વસંતપંચમી પણ છે જ લ્યા અને બાય ધ વે આ ફેસ્ટીવલ ઓફ લવ …રીસ્પેક્ટ …મહોબ્બતમાં હજુ તો ૧૪મીએ વેલેન્ટાઈનની લાલ ગાડી આવી ..ગુલાબી ગજરો લાવી ગાતી સવારી આવે એ પહેલા પ્રોમિસ …હગ અને કીસ્સ્સ્સ ડે ના મનમોહક નજારાઓ આવવા બાકી છે એટલે “ દિલ જીગર નજર ક્યા હૈ મૈ તો તેરે લિયે જાન ભી દે દુ ..” ગાઈ શકો પણ ખરા .. અને ના ગઈ શકો તો જૈસી જિસકી કિસ્મત શેઠજી એમ સમજીને અગલા ૧૪ ફરવરી કા ઇન્તેઝાર કરને કે સિવા ઓર કોઈ ચારા નહિ હોગા …!!

સવાલ એકલા ૧૪ ફેબ્રુઆરીનો છે જ નહિ બંધુઓ …..અને આમ પણ પ્યાર કોઈ સીઝનનો મોહતાઝ થોડો છે હે…? પણ શું છે ૭ થી ૧૪ ફેબ્રુઆરીનો ઇન્તેઝાર હર યુવા દિલ અચૂક કરતું જ હોય છે ( બાય ધ વે …યુવા લખ્યું તો નોન-યુવા રિસાઈ જતા નહિ બીકોઝ વેલેન્ટાઈન હોય કે અપના ઓરીઝીનલ વસંતપંચમી પ્યાર …પ્યારનો ઈઝહાર કે પ્યારની ફરમાઈશ તો હર ઉમ્રના લોકો કરી જ શકે છે …..વેલેન્ટાઈનના મેનીફેસ્ટોમાં એવું ક્યા લખ્યું છે કે જુવાનીયા જ ગુલાબો લઈને ચકરડીએ ચડી શકે છે ..એ સિવાયના નહિ …!!!! પ્યાર તો દરેક ઉમરે ખીલતો જ રહેવો જોઈએ …વ્યક્ત થતો જ રહેવો જોઈએ ..!!!! આ બચાડા યંગ પીપલ્સ જરા ફોકસમાં આવે એમ ‘ આઈ લવ યુ ‘ કે ‘ આઈ નીડ યુ ‘ ગાંગરતા હોય એટલે જરા જલ્દી ગામના ડોળે ચડી જાય …બસ ફરક તો આટલો જ …!!!

અને આમેય વેલેન્ટાઈનના પ્રેમ તો જિંદગીના ‘ કેટલી વિહે સો થાય ‘ ના તોફાનોમાં ટકી જાય તો જ ટેડી ને રોઝ ….ચોકલેટ ને પ્રોમિસનું મહત્વ સમજાય બાકી તો મારા ભાઈ/બોન ૧૪ મી છે એટલે સાલ્લુ ક્યાંક કોઈકને આપણી પર પરાણે ઓળઘોળ કરાવવાવાળા માટે તો નરકમાં ય જગ્યા નથી હોતી ( આવું શાસ્ત્રોમાં લખવાનું રહી ગયેલું – અહી એટલે જ એડ કર્યું ..!! ) બરાબર છે કે જુવાનીના જોશમાં કે પછી ક્ષણિક આકર્ષણમાં ‘ કોઈ અપના સા ‘ લાગવા માંડે તો એમાં વાંક તમારા કરતા વાસંતી વાયરાનો વધુ હોય શકે છે પણ વસંતપંચમીના અસલ ચોપડા ઉખેળો તો સમજાય કે પ્યાર બોલે તો રીસ્પેક્ટ….ઓર રીસ્પેક્ટ બોલે તો દિલથી દિલ મળે અને ઉમરના આકર્ષણોથી પર થઈને એકબીજાને ગમતા રહેવું વોહી તો …!! સીધી વાત છે ને પ્રેમ તે કાઈ ‘ આકળ વ્યાકુળ કાન ને વરસાદ ભીંજવે ‘ જેવી ઘટના થોડી છે ? એ તો અનુભવવાની ચીજ છે … ઇટ્સ ઓલ એબાઉટ ફીલિંગ બ્રો/સીસ ..!!! બીકોઝ શારીરિક આકર્ષણ તો સમય સાથે સરી જવાનું અને શાશ્વત અને સતત જો કશું સાથે રહેવાનું તો એ હશે માનસિક સાયુજ્ય …..દિલ સે દિલ કા ડાયરેક્ટ કનેક્શન …બોલ્યા વિના સમજી જાય એવી આંખો અને એકસાથે ધડકે એવા જીગર ….!!!

થોડા જ્યાદા ડીટેલીગ હો ગયા નહિ …? પણ શું છે કે પ્યારમાં પડવાની અને પછી એમાંથી નીકળાય નહિ એનું ધ્યાન રાખીને એને સાચવવાની પહેલી શરત જ એ છે કે પ્યાર સ્થળ અને સમયના બંધનોથી પર હોના ચાહિયે.. અને આમેય પ્રેમની કોઈ ઉમર નથી હોતી હા જો કાઈ જુદું હોય છે તો એ હોય છે પ્રેમનો પ્રકાર . દરેકના ઈઝહાર-એ-મુહોબ્બત જુદા જુદા હોવાના – ‘ હું તને ચાહું છું ‘ કે ‘ તુ મને ગમે છે ‘ આ ચાહવું કે ગમવું એ જ તો છે પ્રેમ .આપણા સૌના માનીતા રમેશ પારેખના જ શબ્દો માં “ એક ડોસો સ્વયં થયો ગજરો ને એની વય મહક થવાની થઈ “ મહેકવાની ક્યાં કોઈ ઉમર હોય છે ? અને પ્રેમ ની ? પ્રેમ ની પણ કોઈ ઉમર નથી જ હોતી હા એના પ્રકાર જુદા હોય શકે છે અને ફેબ્રુઆરી એના માટે જ તો છે કેલેન્ડરમાં ..!!!

આમાં જો પાછલી બેન્ચેથી કોઈ સણસણતો સવાલ પૂછે કે ‘ સર, પ્રેમ એટલે ?” તો ટકો ખંજોળતા પહેલા હિતેન આનંદપરાની આ બે લાઈન વાચો , સમજાય જશે પ્રેમ નું મહત્વ – “ પ્રેમ આખી જીન્દગી નો મર્મ છે , એ સિવાયની બધી વાતો તર્ક છે “ અને આમ પણ બેક ટુ વેલેન્ટાઈન આવીએ તો વિદેશી તહેવાર વિરુદ્ધ સભ્યતા અને સંસ્કારોનો મોરચો ખુલે એ પહેલા ચોખવટ કે આ વિવાદો અને વિખવાદો વચ્ચે મહત્વનું એ છે કે પ્રેમ ટકી રહે છે બાકી તો વિદેશી વિરુદ્ધ દેશીની લડાઈઓમાં પડ્યા વગર એક વાત ચોક્કસ છે કે વેલન્ટાઈન હોય કે વસંત અંતે તો આ બંને વ્હાલપના વાવેતર જ કરે છે ને …બંને દિવસે તમે વ્હાલનું દર્શન કરી કે કરાવી શકો છે અને બાય ધ વે વ્હાલ એટલે કાઈ જુવાનીયા કે જુવાનડીઓ હાથમાં ગુલાબ …ચોકલેટ કે ટેડી લઈને દોડાદોડી કરે એ જ એકલું થોડું છે , તમારા કોઈ પ્રત્યેના વહાલને . ઘરના સભ્યો – માં , પિતા , પત્ની , બાળકો , બહેન કે કુટુંબીજનો પ્રત્યે પ્રદર્શિત થતા વહાલનું પર્વ છે આ . એમ તો ‘ તુ મને ગમે છે ‘ એવું કહેવા માટે કોઈ ચોક્કસ દીવસની ક્યા જરૂર છે પણ શું છે કે આધુનિક સમયમાં બધું મસ્ત પેકીંગમાં રાખવાનો ટ્રેન્ડ છે બિલકુલ જ એ જ સિનારિયો વેલેન્ટાઈનને લાગુ પડે છે . પ્યારના પંચનામાં કર્યા વગર કોઈ તમને કે તમે કોઈને એક દિવસ તો એક દિવસ પણ ‘ આઈ લવ યુ ‘ કે ‘ તું મને ગમે છે ‘ એમ કહો એ કાઈ ઓછું છે ….??

  • અજય ઉપાધ્યાય – ( ગાંધીનગર સમાચાર કોલમ ” રઝળપાટ ” ૧૦ ફેબ ૨૦૧૯ )

કન્યા પધરાવો સાવધાન ….!!!!!!!

Featured

કન્યા પધરાવો સાવધાન ….!!!!!!!

‘ નાણાવટી રે સાજન બેઠું માંડવે ……’ પણ વેઇટ હવે સાજન નાણાવટી હોય કે ના હોય પણ શાંતિથી માંડવે ભાગ્યે જ બેસવાનું …..પૂછો વ્હાય ? …. ઈટ ઈઝ એટલા માટે કે એટલો ટાઈમ ક્યાં ? અને બીજું કે ફોર્માલીટીનો ફૂંફાડો ભેગો ને ભેગો હોય જ …!! સાજન બોલે તો દુલ્હા ઔર દુલ્હન કે દો ચાર મિત્રો , સંબંધીઓ અને ઓફકોર્સ મોમ એન્ડ ડેડ , બ્રો એન્ડ સીસ …બસ આટલા સાજનમાં ગણવાના અને છેક છેલ્લે સુધી આ જ નાણાવટી સાજન ‘ માંડવે ‘ બેસી રહેવાનું ….!!!!! વેલકમ ટુ ધ ચેન્જીંગ વર્લ્ડ ઓફ બીગ ઇન્ડિયન વેડિંગ …!!!! લગ્નગાળાની ધોધમાર સીઝન અને આનંદ ઓછો અને આડંબર વધુ વાળા બદલાયેલા લગનસરાની સિઝનમાં આપ સૌનું કંકુ-ચોખાના તિલક , રંગબેરંગી સાફા અને ડીજે ના તાલે સુ-સ્વાગતમ …..!!!

જમાના પ્રમાણે બધું બદલાય એમ લગ્નો , લગ્નની તૈયારીઓ , લગ્નના પ્રસંગો અને ઓફકોર્સ લગ્નમાં ભાગ લેનારાઓ પણ બદલાય એમાં કોઈ નવી નવાઈ ના કહેવાય પણ શું છે કે પાર્ટી પ્લોટમાંથી સંભળાતા ‘ હો લડકી આંખ મારે …’ ના રેકોર્ડેડ કે પછી કર્કશ અવાજવાળા લીડ ડીજે સિંગર ના ભાંગતી રાત્રે ડીસ્ટર્બ કરતા અવાજો વચ્ચે વિચાર જરૂર આવે કે ઓરીજીનલ લગ્નવિધિ …એની મજા અને એનો ઉમળકો ક્યાંક ને ક્યાંક યા તો ઓછો થતો જાય છે યા તો કુટુંબીઓ પુરતો મર્યાદિત થતો જાય છે …!!! અને આ લેખ હરગીજ અત્યારના લગ્નપ્રસંગોને વખોડવા માટે નથી જ પણ એક નજર લગ્નોની આજ અને કલ પર જરૂરથી છે જ . ‘ કંકુ છાંટીને કંકોતરી મોકલી રે,,,,” વાળા સોનેરી દિવસો હજુ થોડા ઘણા સચવાય તો રહ્યા જ છે પણ આ ‘ કંકુ છાંટીને કંકોતરી …’ ની જગ્યાએ ઈ-કાર્ડ નું ચલણ વધતું જાય છે . ઓફકોર્સ કંકોતરીઓ છપાય તો છે જ , ઈનફેક્ટ મોંધીદાટ પણ છપાય છે અને સાથે કોઈ ગીફ્ટ મોકલવાનો રીવાજ માલેતુજારોની સાથે સાથે અપર મધ્યમવર્ગમાં પણ ચાલુ થઇ ગયો છે . આમ તો ‘ સેવ ધ ડેટ ‘ ના રીમાઈન્ડરો મળતા જાય એમ પછી કંકોત્રી વાંચવાની જરૂર ઓછી રહેતી થઇ ગઈ છે . વોટ્સઅપ પર લોકેશનની પીનના આધારે આધારે પાર્ટીપ્લોટ સુધી પહોચી જાવાય છે એટલે ૩૦ થી લઈને ૩૦૦૦ સુધીની કંકોત્રી ડ્રોઅરના ખાનામાં કેદ જ રહે છે .

પહેલા તો શું છે કે ગામડાઓમાં બે કે ત્રણ શેરીઓમાં આડશો કે મંડપ બાંધીને લગ્નો ઉકેલાઈ જતા કે પછી સુખી ગામોમાં લગ્નની વાડી હોય તો ત્યાં પણ હવે શહેરોમાં લગ્ન નક્કી થાય કે પહેલું કામ યોગ્ય વાડી કે હોલના બુકિંગનું કરવું પડે નહીતર અઘરું થઇ જાય . પાર્ટી પ્લોટોનો જમાનો છે , નજીક મળે તો નજીક નહિતર શહેર બહારનો ટ્રેન્ડ પણ ઇન્થીંગ છે જ . ટાઈમસર સારો મેરેજહોલ કે પાર્ટીપ્લોટ મળી જાય એટલે એક હાશકારો …!!! પણ વેઇટ હવે જ સાચી લગ્ન તૈયારીઓ શરુ થવાની વત્સ …!!! ડીપેન્ડસ કે તમે જાતે આખોયે પ્રસંગ હેન્ડલ કરવાના કે પછી હવે તો ઇવેન્ટ કંપનીઓ હાજર જ હોય છે તમારી મદદ કરવા માટે તો એને આખોયે પ્રસંગ સોંપીને ચિંતામુક્ત થઈને પ્રસંગ માણવા તૈયાર છો ? ચોઈસ ઈઝ યોર્સ અને પ્લીઝ નોટ કે પહેલાના સમય કરતા આજકાલ ચોઈસીસ અઢળક છે અને ઇઝીલી અવેલેબલ પણ છે ..!!! કોઈ ઇવેન્ટ મેનેજમેન્ટ કંપનીને વેન્યુથી લઈને જાન વિદાઈ કે પછી લડકે કી શાદી હોય તો રીસેપ્શન સુધીનું લીસ્ટ પકડાવી દો… એ પહોચી વળશે પણ હા ઇસમેં રૂપિયે બહોત લગેગે હો ભાઈઈઈઈઇ ….!!!!! જો કે પ્રસંગ માંડીને બેઠા હોય ત્યાં રૂપિયા કોણ ગણે છે ???/

અને ગણવા ચાહો તો પણ એક હદથી વધુ શક્ય પણ નથી બીકોઝ આજકાલના લગ્નોમાં અમુક વસ્તુ મસ્ટ બની ગઈ છે . જેમ કે ડેકોરેશન …ક્લોથ્સ…પ્રી-વેડિંગ ઈટીસી ઈટીસી …!!! ઘરડા કહેતા ને કે ગોળ નાખો એટલું ગળ્યું થાય બસ કૈક એવું જ લગ્ન પ્રસંગને લાગુ પડે છે . જમાનો બદલાયો છે તો કપલ્સ ના તેમના જીવનના આ યાદગાર પ્રસંગને ઉજવવાના અને એને વધુ યાદગાર બનાવવાના તરીકાઓ પણ બદલાયા છે . હવે પ્રી-વેડિંગ ફોટો અને વિડીયો શૂટ આમ વાત છે . કોઈ ફોરેન જાય તો કોઈ આજુબાજુમાં આ શૂટ કરી લે – જેવી જેની પહોંચ , પણ શૂટ ઈઝ મસ્ટ !!! આવું જ કઈક ડેકોરેશનનું છે . આંખ આંજી દે એવી રીતે ફૂલો – લાઈટો – કમાનો – સ્થાપત્યોથી શણગારેલ લગ્ન સ્થળો લગભગ દરેક દુલ્હા-દુલ્હનના લીસ્ટમાં હોય જ છે . માઈન્ડ વેલ કે જરૂરી નથી કે આ બધું જ માલેતુજારો જ કરે છે પણ જેવી જેની પહોંચ એ પ્રમાણે લગભગ દરેક દુલ્હા-દુલ્હનના માતા પિતા આમાંનું મોટાભાગનું ‘ પછેડી મુજબ સોળ તાણીને ‘ પણ કરતા થયા છે . લગ્નો સાદગીથી ભભકા તરફ અને દિવ્યતાથી દમામદાર તરફ વધતા જાય છે ….અચ્છા હૈ …!!

આજકાલના લગ્ન સમારંભોમાં અચ્છું તો ઘણું બધું હોય છે પણ માણવાનો ટાઈમ કોને હોય છે ? વરપક્ષવાળાઓને વરઘોડામાં નાચવામાં વધુ ઈન્ટરેસ્ટ હોય તો જાનમાં આવેલાને જમવામાં …!!! કન્યાપક્ષવાળાને પ્રસંગ સુખરૂપ ઉકલી જાય એમાં વધુ રસ હોય તો બાકીના આમન્ત્રીતોને માત્ર ને માત્ર જમવામાં …( અમુક અંગત લોકોને બાદ કરતા )…!! અને હવે તો જમણવારમાં પણ ‘ ૩૨ પકવાન ‘ ઓછા પડે એટલી વાનગીઓ રાખવાની ફેશન છે પછી ભલે ને પેલા ફેમસ જોકની જેમ એક જ ડીશમાં ઇટાલિયન , સાઉથ ઇન્ડીયન અને ગુજરાતી વાનગીઓની સાથે પંજાબી અને ચાયનીઝ વ્યંજનો કુસ્તી કરતા હોય …!!! પહેલા તો પંગત પડતી અને આગ્રહ કરી કરી ને જમાડાતા….એમાં લોકો ભરપેટ વાનગીઓ માણતા એ ફાયદો તો હતો જ પણ બગાડ ઓછો થતો . પણ જ્યારથી બુફે સીસ્ટમ ચાલુ થઇ છે ત્યારથી બગાડની માત્રા વધી ગઈ છે . ઘણા તો ટેક એન્ડ ટેસ્ટમાં માનતા હોય એમ બધી વાનગીઓને લઈને ટેસ્ટ કરીને જો ના ભાવે તો કુડેદાનના હવાલે કરતા લગભગ દરેક લગ્ન જમણવારમાં જોવા મળે જ છે ..!! યજમાને ભલે ૪૦૦ થી લઈને ૧૬૦૦ સુધીની ડીશ કેમ ના પીરસી રાખી હોય ….હું કેર્સ ??? અને પાછું જેણે આ બધો ખર્ચ કર્યો હોય એ તો જ્યારે અંતમાં જમવા બેસે ત્યારે બની શકે કે પોતાની ડીશ જોઇને વિચારે ચડી જાય કે ‘ સાલું , મેં મેનુમાં પનીર પસંદા તો રખાવેલા , એ ગયા ક્યા ???” ઇનશોર્ટ ઘરધણી તો આ બધા તાક્જામ ને માણી શકે એટલી ફુરસદ તો એને હોય જ નહિ ….!!!

ખેર , દરેક વસ્તુની બે બાજુ હોય છે એમ આટલા બધા બદલાવો છતાં પણ એક વાતનો હરખ તો છે જ કે હજુ પણ લગ્નપ્રસંગોમાં પરંપરા ભુલાતી નથી . હજુ પણ નાક ખેચવાનું , ફટાણા ગાવાનું , લગ્નગીતો ગાવાથી લઈને મૂળભૂત અને પરંપરાગત બધી જ વિધિઓ ફોલો કરાય છે . હા ભલે ને લગ્નગીતો તમારી બદલે ગાઇ આપનાર મંડળીઓ આવી ગઈ છે …લેટેસ્ટ સાડી કે ઘરચોળાની પાનેતરને શુકન પુરતું પણ રખાઈ તો છે જ … મોજડી ચોરવાથી લઈને વરમાળા પહેરાવવામાં કન્યાને વરરાજાથી ઉંચી કરાય છે ..!!!! શાદી …બ્યાહ કે લગ્નનો માહોલ મોર્ડન , આધુનિક અને વધુ આકર્ષક થતો જાય છે તો સાથે સાથે ખર્ચાળ પણ થતો જાય છે છતાં પણ અધધધ આડંબરોના પગપેસાર છતાં પણ ‘ ધ બીગ ઇન્ડીયન વેડિંગ ‘ નો ચાર્મ …મજા….આનંદ અને ઉલ્લાસ બરકરાર છે …..વિથ ઓલ ધ ગ્લિટરીંગ સ્વેગસ્સ્સ્સસ્સ્સ્સ . !!!!!!!

વિસામો :

“ ‘વર તારો અણવર આવો તે કાં ? આવો તે કાં ? આંખો જોઉ તો ફાંગો દેખાય ફાંગો દેખાય.’જમવા બેસે તો ગાય..‘અણવર થોડુ થોડુ જમજે રે મસૂરીયાની દાળ..તારા પેટડીયામાં દુખશે રે મસૂરીયાની દાળ..” – અણવરને લાગમાં લેતું એક ફટાણું

  • અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૩ ફેબ્રુઆરી ૨૦૧૯ )

તું જાણે પતંગ છે ને હું છું તારી દોર….!!!!!

Featured

તું જાણે પતંગ છે ને હું છું તારી દોર….!!!!!

“ આકાશમાં ઉડતી રંગબેરંગી પતંગો એકબીજા સાથે ઉલજતી રહે ….ક્યારેક એક પતંગ બીજાની ઉપર તો ક્યારેક બીજી પતંગ એની ઉપર …!!! આ બધું ત્યાં સુધી ચાલે કે જ્યાં સુધી કોઈ એકની પતંગ કપાઈ ના જાય …અને પછી ઉડાડનારાઓની ચીચયારીઓ અને દેકારો ….ફરી પાછી બીજી પતંગોના પેચ …ખેંચ અને ઢીલ …પકડના નારાઓ સાથે પતંગબાજી આગળ વધે …!!! કપાયેલી પતંગ એમ જ હવાના સહારે ઉડતી ક્યાંક પડી જાય ….આમાં સટાબાજી પણ ખુબ થાય …મૂળે તો આ રાજાઓની રમત માનવામાં આવે છે ….!!! “ પ્રખ્યાત લેખક રસ્કીન બોન્ડે પોતાની એક લઘુનવલમાં ૨૦મી સદીની શરૂઆતમાં ખેલાતા પતંગયુદ્ધનું વર્ણન કઈક આમ કરેલું ..!!! જો કે હવે તો રાજા-રજવાડાઓની આ પસંદીદા રમત આમ જનતાની ફેવરીટ રમત બની ગઈ છે …!!! મકરસંક્રાંતિના દિવસે આવો માંડીએ પતંગ ….પતંગ-યુદ્ધ …પતંગબાજી અને પતંગબાજોની વાત …..!!!!

ઉતરાયણ‘ યાની કી મકરસંક્રાંતિ નામનો આ શબ્દ કે જેનો સંસ્કૃત અર્થ ‘ઉતરાયન‘ થાય છે જે એક્ચ્યુલી ઉત્તર અને અયનના જોડાણથી બનેલો છે. એવું મનાય છે કે ૧૪મી જાન્યુઆરીથી સૂર્ય ઉત્તર દિશા તરફ પોતાના પગલા માંડવાનું શરુ કરે છે એટલે એને ઉત્તરાયન કહેવામાં આવે છે. જે શબ્દ પાછળથી અપભ્રંસ થઈને ‘ઉત્તરાયણ‘ બન્યો. આ ઉપરાંત આ દિવસે સૂર્ય મકર રાશિમાં પ્રવેશે છે એટલે ‘મકર સંક્રાંતિ‘ પણ કહે છે. આવું જ પતંગ માટે છે . પતંગને તેલુગુ ભાષામાં ‘ગાલિપટ્ટમ‘ કહેવાય છે. પતંગ એટલે પ્રગતિ, ઉડાન, બહુરંગ, પ્રેમ અને ડોલન. પતંગનો સંસ્કૃત અર્થ ‘ઉડનારો‘છે અને અંગ્રેજીમાં તેને ‘કાઈટ‘ કહેવામાં આવે છે. આ કાઈટ મતલબ ગરમ પ્રદેશમાં મળતું કાઈટ નામનું પક્ષી, કાઈટ નામનું આ પક્ષી આકાશમાં ઉંચે ઊડી પોતાની પાંખ પહોળી કરી તરતુ રહે છે. ક્યારેક સ્થિર પણ રહે છે. જે પતંગ જેવો દેખાવ ધારણ કરે છે …!!!

પ્રાચીનકાળથી જ મનુષ્યની ઈચ્છા આકાશમાં ઉડવાની હતી …પક્ષીઓની જેમ સ્વૈરવિહાર કરવાની હતી ,,,,અફાટ આકાશને પેલે પાર પહોચવાની હતી !!! એમાંથી જ પતંગનો જન્મ થયો હશે ..!!! પ્રાચીન અને મધ્યયુગમાં પતંગોનો ઉપયોગ હવાનું પરીક્ષણ , સંદેશાઓ મોકલવા કે સૈન્ય ગતિવિધિઓ માટે થતો હતો . ગ્રીક ઇતિહાસકારોની માનીએ તો પતંગબાજી લગભગ ૨૫૦૦ વર્ષ જૂની પ્રથા છે પણ મોટાભાગે પતંગની શરૂઆત ચીનમાં થઇ હોવાનું વ્યાપકપણે મનાય છે . ચીનમાં આ પ્રથા લગભગ ૨૦૦૦ વર્ષ જૂની છે એવું મનાય છે . કહેવાય છે કે ચીની સેનાપતિ હાંસીને કાગળના ટુકડાઓમાં સંદેશાઓ લખીને એને ઉડાડીને પોતાના સૈનિકો સુધી પહોચાડેલા …આ હતી પતંગની ફર્સ્ટ ફ્લાઈટ …!!! ચીનમાં આજે પણ ૯ સપ્ટેમ્બરના ઉજવાતા પતંગોત્સવમાં આ શોખ બરકરાર છે તો અમેરિકામાં પણ રેશમી કપડા અને પ્લાસ્ટીકની પતંગોનો પતંગોત્સવ જુનમાં ઉજવાય છે તો વળી જાપાનીઝ એમ માને છે કે પતંગ ઉડાડવાથી દેવતાઓ પ્રસન્ન થાય છે એટલે ત્યાં મેં મહિનામાં આ દેવતા પ્રસન્ન કાર્ય કરવામાં આવે છે . મતલબ કે પૂરે કાયનાતની માલીપા આપણે એકલા નથી કે જે ૧૪મીએ છત પર ચડીને …ગોગલ્સ ઠબકારીને ….કર્કશ પપુડા , ફૂલ સ્ટોક ઓફ ખાધા-ખોરાકી અને સંગીતના દેકારા વચ્ચે નોન-સ્ટોપ ઓછામાં ઓછા બે દિવસ પતંગબાજી કરતા રહીએ છીએ ….!!!! જો કે આપણે ત્યાં તો મહિના અગાઉ જ આકાશમાં પતંગો ઉડતા થઇ જાય છે …..ગુજરાતી આમેય ઉતસ્વઘેલી પ્રજા ખરી ને ….!!!

ઓકે પતંગના ઈતિહાસને મુકીએ બાજુએ અને માણીએ પતંગની મજા વિથ રેફરન્સ ટુ આગલું વાક્ય અને ગોગલ્સ…પપુડા …સંગીત …મિજબાની …!!! ઉતરાયણના દિવસે આકાશમાં ખાલી પતંગો જ નથી ચગતા પણ સાથે સાથે આડોશી પાડોશી અને સગા-વ્હાલા કે દોસ્તો સાથેના સંબંધો પણ પરવાન ચડતા હોય છે ..!! આટલો બધો સમય જોડેજોડેના ધાબા પર વિતાવ્યા પછી એ સંબંધો વધુ મજબુત થાય છે એ સ્યોર છે ..!! એક્નીજાની અગાસીથી ચીકી –શેરડી – તલલાડુ કે પછી કપાયેલી પતંગોની આપ-લે એક જુદો જ સંબંધ બનાવી જાય છે . બાજુની અગાસી પરથી ઉડતા પતંગને જોઇને આપણા પતંગની હવા નક્કી કરવી કે પછી કપાયેલા દોરને પ્રેમથી ફીંડલુ વાળીને બાજુની અગાસી પર નાખવા જેવા પાડોશીધર્મો બજાવવાનું કામ થાય એનું નિમિત બને પતંગ …!!! તો ભલેને બાજુવાળા અંકલથી રોજ ડર લાગતો હોય પણ તે દિવસે ધાબેથી એમના પતંગને બિન્દાસ કાપીને કાપ્યો છે ની ચીચ્યારી મારવાની અમુલ્ય તક પણ પતંગ જ આપે છે …!!!

બીજે ભલેને પતંગ સાથે દેવીદેવતાઓ ને જોઈન્ટ કરી દેવામાં આવતા હોય પણ હકીકતે પતંગ એ તો જુવાનીનો ઉત્સવ છે …!! જી હા પતંગ ઉડાડવાના કેફમાં તો તે દિવસે અનેક ઉમરલાયકો પણ બચૂકડાં બાળક બની જાય છે . ધાબા પરથી પસાર થતી કપાયેલી પતંગને પકડવા કૈક કેટલાયે ઉમર ભૂલીને વાંસડાકુદ કરી લેતા હોય છે . એક તો સૂર્યનારાયણ નો મસ્ત તડકો અને ઉપરથી ધાબા પર સંગીત અને જોમનું સામ્રાજ્ય ….ભલભલા જુવાન થઇ જાય આમાં તો …!! રંગબેરંગી પતંગોથી શોભતા આકાશ સામે મીટ માંડીને પતંગોના કરતબ કરવાની મજા જ અનેરી છે ….એ રંગીન આકાશ ઓર નશીલું બની જાય …!!!!

કોઈએ સાચું જ લખ્યું છે કે ‘ પતંગ એટલે આકાશને પ્રેમપત્ર લખવાનો સમય ‘ .. પતંગની હારેહારે આજુબાજુના ધાબા પર કોઈ સાથે રચાતું નૈનમૈત્રક યાની કી મૂંગા પ્રેમપત્રો ની પણ એક આગવી મજા છે …ગમતા ચહેરાને ગોગલ્સ પાછળથી તાકવાની મજા છે …..ગુન્ચાયેલી દોરીઓ ને ઉકેલવાની મજા છે ….. તો ધાબા પર એય્ય્ય્યય્ય્ય્ય કાપ્યો છે , ઓય્ય્યય્ય્ય્ય લપેટ કે દેદેદેદેદ ઢીલ દે ના આવજો કરતા આપણે અગેઇન આપણા પૂર્વજો જેવા બની જઈએ છીએ પણ એ જ તો આ આકાશી તહેવારની મજા છે . અમસ્તા તડકાથી ભાગતા ફરતા હોઈએ અને છાયો શોધતા હોઈએ પણ પતંગબાજીમાં આપણે ભરતડકે ક્યા નોનસ્ટોપ ૮-૧૦ કલાકો કાઢી નાખીએ છીએ એની ખબર પણ નહી પડતી ….!! રાજેન્દ્ર શાહના શબ્દોમાં ઉતરાયણમાં આકાશને તાકવાની પણ એક મજા છે , અમસ્તા તો ક્યારે ઊંચું જોઇને આકાશને મનભરી ને તાકવાના ?? સૂર્ય મકરમાં પ્રવેશે છે કે જે હોય તે પણ દાન ધર્મની સાથે સાથે પતંગબાજીનો ઉત્સાહ , એનું વાતાવરણ અને સાંજે ભલે થાકીને લોથપોથ થઇ જાવાય પણ ધાબા પર વિતાવેલી એ અમુલ્ય ક્ષણોની યાદગીરી જ તો છે સંક્રાંતિનું જમાપાસું. પતંગ સ્થિર રહેતા શીખવે ને પતંગ કપાયા પછી અફસોસ નાં કરવાનું પણ શીખવે ….પતંગ પ્રેમ પણ શીખવે અને પતંગ દાવ-પેચ પણ શીખવે ….પતંગ ગુંચ ઉકેલતા પણ શીખવે ને પતંગ ગુથ્થી મારતા પણ શીખવે ….પતંગ ગમતી વ્યક્તિ માટે ફીરકી પકડાવતા પણ શીખવે ને પતંગ સરખા અંતરે રહીને બાંધેલા કીન્નાની જેમ સમાંતર રહેતા પણ શીખવે …..અંતમાં પ્રાચીન રંગભૂમિનું આ ગીત ગણગણતા સૌ ને હેપ્પી પતંગોત્સવ !!! ’ ઊડશું જીવનમાં જોડાજોડ , પાંખો જેવી પતંગની …સાહ્બો મારો ગુલાબનો છોડ , વેલી હું તો લવંગની ‘…..!!!!!

  • અજય ઉપાધ્યાય ( ગાંધીનગર સમાચાર – કોલમ ” રઝળપાટ ” 13 જાન્યુ 2019 )

માસ્ક , મ્યુઝીક , લાઈટીંગ , મેકઅપ : સ્ટોરી ઓફ ‘ હોરર ‘ બ્રધર્સ ….!!!!!!!

Featured

માસ્ક , મ્યુઝીક , લાઈટીંગ , મેકઅપ : સ્ટોરી ઓફ ‘ હોરર ‘ બ્રધર્સ  ….!!!!!!!

 ૧૯૭૦ – ૮૦નો એ દાયકો હતો જ્યારે હિન્દી સિનેમામાં એક બાજુ વન એન્ડ ઓન્લી અમિતાભ બચ્ચનની એન્ટ્રી થઇ ચુકી હતી અને એકબાજુ પ્રયોગાત્મક અથવા તો સમાંતર સિનેમા પણ જોર પકડી રહ્યું હતું . એક બાજુ એક્શનનું આગમન પુરજોશમાં થઇ ચુક્યું હતું અને બીજી બાજુ ડાર્ક અને મીનીગફૂલ સિનેમા પણ પોતાના દસ્તક દઈ ચુક્યું હતું એવામાં એક નિર્માતા એવો પણ હતો જેને આ એક્શન અને રીયાલીસ્ટીક ફિલ્મોથી અલગ જ પોતાની રાહ પકડવાનું નક્કી કરી લીધેલું  , ઈનફેક્ટ એ એકલો નહોતો પણ એની સાથે એના સાત સાત ભાઈઓ પણ મદદમાં હતા . અને એની ફિલ્મોની જોનર પણ હતી આ બધાથી અલગ ..!!! જી હા , ના તો એક્શન અને ના તો રીયલ …એણે બનાવી ભારતની પ્રથમ કહી શકાય એવી ફુલ્લી ફ્લેજ્ડ હોરર મુવી …!!! જો કે ફિલ્મ સમીક્ષકો અને ઇવન ફિલ્મવર્તુળોએ એના પર કાઈ ખાસ ધ્યાન પણ આપવાનું મુનાસીબ માન્યું નહિ બીકોઝ હોરર જોનરની ફિલ્મો તે કાઈ ચાલતી હશે ઇન્ડીયામાં ??/ અને એ પણ બચ્ચન અને નસીર-શબાના જેવા મંજાયેલા કલાકારોની ફિલ્મોની સામે …? નોટ પોસીબલ ..!!!

કટ ટુ મહાબળેશ્વર …વર્ષ ૧૯૭૧ ..!!! બે ફ્લોપ ફિલ્મોના નિર્માતા પિતા અને ઈલેક્ટ્રોનિકની દુકાન ચલાવતા સાતે ભાઈઓએ નક્કી કર્યું ફિલ્મી ગ્લેમરમાં નસીબ અજમાવવાનું અને એના માટે હોરર જેવી સામે પાણીએ તરવા જેવી જોનર પસંદ કરી ફિલ્મ બનાવવા ..!! કદાચ ત્યારે એમને કે ફિલ્મ ઇન્ડસ્ટ્રીને પણ ખબર નહોતી કે આ ફિલ્મ હિન્દી ફિલ્મો માટે એક માઈલ સ્ટોન બની જશે ..!! મહાબળેશ્વરના સરકારી ગેસ્ટહાઉસમાં ભાડે લીધેલા કેમેરા સાથે માત્ર ૧૫ લોકોના યુનીટે ધામા નાખ્યા . ઇવન કલાકારોને પણ ફિલ્મમાં પહેરવાના કપડા પોતાના જ લાવવા જણાવાયેલું . ૪૦ દિવસની મહેનત અને માત્ર ૩.૫ લાખના ખર્ચે એ ફિલ્મ બની એ પણ એવા સમયે કે જ્યારે એક એવરેજ હિન્દી ફિલ્મ ઓછામાં ઓછા ૫૦ લાખના ખર્ચે બનતી હતી . ૩.૫ લાખમાં બનેલી એ ફિલ્મે રીલીઝ થતા જ ધૂમ મચાવી દીધી અને એ સમયે અધધધ કહી શકાય એવો ૪૫ લાખનો વકરો કરીને ફિલ્મી માંધાતાઓની આંખો પહોળી કરી દીધી એટલું જ નહિ પણ હિન્દી ફિલ્મોમાં એક નવું જોનર “ હોરર “ શરુ કરવાનો પણ શ્રેય એ સાતે ભાઈઓને ફાળે ગયો , એટલું જ નહિ પણ એ પછીથી રોમાન્સ અને એક્શનથી પણ હટીને હીટ ફિલ્મો બની શકે છે એનું ફિલ્મ ઇન્ડસ્ટ્રીને ભાન થયું …!!! એ ફિલ્મ હતી સુપરહીટ હોરર ફિલ્મ “ દો ગજ જમીન કે નીચે “ અને એ ફિલ્મના હમણાં જ અવસાન પામેલા અને ચૂંટણીઓના ચક્રવ્યુહમાં સમાચારોમાં પુરતું સ્થાન ના પામેલા દિગદર્શક હતા તુલસી રામસે અને એમના ભાઈ શ્યામ રામસે …!!!

નો ડાઉટ રામસે બ્રધર્સનું કદાચ યશ ચોપરા કે મનમોહન દેસાઈ જેવા લોકો જેટલું યોગદાન નહિ હોય પણ એક વાત ચોક્કસ છે કે હિન્દી નિર્માતાઓને હોરરની રાહ દેખાડનાર આ રામસે ભાઈઓ જ કહેવાય . ઈનફેક્ટ જે સ્થાન રોમાંસ માટે યશ ચોપરાનું છે એ જ સ્થાન હોરર માટે રામસે બ્રધર્સનું છે જ એમાં કોઈ શંકાને સ્થાન નથી જ . જો કે દો ગજ જમીન કે નીચે ની પહેલા રામસે બ્રધર્સના ફાધર એફ.યુ રામસે કે જે પોતે ફિલ્મ નિર્માતા હતા તેમણે બે ફ્લોપ ફિલ્મો બનાવેલી જ પણ રામસેનો ઈતિહાસ અને રામસે સ્ટાઈલ ફિલ્મોની શરૂઆત કરવાઓ જશ તો ‘ દો ગજ જમીન કે નીચે  ‘ને જ જાય છે . એફ.યુ.રામસેના આ સાત બેટાઓએ હિન્દી સિનેમામાં એક નવો હોરર દોર શરુ કરેલો . અત્યારે નેટફ્લીક્સ કે હોટસ્ટાર પર રુવાડા ઉભી કરી દેતી ઈંગ્લીશ હોરર ફિલ્મો જોનાર વર્ગને રામસે બ્રધર્સ એટલે શું અને એનો કેવો જમાનો હતો એના વિષે કદાચ ખ્યાલ નહિ જ હોય એ હકીકત છે અને કદાચ અત્યારે ચેનલ પર એમની ‘ બંધ દરવાઝા ‘…’ પુરાની હવેલી ‘…કે  ‘ વીરાના ‘ જેવી ફિલ્મો જોતી વખતે હસવું પણ આવી જતું હશે પણ એ યાદ રહે કે એ જમાનો વીએફએક્સનો નહોતો અને ઉપરથી રામસે લો બજેટ ફિલ્મો બનાવવા જાણીતા હતા અને ખાસ તો માત્ર લાઈટીંગ અને માસ્કનો ઉપયોગ કરીને હોરર સર્જવાના નિષ્ણાત હતા એવામાં રામસેએ બનાવેલી હોરર ફિલ્મો ભલે ને સી ગ્રેડ ની ગણાતી હોય તો પણ એ જમાનાની દ્રષ્ટીએ માઈલસ્ટોન જ હતી .

૧૯૭૦-૮૦ની રામસે બ્રધર્સની ફિલ્મોની વાર્તા લગભગ એક જેવી જ રહેતી …ખાલી હવેલી ….કબરમાંથી ઉઠતા ભૂત – ડાકણો ….ખૂન …બદલો …સેક્સી હિરોઈન …પ્રેમમાં ધોખો ….કતલ ….અને હા આ બધામાં થોડું સેક્સ ..થોડી ફાઈટીંગ …થોડી મારામારી અને થોડી સિડકટીવ ક્ષણો …અને એ બધાથી ઉપર ખોફનાક ચહેરાવાળા વિલનો કે ભૂતો કે બદમાશો કે ચુડેલો ,,,જે દર્શકોને ડરાવવા માટે કાફી રહેતા !!! ‘ પુરાના મંદિર ‘ માં સામરી નામે વિલન બનતો અને ‘ સામરી ‘ માં દરિંદો કે રાક્ષસ બનનાર ૬ ફૂટ + ઉંચો કલાકાર યાદ છે ને કે જેની પરદા પર એન્ટ્રી થતા જ બીક લાગી જાય . એનું અસલ નામ હતું અનિરુધ્ધ અગરવાલ . પુરાના મંદિર પછી અનિરુધ્ધ બહુ જાણીતો ચહેરો બની ગયેલો . બાકી તો રામસે બ્રધર્સની ફિલ્મો જ બી ગ્રેડ ની ગણાતી એટલે સ્વાભાવિક છે કે કોઈ એ ગ્રેડના કલાકાર તો એમાં હોવાના જ નહિ અને આમેય લો બજેટ ને લીધે ખુદ રામસે બ્રધર્સ જ એવા કલાકરોને સાઈન કરતા કે જે સસ્તામાં મળે કેમકે આખરે તો રામસે નામ જ કાફી રહેતું ફિલ્મ માટે એટલે અરુણા ઈરાની , દીપક પરાશર , અર્ચના પુરણસિંહ ,હેમંત બીર્જે જેવા અનેક કલાકારો સાઈન થયેલા પણ હા બપ્પી લાહિરી જેવાનું સંગીત અમુક ફિલ્મોમાં હતું એમ તો કિશોર અને લત્તાએ ગીતો પણ ગયેલા છે . ખેર આ બધા કરતા આમેય રામસેની ફિલ્મમાં મેકઅપ .. માસ્ક……મ્યુઝીક અને લાઈટીંગનું જ કામ રહેતું …હીરો ને હિરોઈન તો કોઈ પણ ચાલી જાય અને આ વાત એમણે એક નહિ પણ અનેક સફળ અને હીટ ફિલ્મો બનાવીને સાબિત પણ કરી દેખાડેલી …!!

અને ફિલ્મીકીડાઓ માથું ખંજોળતા કે આ ફિલ્મો હીટ કેમ જાય છે ? જો કે એ પણ સત્ય છે કે રામસેની મોટાભાગની ફિલ્મો ઈંગ્લીશ ફિલ્મો કે વાર્તાઓની ભારતીય આવૃત્તિ જેવી જ રહેતી . એમના પર આરોપ હતો કે ઈંગ્લીશ ફિલ્મોની વાર્તા ચોરીને હિન્દીમાં બનાવે છે પણ જવાબ એ પણ આપવામાં આવેલો કે ઈંગ્લીશ ફિલ્મો ઇન્ડીયામાં જોવે છે કેટલા અને ક્યારે ? આ એ વખતની વાત છે જ્યારે હોલીવુડ રીલીઝ ભારતમાં નામ પુરતી જ રહેતી . આમ છતાં પણ રામસે બ્રધર્સની મોટાભાગની ફિલ્મો હીટ ગણી શકાય એટલી ચાલેલી અને નાના સેન્ટરોમાં ખુબ ચાલેલી એ હકીકત છે . રામસેની ફિલ્મના ચાહકોનો એક આખો વર્ગ હતો કે જે આતુરતાથી રામસે બ્રધર્સની ફિલ્મની રાહ જોતો . ઈનફેક્ટ વિતરકો પણ રામસેની ફિલ્મને ચપોચપ ઉપાડી લેતા કેમકે એમાં એમને સારો એવો નફો પણ મળતો . હમણાં જ અવસાન પામેલા તુલસી રામસેએ આનું રાઝ એક મુલાકાતમાં ખોલેલું કે ‘ દર્શકો ફૂલ ડીશ જમવા આવે છે એટલે બધું આપવું પડે , થોડો રોમાન્સ , થોડું સંગીત , અને સેક્સી દ્રશ્યો પણ ..તમે દર્શકોને સતત ડાર્ક કે ડરાવી શકો નહિ “ . ખેર હોરર ફિલ્મોના વળતા પાણી થયા પછીથી રામસે બ્રધર્સે ૧૯૯૩મા ઝી ટીવી પર ભારતની પ્રથમ હોરર સીરીયલ “ ધ ઝી હોરર શો “ શરુ કર્યો અને સતત આઠ વર્ષો સુધી સફળતાથી ચલાવ્યો પણ ખરો ..!!! આમ ભારતની પ્રથમ હોરર સીરીયલ પણ એ જ લાવ્યા . ખેર હવે તો વીએફએક્સના જમાનામાં હોરર ફિલ્મો પણ હોરર ઓછી અને ડીજીટલ વધુ લાગે છે એવામાં વીએફએક્સ વગરના જમાનામાં માત્ર માસ્ક , મેકઅપ અને લાઈટીંગથી દર્શકોને એક દશકા સુધી ડરાવનાર તરીકે રામસે બ્રધર્સ સદા યાદ રહેશે ..!!

વિસામો :

“  દો ગજ જમીન કે નીચે “ થીયેટરમાં એકલા જોઈ બતાવે એને ૧૦૦૦ રૂપિયાનું ઇનામ આપવાની જાહેરાત કરવામાં આવેલી !!!!

સત્તા નો સેમી-ફાઈનલ : સમજદાર કો ઇશારા કાફી ….!!!!!!!

Featured

સત્તા નો સેમી-ફાઈનલ : સમજદાર કો ઇશારા કાફી ….!!!!!!!

‘ કાહે કી શાનદાર જીત ….શાનદાર તો તબ કહેતે જબ વન સાઈડેડ વિકટરી હોતી કોંગ્રેસ કી ….ઇસમેં તો ક્યાં હૈ કી અભી કે મામુ દિખાઈ નહિ દે રહે થે તો પુરાને મામુ કો વાપસ લે આયે “ ….પાંચ રાજ્યોના ભાજપ માટે આંચકાજનક અને કોંગ્રેસ માટે આશ્ચર્યજનક પરિણામો ચાલુ હતા ત્યારે એક ટીવી ડીબેટમાં ઓવૈસી આવું કહી રહ્યા હતા ..!!! એમ.પી. અને રાજસ્થાનમાં ભાજપે આપેલી કરારી ટક્કરે ઓવેસીની વાતમાં દમ છે એ માનવું જ પડે પણ ભાજપની કરારી હાર માટે આ કોઈ એક્સક્યુઝ છે જ નહી ….બિલકુલ નહિ …!!!! પાંચ રાજ્યોના ચૂંટણી પરિણામોએ ‘ કોંગ્રેસ મુક્ત ભારત ‘ ના સપના જોનાર ભાજપ અને એના હારેલા નેતાઓથી લઈને ખુદ વડાપ્રધાન સહીત સૌએ ‘ પ્રજાના ચુકાદાને નતમસ્તક સ્વીકારીએ છીએ ‘ એવું કહેવા સિવાય બીજો કોઈ આરો બચવા જ નથી દીધો . પંદર પંદર વષો જૂની સરકારો એક જ ઝાટકે કડડભૂસ , યસ છતીસગઢને બાદ કરતા એમ.પી. અને રાજસ્થાનમાં ધાર્યા કરતા દેખાવ સારો રહ્યો પણ અંતે તો હાર એ હાર જ કહેવાય ભાઈઈઇ !!!

હિન્દી બેલ્ટના ત્રણ મોટા અને મજબુત રાજ્યોમાં સત્તા મેળવીને ઓબ્વીય્સ્લી કોંગ્રેસ ‘ આજ ખુશ તો બહોત હોંગે ‘ વાળા મુડમાં છે જ અને એ ખુશીની પાછળ મિઝોરમમાં કોંગ્રેસ હાર્યું અને તેલંગાનામાં એમનું ગઠબંધન પાછળ રહી ગયું એ વાત દબાઈ ગઈ છે જો કે કેન્દ્રમાં સરકાર બનાવવામાં આ બંને રાજ્યો કોઈ ખાસ કામના છે પણ નહિ , પણ કહેવાય છે ને કે ‘ જો જીતા વો સિકંદર ‘ એટલે હિન્દી બેલ્ટના આ ત્રણ મહત્વના રાજ્યો કે જેણે મોદીને ૨૦૧૪મા વડાપ્રધાન બનવામાં ખુબ મદદ કરેલી એમાં પંજાનો સપાટો કોંગ્રેસ અને રાહુલ માટે શુકનના સવા રૂપિયાનું કામ કરશે અને એ પણ એવા સમયે કે જ્યારે લોકસભાની ચૂંટણી હવે કાઈ બહુ છેટી છે નહિ . રાહુલ માટે આ ત્રણ વિજયો એટલા માટે પણ મહત્વના છે કે સાવ તળિયે ગયેલી કોંગ્રેસની પ્રતિષ્ઠાને એક પક્ષ તરીકે આનાથી થોડો ફાયદો થશે અને એક પ્રમુખ તરીકે રાહુલનું વજન કોંગ્રેસમાં અને ( જો થાય તો ) ૨૦૧૯ ની ચૂંટણી પહેલાના ‘ મહા ગઠબંધન ‘ માં વધશે …!!!

શું કહી જાય છે આ પરિણામો ? શું આ છે ભાજપના અંતની શરૂઆત ? શું ૨૦૧૯મા મોદી મેજિક નહિ ચાલે ? શું એક તરફ ભાજપ અને એક તરફ બધા વિપક્ષો આવો સિનારિયો ૨૦૧૯મા જોવા મળશે ? શું અહંકાર અને અભિમાનમાં ઉડતા ભાજપી નેતાઓને આવા કરારા જવાબની જરૂર હતી ? શું કોંગ્રેસ એકલે હાથે ભાજપને ૨૦૧૯મા અટકાવી શકશે ? સવાલ બહોત હૈ ..!!! અને હોવા પણ જોઈએ જ કેમકે કેસરિયા રંગે રંગાવા જઈ રહેલા હિન્દુસ્તાનના નકશાનો રંગ બદલી નાખનાર આ પરિણામોએ મને ને તમને આવા સવાલો કરતા કરી જ દીધા છે એ હકીકત છે . ખેર એક વાત સમજી લો કે કોંગ્રેસને બગાસું ખાતા પતાસું હરગીઝ મો માં નથી જ આવ્યું અને સાથેસાથે એ વાત પણ સાચી જ છે કે કોંગ્રેસે એટલું હરખાવાની પણ જરૂર નથી કેમકે રાજસ્થાન અને એમ.પી. માં ભાજપે સારી ફાઈટ આપી છે એટલું જ નહિ પણ એમ.પી. માં તો ભાજપને કોંગ્રેસ કરતા મત પણ વધુ મળ્યા છે અને ચૂંટણી પછી જાહેર થયેલા આંકડાઓ મુજબ ભાજપ અને કોંગ્રેસના વોટશેરમાં કોઈ ખાસ મોટો ઉતાર ચડાવ જોવા મળ્યો છે જ નહિ . મતલબ કે નો ડાઉટ ભાજપ હાર્યા પછી પણ એમ નથી કહી શકે એમ કે વી આર ફીનીશ્ડ કે કોંગ્રેસ જીત્યા પછી પણ એમ નથી કહી શકે એમ કે વી હેવ ક્લીન સ્વીપ્ડ ..!! મતદારોએ એવી મસ્ત કળા કરી છે કે શાશન પણ બદલાવી નાખ્યું , એમ.પી. અને રાજસ્થાનમાં બહુમતી પણ નથી આપી અને બંનેને ૨૦૧૯ માટે ઉભડક પગે પણ રાખ્યા છે …!!!!

ખેર ચાણક્ય અમિત શાહ અને વડાપ્રધાન મોદી સહીત ભાજપના લગભગ બધા જ કદાવર નેતા વિચારતા હશે કે સાલું આવું થયું જ કેમ ???? કેમકે રાજસ્થાનમાં તો દીવાલ પર લખેલું હતું કે દર પાંચ વર્ષે સરકાર બદલાય છે એ ન્યાયે બીજેપી જવાની જ હતી , જો કે સમયસર વસુંધરાને હટાવી શક્યા હોત , લગભગ ૮૫ જેટલા ટીકીટ કપાયેલા વિધાનસભ્યોને બાગી બનતા રોકી શક્યા હોત અને ખાસ તો સામાન્ય કાર્યકરો સાથે સંવાદ બનાવી શક્યા હોત તો રાજસ્થાનમાં ભાજપ માટે ચિત્ર સારું હોત પણ સામે રાહુલનો આક્રમક અને તાબડતોડ પ્રચાર , લોકોના મુદ્દા ઉપાડવાની નીતી અને જૂથબંધી હોવા છતાં ગેહલોત અને સચિનનું એક રહેવું રાજસ્થાનમાં કોંગ્રેસના સત્તામાં વાપસીના અગત્યના પરિબળ ગણી શકાય . ખેર રાજસ્થાન તો જશે જ એવું તો ખુદ ભાજપી સમર્થકો પણ માનતા હતા પણ એમ.પી. ? અને ખાસ તો છતીસગઢ ??? છતીસગઢમાં રમણસિંહની સરકાર સારું કામ કરી રહી હતી એમાં તો વિરોધીઓ પણ ના નહિ પાડી શકે પણ કિસાનો અને નક્સલી પ્રદેશોમાં ઓછો જનાધાર અને ખાસ તો પોતાના લોકઉપયોગી કાર્યોને ચૂંટણી ટાણે જનતા સુધી પહોચાડવામાં રમણસિંહ થાપ ખાઈ ગયા એ ઉપરાંત આખોય ચૂંટણીપ્રચાર રમણસિંહે પોતાના ખભ્ભા પર રાખેલો , મોદીની સભા ઓછી થઇ અને ખાસ તો છતીસગઢ કોંગ્રેસના પ્રમુખ બધલે એકદમ છેવાડાના બુથ સુધી કાર્યકરો તૈયાર કર્યા અને યસ અધૂરામાં પૂરું એન્ટી ઇન્કમબન્સી અને જીએસટી અને નોટબંધી તો ખરા જ સરવાળે ‘ ચાવલવાલે બાબા ‘ ગયા …!!

છતીસગઢ પછી સૌથી મોટી આશા ભાજપને એમ.પી. માં હતી અને શિવરાજે એકલે હાથે લડત પણ સારી આપી છતાં પણ એન્ટી ઇન્કમબન્સીની અસર તો હતી જ પણ એ સિવાય પણ કોંગ્રેસનો આક્રમક પ્રચાર શીવરાજની હારનું મુખ્ય કારણ બની રહ્યો . જો કે શિવરાજની છબી એ ભાજપને આટલી સીટો અપાવી એ સ્વીકારવું જ પડે . પ્રચાર દરમ્યાન અને રીઝલ્ટ પછી પત્રકારોએ એમ.પી. ના લોકો સાથે કરેલી વાતચીતો મુજબ મોટાભાગનાને શિવરાજ સાથે સહાનુભુતિ હતી પણ મોદી સરકારની નીતિઓ સામે વાંધો હોવાથી શિવરાજ વિરુદ્ધ મત આપ્યો હતો . આ મોદી સરકાર માટે ગંભીર મુદ્દો કહી શકાય . ભાજપ ભલે કહે કે રાજ્યની ચૂંટણીઓ તો મુખ્યમંત્રી અને ત્યાની સરકારના નામે જ લડાય છે પણ હકીકત એ છે કે નોટબંધી , જીએસટી . કીસાનોની સમસ્યાઓ પ્રત્યે દુર્લક્ષ , બેરોજગારી જેવા કેન્દ્રીય મુદ્દાઓ આ ચૂંટણી પર હાવી હતા જ અને એક રીતે તો આ મોદી સરકાર વિરુદ્ધ જ મેન્ડેટ કહી શકાય .

હવે વાત મુદ્દાની ….આની ૨૦૧૯ પર શું અસર થશે ? જવાબમાં જો કોઈ ‘ કોઈ અસર નહિ થાય ‘ એમ કહેતું હોય તો એ વાત સત્યથી દુર છે . હકીકત એ છે કે રાજસ્થાન , એમ.પી. અને છતીસગઢ ત્રણેય હિન્દી હાર્ટલેન્ડના રાજ્યો કહેવાય અને સીટોની ગણતરીએ મોટા પણ કહેવાય એવામાં આવનારી ચૂંટણીમાં ચોક્કસપણે કોંગ્રેસને ફાયદો થાય જ . ત્રણેય રાજ્યોની કુલ ૬૫ લોકસભા સીટમાથી અત્યારે ૬૨ ભાજપના ભાજપના કબજામાં છે જેમાં ઘટાડો થશે જ , પણ ભાજપ માટે આશ્વાશનના સમાચાર એ કહી શકાય કે એમ.પી. કે રાજસ્થાનમાં એમનો વોટશેર બહુ તુટ્યો નથી એટલે કદાચ બહુ ખતરનાક નુકશાન ભાજપને થાય નહિ એવુય બને છતાં પણ અત્યારે આ કહેવું વધુ વહેલું ગણાય કેમકે હજુ લોકસભા ચૂંટણીને ચારેક મહિનાની વાર છે અને આ ત્રણ કરારી હાર પછી ચોક્કસપણે ભાજપ અને એના નેતાઓ આમાંથી કશુક શીખશે જ . પણ સેમીફાઈનલમાં ૩-૦ થી હારેલ ભાજપે એ યાદ રાખવું પડશે કે ભારતનો મતદાર બદલાઈ ચુક્યો છે એને વાતોના વડામાં નહિ પણ ઠોસ કામમાં રસ છે …એને વિપક્ષો પર વિલાસીત વાકપ્રહાર નથી સાંભળવા પણ તમે એના માટે , એના પ્રદેશ માટે શું કરશો એમાં રસ છે …એને અહંકારમાં પોતાનાથી દુર થઇ જતા નેતાઓમાં નહિ પણ પોતાની સાથે ચાલતા અને એની સમસ્યાઓનો ઉકેલ આપતા નેતાઓમાં રસ છે …!! કોંગ્રેસને તો ચોક્કસ આ એક નવી શરૂઆત કરવાની તક પ્રજાએ આપી જ છે પણ ભાજપ માટે આ એક ચેતવણી છે અને જો એમાંથી કશું શીખશે નહિ તો એના અંતની શરૂઆત થતા વાર નહિ લાગે …!!!

  • અજય ઉપાધ્યાય ( ગાંધીનગર સમાચાર કોલમ ” રઝળપાટ ” ૧૬ ડીસેમ્બર ૨૦૧૮ )

મહેનત ..પૈસા ..અરમાન..વિશ્વાસ નું અક્ષમ્ય “લીક “!!!!!

Featured

મહેનત ..પૈસા ..અરમાન..વિશ્વાસ નું અક્ષમ્ય “લીક “!!!!!

તલાટી / જુનીયર ક્લાર્ક જગ્યા ૧૮૧૯ – ઉમેદવાર અધધધ ૨૩ લાખ ….મુખ્ય સેવિકા જગ્યા ૫૧૨ – ઉમેદવાર ૨ લાખ …. ૩૩૪ વનરક્ષકની જગ્યા સામે ઉમેદવારી નોંધાવી લગભગ સવા છ લાખ લોકોએ ….ટાટની જગ્યા છે ૨૪૬૦ અને પરીક્ષાર્થીઓ છે લગભગ દોઢ લાખ ….૪૧૨ ડેપ્યુટી મામલતદાર બનવા માટે લગભગ સવા ચાર લાખ લોકો લાઈનમાં છે ….૧૪૪૨ સફાઈ કામદારોની જગ્યા માટે ફોર્મ ભરાયા ૮૨ હજાર અને હમણાં જ જે પ્રકરણે આખાયે ગુજરાતને નીચાજોણું થયું એ લોક રક્ષકદળની ૯૭૧૩ જગ્યા માટે પરીક્ષાખંડની ડેલીએ હાથ દઈને પાછા આવેલા ઉમેદવારોની સંખ્યા છે લગભગ ૯ લાખ આસપાસ …!!!! હજુ આમાં રીસર્ચ ઓફિસર ( ૭ જગ્યા સામે ૬ હજાર ) , ડેપ્યુટી ચીટનીસ વર્ગ ૩ ( ૭૭ જગ્યા માટે લગભગ ૩ લાખ ) સ્ટાફ નર્સ ( ૭૦૦ જગ્યા માટે લગભગ ૧ લાખ ) જેવી ભરતીઓ અને એના માટેના ઉમેદવારોની સંખ્યા જોડો તો કુલ લગભગ ૨૩૫૫૫ ભરતીઓ માટે ઉમેદવારી નોંધાવનારાઓનો કુલ આંકડો પહોચે ૫૫ લાખ જેવા અધધધ ફિગર સુધી ….!!!!!!

ઓકે ચાલો માન્યું કે શિક્ષણનું સ્તર ઊંચું ગયું હોવાથી દરેક સરકારી ભરતીઓમાં ઉમેદવારી નોંધાવનારાઓની સંખ્યા દિવસેને દિવસે વધતી જાય છે પણ આ પરથી એટલીસ્ટ એક વાત તો નામદાર સરકારે માનવી જ પડશે ને કે બેરોજગારીનો આંક પણ વધતો જ જાય છે અને એમાં પડ્યા પર પાટુંની જેમ પેપરો ફૂટે …!!! પેપરો નહિ પણ ખરેખર તો પરીક્ષાર્થીના નસીબ જ ફૂટ્યા કહેવાય . ગુજરાત સરકારમાં આવતી રહેતી ભરતીઓ માટે દિવસ-રાત મહેનત કરનારા …ઉછીના પૈસા લઈને પણ એના ક્લાસ ભરનારાઓ અને એ પરીક્ષાઓની તૈયારીઓ કરવા માટે નજીકના કે દુરના શહેરમાં રહેવાનો કમરતોડ ખર્ચો ભોગવનારાઓ માટે તો આવા પેપર લીક એ બીજું કાઈ નહિ પણ નાસીપાસ થવાના કારણ બનતા જવાના એનું શું ? વર્ષ કે વધુ સમયથી સરકારી નોકરીની આશામાં તન – મન અને ધન બધી જ રીતે મહેનત કરનારાની પીઠમાં આ તો ખુલ્લેઆમ ચપ્પુ હુલાવ્યા જેવી ઘટના કહેવાય ..!!! પરીક્ષાનો અર્થ જ પારદર્શિતા થાય એવામાં પેપરો ફૂટે અને એ પણ સરકારની જાણબહાર થાય એ તો સરકારની સરેઆમ નિષ્ફળતા તો ગણાય જ પણ એનાથી પણ વધુ તો બેકારો સાથે થયેલી ક્રૂર મજાક કહેવાય …!!!

અખબારી અહેવાલોને સાચા માનીએ તો આ પેપર પ્રિન્ટ કરવામાં જ અધધધ ખર્ચ કરવામાં આવેલો એમાં અંદાજે ૯ લાખ જેટલા પરીક્ષાર્થીઓનો માથાદીઠ ૧૦૦૦ રૂપિયા જેટલો ખર્ચ ઉમેરો અને ઉપરથી સુપરવાઈઝરો અને બીજા સલામતી બાબત ખર્ચો એડ કરો તો સમજાશે કે એક પેપર ફૂટ્યું એમાં પ્રજાના કેટલા નાણાનો વ્યય થયો , હજુ આમાં આપણે ૯ લાખ ઉમેદવારોએ આ પરીક્ષાની તૈયારીરૂપે ખર્ચેલા ફદિયા તો ઉમેર્યા જ નથી . ઈમાનદારીથી ટેક્ષ ભરતા નાગરિકોના પૈસાના આ બગાડની જિમ્મેદારી કોની ? આજકાલ સરકારી નોકરી મળવી મુશ્કેલ થઇ ગઈ છે એવામાં આવી રીતે ફૂટતા પેપરો અને રદ થતી પરીક્ષાઓથી નોકરીવાંછુક પર કેટલી ખતરનાક માનસિક અસર પડે એનો કોઈ અંદાજ છે કે નહિ ? એક તો ઘણા સમયે એને લાયક કોઈ પોસ્ટની જાહેરાત આવી હોય , એક બાજુ ઉમર વધતી જતી હોય એવામાં રૂપિયાની લાલચમાં આચરાતો આવો ઘોર ભ્રષ્ટાચાર બેકારોના દિમાગમાં કઈ છાપ છોડી જવાનો એ વિચાર્યું છે ક્યારેય ?

સરકારી ભરતીની પરીક્ષાઓ કે બીજી કોઈ પરીક્ષાઓ જાણે મજાક બનીને રહી ગઈ હોય એવું લાગે છે . એક તો બેરોજગારીના પ્રમાણમાં ઓછી ભરતીઓ ખુલે , ઉમેદવારો ૧૦૦-૨૦૦ કે ૫૦૦ની પરીક્ષા ફી ચુકવે , પરીક્ષાની અઢળક રૂપિયા ખર્ચીને તૈયારી કરે અને પરીક્ષા કેન્સલ થાય અથવા તો કેન્સલ નાં થાય તો એના પરિણામો માટે મહિનાઓ સુધી રાહ જોવી પડે આ બધું દરેક સરકારી ભરતીઓની પ્રક્રિયામાં કોમન થતું જાય છે . સવાલ એ નથીં કે કોઈ પણ સરકાર આના પ્રત્યે દુર્લક્ષ છે પણ સવાલ એ છે કે સીસીટીવી , પોલીસ બંદોબસ્ત , ગોપનીયતા જેવા તાળું મારેલા તબેલામાંથી પેપર રૂપી ઘોડા ભાગી જ શેના જાય ..? આ પહેલા પણ ટેટનું પેપર લીક થયેલું , દર વર્ષે ૧૦મા અને ૧૨માની પરીક્ષા વખતે પેપરો ફૂટ્યાની અફવાઓ રેગ્યુલર બનતી જાય છે . રૂપાણી સરકારે ૨૪ કલાકમાં જ ઘણા આરોપીઓની ધરપકડ કરી લીધી અને આ લખાય છે ત્યારે શુક્રવાર સુધીમાં આખીયે ઘટનાના તાર મેળવવાની કોશિશ થઇ રહી છે પણ સૌથી મોટો સવાલ એ છે કે ‘ અંદર ‘ ના જ જેમાં સંડોવાયેલા હોય એવામાં નિષ્પક્ષ અને કડક કાર્યવાહી કેવી રીતે થશે ?? પેપર લીકના મામલામાં કડમાં કડક કાર્યવાહી થવી એટલા માટે જરૂરી છે કે જેથી ભવિષ્યમાં ઈમાનદાર પરીક્ષાર્થીઓની મહેનત સાથે કોઈ ખિલવાડ ના થાય …!!!

બેરોજગારી રાષ્ટ્રીય સમસ્યા છે એની નાં નહિ અને સરકારના લાખ પ્રયત્નો છતાં પણ તાજેતરના આંકડાઓ મુજબ ગુજરાતમાં બેરોજગારીનો દર ઓવરઓલ રાષ્ટ્રીય દર કરતા ઉંચો છે . એવું પણ નથી કે આગળ લખ્યા એ મુજબ પંચાવને પંચાવન લાખ બેરોજગાર જ હશે , એમાંથી ઘણા કોઈ ખાનગી કે બીજી કોઈ નોકરી કે વ્યવસાય કરતા જ હશે પણ સરકારી નોકરીની ઈચ્છા એમને ઉમેદવાર બનાવી જાય છે અને એ સાચા પણ છે કેમકે સરકારી નોકરી એટલે રોજગારની સુરક્ષા પ્લસ હોદ્દો . આમ છતાં પણ શક્ય એટલા યુવાનોને રોજગારી મળી રહે એ જોવી રાજ્યની ફરજ છે એવામાં સરકારી નોકરીની પરીક્ષાઓમાં આવા ધપલા કોઈ પણ સરકાર માટે નેગેટીવ કહેવાય . લોકરક્ષક દળના કૌભાડ પછી અગાઉ થયેલી અનેકો ભરતીઓ શંકાના દાયરામાં આવી ગઈ છે . આવા કૌભાંડ કરનાર કોઈ પણ હોય પણ અંતે એની સમ્પૂર્ણ જવાબદારી તો રાજ્ય સરકારની જ કહેવાય . ગુજરાત વેપારી રાજ્ય છે પણ સામે નોકરી વગરના બેકારો ઓર આઈ સે શિક્ષિત બેરોજગારો પણ વધુ છે જ એ સ્વીકારવું પડશે . બેકારી ભથ્થું આપવું કે પછી વયમર્યાદા વધારવી કે પછી ખાનગી ક્ષેત્રે વધુ નોકરીની તકો ઉભી કરવી આવા ઉકેલો સરકાર વિચારે છે એ સારું છે અને એ લાગુ થયે એના પરિણામો વિષે ચર્ચા થઇ શકે પણ એ પહેલા તો કોઈ પણ પરીક્ષા પછી ચાહે એ સરકારી ભરતીની હોય કે કોલેજ કે બીજી શૈક્ષણિક એના પેપરો ફૂટતા બંધ થવા જ જોઈએ ..!!

પેપર લીક થવાના બનાવો ખાલી ગુજરાતમાં જ બને છે એવું પણ નથી , ગુજરાતમાં જ અગાઉના વર્ષોમાં પણ આવા બનાવો બન્યા જ છે અને દેશભરના ઘણા રાજ્યોમાંથી પણ આયેદિન પેપરો લીક થયાના સમાચારો આવતા જ રહેતા હોય જ છે પણ મહત્વની અને ગંભીર વાત એ છે કે કોઈ પણ રાજ્ય સરકાર ઘોડા છૂટી જાય એ પહેલા તાળા કેમ મારી નથી શકતી ? સરકાર ચાહે કોઈ પણ પક્ષની હોય કે હું ને તમે ચાહે કોઈ પણ પક્ષના સમર્થક હોઈએ પણ એક વાત તો સખેદ અને મક્કમતાથી કહેવી જ પડે કે પરીક્ષાઓમાં પારદર્શિતાને બદલે આવી લાલીયાવાડી કોઈ કાળે ચલાવી લેવાય જ નહિ …!!! ઉમેદવારોના ભાવી સાથે આવા હીન ચેડા ચાલે જ નહી .ગુનેગારોને પકડવા કે એને આકરામાં આકરી સજા આપવી એ તો સરકારનું કામ અને જવાબદારી છે જ પણ ભવિષ્યમાં બેકારો કે નોકરી ઇચ્છિત લોકો સાથે આવી મજાક નાં થાય એના માટે કોઈ ફૂલપ્રૂફ વ્યવસ્થા કરવી એ અગ્રીમતા હોવી જોઈએ અને આ બનાવોને ખુબ જ ગંભીરતાથી લેવા જ પડશે કેમકે આવા જધન્ય અપરાધોની સીધી અસર યુવાનો પર પડવાની અને આપણો ભારત દેશ વિશ્વમાં સૌથી વધુ યુવાનો ધરાવતો દેશ છે એવામાં જો યુવાનોના દિલ કે દિમાગમાં આવી ઘટનાઓની નેગેટીવ અસર પડશે તો એ અસર આક્રોશ બનતા વાર નહિ જ લાગે ..!!

  • અજય ઉપાધ્યાય ( ગાંધીનગર સમાચાર ” રઝળપાટ ” ૯ ડીસેમ્બર ૨૦૧૮ )

દર વર્ષે એક નાનું શહેર “ અકસ્માતે “ ઓછું થાય છે ……!!!!!

Featured

દર વર્ષે એક નાનું શહેર “ અકસ્માતે “ ઓછું થાય છે ……!!!!!

દાર્જીલિંગની વસ્તી છે અંદાજે ૧,૨૦,૦૦૦ …અનંતનાગની છે અંદાજે ૧ લાખ …ગ્રેટરનોઇડા અને ગંગટોક પણ લગભગ ૧ લાખની આસપાસ પોપ્યુલેશન ધરાવે છે ,,,હવે એક બીજો આંકડો જુઓ …૧.૩૬,૦૦૦ !! આ આંકડો છે છેલ્લા એક દસકામાં ભારતમાં માર્ગ અકસ્માતમાં મૃત્યુ પામનાર લોકોની વાર્ષિક એવરેજ …યાની કી ભારતમાં દર વર્ષે એટ એન એવરેજ ૧ લાખ છત્રીસ હજારથી વધુ લોકો રોડ અકસ્માતોમાં મૃત્યુ પામે છે …મતલબ કે દર વર્ષે રોડ વચ્ચે મુરજાતી જીંદગીઓને લીધે ભારતના એક નાના શહેર જેટલી વસ્તી ઓછી થતી જાય છે ..!!!! ૨૦૧૬ની સરખામણીમાં ભારતમાં ૨૦૧૭માં માર્ગ અકસ્માતોની સંખ્યામાં લગભગ ૪% જેટલો વધારો નોંધાયો છે . આ ૪% ભલે ફિગર નાનો લાગે પણ એનો ખતરો અનેકોગણો ગંભીર અને લાંબી અસરો પાડનારો છે ..!!! કેમકે આ લાખ પ્લસનો આંકડો તો માત્ર મોતને ભેટનાર લોકોનો જ છે બાકી અકસ્માતોને લીધે ઈજાગ્રસ્ત કે જિંદગીભર અપંગ થઇ ગયેલા લોકોનો આંકડો તો આનાથી ચાર ગણો વધુ છે …વેરી વેરી સીરીયસ ના ?..!!

હજુ વધુ આંકડાઓથી આ ગંભીર બાબતને સમજીએ તો ૨૦૧૭મા પ્રકાશિત એક રીપોર્ટ મુજબ ભારતમાં દર દસ મીનીટે ત્રણ લોકો રોડ અકસ્માતોમાં મૃત્યુ પામે છે . જનરલી આપણા દિમાગમાં એક હશે કે વાવાઝોડા , પુર , ધરતીકંપ જેવી કુદરતી આપદાઓમાં જીવ ગુમાવનારાઓ વધુ હશે . પણ તમારી આ ભ્રમણા એ વાંચીને ભાંગી જશે કે વર્ષ ૨૦૧૫માં આવી કુદરતી આપદાઓમાં જીવ ગુમાવનારાઓની સંખ્યા હતી માત્ર ૧૦૫૧૦ ..!!! હવે આને આગળ લખેલા વાર્ષિક એવરેજ રોડ અકસ્માતોના ભોગ બનનારાઓ સાથે સરખાવી લ્યો ..!! યાની કે કુદરતી આપદાઓ કરતા રોડ અકસ્માતોમાં મરનારાઓની સંખ્યા ૧૪ ગણી વધારે છે ..અને આ તો છેક ૨૦૧૫ની વાત છે કેમકે લેટેસ્ટ આંકડાઓ તો બહાર નથી આવ્યા પણ છાપા અને ટીવી ન્યુઝ ચેનલોમાં રોજ્જે રોજ્જ હેડલાઇન બનતા અકસ્માતો અને એમાં ભોગ બનનારાઓની સંખ્યા જોતા એટલી તો ખબર પડી જ જાય કે રસ્તા પર ફરતા યમરાજનો હાઉ ઘટવાને બદલે દિવસે દિવસે વધતો જાય છે ..!!

સરકાર ટ્રાફિક સપ્તાહો ઉજવે , રોડ સુરક્ષા સપ્તાહો ઉજવે કે ચોરે ને ચૌટે સીસીટીવી કેમેરાઓ મુકે કે પછી ટ્રાફિક સંચાલનની કડક ઝુંબેશ ચલાવે તો પણ આ આંકડાઓ ઘટવાને બદલે વધતા જ જાય છે , અને પ્લીઝ નોટ કે આ તો ચોપડે ચડેલા કે પછી જાહેર થયેલા આંકડાઓ છે , દેશના રીમોટ એરીયાઓ કે અંતરિયાળ જગ્યાઓમાં થતા અકસ્માતો તો આમાં સામેલ છે જ નહીં…!!! અને સૌથી વધુ કરુણ વાત એ છે કે રોડ અકસ્માતોમાં મરનાર લોકોમાંથી ૨૦૧૬ના રીપોર્ટ મુજબ ૬૦% લોકો ૧૮ થી ૩૫ વર્ષના યુવાનો હતા અને મોટાભાગના એમના કુટુંબના એકમાત્ર પાલક પોષક હતા ..!! જી હા મીનીસ્ટ્રી ઓફ રોડ એન્ડ ટ્રાન્સપોર્ટના આંકડાઓ મુજબ ૨૦૧૬મા રોડ અકસ્માતોમાં મૃત્યુ પામેલાઓમાંથી ૧૦૦૦૦થી વધુ લોકો ૧૮ વર્ષથી નીચેના અને ૭૦૦૦૦ જેટલા ૧૮ થી ૩૫ વર્ષ વચ્ચેના હતા ..!! આજે જ્યારે ભારત દુનિયામાં સૌથી વધુ યુવાનો ધરાવતો દેશ છે એવામાં રોડ વચ્ચે આમ અકાળે મુરઝાઈ જતી આટલી બધી યુવાન જિંદગીઓની ખોટ કોઈ પણ દેશને ભારી નુકશાન પહોચાડી શકે છે એ વધુ ખેદભરી વાત છે …!!

રોડ અકસ્માતો અટકાવવા શું કરવું અને આપણું શું યોગદાન હોઈ શકે એની વાત તો આગળ કરીશું જ પણ એ પહેલા આ આંકડા પણ જાણી લ્યો કે લગભગ ૮૦% અકસ્માતો ડ્રાઈવિંગ લાઈસન્સ ધરાવતા ડ્રાઈવરો દ્વારા થાય છે , એનો અર્થ જો કે એ નથી કે લાઈસન્સ વગરના લોકો વાહનો ઠોકતા નથી , ઠોકે જ છે પણ આ ૮૦%વાળાઓ વિષે એક રસપ્રદ આંકડો એ પણ છે કે આમાંથી ૫૫% જેવાએ લાઈસન્સ એજન્ટોને હજાર બે હજાર આપીને વગર ટેસ્ટે જ મેળવી લીધેલું હોય છે ..!! ડ્રાઈવિંગ અને ડ્રાઈવિંગ ટેસ્ટ માટે જગતભરમાં આકરા અને કડક કાયદાઓ અને પરીક્ષાઓ છે , ઇવન આપણે પણ છે જ પણ ભ્રષ્ટાચાર અને શોર્ટકટની રીતો અને કાયદાઓના છીંડા અપનાવીને મેળવાતા લાઈસન્સો સરવાળે મહાભયાનક અકસ્માતોનું નિમિત બને છે . ઠીક છે આ લાઈસન્સ વગરનાઓના પાપે અકસ્માતો તો થયા જ કરે છે કેમકે એક તો એમને ટ્રાફિકનું જ્ઞાન જ નથી કે ગંભીરતા પણ નથી પણ લાઈસન્સ ધરાવનારાઓની આમાં મેજોરીટી ચિંતાજનક છે . એનો અર્થ એ થયો કે આપણા ટ્રાફિક નિયમો હજુ પરફેક્ટ નથી અને એનાથી પણ વધુ કે લાઈસન્સ આપવા માટેના કાયદાઓ હજુ કડક બનાવવાની જરૂર છે ..!!!

ખેર આજે આંકડાઓથી જ વાત આગળ વધારીએ તો ૨૦૧૬ના ફિગર મુજબ લગભગ ૭૦૦૦૦થી વધુના મોતનું કારણ હતું ઓવરસ્પીડીંગ યાની કે નિયત કરતા વધુ ઝડપે વાહન ચલાવવું , દસેક હજાર લોકો અક્કલ વગરના ઓવરટેકિંગને લીધે મોતને ભેટ્યા , ૬૦૦૦ની આસપાસ કોઈ નશાને લીધે ભટકાઈ પડ્યા , ૫૦૦૦ જેવા રોંગ સાઈડમાં હોશિયારી મારતા ઝડપાઈ ગયા તો ૪૦૦૦ જેવા રેડ લાઈટ હોવા છતાં ક્રોસ કરવામાં કે લેન બદલવાની ઉતાવળમાં અંટાઇ ગયા . ૧૦૦૦૦ જેવા હેલ્મેટ ઘરેથી લઈને નીકળ્યા હોવા છતાં પહેરી નહિ એટલે અને પાંચેક હજાર સીટબેલ્ટને શોભાના ગાંઠીયા સમજવામાં હોમાઈ ગયા અને ૨૦૦૦ જેવા ચાલુ વાહને મોબાઈલ પર વાતું કરવામાં જીવનું કવરેજ ખોઈ બેઠા . યાદ રહે આ આંકડાઓ સરકારી છે અને છેક ૨૦૧૬ના છે પણ આંખ ઉઘાડનારી વાત ઉપરોક્ત આંકડાઓમાં એ છે કે અકસ્માતો થવા પાછળના લગભગ દરેક કારણો આમાં સામેલ છે અને મોટાભાગે આ જ વજહ હોય છે અકસ્માતોની . હા એ અલગ વાત છે કે તમે ગમે એટલું સેફ ડ્રાઈવ કરતા હો કે કાળજીથી ચાલતા હો કે ચલાવતા હોવ પણ કહેવાય નહિ કે ક્યાંથી કોઈ બાપ કમાઈનું બામ્બુડીયું કે શીખાઉ ડ્રાઈવર કે લાઈસન્સ વગર ડ્રાઈવર સીટ પર ચડી બેઠેલું કોઈ આવીને જો તમને ઠોકી દે તો આવા અકસ્માતો આમાં સામેલ નથી જ પણ એ તો કહેવાય છે ને કે કાળની ગતિને કોણ પામી શકે છે એ મુજબ એને કાળની ગતિમાં ગણીએ તો પણ દિલ પર હાથ રાખીને કહેજો કે ઉપરમાંથી કેટલી ભૂલો તમે પણ કરી છે કે કોઈને કરતા જોયા છે …?

ભારતમાં રોજના અંદાજે ૨૦૦૦થી વધુ રોડ અકસ્માતો નોંધાય છે જેમાંથી ચોથા ભાગના અકસ્માતોમાં ટુ-વ્હીલર સામેલ હોય છે . ભારતના હાઈવે પર વાહનોની ભીડ અને શહેરોમાં ટ્રાફિક જામને લીધે અકસ્માતો કોમન થતા જાય છે . લાઈસન્સ કે વગર લાઈસન્સની વાત તો છોડો પણ આપણામાંથી મોટાભાગનાને આગળના વાહનથી સેફ ડીસટન્સ રાખવાની ટેવ જ નથી , હેલ્મેટ કે તપેલી હેલ્મેટ દંડની બીકે લઇ તો લઈએ છીએ પણ એ માત્ર ટ્રાફિક પોલીસ દેખાય ત્યારે જ માથાની શોભા બને છે …હજુ ૧૬ ના પણ ના થાય હોય એવા આપણા સંતાનોને ગર્વથી કાર કે બાઈકની ચાવી આપતા હજુ આપણો હાથ ધ્રુજતો નથી …હજુ હીટ એન્ડ રનવાળા પકડાયા પછી જામીનો પર ફર્યા કરે છે …. સીટ બેલ્ટ તો શોભાના ગાંઠીયા કહેવાય …એને બંધાય થોડા ….?..પોલીસની લાલ આંખના બીકે ઝીબ્રા ક્રોસ્સિંગ કે લાલ લાઈટ પર ઉભું રહેવું આપણી શાનની ખિલાફ છે પણ શું થાય પાવતી ની બીકની મજબૂરી છે …ખુલ્લા રોડ પર જાણે કે રેસ લાગી હોય એવો સીન આમ છે …મોટા ટ્રકો પોતાના પૂજ્ય પિતાશ્રીનો રસ્તો હોય એમ માતેલા સાંઢની સ્પીડે દોડતા રહે છે અને નિર્દોષોને હણતા રહે છે … ચાલુ વાહને મોબાઈલ પર વાત કરવી સાવ સામાન્ય છે…..લીસ્ટ લાંબુ થઇ શકે એમ છે પણ હકીકત એ છે કે હજારો કિલોમીટર લાંબા હાઈવેઝ પર કે શહેરોમાં સતત અને ચોક્કસ નિગરાની રાખી શકે એવા કર્મચારીઓની અછત હોવા છતાં સૌથી મહત્વનું કે ચાલકોમાં જ સલામત ડ્રાઈવિંગના નિયમોનું પાલન કરવાની જરા પણ સમજ નથી …!!! સરકાર પોતાની રીતે પ્રયત્નશીલ છે , કાનૂનો બદલાવીને લોકોને ટ્રાફિક અંગે વધુ અવેર કરવાના પ્રયત્નો ચાલે છે પણ જો આપણે જ આપણી ખુદની અક્કલ વાપરીને ટ્રાફિક અને રોડ સેફટીના નિયમોનું પાલન કરતા નહિ શીખીએ તો ભવિષ્યમાં દર વર્ષે ઓછા થતા એક નાના શહેરના નિવાસી તરીકે આપણું પણ નામ હશે જ …!!

– અજય ઉપાધ્યાય ( ગાંધીનગર સમાચાર ” રઝળપાટ ” ૨૩ નવેમ્બર ૨૦૧૮ )

સુપરહીરોઝ ના ભગવાનની એક્ઝીટ …!!!!!!!

Featured

સુપરહીરોઝ ના ભગવાનની એક્ઝીટ …!!!!!!!

ફિલ્મ “ અમેઝિંગ સ્પાઈડરમેન’ નો એક સીન છે , લીઝાર્ડ બનેલો ડોક્ટર કોનર્સ સ્પાઈડરમેન પીટર પાર્કરને બરાબરનો ફટકારી રહ્યો હોય છે , ઈનફેક્ટ આ આખી લડાઈ સંગીતમય રીતે બતાવવામાં આવેલી . અને સ્પાઈડરીયો બરાબરનો માર પણ ખાઈ રહ્યો હોય છે બરાબર એ જ વખતે એક બુઢ્ઢો કાનમાં હેડફોન લગાવીને સંગીત સાભળતા સાંભળતા પોતાનું કામ કરી રહ્યો હોય છે , એને ખબર જ નથી કે પાછળ આવડો મોટો સુપરહીરો માર ખાઈ રહ્યો છે …!!! એ બુઢ્ઢો બીજું કોઈ નહિ પણ સ્ટેન લી હતો ..!!! જી હા પાછળ જે સુપરહીરો માર ખાઈ રહ્યો હોય છે એને બનાવનાર – એનો જનક એવો માર્વેલ કોમિક્સનો કર્તાધર્તા અને આવા અનેકો સુપરહીરોનો ભગવાન સ્ટેન લી ખુદ …!!! માર્વેલની લગભગ દરેક ફિલ્મમાં સ્ટેન લી કોઈ ને કોઈ સ્વરૂપે કેમિયો રીતે અચૂક દેખા દેતો જેમ આપણા સુભાષ ઘાઈ પોતાની દરેક ફિલ્મમાં અચૂક દેખાય જ છે બિલકુલ એમ જ ..!!! સ્ટેન લી ક્યાં ક્યાં ફિલ્મમાં કેવી રીતે દેખાયો અને એ શા માટે એની હર ફિલ્મમાં દેખાતો એની વાત તો આગળ કરીશું પણ કાગળ પરના સુપરહીટ કોમિક્સથી રૂપેરી પરદે એક થી એક ચડિયાતા સુપરહીરોનું સર્જન કરીને એક આખીયે પેઢીને મનોરંજન પૂરું પાડનાર સુપરહીરોના ભગવાન સ્ટેન લી એ હમણાં જ વિદાય લીધી …!!

હમણાં ૨૮ ડિસેમ્બરે જેમનો જન્મ દિવસ આવશે એવા સુપરહીરો અને માર્વેલ કોમીક્સના સ્પાઇડર મેન, એકસ મેન, આર્યન મેન, થોર, હલ્ક, બ્લેપેન્થર, ડેર ડેવિલ, ડોકટર સ્ટ્રેન્જ અને આંટમેન જેવા અવિસ્મરણીય સુપરહીરોનાં પાત્રોના જનક સ્ટેન લી ને બચપણથી જ મોટા અને પ્રખ્યાત માણસ બનવાની ઈચ્છા હતી . આમ તો એમનું અસલ નામ સ્ટેન્લી માર્ટીન લીબર હતું પણ લી ની ઈચ્છા હતી કે મોટા માણસ બન્યા પછી જ પોતાનું અસલ નામ વાપરશે એટલે તો એમણે સ્ટેન લી જેવા નામથી કોમીક્સની દુનિયામાં કદમ રાખ્યા પણ થયું એવું કે પછી એ જ નામ એમની ઓળખાણ થઇ ગયું અને સ્ટેન લી એ જ નામથી સર્જન કરતા રહ્યા . કાકાની મદદથી લી નવા નવા શરુ થયેલા ટાઈમલી કોમિક્સમાં આસિસ્ટન્ટ બની ગયા જ્યાં કે જે કંપની પાછળથી માર્વેલ કોમીક્સના નામે પરિવર્તિત થઇ . ટાઈમલીમા એમને ભાગે આર્ટીસ્ટ ચિત્ર બનાવવા જે શાહી વાપરે એનો ડબ્બો ભરી રાખવાનું કામ આવેલું . ધીરે ધીરે એમને પ્રૂફ રીડીંગ , ટેક્સ્ટ ફીલિંગ કરવાનું અને ચિત્ર પર પડેલા ડાઘ હટાવવાનું કામ મળવા લાગ્યું . એ પહેલા અમેરિકાની મહાન નવલકથા લખવાના સ્વપ્ન સાથે લી એ અખબારોમાં લખવાનું , સેન્ડવીચ વેચવાનું અને ઇવન ઓફિસબોયના કામ પણ કર્યા . પ્રગતી થઇ ગઈ અને લી લખતા રહ્યા . વચમાં લી આર્મીમાં પણ જોડાયા જ્યાં એમણે મેન્યુઅલ , ટ્રેનીંગની સ્ક્રીપ્ટ અને યુદ્ધ વખતે સૈનિકોને બોલવા સ્લોગનો પણ લખ્યા .

એવું નહોતું કે લી એ જ સૌપ્રથમ કોમિક્સ શરુ કર્યા , એ પહેલા પણ ડીસી કોમિક્સ જાણીતું નામ હતું જ અને ટાઈમલીને પ્રતિસ્પર્ધા પૂરું પાડતું જ હતું , ડીસી ની જસ્ટીસ લીગ ઓફ અમેરિકા હીટ હતી , હવે ટાઈમલી કે જે એટલાસ કોમિક્સના નામથી જાણીતું હતું એને પણ સ્પર્ધામાં ટકી રહેવા કૈક કરવું પડે એમ હતું . ખેર લી ફરીથી ટાઈમલીમાં પરત ફર્યા હવે ટાઈમલીનું નામ માર્વેલ કોમિક્સ બની ગયેલું અને ૧૯૬૧મા જ લી નો સિતારો વધુ ચમકી ઉઠ્યો . એક તો બહુ નાની એવી ૧૮ વર્ષની ઉમરે લી માર્વેલના ચીફ એડિટર બની ગયેલા અને બીજું કે એજ સમયગાળામાં લી ના દિમાગમાંથી જન્મ લીધો ‘ ફેન્ટાસ્ટીક ફોર ‘ એ ..!!! અને બાકી ઈતિહાસ બની ગયો . જો કે આ હીટ સીરીઝ લખતા પહેલા ૧૯૫૦નાં વચગાળામાં લીએ અનેક ક્ષેત્રે હાથ અજમાવેલો જેમ કે એટલાસ કોમિકસ માટે વાર્તાઓ લખી કે જે મોટે ભાગે રોમાન્સ, વેસ્ટર્ન્સ, હ્યુમર, સાયન્સ ફિકસન, હોરર અને સસપેન્સ વાર્તાઓ હતી તો ૧૯૫૦માં ડાન ડી કાર્લો સાથે મળીને રેડિયો કોમેડી મેરી વિલ્સન પર આધારિત ન્યુઝપેપર સ્ટ્રીપ માય ફ્રેન્ડ ઇર્માનું સર્જન પણ કર્યુ હતું. જો કે લી ને આનાથી સંતોષ નહોતો અંતે ‘ ફેંટાસ્ટીક ફોર’ એ એમનું સપનું સાચું પાડ્યું …!!! મજાની વાત એ છે કે ફેંટાસ્ટીક ફોર ના સર્જન પહેલા લી એ કોમિક લખવાનું છોડી દેવાનું મન બનાવી લીધેલું પણ એમના પત્ની હમેશા ઈચ્છતા કે લી કશુક અદ્વિત્ય , અદ્ભુત અને અવિસ્મરણીય સર્જન કરે . અને આમેય લી ની બચપણથી એક ઈચ્છા તો હતી જ કે અમેરિકાની મહાન નવલકથા લખવી . ખેર નવલકથા તો ના લખાઈ પણ એવા જ મહાન કોમિક અને સુપરહીરોના પાત્રો જરૂર સર્જાયા ..!!

લી ના પાત્રો આટલા લોકપ્રિય કેમ થયા એનું રહસ્ય ખુદ લી એ જ એક મુલાકાતમાં ખોલેલું . લી નું માનવું હતું કે સુપરહીરો પણ આમ ઇન્સાન જેવા જ હોવા જોઈએ . લી એ કહેલું કે એ સુપરહીરો છે એનો અર્થ એવો નથી કે એની પોતાની કોઈ સમસ્યા જ નથી . લી ના પાત્રો આટલા લોકપ્રિય થયા એનું એક કારણ એ પણ હતું કે લી એ પોતાના પાત્રોને યા તો સારા બતાવ્યા યા તો ખરાબ , એના કોઈ પણ પાત્રો આ બે ની વચ્ચે ઝુલતા જોવા નહોતા મળ્યા . આનાથી થયું એવું કે લોકો આ સુપરહીરો લાગતા આમ ઇન્સાનો જેવા પાત્રો સાથે સહેલાઈથી કનેક્ટ થઇ શક્યા . લી એ શું કર્યું કે ચીલાચાલુ કોમિક્સમાં થોડી વિસંગતાઓ અને માનવીય ભાવનાઓ ઉમેરી જેથી આ દરેક પાત્રો સુપરહીરો હોવા છતાયે આમ ઇન્સાનો જ લાગ્યા . લી ના પાત્રો લગભગ એવા જ હતા જેવા કે આમ જીંદગીમાં હું ને તમે હોઈએ છીએ . એ ઈર્ષા પણ કરતા , એ લડાઈ પણ કરતા , એમની વચ્ચે ઝગડા પણ થતા , એ ભૂલો પણ કરતા અને એ પાછા એ ભૂલોને સુધારતા પણ , ભૂલોની માફી પણ માંગતા …મતલબ કે ઓલમોસ્ટ માણસો જેવા જ …!!! મહાનાયક હતા ખરા પણ એમની પણ એક મર્યાદા રહેતી , અખૂટ તાકત હોવા છતાં પણ એમની એક લીમીટ હતી , એમનામાં રીસ હતી , ખીઝ હતી , અભિમાન હતું , અહંકાર હતો જેમકે ધ ફેન્ટાસ્ટિક ફોર એકબીજા સાથે જ લડતા તો સ્પાઇડરમેન ની પોતાની નોકરી , ઘર અને પ્રેમિકાની સમસ્યા હતી તો એલિયન ધ સિલ્વર સર્ફર પણ અલગ હતો. અને હલ્ક તો પોતાની જાતને જ નુક્સાન પહોંચાડતો હતો તો સામે છેડે ડેરડેવિલ બ્લાઇન્ડ અને આયર્નમેન નબળા હ્રદયવાળો ….!!! એક આડવાત હલ્કનો કલર લીલો એટલા માટે રાખવામાં આવેલો કે કોમિક્સ પ્રિન્ટીંગ માટે આ આસાન રંગ હતો ..!! બીજી એક આડવાત કે સ્પાઈડર-મેનનાં નામમાં વચ્ચે હાઈફન (-) એટલા માટે રાખેલી કે કોઈ એને સુપરમેન ના સમજી લે …!!!

ખેર હવે વાત લી કેમ માર્વેલના દરેક ફિલ્મમાં કેમિયો કરતા અથવા તો એમના પાત્રો વાપરેલા હોય એ દરેક ફિલ્મમાં અચૂક દેખાતા ? એમસીયું ( માર્વેલ સિનેમેટિક યુનિવર્સ ) – એવું મનાય છે કે માર્વેલના કોઈ પણ પાત્રો જ્યાં વપરાય ત્યાં લી દેખાશે એવો એક કરાર થયેલો , આ કરારથી લી એવું સાબિત કરવા માંગતા હતા કે માર્વેલના બધા જ પાત્રો આખરે એક ફેમીલી છે કે પછી માર્વેલની દુનિયાના મેમ્બર્સ છે . એટલે તો શરૂઆતમાં લખ્યું એ સિવાય યાદ કરો થોર ફિલ્મનો એ બુઢ્ઢો જે હથોડો ખેચવા પોતાની કાર પાછળ એને બાંધે છે કે પછી પહેલી ‘ એક્સમેન ‘ માં જ્યારે સેનેટર કેલી સમુદ્રમાંથી નગ બહાર આવે છે ત્યારે એક હોટડોગ વેચતો માણસ એને નવાઈથી જુવે છે કે પછી સ્પાઈડરમેન માં વિસ્ફોટ વખતે એક છોકરીને બચાવતો બુઢ્ઢો હોય કે ‘ ડેરડેવિલ ‘ માં આંધળા બાળકને કર સાથે ભટકાતા બચાવતો આદમી હોય કે પછી ‘ હલ્ક ‘ માં એક પહેલવાન સિક્યોરીટીવાળાને સુરક્ષાનું લેકચર આપતો આમ ઇન્સાન હોય …!!! હવે સ્ટેન લી એના સુપરહીટ અને સુપરપાવર વાળા પાત્રોની સાથે સાથે આમ જ આપણી યાદોમાં રહેવાનો ….!!!!

– અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૧૮ નવેમ્બર ૧૮ )

દિવાલી કે સાથ ભી , દિવાલી કે બાદ ભી !!!!

Featured

દિવાલી કે સાથ ભી , દિવાલી કે બાદ ભી !!!!

‘ કા ભાઈ શું ક્યે દિવાળી ? ‘ ,,,’ કઈ નહિ , દિવાળી શું ક્યે ? એ જ હર વર્ષની જેમ દિવાળી આવે ને જાય …આ આવી દિવાળી ..ને જતી રહેશે તો ખબર પણ નહિ પડે ..’…’ હા ઈ તો છે ‘…” તો શું ? એમાયે આ વખતે તો નામદાર સુપ્રીમ કોર્ટે ફટાકડા’ય માપે માપે ફોડવાનો હુકમ કરી દીધો છે …ફટાકડાનું સમયબાંધણું યુ કનો !! …એટલે સાલું ક્યાંક એવું ના થાય કે દિવાળીની રાતના દસ પછી પૂછવું પડે કે ખરેખર આજે દિવાળી છે કે શું ? ‘ ..’ હા એ વાત પણ નોટ કરવા જેવી છે ..નામદાર કોર્ટનો અનાદર તો થાય નહિ પણ એ નથી સમજાતું કે નામદાર કોર્ટ હવે આવા હુકમો પણ કરશે કે શું ? સી , માન્યું કે અંધાધુંધ આતશબાજીને લીધે અવાજ અને હવાનું પ્રદુષણ દિવાળીના તહેવારો દરમ્યાન વધી જાય જ છે અને નાના બાળકો અને વૃધ્ધોને શ્વાસ લેવામાં તકલીફો પણ થાય છે , પણ શું છે કે તહેવારોનો સાચો આનંદ જ ઉત્સાહ , ઉજવણી કે સેલિબ્રેશન છે , બીકોઝ આખરે તહેવારો આવે જ છે આપણને રૂટીન લાઈફમાંથી થોડી આનંદ , ઉલ્લાસની ક્ષણો આપવા માટે . હવે જો એમાયે નિયંત્રણ મુકવું પડે તો કાઠું તો પડવાનું …પણ જોઈએ ૧૦ પછી આકાશમાં છુમ્મ્મ કે ધડામ સંભળાય છે કે નહિ ? કે પછી ૯:૫૯ એ સળગાવેલો ફટાકડો ૧૦:૦૨ એ ફૂટે તો બચાવમાં કોઈ વકીલ રાખવો પડશે કે શું ?!!!!

આ વકીલ પરથી યાદ આવ્યું કે નર્મદાના નીર વચ્ચે એક વકીલે વિશ્વની સૌથી ઉંચી પ્રતિમા તરીકે સ્થાન મેળવ્યું એનાથી સમગ્ર વિશ્વમાં ગુજરાત અને સરદારનું નામ આભ ઉંચેરુ થઇ તો ગયું જ છે એમાં કોઈ બેમત નથી નથી ને નથી જ . ‘ પણ આવા અધધધ ખર્ચે પ્રતિમા ? ‘ ..’ જો બકા એમાં એવું છે ને કે જગત આખામાં પ્રતિમાઓ મુકાય જ છે અને લોકો હોંશે હોંશે એને નિહાળવા જાય પણ છે જ , કોઈ દેશના વિકાસ કે પ્રગતિમાં પોતાનો ફાળો આપનારનું આવી રીતે સન્માન કરવાનો શિરસ્તો જગત આખામાં છે જ , આ તો શું છે આપણે આવા ટાણે’ય પાલીટીક્સ રમવામાંથી નવરા નથી થતા ….અમેરિકામાં કે ચીનમાં મુકાય તો એ અજાયબી થઇ જાય અને આપણે અહી મુકાય તો ખોટો ખર્ચ ? ‘…’ હે હે હે હે , પોલીટીક્સને નર્મદામાં પધરાવીને એક વાતનો ગર્વ તો લેવો જ પડે કે અખંડ ભારતના નિર્માણમાં અડગ અને અડીખમ રહીને યોગદાન આપનાર અસરદાર સરદારને આ શ્રેષ્ઠ અંજલિ કહેવાય …અને એમાયે આવું સન્માન એમના પોતીકા રાજ્યમાં મળે તેનો એક ગુજરાતી તરીકે પણ ગર્વ કહેવાય જ ..!! રજાઓમાં પ્રવાસઉત્સુક ગુજરાતીઓ માટે આ દિવાળીએ ફરવાલાયક અને જોવાલાયક એક સ્થળનો વધારો થયો એ નફ્ફામાં …!!! એટલે આ દિવાળીએ ફેસબુક ને ઇન્સટામાં હેસટેગ જોવા મળવાના ..’ પુછ્ડા ઢીકણા ઈઝ વિથ સો એન્ડ સો એન્ડ ફીફટીન અધર એટ #સ્ટેચ્યુઓફ યુનિટી ..!!! આ દિવાળીએ અને દિવાલી કે બાદ ભી સેલ્ફી વિથ સરદાર ની ધૂમ રહેવાની ..!! જય સરદાર ..!!

‘ એમ તો હવે ભારત સિવાયના બીજા દેશના ભડવીર ક્રિકેટરો વિરાટને સ્ટેચ્યુ કહેવા ઈચ્છતા હઈશે..!!! નસીબ ફિલ્મનો બચ્ચનનો ડાયલોગ છે ને એમ એકબીજાને જોઇને વિન્ડીઝવાળા કહેતા હઈશે કે ‘ તેરે કો ક્યા મારા હૈ …ક્યા મારા હૈ દેખ ‘ સાલું સદી ઉપર સદી ને એની ઉપર ઓર એક સદી ..કસમથી બોસ્સ આ માણસ પાંચ જ વર્ષ આવું ને આવું રમશે ને તો એકેય રેકોર્ડ બચ નહિ પાયેગા …!! રમશે તો શું ? રમવાનો જ છે ..!! અને જે સ્પીડે રમે છે એ જોતા તો ટોપ નું સ્થાન ઇન્ડિયા પાસે જ રહેશે એ નક્કી છે . સોશિયલ મીડિયામાં તો વિરાટની સતત ત્રણ સેન્ચ્યુરી પછી કોઈકે કોમેન્ટ પણ કરેલી કે ‘ આવું ના ચાલે યાર , વિરાટે તો ક્રિકેટની ગેમને વન મેં શો બનાવી દીધી છે ..!!! “ જો કે વાતમાં દમ-આલું છે જ અને એમાં અધૂરામાં પુરા વિન્ડીઝવાળા અડફેટે ચડી ગયા એટલે શું છે કે ભાઈઓએ ઇંગ્લેન્ડની હારનો કચકચાવીને બદલો બચાડા બલ્બ વગરના હોલ્ડર એન્ડ સાથીઓ સાથે લઇ લીધો ..!!!. જોકે અંદરોઅંદર ડખ્ખાથી પાયમાલ થયેલી વિન્ડીઝની આ ટીમ વોલ્શ, રીચાર્દ્ઝ કે લોઈડ ના જેવી તો નહોતી જ છતાં પણ બીડું આફ્ટરઓલ આંકડે બોલતે હૈ ..એટલે એ ન્યાયે ફૂલ ક્રેડીટ ગોઝ ટુ વિરાટ એન્ડ કંપની…તાલિયા …!!! જો કે સાચો પડકાર તો ઓસ્ટ્રેલીયામાં છે , ઉછાળવાળી પીચો પર ઇંગ્લેન્ડ જેવું નહિ થાય એવું માનવા માટે એક કારણ એ પણ છે કે ટીમ ઓસીઝ પણ અત્યારે સ્ટીવ વો કે બોર્ડરના જેવી રહી નથી તો બી એની પીચો પર વિરાટ એન્ડ કંપનીને વિરાટ પડકાર તો મળવાનો જ …..અને કઈ નહિ મળે તો સ્લેજિંગ તો મળવાનું જ !!! એટલે આ દિવાલીકે બાદ તૈયાર રહેના મંકી ડાંસ માટે …!!!!

‘ અલા , આ સ્લેજિંગ એટલે ગાળા-ગાળી જ ને ? ‘..” હાસ્તો એવું જ કઈક કહેવાય અલ્યા ‘..” તો પછી આ #મીટુ પણ સ્લેજિંગ જ થયું કે નહિ ?!! “..’ લોલ્ઝ , અલ્યા ભારે કરી તે હોં , પણ શું છે કે મીટુ એ સભ્ય ભાષામાં સ્લેજિંગ કેવાય , અને બાય ગોડ એક પછી એક જે કચ્ચા ચિઠ્ઠા ખુલે છે ને તો સાલું એમ થાય કે એની જાય્તને આ ભાયએ કહા કહા ગુલ ખિલાયે હૈ ?..!! ‘ ‘ તો શું , આ એમ.જે અકબર ને આલોકનાથ ના તો લાઈનબંધ સ્લેજિંગ બહાર આવવા માંડ્યા છે , અને આ બંનેને સાજીદ બરાબર સ્પર્ધા પૂરી પાડી રહ્યો છે એટલે ઇસ દિવાલીકે બાદ ભી #મીટુ ધૂમ- ધડામ સે ફૂટતે રહેંગે …!!! રાજકીય ધૂમ-ધડામ તો દિવાળી જતા જ ચાલુ થઇ જાવાની કેમકે રાજસ્થાન , મધ્યપ્રદેશ , છતીસગઢ , તેલંગાના અને મિઝોરમમાં વિધાનસભા ઈલેક્શનના ઢોલ ઢબુકવાના . ભાજપ માટે રાજસ્થાન , એમપી અને છતીસગઢ ના પરિણામો આગામી લોકસભા ઈલેક્શન માટે ટ્રેલર પુરવાર થવાના ..!! ‘ ટીવી ના ઓપીનીયન પોલ્સમાં રાજસ્થાન બીજેપીના હાથમાંથી જતું અને બાકી બે માં કસોકસની ફાઈટ છે એમ બતાવતા હતા “..” હા વર્તારો તો એવો જ છે કે રાજસ્થાનમાં વસુંધરા સરકાર રીપીટ નહિ થાય અને એમપી અને છતીસગઢમાં લગભગ લગભગ છે “…’ હાઈલા , આવું થાય તો તો મોદી સાહેબને ૨૦૧૯મા ૩૦૦ ભેગા કરતા દમ નીકળી ના જાય ?”… “ આમાં શું છે ભૂરા કે વિધાનસભા અને લોકસભા બંને ઈલેકશન અને એની લડાવાની પેટર્ન અલગ અલગ હોય છે છતાં પણ અસર તો થાય જ અને આમ જો આ મમતા , માયા, ચંદ્રબાબુ ને બાકીના જે રીતે ભાયબંધીના ધમપછાડા કરે છે એ જો હાચા પડે તો મોદી સાય્બને વધુ તકલીફ પડે ૧૯ માં ઈ નક્કી , તકલીફ બોલે તો અત્યારે છે એનાથી ૩૦-૪૦ સીટો ઓછી આવે બીજું કાઈ નહિ !! ઉસકા રીઝન નમ્બર વન કી રાહુલ અને કોંગ્રેસે હજુ યુપીએ વખતની ખોવાયેલી પ્રતિષ્ઠા પાછી મેળવવાની છે , રાહુલ સોફ્ટ હિન્દુત્વ તરફ સરક્યા તો છે જ પણ હજુ પબ્લિક કો જ્યાદા ભરોસા લગતા નહિ હૈ કેમકે જ્યાં પણ કોંગ્રેસ જીતી છે ત્યાં પોતાના જોરે નહિ પણ યા તો બીજેપી ના આંતરકલહ કે પછી લોકોના સ્થાનિક સરકાર સામેના અણગમાને લીધે જીતી છે …રીઝન નમ્બર ટુ – મમતા થી લઈને શરદ અને અખિલેશ થી લઈને માયા સુધી બધા રાહુલના નેતૃત્વ નીચે એક થવા બાબતે હન્ડ્રેડ પર્સન્ટ સ્યોર નથી જ બીકોઝ બધાને નેતા થવું છે , સપોર્ટર નહિ !!! એટલે આ લીડર બનવાની મહત્વાકાંક્ષા આ શંભુમેળાને એક થવા નથી દેતી એ હકીકત છે … એટલે આ દિવાળી પછીથી આ રાજકીય આતશબાજી વધુ જોર પકડવાની એ નક્કી છે …ને આમને તો કોઈ સમયમર્યાદા’ય નડે નહિ બોલો….!!!!!” આપણે તો શું છે કે સાક્ષીભાવે આ આતશબાજીઓ જોયા કરવાની અને એકબીજાને વોટ્સઅપ ફોરવરડીયા ની જેમ નહિ પણ રીયલમાં – રૂબરૂમાં – ભેટીને કહેતું રહેવાનું “ હેપ્પી દિવાલી અને નુતન વર્ષાભિનંદન “…!!!!

  • અજય ઉપાધ્યાય ( ગાંધીનગર સમાચાર કોલમ ” રઝળપાટ ” ૪ નવેમ્બર ૨૦૧૮ )

ઓ વુમનીયા …આહા વુમનીયા …!!!!

Featured

ઓ વુમનીયા …આહા વુમનીયા …!!!!

કેમ બાકી હજુ તો #મીટુ શરુ જ થયું છે ત્યાં તો ભાઈલોગ કી બોલતી બંધ થઇ ગઈ ને હૈન્ન્નન્ન ……!!! ‘ સ્ત્રી તો અબળા છે …સ્ત્રી તો લાચાર છે …સ્ત્રી તો બિચારી છે ‘ આવું આવું કહેનારા ખુદ જ અન્ડરગ્રાઉન્ડ થવા લાગ્યા ને …!!! અસલમાં સ્ત્રી થી શશક્ત અને માનસિક મજબુત જગતમાં કોઈ છે જ નહિ ….એન્ડ ધીસ ઈઝ ફેક્ટ…!!! પણ સમજે કોણ ? આપણે તો શું છે કે સદીઓથી ચલી આતી સ્ત્રીઓને પગલુછ્નીયું કે ઘરની શોભા કે એનાથી પણ આગળ વધીને માલિકીભાવ જતાવવાની ચીજ સિવાય વધુ ક્યા ક્યારેય સમજી જ છે ? અને આમેય સ્ત્રી ને કોણ સમજી શક્યું છે ભાઈસા’બ ……??? આ માનસિકતા ને માનસિકતામાં આપણે એ ભૂલી ગયા કે જમાના બદલ ગયા હૈ ઓંર મહિલાઓ પણ બદલેલા જમાના સાથે બહુ ઝડપથી ટ્યુનીંગ કરતી થઇ ગઈ છે . યસ્સ્સ્સ માન્યું કે હજુ પણ ઘણા પ્રદેશો , વિસ્તારો કે ક્ષેત્રોમાં મહિલાઓનું સ્થાન નીચું છે , હીન છે કે પુરુષ સમકક્ષ નથી , સો વ્હોટ …? એ સમય દુર નથી કે મહિલાઓ પણ પુરુષ સમોવડી કે ઇવન કોઈ કોઈકોઈ ક્ષેત્રોમાં તો પુરુષોથી પણ આગળ નીકળી જવાની કે નીકળી ગઈ જ છે …!!

પણ સાલ્લુ કેબીસી માં ૭ કરોડની ઇનામી રકમ માટે પુછાય એવો એક પ્રશ્ન છે કે જેનો કોઈ જવાબ હજુ મળતો નથી ….ઓઉર યે રહા વોહ સવાલ આપકી કોમ્પ્યુટર સ્ક્રીન પર : “ સ્ત્રી ને સમજવી કઈ રીતે ? “ ઓર “ શું સ્ત્રીને સમજી શકાય ?” ..ધડલ્લે થી ૧૦૦% ના એવો જવાબ આપો કે યોગ્ય જવાબ શોધવા બેસો એ પહેલા એક પ્રચલિત ક્વોટ ઠબકારી દઉં કે ‘ સ્ત્રીને સમજવી થોડી (?) કઠીન છે , એના મનને વાંચવું પીએચડી કરવા કરતા પણ ટફ છે ….’ ઈટીસી ઈટીસી …!! ખેર ભલભલા કોયડા ઉકેલી નાખનારાઓ માટે પણ આ સવાલનો જવાબ શોધો અઘરો તો પડે જ છે .” મારે આજે આઈસ્ક્રીમ ખાવો હતો , તે મારા માટે કોફી કેમ મંગાવી ..?”….તને તો બધું કહેવું પડે , સમજાય જ નહિ ને કોઈ દહાડો “ આવા ડાયલોગનો સામનો કરી ચુકેલા દરેક ટકો ખંજવાળતા હશે કે સાલ્લુ ખબર કેમ પાડવી કે આજે કોફો નહિ પણ આઈસ્ક્રીમ ખાવો હતો આને ?..!!! છે ને અઘરું …!!! પણ સોચને વાલી બાત યે હૈ કી જો તમારી જરૂરીયાતો , તમારા પ્રોબ્લેમ્સ અને તમારી અંદર શું ચાલે છે એને સ્ત્રી આસાનીથી વાંચી સકતી હોય તો પુરુષ કેમ નહિ ? પોઈન્ટ ટુ બી નોટેડ ..!!

ઓકે , વાતને વધારે હળવી બાજુ લઇ જતા પહેલા થોડા સીરીયસ પોઈન્ટ નોટ કરી લઈએ …!! ઈનફેક્ટ આ પોઈન્ટ્સમાં કોઈ અસહમત થઇ શકે છે પણ આ જનરલ ઓબ્ઝર્વેશન છે – ઓવરઓલ ..!! વૈજ્ઞાનિક રીતે એમ સાબિત થયું છે કે સ્ત્રી અને પુરુષની દિમાગી રચના અલગ અલગ છે , એટલે ઓબવિયસલી બંનેની વિચારવાની , રીએક્ટ કરવાની અને કોઈ બાબતમાં સોલ્યુશન કે દલીલોની રીત પણ જુદી જુદી જ હોવાની . સ્ત્રીમાં હાજર બે એક્સ ક્રોસ્મોસ અને પુરુષોમાં હાજર એક એક્સ અને એક વાય ક્રોસ્મોસના અભ્યાસ પરથી તારણ નીકળ્યું છે કે આ એક એક્સ્ટ્રા ક્રોસ્મોસ સ્ત્રીને વધુ જટિલ બનાવે છે ….!!! હાચું ખોટું ઈવડા ઈ વિગ્નાનીકોને ખબર હોં …!!! પણ આ જટિલ વાળી વાત સાથે ઘણા સમત થવાના ..!! અને આ જટિલતાનો પહેલો પરચો એ છે કે લગભગ દરેક સ્ત્રી એવું ઈચ્છે છે કે એનો પાર્ટનર એની માંગણી કે ઈચ્છા વિષે વગર બતાવ્યે જાણી જવો જોઈએ ..!!! યાની કી આગળ જે કોફો વાળું લખ્યું એનો તાળો અહી મળી જાય છે …!!! ‘દાખલો પૂરો …!!

મોટાભાગના પુરુષો સ્ત્રીની પ્રશંશા કરવામાં કાચા પડતા હોય છે . લગ્ન પહેલા કે લવીડવી કપલકાળમાં હોવ ત્યારની વાત તો થાય જ નહિ પણ મોસ્ટલી લગ્ન પછી ઘરવાળીની પ્રશંશામાં બે મીઠા બોલ કાઢતા જોર પડતું હોય ઈવડા ઈ સ્ત્રીને સમજવાની વાતું કરે ત્યારે સાલું લાગી આવે ..!!! યસ માણસ માત્ર પ્રશંશાને પાત્ર જ્યારે અહિયાં તો તમારા બે મીઠા બોલ કા હી સવાલ હૈ બાબા ..!! ‘ સરસ લાગે છે આ સાડી / ડ્રેસ ‘ થી લઈને ‘ આજે ભરેલા રીંગણ મસ્ત બનાવેલા ‘ જેવા દિલથી નીકળેલા બે બોલ ના બદલામાં તમારે સ્ત્રીને સમજવાની કસ્ટી નહિ લેવી પડે …આઈ સપથ ..!!! અને જો આવું ના કરો અને એનો મુડ છટક્યો તો ? શાસ્ત્રોમાં આઈ મીન આધુનિક શાસ્ત્રોમાં એનો પણ ઉકેલ લાવવાની કોશિશ થઇ જ છે . સોશિયલ મીડિયા પર થયેલા એક ક્મ્પેઈન મુજબ જો સ્ત્રીનો મુડ બગડ્યો હોય તો બે વાત એવી છે કે જેનાથી એ અસલ મુડમાં આવી શકે છે અને એમાંની એક છે વાતચીત ..!! જી હા સ્ત્રીની મહત્વાકાંક્ષા ( ઘરની ઓર નોકરી બાબતની ) એના પર ચર્ચા કરો કે પછી એ બંને બાબતોમાં એને આગળ વધવા માટે પ્રોત્સાહન પૂરું પાડવાની કોશિશ કરો તો હજુ પણ એ તમને પ્રશંશાના બે બોલ ના બોલવા બદલના ગુનામાંથી માફ કરી શકે છે ..!!!

‘ પ્યાર મેં ક્યા ચાહતી હૈ સ્ત્રી ? ‘…’ અપને પાર્ટનર સે કૈસે બનાયે મધુર રિશ્તે ?’ આ અને આવી અનેકો ઇન્ટરનેટ ફીલ્સુફીઓને નજરઅંદાઝ કરીને એટલું ધ્યાન રાખો કે સ્ત્રીને જાગીર કે મિલકત નહિ પણ ઇન્સાન સમજો તો’ય સ્ત્રી ફટાફટ સમજાવા માંડે ..!!! થોડા વધુ પોઈન્ટ્સ ફટાફટ લઇ લઈએ ..: સ્ત્રીને બીજી સતીની પ્રશંશા માફક નથી આવતી . હવે આમાં આપણે બીજું કાઈ નહિ પણ એટલું જ ધ્યાન રાખવાનું છે કે એક સ્ત્રીની હાજરીમાં બીજી સ્ત્રીના વખાણ ના થઇ જાય …!!! અઘરું તો છે પણ ઈમ્પોર્ટન્ટ પણ છે – કરો આઈ.એમ.પી…!!! સ્ત્રી એટલું તો ઈચ્છતી જ હોય કે આવા વખતે પણ પોતાના પાર્ટનરનું સેન્ટર ઓફ એટ્રેકશન તો એ જ હોવી જોઈએ ..!! બીજો એક ફૂદડી કરવા જેવો પોઈન્ટ એ છે કે સ્ત્રી હમેશા સંકેતો અને અવલોકનોના આધારે તમારો રીપોર્ટ કાર્ડ કાઢતી હોય છે , સ્ત્રીઓ ખાલી જગ્યા વધુ આસાનીથી વાંચી અને સમજી શક્તિ હોય છે અને આ એને મળેલી કુદરતી દેન છે . પેલું કહે છે ને ‘ છઠ્ઠી ઇન્દ્રિય ‘ બસ એવું જ કૈક ..!! હકીકતે સ્ત્રી સપનાઓ સાથે જીવવા ટેવાયેલી હોય છે એટલે જયારે એની લાગણી દુભાય ત્યારે એ ક્યારેક નિઃશબ્દ બની જાય છે , એ ખામોશીને સમજવી પડે અને એટલા માટે યાદ રહે કે ચાહે સ્પર્શથી કે પછી વાતચીતથી કે પછી બિહેવિયરથી હમેશા એ બતાવવાની કોશિશ કરો કે એણે વાંચેલી ખાલી જગ્યામાં છે ‘ યુ લવ હર ‘ ..’ યુ નીડ હર ‘…’ યુ વોન્ટ હર ‘..!!

ઘણાને લાગશે કે આખોયે લેખ વન સાઈડેડ છે તો ભાઈઓ અને માત્ર ભાઈઓ આ તમારા માટે જ લખાય છે !! બીકોઝ સ્ત્રી અને પુરુષ સંસારરથના બે પૈડા છે એટલે જરૂરી છે કે બંને પૈડા સરખા ચાલે , આમાં પુરુષનું પૈડું સરખું ચાલશે જ એવું માનીને સ્ત્રીના પૈડાને વધુ સારી રીતે ચલાવવાની વાત છે – પ્રવચન પૂરું ..!! અસલ વાત એ છે કે સ્ત્રી સમસ્યાને અવગણી શકતી નથી અને બટ ઓબવિયસલી એ આવા સમયે કોઈનો સાથ ઝંખે છે , એટલા માટે નહિ કે એ સોલ્વ નહિ કરી શકે પણ આવા સમયે મળતો ટેકો એને ભાવનાત્મક રીતે વધુ મજબુત બનાવે છે આવનારી આવી બીજી કોઈ ટફ કન્ડીશનને હાલ કરવામાં ..!! એટલે આવા સમયે સાથે ના રહો તો સમજવાની કોશિશ કરવી જ બેકાર ને …? સ્ત્રી હમેશા પેલું મારાથી બેસ્ટ છે એવું વિચારવાને બદલે એને જે મળ્યું હોય એને બેસ્ટ બનાવવામાં માહિર હોય છે , ચાહે એ સંતાન હોય , પતિ હોય કે કુટુંબ હોય …સો એના એ બેટર લીવીંગ ના પ્રયત્નોમાં સાથ આપવો એ પણ એક પ્રકારે એને સમજવાના સવાલનો જવાબ જ છે …!!! ખેર સમજવાની કોશીશ કરવા કરતા એને પ્રેમ કરો , એપ્રીસીયેટ કરો … એની લાગણીઓને સમજો – તરછોડો નહિ …. એના પ્રયત્નોને વધાવો ….એને સમજો નહિ તો કાઈ નહિ પણ એટલીસ્ટ સાંભળો …એને આગળ વધવામાં મદદ કરો …અને ખાસ તો કોઈ પણ કન્ડીશનમાં એની સાથે જ રહો ….આટલું કરો તો’ય ગંગ નહાયા ….!!!!

ઠંડક :

આ પુરુષો પણ ખરા છે! લગ્ન પહેલા તેઓ પ્રેમ કરવાના સોંગદ ખાશે અને લગ્ન બાદ સોંગદ ખાવા જેટલો પણ પ્રેમ કરશે નહીં. (શિડની શેલ્ડન)

  • અજય ઉપાધ્યાય ( ‘ નમસ્કાર ગુજરાત – ઓસ્ટ્રેલીયા ” – કોલમ ” પરબ ” નવેમ્બર ૨૦૧૮ )

સરદાર : સિધ્ધાંતવાદી , નીડર અને લીડર વિદ્યાર્થી !!!!

Featured

સરદાર : સિધ્ધાંતવાદી , નીડર અને લીડર વિદ્યાર્થી !!!!

 શાળામાં વર્ગનો સમય થઇ ગયેલો , વર્ગમાં વિદ્યાર્થીઓ શિક્ષકની રાહ જોઈ રહ્યા હતા પણ શિક્ષકો ઓફિસમાં વાતોએ ચડી ગયેલા . સાહેબની રાહ જોઇને કંટાળેલા વિદ્યાર્થીઓમાંથી એકે તો કંટાળો દુર કરવા લલકાર્યું ગાયન ,,!! વિદ્યાર્થીઓને મજા પડી , એમેણે તો ગાયન ઉપાડી લીધું અને વર્ગમાં શરુ થયું સમુહગાન ..!!!  સમુહગાનનો અવાજ પહોચ્યો છેક શિક્ષકોની ઓફીસ સુધી અને ત્યાંથી ધુઆફુઆ થતા શિક્ષક આવ્યા વર્ગમાં અને માંડ્યા ગાયનના શોખ રાખનાર એ વિદ્યાર્થીને ધમકાવવા ..!! ક્રોધથી લાલચોળ શિક્ષકની સામે બોલે પણ કોણ ? પણ એક વિદ્યાર્થીથી રહેવાયું નહિ , ‘ સાહેબ , તમે ઓફિસમાં ટોળટપ્પા કરો અને વર્ગમાં સમયસર આવીને ભણાવો નહિ તો અમે ગાવાને બદલે શું રડીએ ? વાંક તમારો જ છે અને અમને શેના દંડ આપો છો ? “ ખલ્લાસ , સાહેબનો પિત્તો ગયો અને પોતાને અરીસો દેખાડનાર વિદ્યાર્થીને કર્યો વર્ગ બહાર જવાનો હુકમ . પેલો વિદ્યાર્થી તો ચુપચાપ પોતાના પુસ્તકો લઈને વર્ગના પોતાના સહાધ્યાયી તરફ એક નજર નાખીને ચાલી તો નીકળ્યો પણ એની નજરમાં કોણ જાણે શું હતું કે એના ગયા પછી એક પછી એક બધા વિદ્યાર્થીઓ વર્ગની બહાર અને વર્ગમાં રહ્યા સાહેબ એકલા..!! આખો દિવસ કોઈ વર્ગમાં ગયું જ નહિ . બીજે દિવસે પણ શાળા ખુલી તો ફરીથી આખો વર્ગ ખાલી અને વિદ્યાર્થીઓ બહાર જ ઉભા રહ્યા. શિક્ષકે મુંજાઈને આચાર્યને કરી ફરિયાદ અને સ્વાભાવિકપણે આચાર્યે આગેવાની લેનાર પેલા વિદ્યાર્થીને કર્યો શિક્ષકની માફી માંગવાનો હુકમ . ‘ સાહેબ , વાંક એમનો છે , વર્ગમાં આવવાને બદલે સાહેબ ગપ્પા મારતા બેસી રહ્યા . આ તો ચોર કોટવાળને દંડે એવો ન્યાય છે . માફી તો સાહેબ માંગે કેમકે દોષ એમનો છે , અમારો નહિ “ ૧૦-૧૨ વર્ષના આ વિદ્યાર્થીનો નિર્ભય અને કુશળ અને નીડર જવાબ સાંભળીને આચાર્ય સમજી ગયા , એમણે વિશેષ કોઈ દલીલો વગર બધાને વર્ગમાં દાખલ થવાનું કહ્યું અને બધા વિદ્યાર્થીઓ આગેવાની લેનાર પેલા વિદ્યાર્થીને શાબાશી આપતા આપતા ફતેહ હાસિલ કરી હોય એમ મલકાતા મલકાતા વર્ગમાં દાખલ થયા. પણ ત્યારે એ વિદ્યાર્થીઓને ખબર નહોતી કે અન્યાય સામે આગેવાની લઈને અવાજ ઉઠાવનાર એ વિદ્યાર્થી આગળ જતા મજબુત અંગ્રેજ સલ્તનતનો પાયો હચમચાવી નાખે એવી આઝાદીની લડતની આગેવાની લેવાનો છે . નડિયાદની એ શાળામાં નિર્ભય અને નીડર થવાની સાથેસાથે અન્યાય સામે આગેવાની લેનાર એ વિદ્યાર્થી એ બીજું કોઈ નહિ પણ સરદાર વલ્લભભાઈ પટેલ હતા …!!!

બાળપણથી જ વલ્લભભાઈનો અન્યાય સહન ન કરવાનો સ્વભાવ અને આ સ્વભાવ પાછળ જ્યાં એમનું બાળપણ વીત્યું એ કરમસદની હવા-પાણી પણ એટલા જ જવાબદાર કેમકે ચરોતરના આણંદ તાલુકાના કરમસદની બહુધા વસ્તી પાટીદારોની અને આ પાટીદારો સ્વતંત્ર સ્વભાવના , નિખાલસ અને તેજદાર ગણાતા એટલે વલ્લભભાઈમાં નિખાલસતા , નીડરતા તો નાનપણથી જ . કહેવાય છે કે બચપણમાં વલ્લભભાઈને બગલમાં ફોલ્લો થયેલો . એ વખતની સારવાર મુજબ વૈદે તો એ ફોલ્લાને લોખંડના ગરમા સળીયાથી ફોડી નાખવાનું ( નસ્તર મુકવાનું ) કહ્યું .પરિવારજનો તો આ સાંભળીને જ ડરી ગયા , ઇવન હજામ પણ નસ્તર મુકતા ડરી ગયેલો પણ વલ્લભભાઈએ જાતે જ સળીયાને ગરમ કરીને ફોલ્લો ફોડી નાખેલો ..!! કોને ખબર હતી કે સરદારસાહેબની આ જ નીડરતા આગળ જતા એમને રજવાડાઓના વિલીનીકરણ અને જુનાગઢ અને હૈદરાબાદ જેવા રાજ્યોને અખંડ ભારતમાં ભેળવતી વખતે કામમાં આવવાની હતી ..!! ખેર , સ્વામીનારાયણના પરમ ભક્ત અને સ્વભાવે નીડર , બુદ્ધિશાળી અને સ્વાતંત્ર્યપ્રેમી એવા ઝવેરભાઈ જેવા પિતાના ઘરે ૧૮૭૫ની ૩૧મી ઓક્ટોબરે જન્મેલા વલ્લભભાઈને અભ્યાસ પ્રત્યે પહેલેથી જ પ્રેમ હતો. જો કે સરદારની સાચી જન્મતારીખ વિષે કોઈ નક્કર માહિતી ઉપલબ્ધ નથી પણ મેટ્રીકની પરીક્ષામાં એમણે ૩૧ ઓક્ટોબર લખાવેલી. ૭-૮ વર્ષની ઉમરે વલ્લભભાઈને ભણવા બેસાડેલા .કરમસદમાં તો ગુજરાતી શાળા જ હતી એટલે ગામઠી શાળામાં ગુજરાતી અભ્યાસ પૂરો કરીને અંગ્રેજી અભ્યાસ માટે વલ્લભભાઈએ વાટ પકડી કરમસદથી લગભગ અગિયારેક કિલોમીટર દુર આવેલા પેટલાદની . પિતાની પરીશ્થીતી ખાસ કઈ હતી નહિ એટલે સરદાર શિક્ષણ મેળવવા માટે પેટલાદ સુધી ચાલીને જ આવજા કરતા . પેટલાદમાં તો અંગ્રેજી ચાર ધોરણ સુધી જ ભણવાની વ્યવસ્થા હતી અને સરદારને તો ભણીગણીને વકીલાત કરીને વિદેશ જઈને બેરીસ્ટર થવું હતું . એક આડવાત જ્યારે વલ્લભભાઈ પાછળથી બૅરિસ્ટર થવા ઈંગ્લૅન્ડ ગયા ત્યારે પણ વકીલાતની બહુ બધી ચોપડીઓ ખરીદવાના પૈસા હતા નહિ એટલે લાઈબ્રેરીમાં જઈને વાંચી આવે. લાયબ્રેરી પણ પેટલાદની સ્કુલની જેમ અગિયાર-બાર માઈલ દૂર હતી. એટલે રોજ સવારે ચાલીને નવ વાગે ત્યાં પહોંચતા અને છેક છ વાગે લાઈબ્રેરી બંધ થાય, ત્યારે સરદાર ત્યાંથી ઊઠતા અને સાંજે પાછા ચાલતા જ ઘેર જતા. આમ રોજનું બાવીસ-ચોવીસ માઈલ ચાલવાનું થતું. આવી કઠણ જિંદગીમાં એમનું કાઠું ઘડાયું અને એક ખડતલ-ધીંગું વ્યક્તિત્વ પાંગર્યું. અને આટલી મુશ્કેલીઓ વચ્ચે પણ સરદારે ઇંગ્લેન્ડમાં પોતાનો વકીલાતનો કોર્સ કે જે 36 મહિના નો હતો તેને 30 મહિના માં પૂર્ણ કર્યો હતો. જો કે પેટલાદના શાળાજીવન દરમ્યાન એમને ખ્યાલ આવી ગયો કે બેરિસ્ટર બનવા માટે અંગ્રેજીમાં શિક્ષણ મેળવવું જરૂરી હતું અને વલ્લભભાઈનો ફેવરીટ સબજેક્ટ પણ હતો અંગ્રેજી અને આમેય વલ્લભભાઈ નીચલા ધોરણમાં બીજા કરતા અંગ્રેજીમાં હતા પણ અવ્વલ એટલે વલ્લભભાઈએ વધુ અભ્યાસ માટે નડીયાદ જવાનું નક્કી કર્યું અને એનું કારણ એ હતું કે એક તો ખેડા જીલ્લાના વડામથક હોવાને લીધે નડિયાદમાં સરકારી અંગ્રેજી સ્કુલ હતી અને બીજું એથી પણ વધુ અગત્યનું કારણ કે નડીયાદ વલ્લભભાઈનું જન્મસ્થળ અને મોસાળ પણ હતું . શરૂઆતમાં લખ્યો એ વલ્લભભાઈમાં લીડરશીપનો પાયો નાખતો પ્રસંગ આ જ નડિયાદના શાળાજીવનનો એક કિસ્સો છે ..!!

નડીયાદ એ વખતે ગુજરાતની સાક્ષરભૂમિ તરીકે વિખ્યાત હતું . ગોવર્ધનરામ ત્રિપાઠી , મણીભાઈ દ્વિવેદી . કવિ બાલાશંકર અને રાજનીતિજ્ઞ હરિદાસ જેવા મહાનુભાવોથી શોભતી નડીયાદ નગરીમાં આવતા જ વલ્લભભાઈનું વ્યક્તિત્વ ખીલ્યું . નડીયાદ હાઈસ્કુલના એ દિવસોમાં સ્વતંત્ર સ્વભાવ , મનમોજીપણું , ઓછું પણ અર્થસભર બોલવું , નિખાલસ રહેવું , અન્યાયનો મુકાબલો કરવો અને હાથમાં લીધેલું કામ કોઈ પણ ભોગે પૂરું કરવા જેવા વલ્લભભાઈના છુપા ગુણો બહાર આવ્યા અને એનું પ્રથમ દર્શન એમની સાથે રમતા – ભણતા સાથીઓને થયો . આંગળ લખ્યા એ બનાવની જેમ લીડરશીપનો ગુણ વિકસ્યો . લોકોને તેમના પ્રશ્નો હલ કરવામાં તેઓ મદદરૂપ થતાં. એમ પણ તેઓ ભણવાની સાથેસાથે જાહેરપ્રવૃત્તિમાં અને જાહેરસભાઓમાં પણ ભાગ લેતા , જેમકે નડિયાદની મ્યુનીસીપલ ચૂંટણીમાં યોગ્ય ઉમેદવારનો પ્રચાર કરતા અને મતદારોને માર્ગદર્શન પણ આપતા . કરમસદથી પેટલાદ અને ખાસ તો નડીયાદ આવ્યા પછી સરદારમાં નેતૃત્વ , નિર્ભયતા , નિખાલસતા અને મક્કમતાના ગુણોનો વિકાસ થયો જે એમને આગળ જતા ભારતના લોખંડી પુરુષ બનવા તરફ લઇ જવાનો હતો .

વલ્લભભાઈથી સરદાર બનવાને હજુ તો ઘણી વાર હતી પણ કરમસદ જેવા નાના ગામનો એક વિદ્યાર્થી નડીયાદ જેવા સંસ્કારસમૃદ્ધ નગરમાં ધીરેધીરે વિદ્યાર્થી આલમમાં નેતાગીરીના સક્ષમ પાઠ ભણી રહ્યો હતો પણ કુદરતે હજુ પણ વધુ ઘડતરના પાઠ ભણાવવાનું નક્કી કરી લીધું હશે તો વલ્લભભાઈએ વધુ સારી શાળા અને વધુ સારા અંગ્રેજી શિક્ષણ માટે વડોદરા જવાનું નક્કી કર્યું . જો કે આ થોડા સમય માટે જ હતું . નડિયાદની જેમ ત્યાં પણ વાતવારણ ઉચ્ચ હતું . ગુજરાતી પુસ્તકાલય પ્રવૃતિના પિતામહ ગણાતા સ્વ. મોતીભાઈ અમીનની પ્રેરણાથી ત્યાં ઉચ્ચ વિચારસરણી ધરાવતા વિદ્યાર્થીઓનું પાંત્રીસેક લોકોનું એક ગ્રુપ હતું જેને બધા ‘ ધી થર્ટી ફાઈવ ‘ એ નામે ઓળખતા . આ બધા જ વિદ્યાર્થીઓ કમાટીબાગના રામજીમંદિરમાં છાત્રાલય ખોલીને રહેતા હતા . આ પાત્રીસ માંહેના એક આપણા વલ્લભભાઈ પણ ખરા ..!! સહવાસ અને સંગાથ ઉચ્ચ વિચારોવાળો અને તેમની પ્રતિભાને પોષનાર હોવાથી વલ્લભભાઈ શહેરના કલુષિત વાતાવરણમાંથી બચીને વધુ વિચક્ષણ અને વિશિષ્ટ બની રહ્યા હતા . અંગ્રેજી છઠ્ઠા ધોરણમાં એમણે તેમણે પહેલાં સંસ્કૃત વિષય પસંદ કરેલો પણ પાછળથી તેમણે ગુજરાતી વિષય રાખ્યો. તેમના ગુજરાતીના શિક્ષક હતા છોટાલાલ માસ્તર .ગુજરાતી ભાષામાં સાક્ષર ગણાતા અને ‘ પ્રાતઃકાળ ‘ અને ‘ મહાકાળ ‘ નામે બે પ્રસિદ્ધ માસિકોના તંત્રી એવા છોટાલાલને ગુજરાતી પ્રત્યે સ્વાભાવિક પ્રેમ હતો જ પણ કોઈ સંસ્કૃત છોડીને ગુજરાતી વિષય લે એ એમને ગમતું નહિ કેમકે છોટાલાલ સંસ્કૃત ભાષાના ચાહક હતા . વલ્લભભાઈએ સંસ્કૃત છોડીને ગુજરાતી વિષય રાખ્યો એટલે એમણે ઠપકાની ભાષામાં મજાક કરી કે ‘ પધારો મહાપુરુષ , તમે સંસ્કૃત છોડીને ગુજરાતી ભાષા લીધી પણ તમને ખબર છે કે જેનું સંસ્કૃત સારું ના હોય તેની ગુજરાતી ભાષા પણ સારી ના હોય ‘ આમ કહી છોટાલાલે સંસ્કૃતના ગુણગાન ચાલુ કર્યા. જો કે આમાં કાઈ ખોટું નહોતું પણ બધાની હાજરીમાં મજાક થવાથી વલ્લભભાઈને પોતાનો તેજોવધ થયાનું લાગ્યું અને એમણે છોટાલાલને રોકડું પરખાવ્યું કે ‘ સાહેબ બધા સંસ્કૃત રાખે તો તમારા વર્ગમાં કોઈ હોય નહિ અને તમારે ઘરે બેસવાનો વારો આવે ‘ . સરદારના આવા જવાબથી છોટાલાલ ગિન્નાયા અને એમને પાટલી પર ઉભા રહેવાની સજા સંભળાવી . એમાયે વલ્લભભાઈને વાંધો નહોતો પણ છોટાલાલે એટલાથી સંતોષ ના થયો તો એક થી દસ સુધીના આંક લખવાની વધારાની સજા પણ સંભળાવી દીધી . વલ્લભભાઈને આ વધારાની શિક્ષા અન્યાયી લાગી એટલે એ તો લખીને ગયા જ નહિ . છોટાલાલ શિક્ષા વધારતા જાય અને વલ્લભભાઈ લખીને જાય જ નહિ . આમ કરતા શિક્ષાનો આંક બસ્સો પાડા લખવા સુધી પહોચી ગયો . છેલ્લે દિવસે છોટાલાલે બસ્સો પાડાની ઉઘરાણી કરી તો આ તો હાજરજવાબી વલ્લભભાઈ , એ કહે ‘ બસો લાવેલો પણ બે પાડા મારકણા હતા તે શાળાના ઝાંપે ઝગડ્યા અને એમાં બાકીના પાડા પણ નાસી ગયા “!!! છેલ્લી ચેતવણી તરીકે એક દિવસની મુદત પડી. બીજે દિવસે વલ્લભભાઈ એક કાગળમાં ‘ બસો પાડા ‘ એવું લખીને ગયા . હવે છોટાલાલ અતિ ગુસ્સે થયા અને વલ્લભભાઈને આચાર્ય સમક્ષ પેશ કરવામાં આવ્યા . આચાર્યે ખુલાસો માંગતા વલ્લભભાઈએ એવો સરસ  અને મુત્સદી ભર્યો જવાબ આપ્યો કે આચાર્યે બાઇજ્જત રિહા કરી દીધા. જવાબ હતો  ‘ સાહેબ , પાટલી પર ઉભા રહેવાની પહેલી શિક્ષા મારા  ઉદ્ધત જવાબને લીધે હતી જે વ્યાજબી હતી પણ બાકીની શિક્ષાઓ અન્યાય હતો અને હું અન્યાયને તાબે થતો નથી , અને આમેય એ શિક્ષાઓ મારી માનહાની જેવી મને વધુ લાગી કેમકે હું છઠ્ઠા ધોરણનો વિદ્યાર્થી છું અને શિક્ષામાં મને મારા ધોરણનું કાઈ લખવા આપ્યું હોત તો મને કૈક ફાયદો પણ થાત પણ પહેલા-બીજા ધોરણના વિદ્યાર્થીઓની જેમ મને આંક લખવા આપ્યા એ મારો તેજોવધ અને માનહાની માટે જ હતા એટલે હું એને તાબે નથી થયો અને એનું પરિણામ ભોગવવા હું તૈયાર છું ‘ આચાર્યે  પણ આવા સૈધાંતિક ખુલાસાને સાંભળતા જ કાન પકડ્યા અને વલ્લભભાઈને માફ કર્યા પણ પેટલાદના આગળ લખેલા બનાવની જેમ જ આ બનાવે જાણ્યે અજાણ્યે સૈધાંતિક ખુલાસો કરીને વિદ્યાર્થી વલ્લભભાઈએ સત્યાગ્રહના પ્રથમ સિદ્ધાંતનું આચરણ શરુ કરી દીધેલું જે આગળ જતા ભારતની આઝાદીની લડતનું એક મુખ્ય શસ્ત્ર બનવાનું હતું .

આ બનાવ પછીથી ફરીથી કોઈ બીજા શિક્ષક સાથે કજીયો થવાનું બન્યું અને વલ્લભભાઈ વડોદરાની શાળા છોડીને ફરીથી નડિયાદની શાળામાં સાતમાં ધોરણમાં દાખલ થયા . ગણિતમાં કાચા હોવાને લીધે મેટ્રીકમાં બીજી ટ્રાયે પાસ થયા ત્યારે વલ્લભભાઈની ઉમર હતી ૨૨ વર્ષ . ત્યારે તેમના વડીલો તેમને મહત્વકાંક્ષી વ્યક્તિ તરીકે નહોતા ઓળખતા તથા એમ માનતા કે તેઓ કોઈ સાધારણ નોકરી કે ધંધો કરશે. પણ વલ્લભભાઈની પોતાની અલગ યોજના હતી – તેમને વકીલાતનું ભણી, કામ કરીને પૈસા બચાવી, ઈંગ્લેન્ડમાં ભણી બૅરિસ્ટર બનવુ હતું. પણ એના માટે કોલેજમાં પાંચ છ વર્ષ જવું એમને મંજુર નહોતું એટલે એમણે બે વર્ષના ડીસ્ટ્રીકટ પ્લીડર થવાનું નક્કી કર્યું કેમકે એ થયા પછી સીધા બેરિસ્ટર થઇ શકાય . જુના પુસ્તકો ઉછીના લાવીને ઈ.સ. ૧૯૦૦મા પહેલા પ્રયત્ને એમાં પાસ પણ થયા. હવે બેરિસ્ટર બનવા વિદેશ જવા માટે પૈસાની વ્યવસ્થા કરવી જરૂરી હતી . આ માટે એમણે વકીલાત શરુ કરી અને પોતાની કુશાગ્ર બુદ્ધિ અને હાજરજવાબીથી ટૂંકા ગાળામાં જ કુશળ વકીલ તરીકે યશ અને ધન બંને ખુબ કમાયા . સરદાર ૧૯૧૦મા ઇંગ્લેન્ડ ગયા અને પ્રથાન વર્ગમાં બેરિસ્ટરની પરીક્ષા પાસ કરી એટલું જ નહિ પણ ૫૦ પાઉન્ડનું ઇનામ અને બે ટર્મ ની માફી પણ મેળવી. ૧૯૧૨મા ભારત આવીને અમદાવાદમાં વકીલાત શરુ કરી જે ધમધોકાર ચાલવા લાગી . એ દરમ્યાન ગાંધીજી અમદાવાદ આવ્યા અને કોચરબ આશ્રમની સ્થાપના કરી .  ૧૯૧૭મા ગુજરાત ક્લબમાં સરદાર અને મહાત્મા મળ્યા અને પછીથી મા ભારતીના આ બંને વીરોએ ભારતની આઝાદી માટે કરેલા સંઘર્ષની વાત તો આખુયે જગત જાણે છે . આમ વલ્લભભાઈમાં નેતૃત્વ , નીડરતા , હાજરજવાબીપણું , મક્કમતા જેવા સદગુણોનો પાયો અને વિકાસ એમના શાળાજીવન દરમ્યાન જ થવા લાગેલો .

  • અજય ઉપાધ્યાય ( ગુજરાત  પાક્ષિક – ૧૬ ઓક્ટોબર ૨૦૧૮ )

 

 

 

#મી ટુ………. યુ ટુ ??????!!!!!

Featured

#મી ટુ………. યુ ટુ ??????!!!!!

કહેવત છે ને કે ‘ બાર વર્ષે બાવો બોલ્યો કે જા બચ્ચા અકાલ પડેગા “…અહી બાવો તો નથી બોલ્યો પણ વાત અકાલ શું પણ ભૂચાલ ,ધરતીકંપ, સુનામી આવી જાય એવી છે …!!!! બાવાની જગ્યાએ બેબી અને અમુક તો બેબીયું ની માઓ એ પણ અત્યારે હેશટેગ મી ટુ ના હથિયારથી એવો ભયંકર હાહાકાર મચાવી દીધો છે કે ભલભલા કહેવાતા પ્રતિષ્ઠિત લોકો પણ ‘ અપને હી ઘર મેં ગભરાયે ગભરાયે ફિરતે હૈ …!!! સંસ્કારીથી લઈને રાજનેતા અને પ્રોડ્યુસરથી લઈને અભિનેતા સુધીના લોકો ( પુરુષો ઓન્લી ) , ગાયકથી લઈને પત્રકારો અને લેખકો સુધીના અત્યારે એની હડફેટે આવી ગયા છે . આ તો હજુ શરૂઆત છે , આમાં આવનારા દિવસોમાં મોટા કડાકા-ભડાકા થવા શક્ય છે .પોતાના પર થયેલા સેક્સ્યુલ કાંકરીચાળાની ભોગ બનનાર મહિલા કે યુવતી ફરિયાદ કરી રહી છે , એ પણ છેડચોક …ડંકે કી ચોટ પર …!! અને આ ડંકા વગાડવાનું પ્લેટફોર્મ પૂરું પાડ્યું છે સોશિયલ મીડીયાએ . આમેય સોશિયલ મીડિયામાં કોઈ પણ સમાચાર આગની જેમ ફેલાઈ જતા હોય છે જ્યારે આ તો કોઈ પ્રતિષ્ઠિત , સોશિયલી આબરૂદાર લોકોના નામ આવે છે એટલે સ્વાભાવિક લોકોને વધુ રસ જાગે જ ..!!

આમેય જનરલી લોકો અનેકો ચહેરા ઓઢીને જીવતા હોય છે એવામાં કોઈ એક કદરૂપો ચહેરો બહાર આવે એટલે એની ચર્ચા થવી સ્વાભાવિક છે જ . વાત છે મી ટુ ક્મ્પેઈનની . ‘ ધ ગાર્ડિયન ‘ ના એક અહેવાલ મુજબ ૨૦૦૬મા તરાના બર્ક નામની સામાજિક કાર્યકર્તાએ યૌન ઉત્પીડનથી ત્રસ્ત મહિલાઓને મદદ કરવા માટે મીટુ શબ્દનો પહેલીવાર ઉપયોગ કરેલો પણ એને વધુ વેગ મળ્યો ૨૦૧૭મા .આજથી એકાદ વર્ષ પહેલા અમેરિકામાં હોલીવુડ પ્રોડ્યુસર હાર્વે પર અભિનેત્રી એલીસા મિલાને સેક્સ્યુલ એસોલ્ટના આરોપો લગાવેલા અને આ આરોપોને બળ મળે એટલે અને એના જેવી જ બીજી પીડીતાઓ ખુલીને બહાર આવે ખાસ કરીને કામકાજના સ્થળોએ થયેલા દુર્વ્યવહાર બહાર આવે એ માટે #મીટુ હેશટેગ સાથે આવી પીડીતાઓને જાહેરમાં આવીને બિન્દાસ રીતે સોશિયલ મીડિયામાં એણે ભોગવેલી તકલીફો પ્રગટ કરવાનું આહ્વાન કરવામાં આવેલું . એલીસાના આ ટ્વીટે આખી દુનિયામાં ખળભળાટ મચાવી દીધો અને જોતજોતામાં અનેકો મહિલાઓએ પોતાના પર થયેલા જાતીય દુર્વ્યવ્હારને સમાજ સામે જાહેર કરી દીધો . જો કે જુદા જુદા દેશોમાં હેશટેગ અલગ અલગ પણ રખાયો જેમકે ફ્રાન્સમાં #balancetonporc તો બીજે #Womenwhoroar હેશટેગથી પીડિત મહિલાઓને પોતાની આપવીતી જગજાહેર કરવાનું આહ્વાન કરાયું પણ #મીટુ વધુ લોકપ્રિય થયો .

ખેર ભારતમાં પણ મીટુ ક્મ્પેઈનની અસર એ વખતે પણ થયેલી પણ કદાચ અત્યાર જેટલી નહી , અથવા તો લોકોએ વધુ ગંભીરતાથી લેવાને બદલે એક રોચક વાત તરીકે જ લીધેલી પણ હાલમાં બહાર આવેલી નવી વાતો મુજબ અત્યારે આ મીટુ ક્મ્પેઈન જોરમાં છે અને કૈકના છુપા ચહેરાઓ ઉઘાડી પડી ગયા છે . બીબીસીની રિપોર્ટર શાયમાંએ ૧૧ વર્ષની ઉમરમાં થયેલા દુર્વ્યવ્ય્હાર વિષે તો તારક મહેતાના બબીતાજી મુનમુને પણ આવો જ એક જુનો દુખદ પ્રસંગ સાર્વજનિક કર્યો અને આ સિવાય પણ ઘણી મહિલાઓએ પોતાના કામકાજના સ્થળોએ હાલમાં કે આગાઉ થયેલા દુર્વ્યવહારને સરાજાહેર કરી દીધો . અમેરિકા તો અતિ આધુનિક દેશ હોવા છતાં પણ હાર્વેના બનાવ પછી અનેકો અભિનેત્રીઓએ કરેલા આરોપો જાણીને ચોંકી ગયો તો પછી હજુ પણ સ્ત્રીઓ બાબતે પછાત અને હલકી માનસિકતા ધરાવતા ભારત માટે તો આ બનાવો હચમચાવનાર જ કહેવાય .

કામકાજના સ્થળે અને અંગત લોકો દ્વારા મહિલાઓની શારીરિક છેડછાડ કે બલાત્કાર જેવી ઘટનાઓ આયે દિન આપણા વર્તમાનપત્રોની હેડલાઈન બનતી જ હોય છે પણ જ્યારે આ વાત કોઈ કહેવાતા સજ્જન કે પ્રતિષ્ઠિત વ્યક્તિ માટે જાણવા મળે ત્યારે એની અગત્યતતા કરતા પણ આવી ઘટનાઓમાં ભોગ બનેલી મહિલાઓની હિમ્મત ખુલે છે અને એ વધુ ફ્રીલી આ વાત જાહેર કરતી થાય છે . અને બાહર આવેલા નામ તો જુઓ …ક્વીન જેવી સફળ અને બ્લોકબસ્ટર ફિલ્મનો ડાયરેક્ટર વિકાસ , સંસ્કારી ગણાતા આલોકનાથ , પત્રકારમાંથી રાજનેતા બનેલા એમ.જે.અકબર , બોલીવુડનો એન્ગ્રીમેન નાના પાટેકર , યુવાનોનો ચહીતો લેખક ચેતન ભગત , ફની શો એઆઈબી નો ઉત્સવ , અભિનેતા રજત કપૂર , સિંગર કૈલાશ ખેર અને અભિજિત…લીસ્ટ હજુ લાંબુ થવાનું છે એ ચોક્કસ છે એ એટલા માટે કે આ લખાય છે ત્યારે શુક્રવાર સુધીમાં ક્રિકેટર લસિથ મલીંગા , સુહેલ શેઠ વગેરે વગેરે પર પણ સેક્સ્યુઅલ હેરેસમેન્ટના આરોપો લાગી ચુક્યા છે . નો ડાઉટ આમાંથી અમુક નજીકના ભૂતકાળમાં બનેલા આવા બનાવોને બાદ કરતા મોટાભાગના આરોપો કદાચ ૧૦-૧૫ કે ૨૫ વર્ષ જુના છે પણ આરોપો છે એ હકીકત છે .

હોલીવુડમાં જો આવી ખરાબ હાલત હોય તો પછી બોલીવુડની તો વાત જ ક્યાં કરવી . તનુશ્રીના નાના પરના આરોપો કે પછી આલોકનાથ પર વિનીતાના આરોપો હજુ જેમના તેમ જ છે ત્યારે એ પણ હકીકત છે કે કામ અને કેરિયરની ચિંતામાં આવા અનેકો બનાવો દબાય રહ્યા હશે જ . ‘ અત્યારે આટલા વર્ષો પછી કેમ બોલી ?” કે પછી ‘ આ વાતનો કોઈ પુરાવો નથી “ આવું કહીને છટકી જનાર લોકો અને તાજેતરના બનાવો પછી એક વાત ખુલીને સામે આવી છે કે અમુક આરોપોમાં તો સચ્ચાઈ હતી જ . જેમ કે ચેતન ભગતે અને રજત કપૂરે તો આરોપો સ્વીકારીને માફી પણ માંગી છે , સુહેલ શેઠ નો તો ચીટીયો ભરતો વિડીયો પણ શોશિયલ મીડિયામાં વાયરલ થઇ જ ગયો છે !! બાકીના કદાચ ‘ યાદ નથી ‘ કે ‘ આવું કશું જ થયું નહોતું ‘ એમ કહીને છટકી જવાની વેતરણમાં હોય શકે છે જો કે તનુશ્રી અને વિનીતા એ બંને કેસમાં જે તે સમયે આની ફરિયાદ થયાની પુષ્ટિ થઇ ચુકી છે . અગાઉ ‘યૌન હિંસા પર જાગૃતતા ફેલાવવા માટે મર્દ ‘ ( મેન અગેન્સ્ટ રેપ એન્ડ ડીસ્ક્રિમીનેશન ) નામે કેમ્પેઈન ચલાવનાર ફિલ્મ અભિનેતા ફરાહન અખ્તરે કહેલું કે ‘ જ્યારે કોઈ મહિલા એમ કહે કે મારી સાથે આવું થયું છે તો હું એની વાત સાચી માનું છું “ અને તાજેતરના બનાવોમાં પણ માફીનામાઓ પછી એ વાત સાબિત થાય છે કે ‘ કુછ તો હુઆ હી થા “

ખેર કામકાજના સ્થળે કેરિયરની ચિંતા અને ફેમિલીમાં કે અંગત લોકો દ્વારા થયલા દુર્વય્વ્હારમાં સમાજ અને આબરુની ચિંતાને લીધે આવા કેસો બહાર આવતા નથી પણ નિર્વિવાદપણે આ એક સાહસી શરૂઆત છે . બોલીવુડના એન્ગલથી જોતા કોઈને પબ્લીસીટી સ્ટંટ લાગે પણ જે રીતે તનુશ્રીની #મીટુ ને સમર્થન મળી રહ્યું છે એ જોતા એટલીસ્ટ કામકાજના સ્થળે મહિલાઓ પ્રતિ પુરુષોનો રવૈયો બદલે તો પણ ઘણું છે . જો કે તનુશ્રીના વિરોધમાં પણ વાતો થઇ રહી છે . પબ્લીસીટી સ્ટંટ કે બ્લેકમેલીંગ કે પછી કદાચ મહિલા હોવાનો ફાયદો ઉઠાવીને કરાતા અમુક આરોપોનો ગણગણાટ બાજુ પર રાખીએ તો પણ એ હકીકતથી ઇનકાર થઇ શકે એમ નથી કે આપણા સમાજમાં મહિલાઓ સાથે થતી યૌન હિંસા મોટાપાયે અને લગભગ દરેક વર્ગમાં થઇ રહી છે અને મહિલાઓ એ દર્દનાક ઘટનાઓમાંથી સલામત બહાર આવવાની કે એનાથી કેમ બચી શકાય સતત એની જ ચિંતામાં રહે છે . #મીટુ મુવમેન્ટ કેટલી ચાલશે અને કેવી અસરકારક રહેશે એ તો સમય જ કહેશે પણ આ પ્લેટફોર્મ દ્વારા અત્યાર સુધી ઈજ્જત , શરમ અને આદરના નામે ચુપ રહેલી મહિલાઓ પોતાની સાથે બનેલી આવી ઘટનાઓને બહાર લાવીને જે તે વ્યક્તિ અને સમાજને સાચો આયનો તો બતાવી જ શકશે . પણ આ મુવમેન્ટની અસર અને સફળતા એ વાત પર નિર્ભર છે કે આવી બેબાક અને સાહસિક જાહેરાત કરનાર મહિલાની આપવીતી કોઈ પણ પ્રતિઆરોપો લગાવ્યા વગર એટલીસ્ટ શાંતિથી સાંભળવામાં આવે અને એને ન્યાય અપાવવામાં આવે અને સામે છેડે ભોગ બનનાર પણ માત્ર પબ્લીસીટી સ્ટંટ , પર્સનલ સ્કોર સેટ કરવો કે હૈશો હૈશો ના ગાડરિયા પ્રવાહમાં તણાયા વગર ખરેખર બનેલા બનાવોને #મીટુ નામે બહાર લાવે તો જ #મીટુ વધુ સાર્થક અને સચોટ રહેશે …!

  • અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૧૪ ઓક્ટોબર ૨૦૧૮ )

શાંતતા , કોર્ટ ચાલુ આહે !!!!

Featured

શાંતતા , કોર્ટ ચાલુ આહે !!!!

અક્ષયકુમારની જોલી એલ.એલ.બી. નો એક ડાયલોગ છે કે ‘ મૈ તુજે કોર્ટ મેં દેખ લુંગા ‘…પણ કોર્ટમાં દેખવા દેખવામાં બંને પક્ષો ઘરડા થઇ જાય કે બીજી ત્રીજી પેઢીઓ સુધી કેસ લંબાઈ જાય એટલા કેસનો ભરાવો દેશની કોર્ટોમાં છે. નો ડાઉટ લોકોને હજુ ન્યાયતંત્ર પર પુરતો વિશ્વાસ છે અને કોર્ટ પણ લોકોના વિશ્વાસને સાર્થક ઠેરવતું હોય એવા ચુકાદાઓ આપીને પોતાની છાપ સુધારતી જાય છે એ લોકતંત્ર માટે સારી વાત છે . ન્યાયતંત્રમાં કામ કરતા લોકો જ જાણી શકે કે ઝડપી અને સચોટ ન્યાય મેળવવો જ નહિ પણ આપવો પણ કેટલો મુશ્કેલ છે . અને એનું એક કારણ છે સદીઓ જુના કાયદાઓ ..!!! અને આનંદની વાત એ છે કે આવા કાયદાઓ કે જે લોકોના જીવન પર અસર કરતા હતા એટલું જ નહિ પણ એનાથી મૂળભૂત અધિકારો કે કાયદાકીય અને સમાજજીવનમાં ગૂંચવાડા ઉભા કરતા હતા એવા ચુકાદાઓ આપીને નામદાર કોર્ટે લોકોના વિશ્વાસને વધુ મજબુત કરવાનું કામ કર્યું છે ..!!

નામદાર સુપ્રીમ કોર્ટે એક પછી એક એવા ચુકાદાઓ આપવાના ચાલુ કર્યા છે કે નો ડાઉટ વિવાદ પણ થયો અને હજુ થશે પણ કહેવાય છે ને કે દરેક સારા કામ સામે સો વિઘ્ન આવે એમ આમાં પણ આવવાના પણ મજાની વાત એ છે કે સદીઓ જુના કાયદાઓ કે જે ભારતીય સમાજજીવનને અસર કરતા હતા અને એટલું જ નહિ પણ જેમાં સુધારો કરવાથી આધુનિક ભારત અને આધુનિક ભારતના રહેવાસીઓને બંધારણ મુજબ સરખા હક્કો આપવાની પહેલ થઇ શકે એમ છે એમાં બદલાવ આવકાર્ય છે એમાં બેમત નથી . જેમકે સમલૈંગિકતાનો ચુકાદો . કલમ ૩૭૭ રદ કરવી એ નામદાર કોર્ટનો ઐતિહાસિક ચુકાદો ગણી શકાય . ઐતિહાસિક એટલા માટે કે જાતીય સ્વતંત્રતા આજના યુગની માંગ છે . જગતના ઘણા બધા દેશો આને માન્યતા આપી ચુક્યા છે અને આ માન્યતાનું કારણ કોઈ દબાણ કે દેખાવ નથી પણ માનવીય સ્વતંત્રતા અને ખાસ કરીને જાતીય સ્વતંત્રતા મૂળભૂત માનવીય અધીકાર ગણાય છે અને કલમ ૩૭૭ ની નાબુદી એ કોઈ સામજિક બંધનોને તોડનાર નહિ પણ સમાજ સાથે આવી કોમ્યુનીટીને જોડનાર કહી શકાય . સુપ્રીમ કોર્ટે 6 સપ્ટેમ્બરે પોતાના આદેશમાં LGBTQ સમુદાયને મોટી રાહત આપી અને સમલૈંગિક યૌન સંબંધોને અપરાધ મુક્ત કરી દીધા. એલ ( લેસ્બિયન ) , જી ( ગે ) , બી ( બાય-સેક્સ્યુલ ) અને ટી ( ટ્રાન્સજેન્ડર ) સંબંધો અત્યાર સુધી અપરાધની શ્રેણીમાં આવતા હતા . આ કોમ્યુનીટી બાબતે મનોચિકિત્સકોથી લઈને હાર્ડકોર લોકો સુધી જેટલા મો એટલી વાતો હતી પણ હકીકત એ છે કે એલજીબીટીને મનોવિજ્ઞાન કે બીજા કોઈ શાસ્ત્રની એરણે ચડાવતા પહેલા એ જાણવું જરૂરી છે કે કોઈ બે પુખ્ત વ્યક્તિ વચ્ચેનો જાતીય સંબંધ માનવઅધિકાર અને એના પોતાની રીતે જીવવાના અધિકારમાં આવે છે અને કોર્ટે મંજુરીની મહોર મારીને એ અધિકારની પુષ્ટિ કરી છે .

તો હમણાં જ આવેલા ચુકાદામાં સુપ્રીમ કોર્ટે 158 વર્ષ જૂનો અડલ્ટ્રી અથવા વ્યભિચાર કાયદાને અસંવિધાનિક ગણાવ્યો છે. ઇન્ડિયન પીનલ કોડની કલમ ૪૯૭ મુજબ જો કોઇ વ્યક્તિ કોઇ બીજા વ્યક્તિની પત્ની સાથે, તે વ્યક્તિની સંમતી વગર શારીરિક સંબંધ બનાવે છે તો તેને વ્યભિચારનો દોષી માનવામાં આવશે અને તેને પાંચ વર્ષ સુધીની સજા અને દંડ થઇ શકે છે. પરંતુ આ સંબંધમાં સામેલ સ્ત્રીને પીડિત માનવામાં આવશે અને તેને કોઇ પ્રકારની સજા નહીં થાય. હવે આ કલમ રદ થવાથી વ્યભિચાર ગુનો નહિ ગણાય . નાકનું ટીચકું ચડે એવી વાત તો છે જ પણ કોર્ટનું માનવું છે કે આવા કેસમાં બંને સરખા ભાગીદાર ગણાવા જોઈએ . ચુકાદામાં જસ્ટીસ નરીમાને કહ્યું કે, વ્યભિચારની શરૂ‚આત માત્ર પુરુષ તરફથી જ થાય છે અને સ્ત્રી હંમેશા પિડીતા જ હોય છે એ વિચારસરણી જુની છે. આવી વિચારસરણી પણ સ્ત્રીઓની મરજી અને ગરિમાની વિરુઘ્ધ છે. આ ચુકાદો સ્ત્રી-પુરુષને સમાન અધિકાર આપશે.

નામદાર સુપ્રીમ કોર્ટ આટલેથી જ ન અટકતા ધુંઆધાર બેટિંગ ચાલુ રાખીને વધુ ઐતિહાસિક ચુકાદાઓ આપ્યા છે . જેમકે કેરળમાં આવેલ ઐતિહાસિક મંદિર સબરીમાલામાં વર્ષોથી મહિલાઓના પ્રવેશ પર પ્રતિબંધ લગાવવામાં આવ્યો હતો. મુખ્ય નાયાય્ધીશ દીપક મિશ્રાએ આ પ્રતિબંધને ગેરકાયદે ગણાવીને તાત્કાલીક ધોરણે મહિલાઓને આ મંદિરમાં પ્રવેશવા દેવામાં આવે તેવો આદેશ પ્રશાસનને કર્યો હતો. આમ, મહિલાઓ હવે સબરીમાલા મંદિરના દર્શન કરી શકશે. 800 વર્ષ જૂના આ મંદિરમાં એ માન્યતા ઘણા સમયથી હતી કે મંદિરમાં મહિલાઓને પ્રવેશ આપવામાં આવે નહીં. જો કે આમાં પણ વિવાદ ચાલુ જ છે કેમકે અમુકનું માનવું છે કે આ ધાર્મિક બાબત છે અને કોર્ટ નક્કી કરી શકે નહિ પણ ચુકાદો તો આવી જ ગયો છે . તો સામે છેડે ધાર્મિક બાબતો માટે મહત્વનો ચુકાદો આપતા કોર્ટે જણાવ્યું કે કોઈ પણ ધાર્મિક સ્થળનું અધિગ્રહણ થઈ શકે છે . અધિગ્રહણથી મૌલિક અધિકારોનું હનન નથી, મસ્જિદ, ચર્ચ, મંદિર કોઈપણ ધાર્મિક સ્થળનું અધિગ્રહણ થઈ શકે છે. આને બાબરી મસ્જીદ કેસ સાથે જોડીને જોવાઈ રહ્યો છે

નામદાર કોર્ટે એક જ ઝાટકે આધારના અનેકો સાવાલોને ઉડાવીને નિરાધાર આધાર ધારકો માટે મોટી રાહતના સમાચાર આપ્યા . સુપ્રીમ કોર્ટની પાંચ જજોની બેન્ચે 26 સપ્ટેમ્બરે આદેશ આપ્યો કે આધાર બંધારણીય છે. પરંતુ એને સરકારી સેવાઓમાં ફરજિયાત બનાવી શકાય નહીં. હા, પાન કાર્ડ સાથે આધાર જોડવું ફરજિયાત રહેશે. મોબાઈલ નંબર અને બેંક ખાતા સાથે આધાર જોડવું અનિવાર્ય નથી. જ્યાં ને ત્યાં આધાર ફર્જીયાતના ગાણા ગાતા અને એને લીધે હેરાન થતા નાગરીકો માટે આ સારા સમાચાર છે . જો કે ઓલમોસ્ટ સરકારી દબાણોને લીધે મોટાભાગના આધારની માથાકૂટ પૂરી કરી ચુક્યા છે છતાં પણ આ એક ઐતિહાસિક ચુકાદો કહી શકાય કે જેનાથી આધાર ખરેખર ક્યાં અને કેટલું ઉપયોગી છે એ સ્થાપિત થતું દેખાય છે . કોર્ટે કહ્યુ કે, કેન્દ્ર સરકાર આધાર કાર્ડના ડેટાને સુરક્ષિત કરવા તુરંત કાયદો બનાવે. આધાર ગરીબની તાકાત અને અધિકાર છે. ચુકાદામાં જણાવાયું છે કે આધાર કાર્ડ પર હુમલો કરવો એ લોકોના અધિકાર પર હુમલો કરવા સમાન છે.

તો આવા જ એક શકવર્તી ચુકાદામાં સુપ્રીમ કોર્ટ મહત્વના કેસમાં કોર્ટમાં લાઈવ પ્રસારણ કરવા મામલે ચુકાદો આપ્યો છે. સુપ્રીમ કોર્ટે કોર્ટની કાર્યવાહીનું લાઈવ પ્રસારણ કરવાની મંજૂરી આપી છે. કોર્ટના આદેશ બાદ લોકોને કોર્ટમાં આવવાની જરૂર નહીં પડે. જેના માટે સરકારને જરૂરી નિયમ બનાવવાના પણ આદેશ આપ્યા છે. કોર્ટે કહ્યુ કે, લાઈવ પ્રસારણ કેટલાક નિયમ સાથે કરવામાં આવશે. જો કે સામે છેડે સુપ્રીમ કોર્ટે દાગી નેતાઓને ચૂંટણી લડતા રોકવા કોઈ કાયદો સંસદ જ બનાવે એમ આગ્રહ કર્યો છે અને હાલ તો આવા ૩૪ ટકા જેવા દાગી નેતાઓ કાયદાની ચુંગાલમાંથી બચી ગયા છે . આવા જ એક બીજા ચુકાદામાં સુપ્રીમ કોર્ટે સરકારી નોકરીમાં પ્રમોશન આપવા મામલે 2006ના જસ્ટિસ નાગરાજના ચુકાદા અંગે ફેર વિચારણાની અરજીને ફગાવી છે. જેથી કોર્ટે 2006ના ચુકાદાને યથાવત રાખ્યો છે. કોર્ટે જણાવ્યુ કે, સરકારી નોકરીમાં અનામતની કોઈ જરૂર નથી. જેથી આ મામલે કોઈપણ પ્રકારના ડેટાઓની પણ જરૂર નથી. રાજ્ય સરકાર ઈચ્છે તો સરકારી નોકરીના પ્રમોશનમાં અનામત આપી શકે છે. એક જ વીકમાં આવા અને બીજા મોટા ૧૬ જેવા ચુકાદાઓ સમ્ભ્લાવનાર દેશના મુખ્ય ન્યાયધીશ દીપક મિશ્રા ૧ ઓક્ટોબરે રીટાયર થાય છે અને જતા પહેલા હજુ બીજા આવા ચુકાદાઓ આવી શકે છે …!!! ન્યાયતંત્રમાં હજુ લોકોને શ્રધ્ધા અને વિશ્વાસ છે એ સાબિત કરવાની કોઇપણ તક મિશ્રાજી નહિ છોડે એ નક્કી છે …!!!!

  • અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૩૦ સપ્ટેમ્બર ૨૦૧૮ )

 

હે ટ્રોલરો , ઇટ્સ ધેર લાઈફ !!!!

Featured

હે ટ્રોલરો , ઇટ્સ ધેર લાઈફ !!!!

બીગ બોસ સીઝન ૧૨નો શુભ(?) આરંભ થઇ ગયો છે ..બીગ બોસના નિયમિત દર્શકો માટે તો બીગબોસમાં ચાલતા ડ્રામા અને નૌટંકીની કોઈ નવાઈ છે જ નહિ પણ આ વખતે તો જે લોકો બીગબોસના નિયમિત દર્શકો નથી એમને પણ બીગબોસમાં કઈક વધુ પડતો રસ પડ્યો છે …અને આ ‘એક્સ્ટ્રા ‘ રસ નો વિષય બની છે એક વિચિત્ર જોડી …!!! જી હા આ વખતે બીગબોસની થીમમાં ‘ વિચિત્ર જોડી ‘ નામે અમુક જોડીઓ છે જે એકબીજાથી સ્વભાવ અને વર્તનમાં કે પછી ઉમર અને દેખાવમાં ભિન્ન છે …આવી જ એક જોડી છે ભજનસમ્રાટ અનુપ જલોટા અને એની જોડીદાર જસલીન મથારુની …!!! તમને લાગશે કે આમાં રસ પાડવા જેવું કે વિચિત્ર શું છે ? તો બધુઓ અને ભગિનીઓ આમાં વિચિત્ર એ છે કે અનુપભાઈ છે ૬૫ ના અને જસલીન છે ૨૮ ની …!!! આઈ મીન ટુ સે કે બંને વચ્ચે ઓલ્મોસ્ટ ૩૮ વર્ષનો એઈજ ડીફરન્સ છે …અને અધૂરામાં પૂરું આ એઈજ ડીફરન્સ સિવાય ગામ આખાની ભવરો ચડી જાય એવી વાત એ છે કે ધેય બોથ આર ઇન લવ …!!!! હેઇન્ન્ન્ન થઇ ગયું ને વાંચીને …!!!!

આ હેઈન્ન્ન એ આખું ગામ ગાંડું કર્યું છે …ખાસ કરીને શોસીયલ મીડીયાનું ગામ ….!!! અલ્યા બળતરાવીરો અને વીરાંગનાઓ ….બેય મેચ્યોર છે …સમજદાર છે …પુખ્ત છે ….તો બેય એકબીજાને લવ કરે એમાં તમને ક્યા ચૂંક આવી દિયોર …??? પણ ના ….સમાજના ઠેકેદારો એમ ગાંજ્યા જાય એ થોડું ચાલે ? આખાયે શોશિયલ મીડિયામાં આ બચાડા બેય પાગલ પ્રેમીઓને ગધેડે ચડાવીને સરઘસ કાઢવામાં આવ્યું ….ને હજુયે ઘણાયને પાહઠ વરહનો ભાભો તરી વરહની છોડી હારે લવ કરે એનો અપચો થઇ ગયેલો છે …તે ઈ-ટોણા માર્યા જ કરે છે …!!! શોશિયલ મીડિયા પર આ બંનેને બરાબરના ટ્રોલ કરવામાં આવ્યા ..એમના મજાકિયા મેમે બનાવવામાં આવ્યા …જો કે આ બધી બળતરામાં ક્રિયેટીવીટી ઓછી અને હલકું મનોરંજન વધારે જોવા મળ્યું . પણ શું છે કે દરેક ટ્રોલીગ વખતે થાય છે એમ આમાં પણ આવ દેખા ના તાવ ની જેમ બધા અપની અક્કલ વાપર્યા વગર ફોરવર્ડ પણ કરવા માંડ્યા …!!! અસલમાં ઘણાને એવું લાગે છે કે વર્ષોથી ભજનો ગાતા અનુપજીને પ્રેમમાં પડવાનો અધિકાર છે જ નહિ !! જો કે એમના ઘણાને કદાચ એ ખબર નહિ હોય કે અનુપજી આ અગાઉ ત્રણ વાર ઘોડે ચડી ચુક્યા છે ..!! અને આ અફેર પણ છેલ્લા ૩ વર્ષથી બધાથી છુપાવીને ચાલતું હતું ….નિશાના પર એટલા માટે આવ્યા કે બીગ બોસ જેવા જાહેરમંચ પર આની જાહેરાત કરી એ જ …!!!

ખેર આમાં સારી વાત એ છે કે બળતરાવીરોના આકરા વાક્પ્રહારોથી અત્યારે તો આ વિચિત્ર જોડી ઘણી દુર છે અને બીગબોસના ઘરમાં એમને તો ખબર જ નથી કે બહાર દુનિયા એમના નામના કેટલા છાજીયા લ્યે છે પણ સોચનેવાલી બાત યે હૈ ઠાકુર કી આમાં ખોટું ક્યા છે અને શું છે ? શું ખરેખર આમાં સમાજસુધારાની ભાવના છે કે પછી ઓલટાઈમ અવેલેબલ ઈર્ષાનું તત્વ છે ? શું ખરેખર સમાજ આવી જોડીઓને હજુ પણ સ્વીકારવા તૈયાર નથી કે પછી ‘ કાગડો દહીંથરું લઇ જાય ‘ એ જોવાતું નથી ??? જો કે આ તો બિગબોસનું ઘર છે અને બધા જાણે છે એમ કે બીગબોસ ની દરેક સીઝન આવા કૈક ને કૈક ગતકડાં કરવા માટે જાણીતી છે જ એટલે બિગબોસ પબ્લીસીટી લેવલ પર વિચારીએ તો આ રીશ્તાની સાચી સચ્ચાઈ તો આ બંને બિગબોસના ઘરમાંથી બહાર નીકળે ત્યારે જ ખબર પડે પણ એ ખબર પડે એ પહેલા ‘ હાય હાય …આવું તે હોતું હશે ?” કહેનારાઓ નીકળી પડ્યા છે ઉસકા ક્યા કરે બાબુજી ….?

આવી જ હાય હાય આપણી દેશી ગર્લ પ્રિયંકાએ નીક સાથે સગાઇ કરેલી ત્યારે પણ થયેલી . નીક્ભાઈ પીસી બેબી કરતા માત્ર ૧૦ વર્ષ જ નાનો છે . વાંધો નીકડા ને નહોતો કે પીસી ને પણ નહોતો ..બસ વાંધો હતો તો શોશિયલ મીડિયાના ટેકે ઉકળાટ ઠાલવતા લોકોને ….!!! ખેર ખુદા કા શુકર હૈ કી નીક કે પીસી એ આ મજાક – કમ – બળતરાઓનો કોઈ જવાબ આપવાનું ઉચિત ન માન્યું અને એય ને હાથમાં હાથ નાખીને ફરતા હોય એવા ફોટાઓ અપલોડ કરવાનું ચાલુ રાખ્યું ..!!! ને આમેય જે સોસાયટીમાંથી નીક આવે છે અને પીસી જ્યાં કામ કરે છે એ અમેરિકન કલ્ચરમાં આવી હાય હાય નથી થતી . પણ ખબર નહિ આપણે હજુ બીજાની પસંદ-નાપસંદ માં આપણું નાક ઘુસાડવાનું બંધ કરતા નથી શીખ્યા ..!! અને એમાયે વાત જો પ્રેમની હોય તો પછી એ ચાહે સેલીબ્રીટી હોય કે પછી પોળ-સોસાયટી કે શેરીના પ્રેમીઓ આપણે એમના વતી સારું શું અને નરસું શું એ વિષે જજમેન્ટલ બનવાના બનવાના અને બનવાના જ …!!!

હા એ અલગ વાત છે કે ઘણા કેસોમાં પ્રેમી યુગલોમાં દેખતા આંધળા થઇ જતા હોય છે એવા વખતે હજુ એમને શું સારું રહેશે અને શું નરસું એનું જ્ઞાન આપીએ તો ઠીક છે પણ અનુપ કે પીસી જેવા કેસમાં તો ઠાલી બળતરાથી વિશેષ કઈ હોય એવું લાગ્યું નહિ ..!!! કદાચ ટ્રોલ કરવાવાળાઓને એવું લાગ્યું હશે કે અનુપજી માત્ર ને માત્ર ભજન જ ગાયા કરે અને સાધુ-સંત થઈને જ જીવે કે પછી પ્રિયંકા એના જેટલી કે એનાથી મોટી ઉમરના હારે જ લગન કરે ..!! ઘણાને એ બળતરા થઇ કે આવા ઓલ્ડમેન ને આવી બોલ્ડ અને બુટીફૂલ જીએફ મળે જ કેવી રીતે ? પણ આ ટ્રોલ કરવાવાળા એ ભૂલી ગયા કે અહી મામલો દિલનો છે – લાગણીઓનો છે – પ્રેમનો છે – બે દિલના ધડ્કાવાનો છે …!! અને પ્રેમ- ઈશ્ક-મુહોબ્બત આવું ક્યાં જુવે છે ભૈયા…!! એ જાતી – ધર્મ અને ઉમરનો ખ્યાલ ક્યા રાખે છે ? ‘ પ્યાર કિયા નહિ જાતા હો જાતા હૈ “ જેવું જ આ બંને કેસમાં થયું છે એમ અત્યારે તો કહી શકાય ..!!!

ખેર અનુપ-જસલીનવાળા મામલામાં પબ્લીસીટીનો એન્ગલ બાદ કરીને આગળ વધીએ તો એમ કહેવાય કે આમેય પ્રેમનો મામલો પહેલેથી જ નાજુક ગણાય છે પણ કેટલીક પ્રેમકહાની એટલી નાજુક હોય છે કે વાત ફેલાતા જ પ્રેમીઓની વાટ લાગી જતી હોય છે . બિગબોસ ૧૨ના ઘરમાં અત્યારે રહેતી દીપિકા કક્કડે જ્યારે પોતાના સાથી હીરો શોએબ સાથે લગ્ન કર્યા ત્યારે આવા જ ટ્રોલનો સામનો કરવો પડેલો ..!! સવાલ એ જ થાય કે કોઈ પ્રેમમાં છે એ આપણામાંથી મોટાભાગનાને કેમ પચતું નહિ હોય ? કોઈના પ્રેમને આપણે હમેશા ધર્મ-જાતી કે ઉમરના ત્રાજવે જ કેમ તોળવા માટે સદૈવ તૈયાર હોઈએ છીએ ? આવી જ વાત આપણી હોય તો આપણે ‘ ઇટ્સ માય લાઈફ ‘ કહીને છટકી જતા હોઈએ છીએ પણ આ લોકો કે જાહેર જીવનમાં છે કે સેલેબ છે એને તો ‘ તારાથી આવું ના જ કરાય ‘ આવી ધમકીઓ પરાણે આપી દેતા હોઈએ છીએ . સંસ્કૃતિની દુહાઈઓ અને સામાજિક નીતિનિયમો આવા વખતે જ યાદ આવે છે . ઘણાની ઘરની અને બહારની લાઈફ અલગ અલગ હોય છે , બબ્બે મુખવટા ચડાવીને જીવતા હોય છે એનો વાંધો નહિ પણ જો કોઈ નિખાલસતાથી એકરાર કરે તો માર્યા ઠાર ….!!! જો કે શોશિયલ મીડિયાના શુરવીરો રોજ કોઈ ને કોઈને ટ્રોલ કરવાનું બહાનું શોધતા જ હોય છે અને હવે તો એવું છે કે આ બધું બહુ કોમન અને ક્ષણિક ઈન્ટરેસ્ટવાળું થતું જાય છે અને જે લોકો આના શિકાર બને છે એ પણ થોડા ખુલાસાઓ પછી આમ લાઈફ જીવવા માંડે છે . પણ કોઈકની લાઈફમાં ધરાહાર દૂરબીન લઈને અને ડંગોરો લઈને કુદી પડવાની આપણી આ (અ)શુભ ચેષ્ટા વખતે ખાલી એટલું યાદ રહે કે ઇટ્સ ધેર લાઈફ ….તોય ગંગ નહાયા …!!!!

– અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૨૩ સપ્ટેમ્બર ૨૦૧૮ )

 

ખુલ જા સીમ સીમ !!!!

Featured

ખુલ જા સીમ સીમ !!!!

એ પ્રાથમિક સ્કુલમાં પણ નાપાસ …અને એ પણ એક વાર નહિ પણ બે બે વાર …..જેમતેમ પ્રાથમિક પાસ કરીને મિડલ સ્કુલમાં ગયો તો ફેલ્યોરનો ફિગર વધુ મોટો થઇ ગયો ….મિડલ સ્કુલમાં ત્રણ વાર ફેઈલ …!!! જેમતેમ સ્કુલ ખત્મ કરીને કોલેજમાં પ્રવેશ મેળવવાની કોશિશ કરી તો ત્યાં પણ ‘ ફેલ્યોર જીન ‘ હાજર ….ભાઈશ્રી ત્યાં પણ એન્ટ્રન્સ એકઝામમાં ત્રણ વાર ફેઈલ ….!! જગવિખ્યાત હાવર્ડમાં એપ્લાય કર્યું અને ૧૦ – ૧૦ વાર એડમીશન એપ્લીકેશન રીજેક્ટ ..!!!! વેઇટ વેઇટ ….વાત ખાલી કોલેજ કે યુનીવર્સીટીના એડમીશન પુરતી જ નથી પણ ભાઈ જ્યારે નોકરી શોધવા નીકળ્યા તો નસીબની બલિહારી જુઓ કે જગવિખ્યાત ફૂડ કંપની કેએફસી ચીનમાં આવી ત્યારે નોકરી માટે ૨૪ લોકોના ઇન્ટરવ્યુ થયા …જેમાંથી ૨૩ સિલેક્ટ થઇ ગયા અને રીજેક્ટ થયો તો આ એક માત્ર જે પ્રાથમિક શિક્ષણથી જ જીંદગીમાં રીજેક્ટ થતો આવેલો …!!!!! ઈનફેક્ટ શિક્ષણ અને નોકરીની વાત છોડો પણ જ્યારે ખુદનો બિજનેસ શરુ કર્યો તો એમાં પણ શરૂઆતી બીજ્નેસમાં ફેઈલ ….!!!! હવે તમને એમ થશે કે આટઆટલી પછડાતો ખાધા પછી તો આ ભાઈ શેના ઉભા પણ થઇ શક્યા હશે …?? પણ , ના આટઆટલી નિષ્ફળતાઓ પોતાના પોર્ટફોલીયોમાં સાચવી રાખેલો આ માણસ આજે એશિયાનો સૌથી ધનિક વ્યક્તિ છે અને દુનિયાના ટોચના ધનિકોમાં સ્થાન પામે છે …!!!! વાત છે નિષ્ફળતામાંથી સફળતાને ખુલ જા સીમ સીમ કહેનાર ‘ અલીબાબા ‘ ના સ્થાપક જેક માં ની ..!!

“ અલીબાબા “ ઈ-કોમર્સ બિજનેસનો સ્થાપક જેક એટલા માટે યાદ આવ્યો કે હમણાં જ એણે જે કંપનીને પોતે ખુનપસીનાથી મહાન અને જગપ્રસિદ્ધ બનાવી છે એના ચેરમેનપદેથી હટવાની જાહેરાત કરીને બધાને ચોકાવી દીધા …ચોકાવી એટલા માટે દીધા એમ કહી શકાય કે જેકની ઉમર હજુ માત્ર ૫૪ વર્ષની જ છે અને આવતા સપ્ટેમ્બરમાં ૫૫ થતા જ ચેરમેન નહિ રહે , જો કે ‘ અલીબાબા ‘ ના બોર્ડ ઓફ ડાયરેક્ટરમાં રહેશે પણ આજે જ્યારે કબરમાં પગ લટકતા હોય છતાં લોકો ચેરમેનશીપ નથી છોડતા એવામાં જેકનો આ નિર્ણય સલામી યોગ્ય છે …!! એનીવેય્ઝ …જેક તો એક મધ્યમવર્ગીય પરિવારમાં જન્મેલો , ભણવામાં પણ આગળ લખ્યું એમ કાઈ ખાસ ઉકાળે એમ હતો નહી પણ એને અંગ્રેજી શીખવાનું જબરદસ્ત ઘેલું લાગેલું . જેમ આગળ જતા એને ઇન્ટરનેટ ભવિષ્યનો બિજનેસ છે એવી સ્ફૂરણા થવાની હતી એમ નાની ઉમરમાં જ એને થયું કે આગળ વધવા માટે અંગ્રેજી પાવરફુલ હોવું જોઈએ . એ સમયે ચીનમાં મુખ્ય ભાષા ચીની જ હતી અને ટ્યુશન રાખવાના પૈસા તો હતા નહિ એટલે ૧૩ વર્ષનો જેક રોજ સાઈકલ લઈને એક ફાઈવસ્ટાર હોટેલ પહોચી જતો કે જ્યાં વિદેશી ટુરીસ્ટો ઉતરતા , જેક એમનો ગાઈડ બનતો અને બદલામાં અંગ્રેજી શીખતો .૯ વર્ષ ગાઈડ બનેલા જેકનું અંગ્રેજી કડકડાટ થઇ ગયું . આવા જ કોઈ એક મિત્ર બની ગયેલા ટુરીસ્ટે બોલવામાં અઘરું એવું જેકનું અસલી નામ ‘ માયુંન ‘ ની બદલે એને જેક કહેવાનું શરુ કર્યું અને એ જ એનું નામ બની ગયું …!!

ગાઈડના કામે શીખેલા અંગ્રેજીના પ્રતાપે ગ્રેજ્યુએટ થયેલા જેકને અનેકો રિજેક્ટેડ જોબ્સ પછી અંગ્રેજી શિક્ષકની નોકરી તો મળી પણ જેક ને તો કૈક કરી બતાવવું હતું , શિક્ષકની નોકરી છોડીને જેકે એક ટ્રાન્સલેશન સેન્ટર ખોલ્યું. આ સેન્ટરમાં અંગ્રેજીમાંથી ચીની અને ચીની ભાષામાંથી અંગ્રેજીમાં અનુવાદનું કામ કરવામાં આવતું હતું. ૯૪-૯૫મા જેક ધંધાના કામે અમેરિકા ગયા અને આ અમેરિકા મુલાકાતે એમના જીવનની દિશા બદલી નાખી . ત્યાં જ જેકે પ્રથમ વાર કોમ્પ્યુટર અને ખાસ તો ઇન્ટરનેટ વિષે જાણ્યું કેમકે ચીનમાં તો ઇન્ટરનેટ સાવ અજાણી ચીજ હતી . ઇન્ટરનેટ સાથે ઓળખાણ કરાવનાર મિત્ર સ્ટુઅર્ટે જેકને કહ્યું આમાં જે માંગો એ મળે , જેકે ચીનના બીયર ( રીછ ) વિષે સર્ચ કર્યું પણ દુનિયા આખીના રીછ વિષે માહિતી આવી પણ ચીનના રીંછ વિષે નો રીઝલ્ટ ..!!! જેક ને લાગી તો આવ્યું પણ એની સાથે સાથે એના દિમાગમાં ઇન્ટરનેટથી ચીનમાં વેપાર કરવાનો પાયો નંખાય ગયેલો . ૧૯૯૬મા જેકે ચીન પહોંચતા પોતાના મિત્રોનો સહયોગ લઈને ચીન વિશે જાણકારી આપતી પહેલી વેબસાઈટ બનાવી ‘અગ્લી’. ચીનની એ પહેલી ઓનલાઈન ડિરેક્ટરી હતી. ચીનમાં એની ખુબ ચર્ચા પણ થઇ અને શરુ થયાના થોડા કલાકોમાં ખુબ ઇન્ક્વાયરી પણ આવી , પરિણામે જેક ચીનમાં મિસ્ટર ઈન્ટરનેટના નામથી જાણીતા થયા. પણ એ સમયે ચીનમાં બહુ ઓછા ઘરોમાં ઇન્ટરનેટ હતું પરિણામે થોડા સમય પછી આ ચાઈના પેજ થયું બંધ …!!! પણ જેક ને રસ્તો મળી ગયેલો ઇન્ટરનેટથી વેપાર કરવાનો અને આવનારા વર્ષોમાં એજ થવાનું હતું …!!

હિમત હાર્યા વગર પત્ની અને મિત્રોના ૨0૦૦૦ ડોલરના રોકાણ સાથે જેકે ‘ ચાઈના યેલો પેજીસ ‘ નામની કંપની બનાવી કે જે બીજી કંપનીઓ માટે વેબ્સાઈટ બનાવતી હતી પણ આ કંપની ને પણ તાળા લાગી ગયા . જેકે વાણીજ્ય મંત્રાલયમાં નોકરી તો સ્વીકારી લીધી પણ કશુક કરવાનો કીડો એને એમ જંપવા દે એમ હતો નહી . અંતે ૧૯૯૯મા ૧૭ જેટલા દોસ્તોને ઈ-કોમર્સ સાઈટ શરુ કરવા સમજાવીને અને ૮૦ દોસ્તો પાસેથી ભેગા કરેલા ૬૦ હાજર ડોલરની રકમથી શરુ થઇ “ અલીબાબા “ ની સફર …!! થોડા વખત પહેલ આ જ કોલમમાં એમેઝોન ના જેફ બેજોસની સફળતાની વાત કરેલી . જેક અને જેફ ની સંઘર્ષગાથા ઓલમોસ્ટ મળતી આવે છે . ઈનફેક્ટ જેક ને તો શરૂઆતમાં કોમ્પ્યુટરનું બિલકુલ જ્ઞાન હતું નહિ જો કે પછીથી એણે એ જ ઇન્ટરનેટને માધ્યમ બનાવીને વિશાલ ઈ-કોમર્સ સામ્રાજ્ય ઉભું કર્યું . જો કે, કંપનીની શરૃઆત એટલી સારી ન હતી કેમકે પહેલાં ત્રણ વર્ષ સુધી કોઈ નફો થયો નહીં. એનું કારણ હતું ઓનલાઈન પેમેન્ટની કોઈ પદ્ધતિ જ ન હતી અને ઉપરથી કોઈ બેંક તેમની સાથે કામ કરવા તૈયાર ન હતી. આનો ઉકેલ લાવવા જેકે સ્વતંત્ર પેમેન્ટ સિસ્ટમ ‘અલી પે’ નામથી ડેવલપ કરી. સૌએ આની હાંસી ઉડાવી. પણ આજે દુનિયાભરમાં લગભગ ૮૦ કરોડ લોકો ‘અલી પે’નો ઉપયોગ કરે છે.

ચીને પોતાની બજારમાં વિદેશી કંપનીઓને લગભગ નોએન્ટ્રી આપેલી એનો જેકે ભરપુર લાભ ઉઠાવ્યો . ચીનની કોમ્યુનીસ્ટ સરકારને પોતાનામાભરોસો મુકાવીને જેકે એમેઝોન જેવી કંપની માટે પણ ચીનમાં કોઈ જગ્યા બચાવી નહિ .અને ચીનની વિશાળ કન્ઝ્યુમર માર્કેટમાં જુદા જુદા રૂપે પગ જમાવ્યો . આજે ચીનમાં ૬૦ કરોડ નેટયુઝર્સ છે . અલીબાબા ગ્રુપ ચીનની સૌથી મોટી શોપિંગ વેબ્સાઈટ “ ટાઓબાઓ” ચલાવે છે એટલું જ નહિ પણ “ અલીએક્સપ્રેસ” નામે નાના વેપારીઓને પ્લેટફોર્મ પૂરું પડતી રીટેલ સાઈટ , “ ફ્લીગી” નામે ઓનલાઈન ટ્રાવેલ પ્લેટફોર્મ , “ લઝાડા” નામે સિંગાપોર, મલેશિયા , ફિલીપાઈન્સ , થાઈલેન્ડ માં રીટેલ સાઈટ , “ ઈલેવન મેઈન “ નામે અમેરિકન ઓનલાઈન સ્ટોર ,ચલાવે છે . કલાઉડ કોમ્પ્યુટીંગ માં પણ અલીબાબા છે તો પેમેન્ટ માટે ‘ અલી પે ‘ છે તો મનોરંજન ક્ષેત્રે અલીમ્યુઝીક , અલીબાબા પિક્ચર્સ પણ છે . ‘ અલીહેલ્થ ‘ , ‘ અલીસ્પોર્ટ્સ ‘ ઉપરાંત પ્રકાશન અને ઇન્વેસ્ટમેન્ટ ફંડ ક્ષેત્રે પણ જેક ની હાજરી છે . બે દશકોની અંદર જ એમની કંપની દુનિયાની વિશાળકાય કંપનીઓમાં શામિલ થઈ ગઈ હતી. અત્યારે એમની કંપનીની વેલ્યુ લગભગ 420.8 અરબ ડોલર (લગભગ 30,284 અરબ રૂપિયા) છે. ચીનમાં તો એ ભગવાનની જેમ પૂજાય છે . ભારતની વાત કરીએ તો અલીબાબા ‘ પેટીએમ ‘ ના ‘ પેટીએમ મોલ “ અને ‘ બીગબાસ્કેટ’ માં ભાગ ધરાવે છે અને મુકેશભાઈની રિલાયન્સ રીટેલમાં હિસ્સો ખરીદવાની વેતરણમાં છે . આવો જેક આવતા વર્ષે રીટાયર તો થઇ જશે પણ એ પછી પણ લોકોને શિક્ષણ આપવાના પોતાના મૂળ શોખ પર વધુ કામ કરવાનો છે આ માટે જેકે ૨૦૧૪માં જ પોતાને નામે શિક્ષણ ફાઉન્ડેશનની રચના કરી છે જે શિક્ષણ ક્ષેત્રને સમર્પિત એક સખાવતી સંસ્થા છે….મૂળ શિક્ષક જીવ ખરો ને …!!!!

– અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૧૬ સપ્ટેમ્બર ૨૦૧૮ )

આમરણાંત ઉપવાસ : વિરોધનું સચોટ શસ્ત્ર !!!!

Featured

આમરણાંત ઉપવાસ : વિરોધનું સચોટ શસ્ત્ર !!!!

વર્ષ ૧૯૨૯મા જતીનદાસે લાહોર જેલમાં ભૂખ હડતાલ કરેલી . જતીનદાસની માંગ હતી કે ભારતીય રાજનીતિક કેદીઓ સાથે પણ યુરોપિયન કેદીઓ જેવો વ્યવહાર કરવામાં આવે . બ્રિટીશ પોલીસે જતીનદાસની ભૂખ હડતાલ તોડવાની ખુબ કોશિશો કરી , ઈનફેક્ટ પરાણે મોઢામાં ખોરાક પણ નાખી જોયો પણ જતીનદાસ ટસ ના મસ થયા નહિ અને અંતે બ્રિટીશ સરકાર ઝુકી …!!! આ છે આમરણાંત ઉપવાસની તાકાત …!! આમ જોવા જાવ તો અનશન યાની કી ઉપવાસ પછી ચાહે એ એક દિવસના હોય કે આમરણાંત , ધરણા અથવા તો વિરોધ પ્રદર્શન અને પદયાત્રા એ ભારતીય રાજકારણના અભિન્ન અંગ બની ગયા છે , ઈનફેક્ટ એમ કહી શકાય કે આયે દિન આ ત્રણમાંથી એકાદનો ઉપયોગ તો રાજકીય પાર્ટીઓ કરતી જ રહેતી હોય છે . સત્તાસ્થાને બેઠેલા લોકો જ્યારે તમારી માંગણી કે વાતને નજરઅંદાજ કરે ત્યારે અનશન એકદમ સચોટ અને લોકપ્રિય શસ્ત્ર છે અને મોટાભાગની રાજકીય પાર્ટીઓ આનો છૂટથી ઉપયોગ કરતી થઇ ગઈ છે ..!!!

જો કે ખાલી રાજકીય પાર્ટીઓ જ શુકામ ? અનશનનું શસ્ત્ર તો હર આમ આદમી ઉઠાવતો થઇ ગયો છે . અને આમ પણ માંગણી મનાવવાનું કે એટલીસ્ટ એ માટે સામેની પાર્ટી કે વ્યક્તિને ચર્ચાવિચારણા કરવા માટે મજબુર કરી મૂકતું આ શસ્ત્ર હર કોઈ ઉઠાવી શકે છે અને અપને ઇન્ડીયામાં તો અનેકો વિવિધ માંગણીઓ માટે અનશન કે ઉપવાસ આંદોલનો ચાલતા હોય એની હવે કોઈ નવાઈ છે જ નહિ . અનશન કે ઉપવાસનો એટલો છૂટથી ઉપયોગ થાય છે કે વિરોધ પક્ષ સત્તાધારી પક્ષની વિરોધમાં અનશન કે ઉપવાસ કરે તો એ ઉપવાસના વિરોધમાં સત્તાધારી પક્ષ પણ ઉપવાસ પર બેસી જાય એવા બનાવો તાજેતરમાં નોંધાયા છે ..!!! છે ને જબરું …!! પણ આમરણાંત કે પછી લીમીટેડ ઉપવાસ કે અનશનનું શસ્ત્ર વિરોધનું અસરકારક હથિયાર તો છે જ એમાં ના નહિ અને લોકતંત્રમાં આ હથિયારનો ઉપયોગ કરવાની છૂટ દરેકને છે એમાં પણ એગ્રી …!!! હાએ વાત અલગ છે કે એના પરિણામ પરિસ્થિતિ મુજબ આવતા હોય છે , પણ સરકાર – સત્તા કે કોઈ વ્યક્તિ પર દબાવ બનાવવાનું આ અમોધ શસ્ત્ર છે જ ..!!!

ઉપવાસનું આપણા દેશમાં ધાર્મિક મહત્વ છે ….તહેવારોમાં અને વ્રતોમાં ઉપવાસો આવતા રહે છે અને પુણ્યનું ભાથું બંધાવતા રહે છે . પત્નીઓ પોતાના પતિ માટે ઉપવાસ રાખે છે તો ઘણા માટે ઉપવાસ એટલે ઈશ્વર સાથે જોડાવાનું નિમિત ..!! પણ રાજનીતિમાં ઉપવાસનું અલગ મહત્વ છે . અહી ઉપવાસ ક્યારેક સત્તા માટે કરાય છે તો ક્યારેક સત્તા પાસે પોતાની માંગણીઓ મનાવવા માટે …!! ખેડૂતોના દેવામાફી અને પાટીદાર અનામતની માંગણીઓ લઈને આમરણાંત ઉપવાસ પર બેઠેલા હાર્દીકનો આ લખાય છે ત્યારે ૧૪ મો દિવસ છે , હજુ સુધી તો કોઈ નિવેડો આવ્યો નથી પણ અણસાર છે કે હાર્દિકના આ અડગ અનશનના પ્રતાપે બહુ જલ્દી કોઈ ફેંસલો આવી જશે એ ચોક્કસ છે . કોઈ પણ સરકારને લોકલાગણીઓ પોતાના વિરુદ્ધ જાય એમાં બિલકુલ રસ હોય નહિ અને સ્વાભાવિકપણે અનશન વખતે સરકાર સાઈડમાં અને ઉપવાસી લાઈમલાઈટમાં આવી જતા હોય છે એટલે શાણપણ એમાં જ હોય કે અનશનનો ખેલ યેનકેનપ્રકારે બંધ થાય અને મુદ્દાની વાત પર કોઈ સહમતી બને …!!! અનશન વખતે કોઈ પણ સત્તાધારી પક્ષ આ જ મોડમાં વિચારતો હોવાનો એ નક્કી છે .

અનશન અને એ પણ આમરણાંત એ એકદમ સટીક વાત છે માંગણીઓનો સ્વીકાર કરાવવાની , આ તીર એવું છે કે અચૂક નિશાના પર લાગે જ , જો કે ઘણી વાર અનશન છોડતી વખતે મળેલી બાંહેધરીઓના અમલ માટે ફરીથી અનશન પર પણ બેસવું પડે …!!! આ તો ઇન્ડિયા છે અને જો માંગણી રાજનીતિક હોય તો ઇન્તેઝાર પણ કરવો પડે …પણ આ અનશન શસ્ત્ર છે ચોટડુક એની ના નહિ …!!! જો કે ઘણા અનશનો પરાણે પારણા કરીને પણ વિરામ પામતા હોય એવા બનાવો પણ નોંધાયેલા છે જ …!! જો કે આનો સૌથી સચોટ ઉપયોગ મહાત્મા ગાંધીજીએ કરેલો એમાં કોઈ બેમત નથી . ગાંધીજીએ ઉપવાસ – અનશનનો સચોટ રાજકીય હથિયાર તરીકે અને એનાથી લોકોની લાગણીને વાચા આપવાના કામ તરીકે કરેલો . આઝાદીની લડાઈ અનેકો મોરચે લડાઈ હતી એમાંનો એક મોરચો હતો અનશન …!! ગાંધીજીએ અહિંસા અને સત્યાગ્રહની સાથે સાથે અનેકવાર ભૂખહડતાલ પણ કરેલી . ગાંધીજીએ પોતાના પુરા જીવન દરમ્યાન ૧૫ વખત ઉપવાસ આંદોલનો કર્યા એમાંથી ત્રણ વાર તો એ અનશનો ૨૧ દિવસ સુધી ચાલેલા . ગાંધીજીએ અંગ્રેજોથી દેશને આઝાદ કરાવવા તો ક્યારેક ભારતના ભાગલા વખતે થયેલા તોફાનોને અટકાવવા કલકત્તાથી લઈને દિલ્હી સુધી અનેકોવાર ઉપવાસો અને અનશનો કર્યા અને ગાંધીજીના ઉપવાસોની એવી અસર થયેલી કે એ વખતે તોફાનોમાં તોફાનીઓ પોતાના હથીયારો બાપુ પાસે મુકીને માફી માંગી જતા …!!

બાપુ પછી પણ દેશમાં અનેકો નેતાઓએ ઉપવાસ કે અનશનનો માર્ગ લીધો . વાત વિસ્થાપિતોની હોય કે પર્યાવરણની કે નાગરિક અધિકારોની , આ દેશમાં બાપુ ગયા પછી પણ બાપુ ચિંધ્યા માર્ગે અનશનો કરીને સત્તાપક્ષ કે જે તે લાગુ પડતી સંસ્થા/વ્યક્તિને ઢંઢોળવાનો પ્રયત્ન થતો રહ્યો છે ..!! એમાં ખાસ કરીને ગાંધીજીથી આગળ વધીએ તો યાદ કરવું પડે રામલીલા મેદાન પર અન્ના હજારેનું જનલોક્પાલ બીલ માટેનું અનશન શસ્ત્ર…!!! જો કે એ અલગ વાત છે કે અનશન અન્નાએ કર્યા અને એનો લાભ અરવિંદ કેજરીવાલ એન્ડ કંપનીએ રાજનૈતિક કેરિયર બનાવવામાં કર્યો …!!! હા આવું પણ બને છે , અનશનનો આમ તો મુખ્ય હેતુ માંગ મનાવવાનો જ હોય છે પણ એની સાથે સાથે જો અનશન રાજકીય હોય તો એનો રાજકીય લાભ કેટલો અને કેમ લઇ શકાય એના પર અનશનકર્તાની બીજી આંખ હોવાની જ ..!! ખેર એ જ રામલીલા મેદાન પર કાળાનાણા વિરુદ્ધ અનશન પર બેઠેલા બાબા રામદેવ ને લઠમાર પોલીસથી ભાગવું પડેલું …!!! દલિત આંદોલનોમાં થયેલી હિંસાની વિરુદ્ધ કોંગ્રેસે એક દિવસના ઉપવાસ કરેલા ( જો કે છોલે-ભટુરા વાળા ફોટાઓએ એમાં ફાચર મારેલી એ અલગ વાત છે !!! ) . એમ તો અત્યારે વડાપ્રધાન રહેલા નરેન્દ્ર મોદી જ્યારે ગુજરાતના સી.એમ. હતા ત્યારે ૨૦૧૨મા દરેક જિલામાં ઉપવાસ પર બેસીને સહિષ્ણુતા ફેલાવવાનો દાવો કરેલો …મોદીસાહેબને ઉપવાસ ૨૦૧૨મા ફરી સત્તાસ્થાને બેસવારૂપે ફળેલા..!! તો દિલ્હીમાં અરવિંદ કેજરીવાલ કોંગ્રેસી શાશન અને શીલા દીક્ષિત વિરુદ્ધ અનશન પર બેઠેલા બદલામાં અરવિંદજી વિધાનસભામાં કોંગ્રેસના સુપડા સાફ કરીને મુખ્યમંત્રીની ગાદી સુધી પહોચી ગયા …!!! તો ૨૦૦૬મા ટાટા નેનોના સિંગુર પ્લાન્ટના વિરોધમાં ૨૫ દિવસ ભૂખ હડતાલ પર રહેલી મમતાને એ પછીની ચૂંટણીમાં સરકાર રચવા જેટલી બહુમતી મળી ગયેલી …!! લીસ્ટ લાંબુ બની શકે એમ છે …..!!!!

કટશોર્ટ , આમજનતા પોતાની તકલીફો સત્તાના બહેરા કાન સુધી પહોચાડવા માટે ઉપવાસો અને અનશનો રાખતી થઇ ગઈ છે પણ રાજકીય ઉપવાસો અને અભી બોલા અભી ફક જેવા અનશનો ને લીધે ક્યારેક સચોટ હથિયાર ગણાતું અનશન આજે મજાક બનીને રહી ગયું છે એ પણ હકીકત છે . કુલડીમાં કયો ગોળ ભંગાવાનો છે એની ગંધ જનતાને આવી જતી હોય છે . જો કે સારી બાજુ એ પણ છે કે ભલે કોઈને રાજનીતિક કે સામાજિક લાભ થતો હોય તો પણ જો અનશનોનો હકારાત્મક હલ આવતો હોય તો ગાંધીબાપુના આત્માને ચોક્કસ આનંદ થવાનો …બાકી તો અનશન સફળ થાય તો સમાજને ફાયદો થાય કે નાં થાય પણ રાજનીતિક પકડ અને ઉપવાસમાં ઘટેલા વજનના બદલામાં પર્સનલ વજન તો વધવાનું જ ……!!!!!! નથીંગ રોંગ ..!!

  • અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૯ સપ્ટેમ્બર ૨૦૧૮ )

છોટા પેકેટ ……બડા ધમાકા …!!!!

Featured

છોટા પેકેટ ……બડા ધમાકા …!!!!

હમણાં એક સુપર સ્ટોરમાં જવાનું થયું …બાકી બધું તો ઠીક પણ એક નાના પેકીંગમાં રહેલી વસ્તુ જોઇને ચોંકી જવાયું …!!! લગભગ ૧૦૦ ગ્રામના પેકમાં હતા આંબલીના કાતરા …!!! તારી ભલી થાય ચમના…!!! કાતરા ને એ પણ છોટા પેકીંગમાં ..!!! ખરેખર માન થઇ ગયું માર્કેટિંગ અને સેલ્સ ડીપાર્ટમેન્ટ પર . એટલા માટે નહિ કે હેન્ડી પેકીંગમાં આ વિસરાયેલી પણ અનમોલ વસ્તુ હતી પણ જેના પણ દિમાગમાં આ આઈડિયા આવ્યો એને સેલ્યુટ ..!!! વાત ખાલી કાતરાની નથી પણ આજકાલ લગભગ દરેક ચીજ પછી ચાહે એ ખાવાની હોય કે વાપરવાની પણ નાના અને હેન્ડી પેકીંગમાં મળતી થઇ ગઈ છે ..!!! એક વખત એવો પણ હતો કે ના પહોચી શકતા લોકો ૨૦૦ કે ૫૦૦ ગ્રામ તેલ લેવા કરીયાણાવાળાની દુકાને નાની બરણી કે ડબ્બી લઈને જતા , આજે એવી કોઈ જરૂર નથી . ગલીના નાકે આવેલા કોઈ પણ સ્ટોરની મુલાકાત લઇ લ્યો માથામાં નાખવાના તેલથી લઈને ખાવાનું તેલ ….સોઈથી લઈને સોનપાપડી કે પછી શેમ્પુથી લઈને સુકોમેવો ..બધું જ છોટા પેકમાં હાજર છે …!!!

કિલો કે અર્ધો કિલો ખાખરા નથી લેવા ?- નો પ્રોબ્લેમ , ૧૦૦-૨૦૦ ગ્રામનું પેકેટ હાજર છે …એકલા જ છો ને મોટી ટુથપેસ્ટ નથી જોઈતી ?- નો પ્રોબ્લેમ ૫ કે ૧૦ રૂપિયાની મીનીટ્યુબ હાજર છે …..શેમ્પુની મોટી બોટલના ૧૫૦ કે ૨૦૦ રૂપિયા નથી રોકવા ?- નો પ્રોબ્લેમ એક કે બે રૂપિયાના સેસે હાજર છે …તેલ , સાબુ , બિસ્કીટ , નાસ્તા , શેમ્પુ , મુખવાસ , પાનમસાલા , મરીમસાલા …સોફ્ટડ્રીંક …ચા અને ઇવન દૂધ પણ નાના પેકમાં હાજર છે …!!! યુ નેમ ઈટ ..એનીથિંગ …પેલા બોટલમાંથી નીકળતા જીનની જેમ તમે જે માંગો એ ચીજ ઓલમોસ્ટ નાના પેકેટ – સેસે માં ઉપલબ્ધ થઇ ગઈ છે . માર્કેટિંગ અને વેચાણનો આ કીમિયો અત્યારે પુરજોશમાં સફળ થઇ રહ્યો છે અને એ એટલા સુધી કે લગભગ નધી જ મોટી કે નામી કમ્પની પોતાના ઉત્પાદનોને શક્ય હોય ત્યાં સુધી નાના પેકેટમાં બજારમાં લાવતી – વેચતી થઇ ગઈ છે . આમાં ગ્રાહકને તો ચાંદી જ ચાંદી છે જ પણ સાથે સાથે ગ્રાહકની ખરીદશક્તિ મુજબ પોતાની પ્રોડક્ટ વેચાવાનો ઉત્પાદકને પણ ફાયદો છે જ ..!!

સુપર સ્ટોરમાં કે ઇવન ગલીના નાકેવાળી દુકાન પર જતી વખતે જો આંખ ખુલી રાખશો તો શરૂઆતમાં આંબલીના કાતરાની વાત લખી એવી અનેકો ચીજો આકર્ષક પેકીંગમાં પેક થઈને લટકતી જોવા મળશે . અને શું છે કે વાપરનારને પણ આસાની કેમકે એક તો જ્યારે જોઈએ ત્યારે મળી જાય અને વધુ રોકાણ પણ કરવું નહિ. મૂળે વાત એમ હતી કે ઇન્ડિયાનું કન્ઝ્યુમર માર્કેટ ઘણું મોટું છે અને દેશી વિદેશી અનેકો કંપનીઓ માટે વેચાણની ભરપુર તકો રહેલી છે પણ આ છોટા પેકેટ ( શેસે ) આવતા પહેલા શું હતું કે મોટાભાગે કંપનીઓ વેચાણ માટે શહેરો પર નિર્ભર રહેતી જ્યારે હકીકત એ હતી કે ભારતમાં વિશાળ ગ્રામ્ય કે સેમી-ગ્રામ્ય વિસ્તાર વધુ છે અને એક રીપોર્ટ મુજબ ભારતની કુલ ગ્રાહક શક્તિનો ૫૫% જેટલો મોટો હિસ્સો ગામડાઓમાં રહેલો છે . પણ સ્વાભાવિક છે કે ત્યાના ગ્રાહકોને આર્થિક પરીશ્થીતીઓને લીધે મોંઘી કે વધુ વજનવાળી વસ્તુઓની કોઈ ખપ નથી આવામાં આઈડીયા આવ્યો નાના પેકેટનો કે જેની કીમત ઓછી હોય , એમાં ચીજ ખપ પુરતી જ હોય , એને ક્યાય પણ લઇ જવું સગવડદાયક બની રહે અને ખાસ તો આ ગ્રામ્ય કે સેમી-ગ્રામ્ય વિસ્તારમાં રહેતા ગ્રાહકોના ખિસ્સાને પણ પરવડે ..!! ગ્રામ્ય શું કામ શહેરી ગ્રાહકો પણ ખુશ ખુશ થવા લાગ્યા .

આમાં ફાયદો બંને બાજુ હતો કેમકે એક તો ગ્રાહકને ઓછા પૈસાના રોકાણમાં એને જોઈતી ચીજ આસાનીથી ઉપલબ્ધ થઇ રહેતી હતી અને બીજું કે ઉત્પાદકને એક ને એક ચીજનો વેપાર વધવામાં મદદ થઇ રહેતી . કંપનીઓ પોતાની પ્રોડક્ટના પ્રચાર માટે પણ શરૂઆત સેસેથી કરતી થઇ ગઈ છે . માર્કેટમાં કોઈ એક પ્રોડક્ટની સેસે અને બોટલ કે પેકેટ પણ ઉપલબ્ધ હોય છે . ગ્રાહકને છોટા પેકેટથી શરૂઆત કરાવીને મોટા પેકેટ સુધી લઇ જવાની પણ આ એક માર્કેટિંગ સ્ટ્રેટર્જી જ છે . જો કે શરૂઆત શેમ્પુથી જ થયેલી . ૧૯૮૦ની શરૂઆતમાં ચીક ઇન્ડિયા કંપનીના ‘ કેવીનકેર’ બ્રાન્ડના ૧ રૂપિયાના શેમ્પુ સેસે એ જબરદસ્ત સફળતા મેળવેલી તો એના જ પગલે પગલે લગભગ એ જ સમયગાળામાં હિન્દુસ્તાન લીવરના ૫૦ પૈસાના સેમ્પુના પાઉચે કન્ઝ્યુમર માર્કેટમાં તહેલકો મચાવી દીધેલો અને પાછળ પાછળ સનસિલ્ક , પેન્ટીન પણ એન્ટ્રી લઇ ચુકેલા. આ બધાની જબરદસ્ત સફળતાથી ઉત્પાદકોને એક નવી દિશા મળી ગયેલી . શેમ્પુનું સેસે માર્કેટ તો હવે વિશાળ બની ગયું છે અને એ એટલા સુધી કે લગભગ ૪૦% શેમ્પુ સેસેમાં જ વેચાય છે . ૫૦ પૈસાનું તો હવે કાઈ આવતું નથી એટલે આજકાલની સેસે માર્કેટિંગ સ્ટ્રેટર્જી એન્ટ્રી લેવલમાં ૧ રૂપિયાથી શરુ થાય છે . માર્ક કરજો કોઈ પણ પ્રોડક્ટનું નાનું પેક લગભગ ૧-૨ રૂપિયાથી શરુ થશે અને માર્કેટમાં પગ જમાવ્યા પછી ૫-૧૦ સુધી વિસ્તાર પામતું જશે . કેડબરી જેમ્સ ૧ રૂપિયાના પેકમાં બજારમાં આવી અને ઈન્સ્ટન્ટ હીટ બની ગઈ અને એ પણ એટલી બધી કે કેડબરીનું એલપીયુ ( લો પ્રાઈઝ યુનિટ ) ૩૦% ગ્રોથ કરી ગયું !!! પારલેના ૧ રૂપિયાનું બિસ્કીટ પેકેટ , પેપ્સી કે કોલાની નાની બોટલ , ડાબર જેવાના નાના પેકેટમાં મળતા ઉત્પાદનો આજે આ છોટા પેકેટ બડા ધમાકાના પ્રતાપે માર્કેટ પર પોતાની પકડ જમાવી રાખી શક્યા છે .

સેસે કે પાઉચ કે છોટા પેકેટને માર્કેટમાં હીટ કરવાના અનેકો પેંતરા માર્કેટિંગ ગીમીક્સના ભાગરૂપે અજમાવાય છે અને એમાં ફાયદો અંતે તો ગ્રાહકનો જ થાય છે પણ કંપની પોતાની પ્રોડક્ટ’ને ગ્રાહકોની નજરમાં જલ્દીથી લાવી શકે છે . જેમકે ઉત્તર ભારતમાં ઓરલ હેલ્થકેરે શેમ્પુના પાઉચ સાથે કાંસકો ફ્રી આપ્યો …શેમ્પુ સુપર હિટ..!!! ઘણી બધી બ્રાન્ડેડ કંપનીઓ પોતાની પ્રોડક્ટની બોટલ કે પેકેટ સાથે પોતાની જ બીજી પ્રોડક્ટનું સેસે કે પાઉચ ફ્રી આપતી થઇ ગઈ છે ..!!! પ્રોડક્ટ સાથે જ શું કામ પુસ્તકો , છાપાઓ અને મેગેજીનોમાં પણ હવે ફ્રી સેસે આપીને પ્રચાર કરાય જ છે …!!! ગ્રાહકની તો ચાંદી જ ચાંદી છે .પ્રચાર એ સેસેની સફળતા માટે મહત્વની વાત છે અને હવે તો ટીવી અને ચેનલો અને સોશિયલ મીડિયા હાજરાહજૂર છે એટલે જંગલમાં આગ લાગે એ ઝડપે નવી પ્રોડક્ટ કે એના સેશેનો પ્રચાર શક્ય છે . ભલેને હજુયે ભારતના ૩૦% ગામમાં ટીવી નથી તો શું થયું ,? ગામની દુકાને આ સેસેના તોરણીયા લટકતા જોવા મળશે જ..!! કોઈ પણ પ્રોડક્ટની જાહેરાતમાં ‘ હવે ૧ કે ૨ રૂપિયાના સેસે માં પણ ઉપલબ્ધ “ આ લાઈન અચૂક જોવા કે વાંચવા મળશે જ ..!! સેસે કે મીની પેકેટે આપણી રોજબરોજની દુનિયા એકદમ બદલી નાખી છે એમ કહી શકાય , ઇઝીલી અવેલેબલ એનીથિંગ , સાચવવાની કોઈ માથાકૂટ નહિ અને યુઝ એન્ડ થ્રો અને એ પણ ઓછા રોકાણમાં – એ આ છોટા પેકેટનો બડો ધમાકો કહી શકાય .અનબ્રાન્ડેડ ઉત્પાદકો તો વર્ષોથી નાના પેકેટોમાં વેપાર કરતા જ હતા પણ હવે લગભગ દરેક બ્રાન્ડેડ કંપનીઓ આ છોટા પેકેટ આપતી થઇ ગઈ છે અને ફાયદો એ થયો છે કે ગ્લોબલ બ્રાંડના નમકીન , નાસ્તા , ચોકલેટ થી લઈને અનેકો ચીજો નાના પેકમાં , ખિસ્સાને પરવડે એ ભાવમાં આપણે વાપરતા થઇ ગયા છે ….છોટા પેકેટનો આ બડો ફાયદો બન્ને બાજુ પુરજોશમાં થઇ રહ્યો છે …!!!!

ઠંડક :

સાબુ , શેમ્પુ , ઓઈલ કે નાસ્તા – બિસ્કીટ જ શું કામ હવે તો મોબાઈલ ડેટા પણ ૧૦-૫૦ રૂપિયા કે ૧ થી ૧૫ દિવસ સુધીના સેસે પ્લાન ( છોટા પેકેટ ) માં મળતા થઇ ગયા છે ….!!!!

  • અજય ઉપાધ્યાય ( ‘ નમસ્કાર ગુજરાત ઓસ્ટ્રેલીયા ” મંથલી – કોલમ “પરબ ” ઓગષ્ટ ૨૦૧૮ ).

“ સ્ટ્રીમીંગ નાવ “ : શોર્ટ ….સચોટ અને બિન્દાસ્ત મનોરંજન .!!!!!

Featured

“ સ્ટ્રીમીંગ નાવ “ : શોર્ટ ….સચોટ અને બિન્દાસ્ત મનોરંજન .!!!!!

શાહરૂખખાન ….રાધિકા આપ્ટે ….સુશાંતસિંહ રાજપૂત ….વિદ્યા બાલન …સૈફઅલી ખાન ……..ઇમરાન હાશમી …કરિશ્મા કપૂર …..એન્ડ મેની મોર ….!!! આ બધા ઓલરેડી સિલ્વર સ્ક્રીનના ચમકતા સિતારા તો છે જ , ઈનફેક્ટ શાહરૂખ ને વિદ્યા જેવા તો ઓલરેડી સુપરસ્ટાર છે જ છતાં પણ આ લોકોને સિલ્વર સ્ક્રીન સિવાય પણ નાના પડદે ચમકાવવાનો મોહ લાગ્યો છે …અને એનું કારણ છે શોર્ટ , સચોટ અને બેધડક વાતો કહેતી વેબ-સીરીઝીસ ….!!! જી હા શાહરૂખ તો આમેય નાના પડદા થી જ મોટા પડદે આવેલો છે એટલે એના માટે તો બેક ટુ પેવેલીયન જ કહેવાય , જો કે શાહરૂખ પોતે તો વેબ સીરીઝમાં એક્ટિંગ નથી કરવાનો પણ એના બેનર નીચે એક વેબ સીરીઝનું નિર્માણ કરવા જઈ રહ્યો છે કે જેમાં ઇમરાન હાશમી મેઈન લીડ રોલ ભજવશે … આ વેબ સીરિઝ વાર્તા ‘ ધ બોર્ડ ઓફ બ્લડ પર આધારિત હશે. જેમાં ઇમરાન હાશ્મી મુખ્ય રોલમાં જોવા મળશે. ઇમરાન કબીર આનંદનું પાત્ર ભજવતો જોવા મળશે.!!! રીપોર્ટ તો એવા છે કે વિદ્યા બાલન એક વેબ સીરીઝમાં ઇન્દિરા ગાંધી બનીને આવી રહી છે …!!

સમય સમય મુજબ દર્શકોને બાંધી રાખવા કે પોતાની તરફ ખેચવા માટે મનોરંજનના નવા નવા આયામો વિકસતા રહેતા હોય છે , વેબ સીરીઝ આમાનું એક લેટેસ્ટ અને અત્યારના સંજોગોમાં અતિ લોકપ્રિય અને બળકટ માધ્યમ છે . સાસ – બહુ ના બોરિંગ ડ્રામામાંથી દર્શકોને ઉબકા આવવા લાગ્યા હતા એનો લાભ લઈને વેબસિરીઝે દર્શકોમાં પોતાનું આગવું સ્થાન જમાવી લીધું છે . વેબસીરીઝમાં કહેવાતી વાર્તાઓ અમુક અંશે ફિકશનલ જરૂર છે પણ ઓરીઝનલ અને નેચરલ નજર આવે છે , વેબસિરીઝની વાર્તાઓ ઓવર ડ્રામાથી દુર અને રજુઆતમાં ક્રિસ્પ લાગે છે એનું કારણ છે વેબ સીરીઝના કલાકારોની નેચરલ એક્ટિંગ અને ખાસ તો મેકઅપના થથેડા સિવાય રજુ થતી અસલ લાગતી કાલ્પનિક વાર્તાઓ ..!!!! ખાસ કરીને રજુઆતની છૂટછાટને લીધે બોલ્ડ કન્ટેન્ટ પીરસી શકતી વેબસીરીઝ યુવા દર્શકોમાં ખાસ અને આગવું સ્થાન જમાવી ચુકી છે . ફિલ્મના બે કે ત્રણ કલાકમાં કહી ના શકાય એવી વાર્તા કે પછી સેન્સરની આંટીઘુંટીમાં પડ્યા વગર વાત કહેવી હોય તો વેબ્સીરીઝ છે બેસ્ટ ઓપ્શન ….!!!!

શુશાન્સિંહ રાજપૂતને જ લઇ લ્યો ને ….આમ તો શુશાંત એમ.એસ.ધોનીની હીટ બાયોપિક પછી મોટો સ્ટાર ગણાય છે . નવેમ્બરમાં એની સૈફની છોરી સારા સાથે કેદારનાથ રજુ થઇ રહી છે પણ શુશાંતને પણ વેબસીરીઝનું માધ્યમ ગમી ગયું છે . ૫૪૦ બીસી થી લઈને ૨૦૧૫ સુધીના ૨૦૦૦ વર્ષના સમયગાળામાં થઇ ગયેલી ભારતની હસ્તીઓ પરની આ વેબસીરીઝ્માં શુશાંત ચાણક્ય , ટાગોર , કલામ જેવા લોકોની જીવનયાત્રા કહેવા માટે અલગ અલગ ૧૨ પાત્રોમાં નજરે પડશે …!! દર્શકોને તો બખ્ખા જ છે …!! તો સર્જીકલ સ્ટ્રાઈક પર ઓલરેડી લેટેસ્ટ હોટ અને હીટ વિક્કી કૌશલના રોલવાળી ફિલ્મ ‘ ઉરી ‘ તો બની જ રહી છે પણ બિરલા ગ્રુપની વેબ સીરીઝ કંપની દ્વારા ‘ ઇન્ડીયા સ્ટ્રાઈક – ૧૦ ડેય્સ “ નામે વેબ્સીરીઝ પણ બની રહી છે ..!!

અત્યારે નેટફ્લીક્સ , હોટસ્ટાર અને એમેઝોન વેબસીરીઝ્ના ક્ષેત્રમાં અગ્રેસર છે પણ તમે યુટ્યુબ કે એકતા કપૂરના બાલાજી એએલટી પર અનેકો વેબ્સીરીઝ જોવા મળશે . ૨૦૧૪માં આવેલી પહેલી વેબ્સીરીઝ ‘ પરમેનન્ટ રૂમમેટ “ ની સફળતાથી વેબ્સીરીઝ્ની સીરીઝો શરુ થઇ ગઈ ટીવીના એકને એક ઘીસાપીટા મનોરંજનથી યુવા દર્શકવર્ગ ઉબકી ગયો છે એવામાં વેબસીરીઝની આ નાની નાની ફૂલઝડીઓ યુવા દર્શકોમાં મનોરંજનની ફુહાર લઈને આવી છે . અને આ તો ઓનલાઈન છે એટલે ગમે ત્યારે , ગમે ત્યાં અને ગમે એટલા સમય માટે જોઈ શકાય છે અને આ જ આનો સૌથી મોટો પ્લસ પોઈન્ટ છે ..!! અને બીજું કે દુનિયાભરનું કન્ટેન્ટ તમારા મોબાઈલ કે લેપ્પીમાં હાજર છે . તમે પાકિસ્તાની , કોરિયાઈ , જાપાનીઝ કે મરાઠી , પંજાબી કે પછી યુરોપિયન કોઈ પણ લેન્ગવેજમાં ગાજેલી અને વખણાયેલી આ છોટી છોટી સીરીઝો આસાનીથી અને આરામથી જોઈ શકો છો . યુવાનોને આ વધુ માફક આવી ગયું છે . અને સામે છેડે વેબસીરીઝ્ના નિર્માતાઓ અને કલાકારો પણ એક થી કે ચડિયાતા વિષયો સાથે મનોરંજન પીરસી રહ્યા છે અને એ પણ બેધડક અને બેરોકટોક ….!!!

જો કે આ બેરોકટોકને લીધે વિવાદો પણ એટલા જ થાય છે . એટલે જ ‘ ઇટ્સ નોટ સિમ્પલ ‘ સિરીઝની નાયિકા સ્વરાં ભાસ્કર બીજી સીઝન માટે તૈયારી કરતા કહે છે કે આમાં સેન્સર બોર્ડ ઇન્વોલ્વ નથી એટલે કલાકારો છૂટથી અને રીયલ લાગતું કામ કરી શકે છે . વાત પણ સાચી છે કેમકે વેબસીરીઝ પ્યોરલી એક્ટિંગ પર ડીપેન્ડ છે . મોટાભાગની સફળ વેબ્સીરીઝ એના કલાકારોના દમદાર અભિનયને લીધે અને બાકી જો બચા તો વાર્તાને લીધે લોક્પ્રિય થઇ છે એ હકીકત છે જ ..!! જેમ કે નેટફ્લીક્સ પર હમણા જ રીલીઝ થયેલી અને ત્રણ ભાગમાં આવેલી રાધિકા આપ્ટેની ‘ ઘોલ ‘ રીલીઝ થતા જ હીટ થઇ ગઈ છે . ‘ ઘોલ ‘ માં હોલીવુડ ફિલ્મોમાં જોવા મળે એવા વિઝ્યુલ છે તો નેટફ્લીક્સ પર જ જુલાઈમાં રીલીઝ થયેલી સૈફને ચમકાવતી ‘સૈક્રેડ ગેમ્સ ‘ પછી રાધિકાની આ સીરીઝ વધુ ચર્ચિત છે . તો મુંબઈના બહુચર્ચિત કોલા કમ્પાઉન્ડ કાંડ પર એકતા કપૂર બાલાજી એએલટી પર ‘ હોમ ‘ નામે વેબ્સીરીઝ લાવી રહી છે જેમાં અનુ કપૂર અને સુચિત્રા મેઈન રોલમાં છે કે જેમાં બિલ્ડરની ભૂલોને લીધે તોડી પડાવવા જઈ રહેલી સોસાઈટીને બચાવવા માટે સંઘર્ષ કરતા લોકોની વાત છે .

વેબ્સીરીઝનો જાદુ એટલો બધો છે કે લગભગ બધાને આમાં કામ કરવું છે પછી ચાહે એ નિર્માતા તરીકે કે પછી કલાકાર તરીકે. શાહરૂખની વાત તો આગળ કરી જ પણ એ સિવાય શ્રધ્ધા કપૂર પણ વેબ સીરીઝના આંગણે પગ માંડવા તૈયાર છે તો બહુચર્ચિત રાધે માં પણ એક વેબ સીરીઝ “ રાહ દે માં “ માં આવી રહ્યા છે ..!! તો ડાયરેક્ટર ઈમ્તીઆઝઅલી અને કારણ જોહર પર ડીજીટલ પ્લેટફોર્મ માટે કશું બનાવવાની વેતરણમાં છે . તો ફિલ્મ “ સંજુ “ માં ના કહેવાયેલી સંજય દત્તની લાઈફ પર એક વેબ સીરીઝ બની રહી છે . હીટ ફિલ્મ “ બાહુબલી “ ની શીવગામી પર ૧૦ હપ્તાની એક વેબ્સીરીઝ બની રહી છે જેમાં શીવગામીના પૂર્વ જીવનની વાત હશે …!! ‘ કાંટા લગા “ ગીતથી રાતોરાત હીટ થઇ ગયેલ શેફાલી જરીવાલા બાલાજીની કોમેડી વેબ સીરીઝ ‘ બેબી કમ ના ; માં શ્રેયસ તલપદે અને ચંકી પાંડે સાથે જોવા મળશે .

વેબસીરીઝ મનોરંજનનો નવો ખજાનો છે અને હીટ એટલા માટે છે કે એક તો એને સેસરનો કોઈ બાધ નથી એટલે જે બતાવવું હોય તે બતાવી શકે છે , બીજું કે સામજિક બંધનોને પાર કરીને અલગ વાત કહી શકે છે. આજકાલની વેબસિરીઝોમાં નગ્નતા , ધાર્મિક મતભેદો , લૈંગિક સંબંધો , સેક્સ , હત્યા સહીત બધું જ જોવા મળે છે અને ટીવી કે ફિલ્મોની સેન્સરશીપથી ઉબકી ચુકેલા દર્શકો માટે આ આંચકાની સાથે સાથે કુછ હટકે મનોરંજન છે . અસલમાં વેબસીરીઝ તમારા વિચારો બદલવાની ક્ષમતા ધરાવે છે અને એનું કારણ બેઝીઝક કહેવાતી વાર્તાઓ છે . ચોક્કસપણે વેબસીરીઝ સિનેમા અને ટીવીના મુકાબલે શશક્ત માધ્યમ સાબિત થઇ રહ્યું છે અને આવનારો જમાનો એનો જ છે …!!

પ્લેયર અનનોન’સ બેટલગ્રાઉન્ડ ..!!!!!

Featured

પ્લેયર અનનોન’સ બેટલગ્રાઉન્ડ ..!!!!!

“ અરે જો જો પેલા ઝાડ પાછળ કોઈ લાગે છે “…” શાંતિ રાખજે , આ ટેંક પાછળથી જ નીકળશે “….’ અરે યાર ત્યાં નહોતું જવાનું , ક્યારનો કહું તો છું “…..’ શાબાશ….હવે ગન બદલાવી નાખ “….’ અરે યાર હું તો મરી ગયો ..”….” કાર પડી છે ત્યાં ઘર પાસે , જલ્દી લઇ લે ..”….” સાચવજે . ૩ જણાને મેં ગોડાઉનમાં જતા જોયા ..”….” ત્યાંથી જ નીકળવાના ….શાંતિ રાખ “…..જો કોઈને કાનમાં ભૂંગળા (ઈયરફોન યુ કનો ) ભરાવીને , મોબાઈલ પર આંગળા મરોડતા મરોડતા સાથે સાથે આવા ચિત્ર-વિચિત્ર ઉદ્ગારો કાઢતા જુઓ તો સમજી જજો કે ભાઈશ્રી કે બેનશ્રી આજની હીટ અને મોબાઈલ ગેમ પ્રેમીઓમાં ઓલમોસ્ટ એડીકશન થઇ ગયેલી ‘ પીયુબીજી ‘ ગેમ રમે છે ….!! મોબાઈલ , એક્શ્બોક્ષ અને પીસી પર અત્યારની આ હીટ ગેમ એટલી હીટ છે કે આખાયે જગતમાં આનો ભયંકર ક્રેઝ છે અને ક્રેઝ એટલો કે રાતના ૨ – ૩ વાગ્યા સુધી મોબાઈલની સ્ક્રીન કે પીસીની સ્ક્રીન પરથી રમનારની આંખો અને ઓફકોર્સ આંગળા જરાય ચસકતા નથી …!!!!!

‘ પીયુબીજી ‘ નામ થોડું વિચિત્ર લાગે છે પણ એક્ચ્યુલી આ ગેમના સંપૂર્ણ નામ “ પ્લેયર અનનોન’સ બેટલગ્રાઉન્ડ ‘ શોર્ટ ફોર્મ છે . આટલું લાંબુ નામ તો ક્યાંથી બોલાય એટલે રમતવીરોએ આને કરી નાખ્યું ટૂંકું ને ટચ ..યાની કી ‘ પીયુબીજી ‘ !!!!! જો કે આ ‘‘ પીયુબીજી ‘ ને જનરલ ભાષામાં તો રમતવીરો ‘ પબ્જી ‘ તરીકે જ ઓળખે છે ..!! જો કે નામ મેં ક્યા રખ્ખા હૈ જેવી વાત આ અતિ એડેકટીવ ગેમને બરાબર લાગુ પડે છે . આમ તો ‘ પીયુબીજી ‘ આજકાલની માર્કેટમાં નથી જ . ગયા વર્ષે માર્ચમાં વિન્ડોઝ પ્લેટફોર્મ પર બીટા પ્રોગ્રામ તરીકે રીલીઝ થયેલી આ હોટ અને હીટ ગેમ રિલીઝના લગભગ ૯ મહિના પછી ડીસેમ્બર ૨૦૧૭મા ફુલ્લી અને ઓફિસીયલી રીલીઝ કરવામાં આવેલી અને બીટા અને ઓફિસિયલ વર્ઝન બંનેના ક્રિટિકસોએ ખુબ વખાણ કરેલા એનો જ પ્રતાપ હતો કે રીલીઝ થતા વેત જ એ એટલી બધી સફળ થઇ કે એક જ મહિનામાં ‘ પીયુબીજી ‘ ની ઓફીશીયલ લગભગ ૨૦ લાખ કોપી વેચાઈ ગયેલી અને આ તો હજુ ગેમિંગ જોન અને પીસી ગેમ્સ માટે વેચાયેલી કોપીઝની સંખ્યા હતી .મોબાઈલ વર્ઝન બહાર પડ્યા પછી તો હજુ ‘ પીયુબીજી ‘ સફળતાના અનેરા શિખરો સર કરવાની હતી ..!!

રમત અને રમતનું ફોરમેટ બહુ સરળ છે અને આ જ આ ગેમની અધધધ સફળતાની ચાવી છે . ગેમ શરુ થતા જ સો જેટલા ખેલાડીઓ ( રમનારાઓ ) અંદાજે ૮ x ૮ કિમીના મેપવાલા ટાપુમાં પ્લેનમાંથી એરડ્રોપ થાય છે અને પછી થાય છે દુશ્મનોને ફૂંકવાની ઘાતક પણ અક્કલ માંગતી રમત ..!! ખાલી હાથે ઉતરેલા ખેલાડી પહેલા તો ટાપુ પર ઉતરતા જ હથિયાર , કપડા, દારૂગોળો , વાહનો વગેરેની શોધ કરે અને પછી માંડે દુશ્મનોને શોધવા – ફૂંકવા !!! જો એમ કરતા પોતે ફૂંકાય જાય તો પછી ટીમના બીજા મેમ્બરો રમતા હોય એ જોયા કરવાનું અને એમને દુશ્મનો ક્યાં ક્યાં છે એની માહિતી આપતી રહેવાની ..!!! જો કે તમે પોતાની સેપ્રેટ ગેમ સ્ટાર્ટ કરી શકો પણ મોટાભાગે ટીમને હેલ્પ કરવામાં મજા આવે …!! અમુક સમયે પ્લેગ્રાઉન્ડ મતલબ કે રમવાનો એરિયા નાનો થતો જાય એટલે ખેલાડીએ ફરજીયાત મેપમાં બતાવાતા પ્લેએરિયામાં જ રહેવું અને રમવું પડે ….બહાર રહ્યા તો ગયા જીવથી …!!!! ‘ પીયુબીજી ‘ એકલા પણ રમી શકો અને ૪ કે ૫ લોકોની એક ટીમ બનાવીને પણ રમાય . જો કે મોટાભાગે યારો-દોસ્તો સાથે ટીમ બનાવીને જ રમાય છે અને યારો દોસ્તો ના હોય તો બીજાની ટીમમાં જોઈન થઈને પણ રમાય . ‘ પીયુબીજી ‘ માં મજાની વાત એ છે કે અહી કોઈ દુશ્મન નથી …આઈ મીન તમે જેને મારો છો એ લોકો પણ એક્ચ્યુલી તો તમારી જેમ જ ઓનલાઈન ‘ પીયુબીજી ‘ રમતા રમતવીરો જ છે . અને આમેય ‘ પીયુબીજી ‘ નો મોટો છે ‘ લાસ્ટ મેન સ્ટેન્ડિંગ ઈઝ ધ વિનર “ મતલબ કે જીવસટોસટની લડાઈમાં જે છેલ્લે સુધી જીવતો રહી જાય એ વિનર અને વિનર ને મળે શું ? તો કહે કે છેલ્લે જે જીતી જાય મતલબ કે લડાઈમાં જીવતો રહી જાય એને માટે સંદેશો મળે ‘ વિનર વિનર ચીકન ડીનર ‘ યાની કે આજે તું ચીકન ડીનર કરી શકશે . !!!! ઇન સિમ્પલ ‘ યુ વોન ‘…!!!!

દરેક બેટલ રોયલ ગેમ અથવા તો ટીમ બનાવીને ફાઈટ કરવાની ગેમમાં હોય છે એમ આમાં પણ અનેકવિધ હથિયારોની ભરમાર છે , શ્વાસ અટકી જાય એવા દિલધડક ચેસિંગ છે , રફતાર છે , આકર્ષક લોકેશનવાળા ફીચર્સ છે , રોમાંચ છે અને ખાસ તો સામેવાળાને મારવાની અને જીતવાની સદીઓ પુરાની મનુષ્યની આકાંક્ષાનું પ્રતિબિંબ છે ..!! આમ તો વિન્ડોઝ અને એક્શબોક્ષમાં રીલીઝ થયેલી અને સુપરહીટ થયેલી ‘ પીયુબીજી ‘ જ્યારથી મોબાઈલમાં બે વર્ઝનમાં રજુ કરાઈ છે ત્યારથી એની સફળતાનો ગ્રાફ વધુ ઉંચે ચડ્યો છે અને અત્યારે એ મોબાઈલ ગેમની ટોપ ફાઈવ ગેમમાં સામેલ થઇ ગઈ છે . જો કે મોબાઈલ પ્લેટફોર્મને લીધે ઓરીઝીન્લી રીલીઝ્ડ ‘ પીયુબીજી ‘ ના અમુક ફીચરમાં ફેરફાર કરવામાં આવ્યો છે છતાં પણ મોબાઈલમાં લોડેડ ‘ પીયુબીજી ‘ ઓરીઝીન્લ ‘ પીયુબીજી ‘ ની બરાબર ખરી ઉતરે છે જો કે પીસી પર રમવા કરતા મોબાઈલ પર ‘ પીયુબીજી ‘ રમવામાં થોડી ટફ પડે છે છતાં પણ એટલી લોકપ્રિય બની ગઈ છે કે એકસાથે રમતા ખેલાડીઓની બાબતમાં ‘ પીયુબીજી ‘ એ વર્લ્ડ રેકોર્ડ બનાવી લીધો છે . સમગ્ર જગતમાંથી ૧૩,૪૨, ૮૫૭ પ્લેયરો એકસાથે ‘ પીયુબીજી ‘ રમતા નોંધાયેલા છે …!!! મજાની વાત એ છે કે ‘ પીયુબીજી ‘ ની આટલી તોતિંગ સફળતા માટે એના મેકર્સ બ્લુહોલ સ્ટુડિયોએ જાહેરાતનું એક ફળિયું પણ નથી ખર્ચ્યું પણ ‘ પીયુબીજી ‘ માઉથ ટુ માઉથ પબ્લીસીટીને લીધે જબરદસ્ત હીટ થઇ ચુકી છે …!!!

ગેમની દુનિયામાં અને ખાસ કરીને મોબાઈલ ગેમની દુનિયામાં સમયાંતરે ‘ પીયુબીજી ‘ જેવી ગેમ્સ તહેલકો મચાવતી જ રહેતી હોય છે . યાદ છે ને આજથી બેએક વર્ષ પહેલા પોકેમોન ગો નો ક્રેઝ કે પછી ટેમ્પલ રન કે પછી આવી જ બીજી ગેમ ‘ ફોર્ટનાઈટ રોયલ બેટલ ‘ હોય રમનારાઓને નવીન અને જુદી પડતી ગેમ્સનું હમેશા આકર્ષણ રહ્યું જ છે . ‘ પીયુબીજી ‘ ની સફળતા આ આંકડાઓથી વધુ સારી રીતે સમજી શકાશે કે અત્યાર સુધીમાં ‘ પીયુબીજી ‘ની ૫ કરોડ કોપીઓ વેચાય ચુકી છે . ‘ પીયુબીજી ‘ ના અંદાજે ૯ કરોડ જેટલા ડેય્લી પ્લેયર્સ છે અને અત્યાર સુધીમાં અંદાજે ૪૦ કરોડ લોકો આ ખેલ ખેલી ચુક્યા છે . મોબાઈલમાં તો એ ફ્રી જ છે એટલે લગભગ ૧ કરોડ લોકો ત્યાં લડાઈ લડી ચુક્યા છે . ‘ પીયુબીજી ‘ લગભગ ૩ જીબી જેટલી જગ્યા રોકતી ગેમ હોવાથી લો-એન્ડ મોબાઈલમાં પણ સરળતાથી રમી શકાય એટલે હવે એનું લાઈટ વર્ઝન કે જે ઓછી રેમવાળા મોબાઈલમાં અને ઓછી મેમરી યુઝ કરીને રમી શકાય એવું બજારમાં આવી ગયું છે જો કે ઇન્ડીયામાં એ હવે આવશે . ઓકે ‘ પીયુબીજી ‘ રમશો તો જ એની સાચી મજા આવશે એટલા માટે હિયર ઈઝ સમ ટીપ્સ બીફોર યુ પ્લે ‘ પીયુબીજી ‘ ..!! હમેશા તમારા કન્ટ્રોલને કસ્ટમાંઈઝ કરતા રહો , મેપનો બરાબર ઉપયોગ કરો , નવું સર્કલ આવે તો કુદી ના પાડો પણ પહેલા એરિયાનો અભ્યાસ કરો , હમેશા પ્લે-એરિયામાં જ રહો , બીજા ખેલાડીઓ રમતા હોય એના પર પુરતું ધ્યાન આપો ,કોઈ બિલ્ડીંગમાં દાખલ થાવ તો હમેશા ડોર બંધ કરો , તમારા પર એટેક થાય તો બને એટલું ફાસ્ટ દોડો કે જાતને પત્થર કે બીજા કોઈ પાછળ સંતાડો , તમારી હેલ્થ ૧૦૦% જળવાઈ રહે એ માટે હેલ્થ ડ્રીંક , દવાઓ વગેરે લેતા રહો …વગેરે વગેરે …!!! ‘ પીયુબીજી ‘ વિષે આટલું વાંચ્યા કે જાણ્યાં પછી રમતા પેહેલા એ ખાસ યાદ રાખજો કે એક સ્ટેપ કે લેવલ ક્લીયર કરતા ઓછામાં ઓછી અર્ધી કલાક તો લાગી જ જશે અને આ ગેમ ભયંકર એડેકટીવ છે એટલે એકવાર રમવાનું ચાલુ કર્યા પછી ક્યા અટકવું એના માટે મક્કમ રહેજો……!!!! હેપ્પી ગેમિંગ …!!!

– અજય ઉપાધ્યાય ( ગાંધીનગર સમાચાર – કોલમ ” રઝળપાટ ” ૨૬ ઓગષ્ટ ૨૦૧૮ )

લૌટ કર આઉંગા , કુચ સે કયું ડરું ..!!!!!

Featured

લૌટ કર આઉંગા , કુચ સે કયું ડરું ..!!!!!

૧૯૫૭ની બીજી લોકસભામાં તત્કાલીન રાષ્ટ્રપતિ એસ. રાધાકૃષ્ણન સાથે નવા સાંસદોનો પરિચય કરાવવામાં આવી રહ્યો હતો . એક પાર્ટીના માત્ર ચાર જ સાંસદ હતા . જ્યારે રાષ્ટ્રપતિ મહોદયને કહેવામાં આવ્યું કે આ ચાર સાંસદો ભારતીય જનસંઘ નામની પાર્ટીના છે તો રાષ્ટ્રપતિ કહે આવું કોઈ નામ મેં સાંભળ્યું જ નથી !!!! એ ચાર સંસદોમાં એક હતા અટલ વિહારી વાજપેયી , અને એ ચાર સાંસદોવાળી પાર્ટી આજે આટલા વર્ષો પછી બીજેપી બનીને ઓલમોસ્ટ ૩૦૦ સાંસદો સાથે દેશના સત્તાસ્થાને છે ..!!!  જો કે આ ‘ વિહારી ‘ અને ‘ બિહારી ‘ બાબતે એમણે એકવાર પુરા દેશ સમક્ષ સ્પષ્ટતા કરેલી કે હું અટલ તો છું પણ બિહારી નથી ..!!! લોકોને લાગ્યું કે અટલજી બિહારનું અપમાન કરે છે પણ એમણે ચોખવટ કરેલી કે જેમ વસંત-વિહાર , કૃષ્ણ-વિહાર હોય છે એમ જ મારા પિતાનું નામ વિહારી છે અને આમ હું છું અટલ વિહારી …!!! જો કે એ અલગ વાત છે કે આપણે એમને અટલ બિહારી બાજપેઈ તરીકે જ ઓળખીએ છીએ અને એનો એમણે જિંદગીભર કોઈ વાંધો નહોતો લીધો …!!!!

જો કે અટલજી વાંધાના માણસ હતા જ નહિ . કદાચ ભારતીય રાજનીતિમાં આ એક જ એવા નેતા હતા જેને વિરોધીઓ પણ ઈજ્જત આપતા , એમનું સમ્માન જાળવતા . અને સામે પક્ષે અટલજીએ લગભગ પાંચ દસકાથી વધુની પોતાની રાજનીતિક સફરમાં કોઈને વ્યક્તિગત નિશાના પર લીધા હોય એવો કોઈ દાખલો મોજુદ નથી . ઈનફેક્ટ શરૂઆતમાં અટલજી લોકસભામાં બેકબેન્ચર વધુ હતા , નો ડાઉટ એમના જેટલો શ્રેષ્ઠ વક્તા કોઈ હતું નહિ એટલે તો નેહરુએ એક વાર ભારતની મુલાકાતે આવેલા બ્રિટીશ પ્રધાનમંત્રીને અટલજી સાથે મેળવતા એમ કહેલું કે ‘ આમને મળો , આ વિપક્ષના ઉગતા નેતા છે અને હમેશા લોકસભામાં મારી આલોચના કર્યા કરે છે પણ એમનામાં મેં ભવિષ્યનો સારો દેશનેતા દેખાય છે “..જો કે લોકસભામાં પહેલી જ વાર બોલેલા અટલજીનું ભાષણ સાંભળીને નેહરુજીએ સ્પષ્ટ કહેલું કે મને અટલજીમાં દેશનો ભાવી વડાપ્રધાન દેખાય છે ..!! અને અટલજીએ નેહરુનું આ વાક્ય એક વાર નહિ …બે વાર નહિ પણ ત્રણ વાર વડાપ્રધાન બનીને સાચું પાડેલું ..!! એ વખતની રાજનીતિની આ ગરિમા હતી ..!!

અને ગરિમા પણ કેવી કે અટલજી પોતાના વિરોધીઓ પર રોચક ટીપ્પણી પણ કરતા કે જેનાથી એમને જે કહેવું હોય તે કહેવાય જાય અને સામેની વ્યક્તિને કડવું પણ લાગે નહિ . ‘ અપમાનો મેં સમ્માનો મેં , ઉન્નત મસ્તક ઉભરા સીના ..પીડાઓમે પલના હોગા કદમ મિલાકર ચલના હોગા “ અટલજી આખી જિંદગી આ મૂળ મંત્રને વળગી રહ્યા . જનસંઘની ચાર સીટોથી ભાજપ સરકાર અને દેશના લોકોના લોકપ્રિય નેતા તરીકેની એમની સફર હમેશા પડકારો અને પડકારોના સામના માટે યાદ રહેશે . ખાસ તો વિપક્ષી પાર્ટીઓને એકજુટ કરીને પાંચ વર્ષ સુધી સરકાર ચલાવવાનું શ્રેય એમને જ જાય છે નહીતર એમના પહેલા પણ આવી કોશિશો થયેલી પણ પુરા પાંચ વર્ષ સુધી ચાલેલી નહિ . અટલજીની રાજનીતિક સ્વીકૃતતા વ્યાપક એટલા માટે હતી કે અટલજી પોતાના વિરોધીઓને વિરોધી ક્યારેય માનતા નહિ , એ હમેશા કહેતા કે આ રાજનીતિક વિરોધ છે અને એટલે જ ભાજપ તો ઠીક પણ કોંગ્રેસ કે બીજી પાર્ટીઓમાં એમના પ્રશન્શકો અનેકો હતા . જ્યારે નરસિંહરાવ જનતા સરકારના પ્રધાનમંત્રી હતા ત્યારે સયુંકત રાષ્ટ્ર ( યુનો ) માં ભાષણ આપવાની તક વિદેશમંત્રી અટલજીને એમણે જ આપેલી અને યુનોમાં હિન્દીમાં ભાષણ આપીને અટલજી છવાઈ ગયેલા . અટલજીને મતે એ ભાષણ એમણે આપેલા બધા ભાષણોમાં શ્રેષ્ઠ હતું .

આજે નવી સરકાર આવતા જ જૂની સરકારના પ્રોગ્રામો – યોજનાઓ પર પ્રશ્નાર્થ લાગી જાય છે પણ અટલજી એમાં અપવાદ હતા . પોતાની બુક ‘ ટર્નીંગ પોઈન્ટ ‘ માં આપણા લોકલાડીલા એ.પી.જે.અબ્દુલ કલામ લખે છે કે નરસિહરાવ ૧૯૯૬મા પરમાણુ પરીક્ષણ કરવા માંગતા હતા , બધી તૈયારીઓ પણ થઇ ગયેલી પણ નરસિહરાવ ચૂંટણી હારી ગયા અને અટલજી સત્તા પર આવ્યા . નરસિંહરાવ એ વખતે પરમાણુ કાર્યક્રમના ઇન્ચાર્જ અબ્દુલ કલામ સાહેબને લઈને અટલજીને મળ્યા અને ખાતરી માંગી કે સત્તામાં આવ્યા પછી પણ તેઓ પરમાણુ કાર્યક્રમ ચાલુ રાખશે. જો કે ૧૯૯૬માં અટલજીની સરકાર તો ૧૩ જ દિવસમાં પડી ગઈ પણ ૧૯૯૮મા ફરીથી સત્તા પર આવતાવેત જ અટલજીએ પરમાણુ પરીક્ષણ કરીને નરસિહરાવને આપેલી ખાતરી પાળી બતાવેલી .

વાજપેયી વિદેશનીતિના અચ્છા જાણકાર હતા જ ખાસ કરીને એમના કાર્યકાળ દરમ્યાન પાકિસ્તાન સાથે સંબંધો સુધારવાની પ્રક્રિયાને વેગ મળેલો . એમણે જ સંઘર્ષવિરામ , દિલ્હી-લાહોર બસ ,  ભારતીય ક્રિકેટ ટીમની પાકિસ્તાન ટુર જેવા કાર્યો કરેલા. માર્ચ ૨૦૦૪ માં પાકિસ્તાની ટુર પર જતી ભારતીય ટીમ સૌરવ ગાંગુલીની આગેવાનીમાં અટલજીને મળવા આવી તો અટલજીએ બેટ પર લખેલું કે “ ખેલ હી નહિ , દિલ ભી જીતીએ – શુભેચ્છાઓ “ જો કે અટલજીની પાકિસ્તાન સાથે સંબંધ સુધારવાની મંશા પર કારગીલ પ્રકરણે પાણી ફેરવી દીધેલું જો કે એ વખતે પણ એમણે દુનિયાના દેશોની ધમકીઓની પરવા કર્યા વગર લશ્કરને જંગની છૂટ આપેલી . અમેરિકાના પ્રમુખને તો એમણે પત્ર લખીને સ્પષ્ટ કહેલું કે અમને અમારી જમીન બચાવવાનો પૂરો હક્ક છે . એમના કાર્યકાળ કારગીલ વોર ઉપરાંત લાહોર સમીટ અને સંસદ પર આતંકી હુમલો અને ૨૦૦૨ના ગુજરાતના તોફાનો માટે હમેશા યાદ રહેશે . ખાલી વિરોધીઓને જ નહિ પણ પોતાના પક્ષના લોકોને પણ ચોખ્ખું પરખાવી દેવામાં અટલજી બિલકુલ વિચારતા નહીં . ગુજરાત તોફાનો વખતે અમદાવાદમાં ‘ મોદી રાજધર્મ નિભાયે ‘ કહેનાર વાજપેયી એ બાબરી ધ્વંશ વખતે પણ ‘ યે અચ્છા નહિ હુઆ ‘ કહીને પોતાન